4
Pasal Aꞌa Anaboran Bigi-tinanom
1 Pabalik na isab si Isa amanduꞌ ma bihing danaw Jalil. Landuꞌ aheka aꞌa bay patimuk pinaꞌan ni atagna, angkan iya paruwaꞌ aningkōꞌ ma bayanan bay palayo asal mainaꞌan. Inaꞌan isab sikatimukan saga aꞌa ma bihing tampe, ma gintanaꞌan. 2 Jari aheka pamanduꞌ eꞌ si Isa ma saga aꞌa inān, panduꞌ pamaralilan. Buwattitu pamanduꞌna, yukna, 3 “Pakale kam. Aniyaꞌ inān dakayuꞌ aꞌa pehēꞌ ni humana anaboran bigi-tinanom. 4 Pagsabodna itu, aniyaꞌ bigi-tinanom kaseheꞌ apakpak ni bihing lān. Sakali pinaꞌan saga manuk-manuk anittuk iya. 5 Aniyaꞌ isab bigi-tinanom kaseheꞌ apakpak ni kabatuhan arikiꞌ tanaꞌna. Bigi-tinanom inān alꞌkkas patomoꞌ sabab mbal alalom tanaꞌna. 6 Sagōꞌ pasilak paꞌin llaw, magtūy alūs ugbusna inān sampay alanos, sabab halam alalom gamutna. 7 Aniyaꞌ du isab bigi-tinanom apakpak ni tꞌngngaꞌ sagmot itingan. Makasubud paꞌin sagmot inān, magtūy kasembolan tinanom ati mbal magbuwaꞌ. 8 Na, ya bigi kaseheꞌ waꞌi apakpak ni tanaꞌ ahāp. Manjari saga bigi-tinanom itu patomoꞌ maka pasulig ati magbuwaꞌ ahāp. Aniyaꞌ batang kaseheꞌ amuwan buwaꞌ sarang-sarang, aniyaꞌ kaseheꞌ amuwan buwaꞌ aheka, maka aniyaꞌ isab kaseheꞌ amuwan buwaꞌ lumanduꞌan toꞌongan hekana. 9 Na,” yuk si Isa, “sasuku kam makakale, ikutunbi toꞌongan.”
Angkan si Isa Magparalilan Bang Amanduꞌ
10 Manjari itu, maglaꞌanan paꞌin katimukan aꞌa heꞌ, pasekot ni si Isa saga mulidna kasangpūꞌ maka duwa maka saga aꞌa kaseheꞌan bay mainaꞌan. Tinilaw iya eꞌ sigām pasal kissa bay pamaralilna ma sigām bang ai hatina. 11 Anambung si Isa, yukna, “Kaꞌam ilu kabuwanan pangitaꞌu boꞌ supaya tahatibi pasal kapagparinta Tuhan ma saga aꞌa sukuꞌna, ya halam pataꞌuna ni manusiyaꞌ kaseheꞌ. Saguwāꞌ saga aꞌa kaseheꞌan, ya ma luwasan, subay kinissahan saga kissa pamaralilan, 12 supaya sigām makasaliꞌ ni bay tasulat ma deyom Kitab, ya yuk-i,
‘Angꞌndaꞌ du sigām sagōꞌ mbal makaꞌndaꞌ.
Akale du sigām sagōꞌ mbal makahati.
Bang nggaꞌi ka buwattēꞌ, bay du sigām pabalik
magtaꞌat ni Tuhan boꞌ niampun dusa sigām.’ ”
Pamahati Pasal Aꞌa Anaboran Bigi-tinanom
13 “Na,” yuk si Isa ma sigām, “halam bahāꞌ tahatibi bay pamaralilku ma kaꞌam heꞌ? Bang heꞌ-i mbal tahatibi daka buwattingga eꞌbi angahati ma pamaralilan kamemon ya pamanduꞌku. 14 Ya aꞌa magsabod bigi-tinanom heꞌ, ya na aꞌa magnasihat palman Tuhan. 15 Maka saga aꞌa kaseheꞌan saliꞌ dalil lān bay kapakpakan bigi-tinanom inān. Pagkale paꞌin sigām ma palman Tuhan, magtūy pinaꞌan nakuraꞌ saitan angandagtuꞌ palman Tuhan ya patanom ma deyom atay sigām. 16 Saga aꞌa kaseheꞌan saliꞌ dalil tanaꞌ kabatuhan bay kapakpakan bigi-tinanom inān. Pagkale sigām ma palman Tuhan, magtūy tinaimaꞌ eꞌ sigām maka kinōgan sigām. 17 Sagōꞌ palman Tuhan itu halam bay anganggamut palalom ma deyom atay sigām, angkan pagiman sigām mbal anatas patꞌggol. Taꞌabut paꞌin sigām tꞌkkahan susa atawa nilaꞌat eꞌ pagkahi sigām ma sabab pameyaꞌ sigām ma palman Tuhan, magtūy sigām angꞌbba min pagiman sigām. 18 Saga aꞌa kaseheꞌan isab saliꞌ dalil tanaꞌ bay katomoꞌan sagmot itingan. Takale eꞌ sigām palman Tuhan, 19 saguwāꞌ abimbang pikilan sigām eꞌ kahālan deyom dunya itu. Ya na paꞌin ahalgaꞌ ma sigām pangaltaꞌ maka ai-ai kinanapsuhan. Jari palman Tuhan mbal amuwaꞌ ma deyom atay sigām, saliꞌ dalil tinanom bang kasembolan eꞌ sagmot. 20 Saguwāꞌ saga aꞌa kaseheꞌan saliꞌ dalil tanaꞌ ahāp. Takale eꞌ sigām palman Tuhan ati tinaimaꞌ eꞌ sigām. Jari magbuwaꞌ du palman Tuhan ma deyom atay sigām, saliꞌ dalil tinanom. Kaseheꞌan amuwan buwaꞌ sarang-sarang hekana, kaseheꞌan buwaꞌ aheka, maka kaseheꞌan isab amuwan buwaꞌ lumanduꞌan toꞌongan hekana.”
Palitaꞌan Tinambunan
21 Ahꞌlling isab si Isa ma sigām, yukna, “Aniyaꞌ bahāꞌ magpalitaꞌan boꞌ turunganna maka undam atawa patꞌnnaꞌna ma deyoꞌ kantil? Tantu mbal. Subay patꞌnnaꞌna ma diyataꞌ papaganna. 22 Bang itu niralil,” yukna, “ai-ai kamemon tinapukan ma buwattinaꞌan pinaluwas du ma sinosōng, maka ai-ai mbal tahati ma buwattinaꞌan tahati du ma sinosōng. 23 Sasuku kam makakale, ikutunbi toꞌongan.”
24 Yuk si Isa isab ma sigām, “Isbatunbi pahāp ai-ai takalebi sabab bang ahāp pangisbatbi ahāp isab palsukuꞌan ya pinaniyaꞌan kaꞌam, maka kinꞌnnopan lagiꞌ ma kaꞌam. 25 Hatina itu bang aꞌa aniyaꞌ kataꞌuna kinꞌnnopan giꞌ taꞌuna. Saguwāꞌ sai-sai mbal makahati, kinulangan lagiꞌ bay panghatina.”
Paralilan Pasal Kapasulig Bigi-tinanom
26 Amanduꞌ giꞌ si Isa, yukna, “Buwattitu isab pagparinta Tuhan ma manusiyaꞌ, ya dalilna saliꞌ bigi-tinanom sinaboran eꞌ aꞌa ma tanaꞌna. 27 Aubus paꞌin eꞌna anabod, atuli iya ma waktu sangom ati abatiꞌ waktu llaw boꞌ maghinang hinangna kaseheꞌ. Jari bigi-tinanom bay saboranna patomoꞌ maka pasuligan di-na, sagōꞌ mbal kinataꞌuwan eꞌ aꞌa inān bang buwattingga kasuligna. 28 Patomoꞌ asal bigi-tinanom pagka ma deyom tanaꞌ na, ati pasōng amuwan buwaꞌ. Tagnaꞌ pasahaꞌ, boꞌ anungkalling, boꞌ buwaꞌ atigumaꞌ na. 29 Pagtahak paꞌin buwaꞌ itu, magtūy pinakꞌttuꞌ eꞌ tag-dapu tanaꞌ sabab taꞌabut na waktuna.”
Paralilan Pasal Bigi-tinanom Landuꞌ Anahut
30 Amanduꞌ giꞌ si Isa, yukna, “Ai pamasaliꞌantam pagparinta Tuhan? Ai pamaralilantam? 31 Ya pagparinta Tuhan ma manusiyaꞌ,” yukna, “saliꞌ dalil dansolag bigi-tinanom arikiꞌ-dikiꞌ. Tagnaꞌ tinanom bigi itu ma deyom tanaꞌ anahut asal min bigi-tinanom kamemon ma deyom dunya. 32 Sagōꞌ pagtanom paꞌin, anomoꞌ du ati palabi heyana min tinanom kamemon. Paꞌaslag saga sangana, angkan pinaꞌan saga manuk-manuk angahinang pugaran ma sindunganna.”
33 Aheka saga paralilan buwattēꞌ bay pagguna eꞌ si Isa pagnasihatna ma saga aꞌa, ingga-ingga ya takannal eꞌ sigām. 34 Mbal iya amissala ma saga aꞌa kaseheꞌ bang nggaꞌi ka paralilan ya pamissalana. Sagōꞌ bang hal iya maka saga mulidna, pinahati eꞌna bissalana kamemon ma sigām.
Baliyu maka Goyak
35 Manjari itu ma llaw inaꞌan-i, boꞌ abay kohap na, ahꞌlling si Isa ma saga mulidna. “Sūng kitam,” yukna, “pauntas ni dambilaꞌ danaw eꞌ.” 36 Niꞌbbahan kahekaꞌan aꞌa inān ati paruwaꞌ saga mulid inān ni bayanan ya asal paningkōꞌan si Isa, ati binowa iya eꞌ sigām. Aniyaꞌ isab saga bayanan kaseheꞌ paꞌabay ma sigām. 37 Sakali itu aniyaꞌ hunus parugpak ni danaw inān. Sōng-sōng na sigām abuhaw sabab sinasaꞌ eꞌ goyak. 38 Boꞌ si Isa iya inaꞌan ma buliꞌ, atuli pasandig ma ūꞌan. Na, binatiꞌ iya eꞌ saga mulidna, yuk-i, “Tuwan Guru, mbal ka bahāꞌ asusa? Itiyaꞌ kitam song abuhaw!”
39 Jari punduk si Isa boꞌ yampa sohoꞌna baliyu maka goyak inān pahali. “Sarang na,” yukna ma danaw. “Patꞌddoꞌ ka!” Magtūy pahali baliyu maka tꞌddoꞌ toꞌongan danaw inān. 40 Yukna isab ma saga mulidna, “Angay kam tināw? Mbal giꞌ bahāꞌ kam angandol ma aku?”
41 Sagōꞌ sidda sigām sinōd tāw, angkan sigām magtilaw-tilawan di-sigām, yuk-i, “Sai bahāꞌ aꞌa itu? Minsan baliyu maka goyak ameyaꞌ du ma panohoꞌanna!”