7
Pangandol Kapitan ya Bangsa Rōm
1 Aubus paꞌin kamemon bissala si Isa itu ma saga aꞌa, pasōd iya ni deyom daꞌira Kapirnaum. 2 Na, aniyaꞌ mainaꞌan dakayuꞌ kapitan bangsa Rōm taga-sosohoꞌan kalasahanna. Asaki na sosohoꞌan itu, song na magkamamatay. 3 Makakale paꞌin kapitan pasal si Isa, magtūy aniyaꞌ pagmattoꞌahan bangsa Yahudi pinapinaꞌan eꞌna ni si Isa angamuꞌ pinauliꞌ sosohoꞌanna eꞌ. 4 Manjari pasampay saga pagmattoꞌahan inān ni si Isa boꞌ anganjunjung toꞌongan, yuk-i, “Patut subay tabangannu kapitan itu, 5 sabab amagay toꞌongan iya ma bangsatam Yahudi, maka iya ya bay magbaran anganggastuhan langgaltam.”
6 Jari ameyaꞌ si Isa ma sigām. Asekot paꞌin iya ni lumaꞌ, sinohoꞌ eꞌ kapitan saga bagayna amowahan si Isa lapal, yuk-i, “Tuwan, daꞌa ka amaluꞌug di-nu pasampay piꞌitu sabab mbal aku tōp amapiꞌitu kaꞌa ni lumaꞌku. 7 Bangsahan toꞌongan ka angkan pikilku in aku mbal tōp anampang kaꞌa magbaran. Sagōꞌ angalapal sadja ka minnilu ati kauliꞌan du sosohoꞌanku itu. 8 Minsan aku, biyaksa aku pinagbayaꞌan eꞌ aꞌa min diyataꞌanku maka aniyaꞌ isab sundalu pagbayaꞌanku. Bang sohoꞌku dangan pehēꞌ, pehēꞌ du iya. Bang sohoꞌku dangan piꞌitu, piꞌitu du iya. Damikiyanna bang aniyaꞌ pahinangku ma saga sosohoꞌanku, magtūy du nihinang eꞌ sigām.”
9 Pagkale paꞌin pahꞌlling kapitan inān eꞌ si Isa, ainu-inu iya. Jari palingiꞌ iya ni saga kahekaꞌan aꞌa ya paurul min buliꞌanna. Yukna ma sigām, “Hakaꞌanta kam, minsan ma deyom bangsatam Israꞌil, halam aku bay makabāk aꞌa buwattitu kosog imanna.” 10 Jari amoleꞌ na saga aꞌa bay sinōꞌ eꞌ kapitan. Pagtꞌkka sigām ni lumaꞌ, taꞌndaꞌ eꞌ sigām sosohoꞌan inān kauliꞌan na.
Anak Balu Dꞌnda Pinakallum eꞌ si Isa
11 Mbal atꞌggol minnaꞌan pehēꞌ si Isa ni dakayuꞌ kalumaꞌan niōnan Nain. Sineheꞌan iya eꞌ saga mulidna maka baꞌanan saga aꞌa kaseheꞌan. 12 Makasekot paꞌin iya ni lawang ya pasōran kauman inān, aniyaꞌ mainaꞌan saga aꞌa ananggung patay aꞌa, binowa paluwas ni pagkubulan. Lꞌlla ya amatay heꞌ, anak tunggal dakayuꞌ balu dꞌnda. Jari aheka aꞌa min kalumaꞌan inān bay pabunyug angubul. 13 Na, pagꞌndaꞌ paꞌin Panghūꞌ Isa ma dꞌnda itu, magtūy iya tꞌkkahan aseꞌ. Yukna ma dꞌnda inān, “Daꞌa ka anangis.” 14 Puwas eꞌ pasōng si Isa ni tanggungan boꞌ ntananna, angkan pahoggaꞌ saga aꞌa ananggung eꞌ. Ahꞌlling si Isa, yukna, “Otoꞌ, punduk ka!” 15 Magtūy allum pabalik aꞌa amatay heꞌ. Punduk iya maka eꞌna amissala, ati sinōngan iya eꞌ si Isa ni inaꞌna.
16 Sinōd tāw saga aꞌa mainaꞌan kamemon maka sinanglitan Tuhan eꞌ sigām, yuk-i, “Aniyaꞌ na nabi abarakat palahil piꞌitu. Makapiꞌitu na Tuhan anabangan kitam saga aꞌa sukuꞌna.” 17 Manjari ya habal pasal bay hinang si Isa itu pasaplag na paꞌin ma kaluhaꞌan lahat Yahudiya, sampay ma sakalibutna.
Panilaw eꞌ si Yahiya Magpapandi
18 Na, kahakaꞌan si Yahiya eꞌ saga mulidna pasal pakaradjaꞌan itu. Jari nilinganan eꞌna duwangan mulidna, 19 sinohoꞌ pehēꞌ ni Panghūꞌ Isa. Sinōꞌ sigā atilaw iya bang iya bahāꞌ bay pinagbissala piꞌitu ni dunya, atawa bang aniyaꞌ giꞌ saddī nilagaran. 20 Jari pagtꞌkka duwangan itu ni si Isa, yuk sigā, “Sinōꞌ kami piꞌitu eꞌ si Yahiya Magpapandi sabab aniyaꞌ tilawna ni kaꞌa. Kaꞌa bahāꞌ ya pinagbissala piꞌitu ni dunya? Atawa aniyaꞌ giꞌ saddī min kaꞌa subay lagaran kami?”
21 Na, ma waktu inaꞌan-i aheka aꞌa kauliꞌan eꞌ si Isa ya lamma maka saki sigām indaginis, maka aheka bay kapaluwasan saitan. Aheka isab saga aꞌa buta bay tapaꞌndaꞌna pabīng. 22 Manjari sinambungan eꞌ si Isa duwangan mulid si Yahiya heꞌ. Yukna, “Pabīng kam pehēꞌ. Hakaꞌinbi si Yahiya pasal ai-ai taꞌndaꞌbi maka takalebi maitu. Saga aꞌa bay buta makaꞌndaꞌ na. Aꞌa bay pengkaꞌ makalꞌngngan na toꞌongan. Aꞌa bay niꞌipul tapalanuꞌ na. Aꞌa bay bisu makakale na, maka aꞌa bay amatay tapakallum na pabīng. Sampay aꞌa kulang-kabus kanasihatan na lapal ahāp. 23 Aheya du kahāpan sasuku mbal magduwa-ruwa pikilanna ma aku.”
24 Makalaꞌan paꞌin minnēꞌ saga sosohoꞌan si Yahiya heꞌ, amissala si Isa ni kahekaꞌan aꞌa inān pasal si Yahiya. Yukna, “Ai bahāꞌ bay pihabi, ya angkan kam bay pehēꞌ ni lahat paslangan? Kabayaꞌanbi bahāꞌ angꞌndaꞌ dakayuꞌ aꞌa sapantun dansolag parang-parang, tabowa papꞌllay eꞌ baliyu? 25 Bang nggaꞌi ka heꞌ-i, ai bahāꞌ bay ndaꞌbi pehēꞌ? Aꞌa bahāꞌ magsinꞌmmek ahalgaꞌ? Maraiꞌ nggaꞌi ka, sabab bang aꞌa magsinꞌmmek buwattēꞌ maka magpalasahan toꞌongan, inaꞌan sigām ma deyom astanaꞌ. 26 Hakaꞌin aku toꞌongan bang ai bay ndaꞌbi pehēꞌ? Dakayuꞌ nabi bahāꞌ? Ahoꞌ, bꞌnnal nabi, sagōꞌ labi giꞌ min saga nabi kamemon. 27 Sabab si Yahiya itu bay pinagbissala ma deyom Kitab, ya yuk-i,
‘Itiyaꞌ sosohoꞌanku, yuk Tuhan.
Sohoꞌku iya parahū min kaꞌa,
boꞌ supaya sakapanna lān palabayannu.’
28 Hakaꞌanta kam,” yuk si Isa, “si Yahiya Magpapandi itu halam aniyaꞌ abangsa saddī min iya ma deyom binangsa manusiyaꞌ. Sagōꞌ sai-sai ma deyoman pagparinta Tuhan, minsan aꞌa areyoꞌ kapagaꞌana, alanga lagiꞌ min si Yahiya.”
29 Saga aꞌa kamemon bay akale toꞌongan ma si Isa, ya lagiꞌna saga magaꞌāꞌ sukay parinta. Angahoꞌ sigām in kahandak Tuhan asal abontol, ya angkan sigām bay pinandi taubat eꞌ si Yahiya. 30 Sagōꞌ saga aꞌa Parisi maka saga guru apanday ma saraꞌ agama, mbal bilahi pinandi taubat eꞌ si Yahiya sabab sinulak eꞌ sigām ya pamatꞌnnaꞌ Tuhan ma sigām.
31 Amissala giꞌ si Isa, yukna, “Ai pamaralilanku saga aꞌa ahil jaman itu? Ai pamasaliꞌan sigām? 32 Saliꞌ sigām hantang ondeꞌ-ondeꞌ magtingkōꞌan ma halaman tabuꞌ magpangongkaꞌ. Angalingan saga ondeꞌ min dambilaꞌ ni kaseheꞌan sigām, yuk-i,
‘Oy! Kaꞌam ilu! Bay kami angalisagan kaꞌam
sagōꞌ halam kam magpangigal!
Bay kami magsindilan sagōꞌ halam kam ameyaꞌ magtangis.’
33 Kaꞌam ilu saliꞌ sapantun ondeꞌ mbal tasulut. Bay piꞌitu si Yahiya Magpapandi, aꞌa magpupuwasa maka mbal anginum inuman makalango. Jari pahꞌllinganbi iya in iya konoꞌ sinōd saitan. 34 Puwas eꞌ aku, Anak Manusiyaꞌ, bay piꞌitu amangan maka anginum. Magtūy aku pahꞌllinganbi. Yukbi, ‘He! Ndaꞌunbi aꞌa itu, dahagaꞌ! Panginginum! Magbagay iya maka saga aꞌa magaꞌāꞌ sukay parinta maka aꞌa baldusa kaseheꞌan.’ 35 Sagōꞌ,” yuk si Isa, “kataꞌuwanbi na min sasuku ameyaꞌ ma Tuhan in pangitaꞌuna taluwaꞌ sadja.”
Si Isa Nihulmat eꞌ Dꞌnda Dusahan
36 Aniyaꞌ dakayuꞌ aꞌa Parisi bay amowa si Isa amangan ma lumaꞌna. Jari pehēꞌ si Isa ati aningkōꞌ ma pagkakanan. 37 Na, aniyaꞌ dakayuꞌ dꞌnda ma lahat inān alaꞌat asal hinangna. Makataꞌu paꞌin iya in si Isa inaꞌan amangan ma lumaꞌ Parisi, pinaꞌan iya amowa bingkiꞌ-bingkiꞌ bay nihinang min batu poteꞌ, isihan nsꞌllan pahamut. 38 Pinaꞌan iya anꞌngge min bukutan si Isa, ma tongod tapeꞌna. Anangis na paꞌin iya sampay abaseꞌ na tapeꞌ si Isa eꞌ boheꞌ matana. Sinapuhan eꞌna maka buꞌunna, siniyum isab eꞌna tapeꞌ si Isa boꞌ yampa binuꞌusan eꞌna maka nsꞌllan pahamut eꞌ. 39 Taꞌndaꞌ paꞌin itu eꞌ Parisi ya bay amowa si Isa amangan, yukna ma deyom atayna, “Bang si Isa itu nabi toꞌongan bay du kataꞌuwanna bang sai dꞌnda ya angꞌntanan tapeꞌna itu. Bay kataꞌuwanna in dꞌnda itu asal dusahan.”
40 Sinambungan iya eꞌ si Isa. “Simun,” yukna, “aniyaꞌ pahꞌllingku ni kaꞌa.”
“Ahoꞌ, Tuwan Guru, pahꞌllingun konoꞌ,” yuk si Simun.
41 Amissala si Isa, yukna, “Aniyaꞌ duwangan aꞌa taga-utang saliꞌ-saliꞌ ma aꞌa pangutangan. Dangan inān taga-utang lima hatus pilak, dangan taga-utang limampūꞌ. 42 Saliꞌ-saliꞌ sigām mbal makabayad angkan pinapasan utang sigām eꞌ aꞌa bay pangutangan heꞌ. Na,” yuk si Isa ma si Simun, “bang ma kaꞌa, ingga ma aꞌa duwangan eꞌ ya aheya lasana ma aꞌa bay pangutangan sigām?”
43 Anambung si Simun, yukna, “Bang ma aku, ya aꞌa bay pinapasan utang aheya.”
“Tauwaꞌ sambungnu ilu,” yuk si Isa. 44 Jari niharap dꞌnda eꞌ si Isa ati ahꞌlling iya ni si Simun, yukna, “Taꞌndaꞌnu dꞌnda itu? Makasōd paꞌin aku ni lumaꞌnu insiniꞌ, halam aku bay sakapannu boheꞌ pangoseꞌ tapeꞌku. Sagōꞌ dꞌnda itu bay angoseꞌan tapeꞌku maka boheꞌ matana, ati sapuhanna maka buꞌunna. 45 Halam aku bay siyumnu, sagōꞌ dꞌnda itu, sangay min kapiꞌituku, halam bay pahali aniyum tapeꞌku. 46 Halam bay nsꞌllanannu kōkku pagaddatnu ma aku, sagōꞌ dꞌnda itu bay amuꞌusan nsꞌllan ahalgaꞌ ma tapeꞌku. 47 Angkan buwattitu pangahakaku ma kaꞌa, aheya lasa dꞌnda itu ma aku sabab taꞌampun dusana aheka. Bang aꞌa akulang dusana niampun, kulang du isab lasana.”
48 Jari ahꞌlling si Isa ni dꞌnda, yukna, “Niampun na paldusahannu.”
49 Minnēꞌ saga seheꞌ si Isa magsalu inān anagnaꞌ magtilaw-tilawan di-sigām, yuk-i, “Sai bahāꞌ aꞌa itu angampun saga dusa?”
50 Sagōꞌ ahꞌlling si Isa ni dꞌnda inān, yukna, “Apuwas du ka min mulkaꞌ Tuhan ma sabab pangandolnu ma aku. Palanjal na ka ma halam aniyaꞌ kasusahannu.”