11
Si Isa maka si Yahiya Magpapandi
1 Aubus paꞌin eꞌ si Isa bay magpanohoꞌan ma mulidna kasangpūꞌ maka duwa inān, alaꞌan iya minnēꞌ. Pehēꞌ iya ni saga kalumaꞌan ma lahat Jalil boꞌ magpanduꞌ maka magnasihat.
2 Na, si Yahiya Magpapandi bay takalabusu asal. Pagkalena pasal kahinangan Al-Masi, anohoꞌ iya saga mulidna kaseheꞌ pehēꞌ ni si Isa 3 atilaw iya, yuk-i, “Kaꞌa bahāꞌ ya bay pinagbissala eꞌ si Yahiya piꞌitu ni dunya? Atawa aniyaꞌ giꞌ saddī nilagaran?”
4 Anambung si Isa, yukna, “Pabīng kam pehēꞌ. Hakaꞌinbi si Yahiya pasal ai-ai takalebi maka ai-ai taꞌndaꞌbi itu. 5 Saga aꞌa bay buta makaꞌndaꞌ na, aꞌa bay pengkaꞌ makalꞌngngan na, aꞌa bay niꞌipul tapalanuꞌ na, aꞌa bay bisu makakale na, maka aꞌa bay amatay tapakallum na pabīng. Sampay saga aꞌa kulang-kabus pinagnasihatan na lapal ahāp. 6 Aheya kahāpan sasuku mbal magduwa-ruwa pikilanna ma aku.”
7 Pasaltaꞌ paꞌin saga mulid si Yahiya inān alaꞌan min si Isa, amissala iya ni katimukan aꞌa inān pasal si Yahiya. Yukna, “Ai bahāꞌ bay pihabi, ya angkan kam pehēꞌ ni paslangan? Bilahi kam bahāꞌ angꞌndaꞌ aꞌa sapantun dansolag parang-parang, tabowa papꞌllay eꞌ baliyu? 8 Bang nggaꞌi ka heꞌ-i, na ai bahāꞌ pihabi pehēꞌ? Aꞌa magsinꞌmmek ahalgaꞌ? Araiꞌ nggaꞌi ka, sabab bang aꞌa magsinꞌmmek buwattēꞌ, astanaꞌ ya patꞌnnaꞌanna. 9 Hakaꞌinbi aku toꞌongan bang ai bay pihabi pehēꞌ. Dakayuꞌ nabi bahāꞌ? Ahoꞌ, nabi, sagōꞌ alanga lagiꞌ min nabi. 10 Sabab si Yahiya itu bay pinagbissala ma Kitab Kanabi-nabihan, ya yuk-i,
‘Sohoꞌku aꞌa kawakilanku parahū min kaꞌa, yuk Tuhan,
boꞌ supaya sakapna lān palabayannu.’
11 “Hakaꞌanta kam toꞌongan,” yuk si Isa, “pasal si Yahiya Magpapandi itu: halam aniyaꞌ abangsa labi giꞌ min iya. Sagōꞌ sai-sai ma deyoman pagparintahan Tuhan, minsan aꞌa areyoꞌ kapagaꞌana, alanga lagiꞌ iya min si Yahiya. 12 Min waktu tagnaꞌ kapagnasihat si Yahiya sampay ni llaw itu, amanuyuꞌ toꞌongan saga aꞌa boꞌ makasōd pehēꞌ ni deyom pagparintahan Tuhan. 13 In pagparintahan Tuhan itu pinagkallam na paꞌin ma Kitab Tawrat maka ma Kitab Jabul sampay taꞌabut waktu kalahil si Yahiya. 14 Jari bang kam ahutu magkahagad, si Yahiya ya na si Elija ya pinagsambatan eꞌ kanabi-nabihan. 15 Sasuku kam makakale, kalehunbi toꞌongan.
16 “Manjari,” yuk si Isa, “ai pamaralilanku saga aꞌa ahil jaman itu? Saliꞌ sigām hantang ondeꞌ-ondeꞌ magtingkōꞌan ma halaman tabuꞌ magongkaꞌ-ongkaꞌ. Angalingan saga ondeꞌ-ondeꞌ min dambilaꞌ ni kaseheꞌan sigām, yuk-i,
17 ‘Oy! Kaꞌam ilu! Bay kami angandapuꞌan kaꞌam
sagōꞌ kaꞌam ilu mbal angigal.
Bay kami magsindilan
sagōꞌ kaꞌam ilu mbal ameyaꞌ magtangis.’
18 “Buwattēꞌ isab ma si Yahiya. Amuwasa iya maka mbal anginum inuman makalango, ati yukbi in iya sinōd saitan! 19 Puwas eꞌ aku, Anak Manusiyaꞌ, bay piꞌitu magkakan maka maginum. Magtūy aku pinahꞌllingan eꞌ aꞌa kamemon, yuk-i, ‘He! Ndaꞌunbi aꞌa itu, dahagaꞌ! Panginginum! Magbagay iya maka aꞌa magāꞌ sukay parinta, sampay baldusa kaseheꞌan!’ Saguwāꞌ,” yuk si Isa, “taꞌndaꞌtam min kahinangan Tuhan in pangitaꞌuna asal taluwaꞌ.”
Makaꞌaseꞌ-aseꞌ saga Aꞌa Mbal Magkahagad
20 Puwas eꞌ anagnaꞌ si Isa amabukagan saga aꞌa ma deyom kadaꞌirahan bay pangahinanganna kahekaꞌan saga hinangna makainu-inu, malaingkan halam bay pataikut min karusahan sigām. 21 Yuk si Isa, “Allā, kaꞌam saga aꞌa Korasin maka aꞌa Betsaida, makaꞌaseꞌ-aseꞌ sidda ya pamakadal kaꞌam! Aheka hinang makainu-inu bay pinaꞌndaꞌan ni kaꞌam sagōꞌ halam bay bꞌnnalbi. Bang bay tahinang saga hinangku makainu-inu inān ma daꞌira Tira maka daꞌira Sidun, tantu saga aꞌa mainaꞌan bay pataikut min dusa sigām. Tantu sigām bay magsꞌmmek karut, maka magbusugan di-sigām abu, tandaꞌ sin pagsusun sigām. 22 Hakaꞌanta kam, bang taꞌabut llaw pangahukum Tuhan, abuhat lagiꞌ hukuman ya pinatꞌkka ni kaꞌam min bay hukuman ma saga aꞌa daꞌira Tira maka daꞌira Sidun ma masa awal eꞌ. 23 Kaꞌam isab saga aꞌa Kapirnaum,” yuk si Isa, “ilu kam magbantug-bantug di-bi in kaꞌam pinalanga sampay ni sulgaꞌ! Sagōꞌ nalkaꞌ sadja ya pasampayanbi! In hinang makainu-inu bay pinaꞌndaꞌan ni kaꞌam, bang bay kapaꞌndaꞌan ni saga aꞌa Sodom, tantu masi daꞌira sigām sampay ni kabuwattinaꞌanan. 24 Hakaꞌanta kam, bang taꞌabut llaw pangahukum, abuhat giꞌ hukuman ya pinatꞌkkahan kaꞌam min bay pinatꞌkkahan saga aꞌa Sodom ma masa awal eꞌ.”
Pahalian saga Aꞌa Kabuhatan
25 Manjari itu, ma waktu inaꞌan, amissala si Isa ni Tuhan. Yukna, “O Mmaꞌ, kaꞌa ya makapagbayaꞌ ma langit maka ma dunya. Aheya pagsukulanku ni kaꞌa sabab in bay limbungannu min aꞌa taga-pangadjiꞌ sampay min aꞌa alalom pangitaꞌuna, pataꞌunu na ni aꞌa akulang pangitaꞌuna. 26 Ahoꞌ, Mmaꞌ, min kōgnu maka bayaꞌnu angkan buwattēꞌ.”
27 Yuk si Isa ni saga aꞌa inān, “Bay na pangandol ai-ai kamemon ma aku eꞌ Mmaꞌku. Halam aniyaꞌ makataꞌuwan aku, luwal Mmaꞌku. Damikiyanna, halam aniyaꞌ makataꞌuwan iya, luwal aku anakna lissi, beyaꞌ isab sasuku tapeneꞌku.
28 “Ameyaꞌ kam ma aku, sasuku kam binaleꞌ maka kabuhatan, boꞌ kam buwananku pahalian. 29 Taimaꞌunbi panduꞌ ya pamatanggungku ma kaꞌam, ati anganad kam min aku sabab ahantap asal aku, maka areyoꞌ pangatayanku. Minnitu kam makabāk kahayangan ma nyawabi. 30 Sabab aluhay ya pamahinangku ma kaꞌam, maka alampung isab ya panduꞌ pamatanggungku ma kaꞌam.”