10
Pinalꞌngngan eꞌ si Isa Mulidna Pitumpūꞌ maka Duwa
1 Puwas eꞌ aniyaꞌ pitumpūꞌ maka duwa aꞌa saddī kawakilan eꞌ si Isa. Sinōꞌ sigām parahū min iya ni kamemon daꞌira maka kalumaꞌan ya song papehēꞌanna. Pinalꞌngngan sigām eꞌna duwa-duwa magbeyaꞌ. 2 Yukna ma sigām, “Saga aꞌa inān saliꞌ dalil huma atigumaꞌ na buwaꞌna. Aluha tanaꞌ sagōꞌ kulang aꞌa magani, angkan yukku ma kaꞌam: angamuꞌ-ngamuꞌ kam tabang ni tag-dapu tanaꞌ boꞌ supaya iya anohoꞌ saga aꞌa pehēꞌ magani. 3 Na, lumꞌngngan na kam. Saliꞌ kam sapantun anak bili-bili pinapehēꞌ ni tꞌngngaꞌ saga eroꞌ talun magpangalꞌkkob. 4 Daꞌa kam amowa pitaka atawa puyuꞌ pamowahan ai-aibi atawa taumpaꞌ. Bang aniyaꞌ aꞌa tasampangbi ma labayan daꞌa kam pahoggaꞌ magsagina.
5 “Bang aniyaꞌ lumaꞌ pariyataꞌanbi pahꞌllinginbi dahū, yuk-i, ‘Bang paꞌin kam kaniyaꞌan kasannangan!’ 6 Manjari bang aniyaꞌ patꞌnnaꞌ ma lumaꞌ inān aꞌa patut binuwanan kasannangan, katꞌkkahan du iya kasannangan bay pangamuꞌbi heꞌ. Sagōꞌ bang halam, papelleng ni kaꞌam kasannangan eꞌ. 7 Patꞌnnaꞌ kam ma dakayuꞌ lumaꞌ sadja. Daꞌa kam magpinda-pinda patꞌnnaꞌan. Amangan kam maka anginum ai-ai pangalabot kaꞌam eꞌ saga aꞌa ma deyom lumaꞌ heꞌ sabab bang aꞌa maghinang, wajib iya binuwanan napakana.
8 “Maingga-maingga kalumaꞌan katꞌkkahanbi, bang kam sinagina eꞌ saga aꞌana, kakanunbi ai-ai pinatꞌnnaꞌan kaꞌam eꞌ sigām. 9 Pauliꞌunbi saga aꞌa sakihan mahēꞌ maka hakaꞌanbi sigām, taꞌabut na waktu pagparinta Tuhan. 10 Saguwāꞌ bang aniyaꞌ kalumaꞌan katꞌkkahanbi boꞌ kam mbal gantaꞌ sinagina eꞌ aꞌana, paluwas kam ni lān boꞌ pahꞌllinginbi. 11 Yukbi, ‘Itiyaꞌ paspasan kami min tapeꞌ kami bagunbun lahatbi itu, tandaꞌ saksiꞌ in kami apuwas na min kaꞌam. Sagōꞌ subay kataꞌuwanbi in pagparinta Tuhan asekot na.’ 12 Hakaꞌanta kam,” yuk si Isa, “bang taꞌabut llaw pangahukum Tuhan ma manusiyaꞌ abuhat lagiꞌ hukumanna ma saga aꞌa ma lahat inaꞌan-i min bay hukuman ma lahat Sodom ma masa awal.”
Makaꞌaseꞌ-aseꞌ saga Aꞌa Mbal Magkahagad
13 “Allā!” yuk si Isa. “Kaꞌam saga aꞌa Korasin maka aꞌa Betsaida, makaꞌaseꞌ-aseꞌ sidda ya pamakadal kaꞌam! Aheka hinang makainu-inu bay pinaꞌndaꞌan ni kaꞌam sagōꞌ halam ikutbi. Bang daꞌira Tira maka daꞌira Sidun ma masa awal eꞌ bay pangahinangan saga hinangku makainu-inu itu, tantu saga aꞌa mainaꞌan bay pataikut min dusa sigām. Tantu sigām bay magsinꞌmmek karut, maka magbusugan di-sigām abu, tandaꞌ sin pagsusun sigām. 14 Bang taꞌabut llaw pangahukum Tuhan, abuhat lagiꞌ hukuman ya pinatꞌkka ni kaꞌam min bay hukuman ma saga aꞌa daꞌira Tira maka daꞌira Sidun. 15 Kaꞌam isab aꞌa Kapirnaum,” yuk si Isa, “ilu kam magbantug-bantug di-bi in kaꞌam pinalanga sampay ni sulgaꞌ! Luwal nalkaꞌ ya pasampayanbi!”
16 Ahꞌlling si Isa ni saga mulidna, yukna, “Sasuku anaimaꞌ panduꞌbi, saliꞌ aku ya tataimaꞌna. Sai-sai isab anulak kaꞌam, saliꞌ aku ya tasulakna. Maka sai-sai anulak aku, tasulakna Tuhan ya bay amapiꞌitu aku ni dunya.”
Pagbalik ni si Isa Mulidna Pitumpūꞌ maka Duwa
17 Mbal atꞌggol, makabalik na ni si Isa saga mulidna pitumpūꞌ maka duwa ya bay sohoꞌna palꞌngngan. Landuꞌ sigām akōd. Yuk sigām ni iya, “Tuwan, minsan saga saitan, bay ameyaꞌ ma panohoꞌan kami pagsabbut kami ōnnu!”
18 Anambung si Isa, yukna, “Bay taꞌndaꞌku nakuraꞌ saitan saliꞌ luwa lāt apakpak min bꞌttong langit, halam na aniyaꞌ gaꞌosna. 19 Kabuwanan kam eꞌku kawasa boꞌ kam mbal ainay minsan tagiꞌikbi sowa atawa jalalangking. Tagaꞌosbi isab kawasa nakuraꞌ saitan ya magbabanta, ati halam aniyaꞌ makamula kaꞌam minsan ai. 20 Sagōꞌ daꞌa kam magkalasigan ma sabab kapagbayaꞌanbi saga saitan. Gom giꞌ kam magkōg-koyag ma sabab ōnbi waꞌi tasulat eꞌ Tuhan ma deyom sulgaꞌ.”
Magkōg-koyag si Isa
21 Manjari ma waktu inaꞌan sinōd kōg si Isa sabab min Rū Sussi. Yukna ni Tuhan, “O Mmaꞌ, kaꞌa ya makapagbayaꞌ ma sulgaꞌ maka ma dunya. Aheya pagsukulanku ni kaꞌa sabab in bay limbungannu min aꞌa taga-pangadjiꞌ sampay min aꞌa alalom pangitaꞌuna, pataꞌunu na ni saga aꞌa akulang taꞌuna. Ahoꞌ, Mmaꞌ, min kōg maka bayaꞌnu angkan buwattēꞌ.
22 “Bay na pangandol ai-ai kamemon ma aku eꞌ Mmaꞌku. Halam aniyaꞌ makataꞌuwan Anak Tuhan bang sai iya, luwal Mmaꞌkuꞌ. Damikiyanna isab, halam aniyaꞌ makataꞌuwan Mmaꞌku bang sai iya, luwal aku anakna lissi, sampay isab sasuku tapeneꞌku pinataꞌu.”
23 Jari paharap si Isa ni saga mulidna boꞌ ahꞌlling ni sigām sadja. “Aheya kahāpanbi,” yukna, “ma sabab pakaꞌndaꞌbi pakaradjaꞌan itu. 24 Hakaꞌanta kam, aheka saga nabi maka saga sultan ma masa awal eꞌ bay bilahi toꞌongan angꞌndaꞌ pakaradjaꞌan ya taꞌndaꞌbi ma buwattinaꞌan, sagōꞌ halam taꞌndaꞌ eꞌ sigām. Bilahi isab sigām akale ma ai-ai takalebi itu, sagōꞌ halam bay makakale.”
Kissa Pasal Aꞌa Samariya ya Ahāp Addatna
25 Manjari aniyaꞌ dakayuꞌ guru saraꞌ agama pehēꞌ ni si Isa. Aniyaꞌ panilawna ma si Isa panulayan iya, yukna, “Tuwan Guru, ai subay hinangku boꞌ supaya aku pinasukuꞌan kallum kakkal ni kasaumulan?”
26 Anambung si Isa, yukna, “Ai bahāꞌ tasulat ma deyom saraꞌ Tuhan, ya bay pangꞌbba ma si Musa? Ai hatina ya tabassanu mahēꞌ?”
27 Yuk sambung aꞌa inān, “Wajib kam alasa toꞌongan ma Panghūꞌbi Tuhan. Ya lasabi ma iya subay min deyom ataybi maka min deyom tawhidbi maka min panahuꞌanbi maka min kosogbi. Maka wajib isab kam alasahan pagkahibi manusiyaꞌ buwat eꞌbi alasahan baranbi.”
28 “Taluwaꞌ sambungnu,” yuk si Isa. “Hinangun ilu ati pinasukuꞌan du ka kallum kakkal ni kasaumulan.”
29 Sagōꞌ guru inān mbal bilahi taraꞌug angkan yukna ma si Isa, “Manjari sai bahāꞌ pagkahiku ya subay kalasahanku?”
30 Anambung si Isa, yukna, “Aniyaꞌ dakayuꞌ aꞌa bangsa Yahudi palūd min Awrusalam tudju ni daꞌira Ariha. Ma labayan paꞌin, nirugpakan iya eꞌ saga mundu. Nilaꞌugan iya maka nilangpasan kamemon altaꞌna sampay sꞌmmek bay ma baranna. Ahalol paꞌin iya, pinasagaran iya mainaꞌan. 31 Pasaltaꞌ, aniyaꞌ palabay min lān inān dakayuꞌ imam Yahudi sagōꞌ pagꞌndaꞌna ma aꞌa ahalol eꞌ, palikuwad iya min dambilaꞌ. 32 Damikiyanna, aniyaꞌ aꞌa saddī makapinaꞌan, Yahudi isab min tubuꞌ si Libi, aꞌa anabangan imam. Sagōꞌ pagꞌndaꞌna ma aꞌa ahalol eꞌ, palikuwad isab iya min dambilaꞌ. 33 Puwas eꞌ aniyaꞌ dakayuꞌ aꞌa bangsa Samariya palꞌngngan min lān inaꞌan ati taꞌabutna aꞌa ahalol eꞌ. Pagꞌndaꞌna, magtūy iya tꞌkkahan aseꞌ. 34 Pasekot iya pinaꞌan ati tambalanna paliꞌna maka nsꞌllan maka binu, boꞌ yampa pꞌkkosna. Puwas eꞌ pinasakat aꞌa inān ma kuraꞌna ati binowa ni lumaꞌ paghahantiꞌan boꞌ niayura eꞌna mainaꞌan. 35 Pagsalung amuwan iya sīn ma tag-dapu lumaꞌ heꞌ ati yukna ma iya, ‘Ayurahin aku aꞌa itu. Bang ka makagastu palabi min sīn itu, bayaranku paꞌin ma kabalikku piꞌitu.’ ”
36 Jari atilaw si Isa ni guru inān, yukna, “Na, ma aꞌa tꞌllungan inān, ingga bang ma pikilannu maghinang sangkahāpan ma aꞌa bay kalangpasan eꞌ mundu heꞌ?”
37 Anambung guru, yukna, “Ya aꞌa dangan maꞌaseꞌ ma iya sampay anabang.”
“Na,” yuk si Isa, “pehēꞌ na ka. Hinangun buwat hinang aꞌa inān.”
Si Isa ma Lumaꞌ disi Marta maka si Mariyam
38 Manjari itu, makalanjal paꞌin disi Isa maka saga mulidna minnēꞌ, atꞌkka sigām ni dakayuꞌ kalumaꞌan ati sinagina iya eꞌ dꞌnda niōnan si Marta, sinōꞌ pariyataꞌ ni lumaꞌna. 39 Aniyaꞌ danakan si Marta dꞌnda niōnan si Mariyam. Si Mariyam iya aningkōꞌ na paꞌin ma atag tapeꞌ si Isa akale ma pamanduꞌna. 40 Si Marta alengog pikilanna sabab kaheka hinangna magadjal lalabotan, angkan iya pehēꞌ ni si Isa magmahi. “Tuwan,” yukna, “mbal bahāꞌ ahalgaꞌ ma kaꞌa itiyaꞌ aku pinasagaran eꞌ danakanku magadjal dangan-danganku. Sōꞌun iya anabang.”