20
Paralilan Pasal Aꞌa Maghinang ma Kabbun
1 Magparalilan si Isa, yukna, “In kapagparinta Tuhan saliꞌ dalil aꞌa tag-dapu kabbun pananoman bahan anggul. Daiꞌ llaw paꞌin, palꞌngngan tag-dapu angāꞌ aꞌa maghinang ma kabbunna. 2 Tinambahan konoꞌ sigām dakayuꞌ denari, ya panamba dangan aꞌa ma dangꞌllaw. Magsulut paꞌin, sinōꞌ sigām pehēꞌ maghinang ma kabbunna.
3 “Na, taꞌabut paꞌin lisag siyam subu, pehēꞌ tag-dapu ni pagtabuꞌan, ati aniyaꞌ taꞌndaꞌna mainaꞌan saga aꞌa hal anꞌngge-nꞌngge. 4 Yukna ma sigām, ‘Pehēꞌ kam isab maghinang ma kabbunku. Tambahanku du kam pila-pila ya katongoranbi.’ 5 Na, pehēꞌ na sigām. Augtu paꞌin llaw, pehēꞌ na isab tag-dapu amiha aꞌa kaseheꞌ maghinang ma kabbunna. Buwattēꞌ du isab paglisag tꞌllu kohap. 6 Jari itu, song paꞌin lisag lima kohap, pabīng iya ni pagtabuꞌan, ati aniyaꞌ taꞌndaꞌna saga aꞌa hal anꞌngge-nꞌngge mainaꞌan. Yukna ma sigām, ‘Angay animpus llaw mbal kam maghinang?’
7 “Yuk sambung sigām, ‘Tuꞌud halam aniyaꞌ anohoꞌ kami maghinang’. ‘Na,’ yuk tag-dapu, ‘pehēꞌ kam maghinang ma kabbunku’.
8 “Manjari itu, pagabay kohap na, amissala tag-dapu ni mandul pangandolanna, yukna, ‘Linganin saga maghihinang ilu boꞌ tambahin. Tambahin dahū saga aꞌa bay taꞌāꞌku damuli ilu, boꞌ yampa sigām ya bay taꞌāꞌku dahū.’ 9 Jari ya panamba saga aꞌa ya bay anagnaꞌ maghinang lisag lima kohap, magtongod maka hinang dangꞌllaw, minsan daiꞌ-daiꞌ du ya kapangahinang sigām. 10 Na, taꞌabut paꞌin tinambahan saga aꞌa ya bay taꞌāꞌ waktu subu lagiꞌ, aholat sigām tinambahan aheya. Sagōꞌ saliꞌ du tambahan ya tasambut sigām. 11 Pagsambut paꞌin, pinagmusmuran eꞌ sigām tag-dapu. 12 Yuk sigām, ‘Angay itu? Saga aꞌa bay ngāꞌnu damuli, danjām du bay pangahinang sigām. Boꞌ kami itu bay animpus min subu-subu sampay ni kakohapan, maghulas-sangsāꞌ ma kapasuꞌan llaw! Sagōꞌ, papagsaliꞌnu tambahan sigām maka tambahan kami.’ 13 Yuk tag-dapu kabbun ni dangan inān, ‘Bagay, halam ka bay akkalanku. Ya kapagsulutanta tambahan pinapagtongod maka hinang dangꞌllaw. 14 Na, ngāꞌun na tambahannu itu boꞌ ka amoleꞌ. Tuꞌud kabayaꞌanku pinapagsaliꞌ tambahan aꞌa bay taꞌāꞌku damuli maka bay panambaku kaꞌa. 15 Angay, halam bahāꞌ aniyaꞌ kapatutku magbayaꞌ ma sīnku? Angimbū ka bahāꞌ pagga pagmuraku sīnku?’ ”
16 Yuk si Isa isāb, “Sai-sai taramuli ma buwattinaꞌan, pinarahū ma sinosōng. Maka sai-sai makarahū ma buwattinaꞌan, pinaramuli ma waktu sinōng.”
Amissala si Isa Pabīng Pasal Kamatayna
17 Na, patukad disi Isa tudju ni daꞌira Awrusalam. Jari ma labayan paꞌin, binowa eꞌ si Isa mulidna kasangpūꞌ maka duwa pasaddī min aꞌa kaseheꞌan boꞌ yampa sigām bissalahanna. 18 Yukna, “Pakale kam. Itiyaꞌ kitam patukad ni Awrusalam. Mahēꞌ paꞌin, in aku Anak Manusiyaꞌ sinōngan du ni pangꞌntanan kaimaman alanga maka saga guru saraꞌ agama. Pinatꞌkkahan aku eꞌ sigām hukuman ni kamatay. 19 Puwas eꞌ niꞌndeꞌan du aku ni pangꞌntanan saga aꞌa nggaꞌi ka Yahudi, ati pinagudjuꞌ-udjuꞌ aku eꞌ sigām. Pinagdaplosan du aku boꞌ yampa nilansang ni hāg pinapatay. Sagōꞌ taꞌabut tꞌllumbahangi min kamatayku allum du aku pabīng.”
Ya Pangamuꞌ eꞌ Hꞌnda si Sibidi
20 Sakali pinaꞌan ni si Isa hꞌnda si Sibidi beyaꞌ maka anakna lꞌlla duwangan, mulid si Isa asal. Pasujud dꞌnda itu ma dahuan si Isa angamuꞌ junjung. 21 Tinilaw iya eꞌ si Isa, yukna, “Ai amuꞌnu?”
Yuk dꞌnda, “Bang taꞌabut waktu kapagparintanu, patingkōꞌun konoꞌ duwangan anakku itu min karuwambilaꞌnu.”
22 Anambung si Isa, yukna, “Mbal kataꞌuwanbi bang ai ya amuꞌbi ilu. Makasandal kam bahāꞌ pinananaman kabinasahan buwat paminasa ma aku?”
“Ahoꞌ, makasandal du kami,” yuk sigā.
23 Yuk si Isa, “Asal makananam du kam kabinasahan buwat kabinasahan ya song patꞌkka ni aku. Sagōꞌ halam aniyaꞌ kapatutku ameneꞌ bang sai pinatingkōꞌ ma bihingku kowan atawa ma bihingku gibang. Sukuꞌ koꞌ inān saga aꞌa ya tinagamahan paningkōꞌan inaꞌan-i eꞌ Mmaꞌku Tuhan.”
24 Takale paꞌin eꞌ saga sangpūꞌ mulid kaseheꞌ pasal bay niamuꞌ eꞌ hꞌnda si Sibidi, magtūy apꞌddiꞌ atay sigām ma duwangan magdanakan eꞌ. 25 Angkan sigām kamemon sinohoꞌ eꞌ si Isa patimuk ni atagna. Yukna, “Kataꞌuwanbi kajarihan saga aꞌa ma dunya itu. Ya angꞌntanan pagparinta ma bangsa inān magmanda asal ma saga aꞌa ma deyoꞌan sigām. Ya du saga puntuk nakuraꞌ sigām, angahagda na paꞌin. 26 Sagōꞌ kaꞌam ilu subay mbal magbuwattēꞌ. Sai-sai kam bilahi taga-ōn ma deyomanbi, subay magsosohoꞌan ni kaseheꞌan. 27 Sai-sai kam bilahi pinalanga, subay magpaꞌata ni pagkahina. 28 Buwat aku, ya Anak Manusiyaꞌ. Ya maksudku piꞌitu ni dunya nggaꞌi ka aku subay pinaghulas-sangsāꞌan eꞌ aꞌa kaseheꞌ, sagōꞌ aku ya maghulas-sangsāꞌ panabang sigām. Piꞌitu aku boꞌ paglillaꞌku kallumku pangalꞌkkatku saga aꞌa aheka min paldusahan sigām.”
Duwa Aꞌa Buta Kauliꞌan
29 Manjari atulak paꞌin disi Isa min daꞌira Ariha, aheka aꞌa bay paturul ma iya. 30 Sakali aniyaꞌ mainaꞌan duwa lꞌlla buta aningkōꞌ ma bihing lān palabayan sigām. Makataꞌu paꞌin saga buta itu in si Isa inaꞌan palabay, magtūy sigā angalingan pakosog. “O Tuwan, tubuꞌ Sultan Daꞌud!” yuk sigā. “Maꞌaseꞌ ka ma kami.” 31 Pinabukagan sigā eꞌ kahekaꞌan aꞌa inān, sinōꞌ daꞌa maghibuk. Sagōꞌ pinakosog gom paꞌin pangalingan sigā, yuk-i, “O Tuwan! Tubuꞌ si Daꞌud! Maꞌaseꞌ na ka ba!”
32 Pahoggaꞌ si Isa boꞌ angalingan ni duwangan buta inān, yukna, “Ai kabayaꞌanbi hinangku ma kaꞌam?”