19
Pasal Pagtiman Aꞌa Maglakibini
1 Aubus paꞌin pamissala si Isa buwattēꞌ, alaꞌan iya min lahat Jalil tudju ni lahat Yahudiya, ni jadjahan ma liyu sapaꞌ Jordan. 2 Aheka toꞌongan saga aꞌa bay ameyaꞌ ma iya, ati kauliꞌan eꞌna saga saki sigām mainaꞌan.
3 Sakali aniyaꞌ pinaꞌan saga Parisi anulayan iya boꞌ supaya iya tajallat ma bissalana. Yuk sigām ma iya, “Bang ma saraꞌtam, makajari bahāꞌ bang lꞌlla animanan hꞌndana, minsan ai sababanna?”
4 Anambung si Isa, yukna, “Kilāku halam bay tabassabi ya tasulat ma Kitab, ya yuk-i, ‘Ma tagnaꞌ pamapanjari Tuhan ma manusiyaꞌ, bay sigām pinapanjari eꞌna lꞌlla maka dꞌnda?’ 5 Yuk Tuhan eꞌ, ‘Angkanna lꞌlla angꞌbba min inaꞌ-mmaꞌna boꞌ parakayuꞌ ni hꞌndana. Manjari in bay duwa baran, dabaran na.’ 6 Nggaꞌi ka na sigā duwa baran,” yuk si Isa, “sagōꞌ dabaran na sigā karuwangan. Angkan subay mbal pinapagbutas eꞌ manusiyaꞌ ya bay pinapagdakayuꞌ eꞌ Tuhan.”
7 Atilaw saga Parisi ma si Isa, yuk-i, “Na angay bahāꞌ? Bang ma panduꞌ si Musa, makajari lꞌlla animanan hꞌndana bang paꞌin aniyaꞌ sulatna pagpasahan.”
8 Ya sambung si Isa, “Ya angkan kam pinarūl eꞌ si Musa animanan hꞌndabi, sabab agagga kam pinanduꞌan. Saguwāꞌ nggaꞌi ka buwattēꞌ bay ma waktu tagnaꞌ. 9 Hakaꞌanta kam, sai-sai animanan hꞌndana ma halam bay angaliyu-lakad min iya, ati maghꞌnda iya saddī, taga-dusa iya angaliyu-lakad min hꞌndana poꞌon.”
10 Yuk saga mulid si Isa ma iya, “Bang buwattēꞌ kahālanna ma aꞌa maglakibini, ahāp lagiꞌ subay mbal magpūn.”
11 Anambung si Isa, yukna, “Panduꞌ ilu mbal kabogbogan eꞌ manusiyaꞌ kamemon, luwal sigām ya kabuwanan kosog eꞌ Tuhan. 12 Magginis isab pagsababan ya angkan lꞌlla mbal maghꞌnda. Aniyaꞌ aꞌa mbal makapaghꞌnda sabab aniyaꞌ sallaꞌ ma baranna. Aniyaꞌ mbal makapaghꞌnda sabab kinabili eꞌ aꞌa, maka aniyaꞌ isab magniyat subay mbal maghꞌnda ma sabab pagparinta Tuhan ya pagmatayanna. Sai-sai makataimaꞌ panduꞌ itu, subay anaimaꞌ toꞌongan.”
Kalasa si Isa ma Kamanahutan
13 Na, aniyaꞌ saga aꞌa bay amowa saga anak sigām ni si Isa boꞌ supaya pinatꞌnnaꞌan tanganna maka niamuꞌan kahāpan min Tuhan. Sagōꞌ bay pinabukagan saga aꞌa amowa inān eꞌ kamuliran si Isa. 14 Ahꞌlling si Isa, yukna, “Parūlunbi piꞌitu ni aku saga kamanahutan itu. Daꞌa lāngunbi. Sabab sai-sai makasaliꞌ kaul-piꞌilna ni buwat kamanahutan ilu, taga-palsukuꞌan du ma pagparintahan Tuhan.” 15 Jari pinatꞌnnaꞌ eꞌ si Isa tanganna ni saga ondeꞌ inān, boꞌ yampa alaꞌan minnēꞌ.
Aꞌa Taga-Karaya
16 Manjari itu aniyaꞌ dakayuꞌ aꞌa pehēꞌ ni si Isa. Yukna, “Tuwan Guru, kahāpan ai subay hinangku boꞌ supaya aku kaniyaꞌan kallum taptap ni kasaumulan?”
17 Yuk si Isa, “Angay aku tilawnu pasal kahāpan? Tunggal du Tuhan ahāp. Bang ka bilahi pinasukuꞌan kallum taptap, subay bogbogannu panohoꞌan Tuhan.”
18 Atilaw giꞌ lꞌlla, yukna, “Panohoꞌan ingga?”
Ya sambung si Isa, “Daꞌa ka amapatay aꞌa. Daꞌa ka angaliyu-lakad ni nggaꞌi ka pagholaꞌnu. Daꞌa ka anangkaw. Daꞌa ka anaksiꞌ puting. 19 Pagaddatin inaꞌ-mmaꞌnu. Maka kalasahin pagkahinu manusiyaꞌ buwat eꞌnu alasahan barannu.”
20 Yuk lꞌlla inān, “Ā, bay na kabogboganku inaꞌan-i kamemon. Ai giꞌ subay hinangku?”
21 Yuk si Isa ma iya, “Bang ka bilahi tubus kahāp addat-tabiꞌatnu, pehēꞌ ka, pabꞌllihin altaꞌnu kamemon boꞌ pamuwanun bꞌllihanna ma saga aꞌa miskin. Manjari aniyaꞌ du karayanu ma deyom sulgaꞌ. Puwas eꞌ piꞌitu ka ameyaꞌ ma aku.” 22 Pagkale aꞌa inān ma bissala si Isa, magtūy iya alaꞌan, maka eꞌna asusa sabab landuꞌ aheka altaꞌna.
23 Sakali ahꞌlling si Isa ni saga mulidna, yukna, “Hakaꞌanta kam toꞌongan, in aꞌa dayahan kahunitan pasōd ni deyom pagparintahan Tuhan. 24 Ahoꞌ, hakaꞌanta kam, kaluhayan giꞌ untaꞌ palabay min buliꞌ jalum min aꞌa dayahan pasōd ni deyom pagparintahan Tuhan.”
25 Ainu-inu toꞌongan saga mulid pagkale sigām ma bissala si Isa itu. “Bang buwattēꞌ,” yuk sigām, “sai bahāꞌ makasampay ni kasalamatan ma deyom sulgaꞌ?”
26 Pinandang eꞌ si Isa saga mulidna heꞌ maka eꞌna anambung. Yukna, “Bang manusiyaꞌ mbal toꞌongan makarapat. Sagōꞌ halam aniyaꞌ ahunit ma Tuhan.”
27 Anambung lagiꞌ si Petros, “Ndaꞌun ba kami itu,” yukna. “Bay bbahan kami ai-ai kami kamemon boꞌ ameyaꞌ ma kaꞌa. Ai bahāꞌ panungbas kami?”
28 Yuk si Isa, “Hakaꞌanta kam toꞌongan: in aku Anak Manusiyaꞌ, bang taꞌabut na waktu kapaningkōꞌku ma deyom kasahayaꞌan, magagi du aku ma dunya bahaꞌu. Ya du kaꞌam saga bebeyaꞌanku, pinatingkōꞌ du isab ma tingkōꞌan sangpūꞌ maka duwa hekana, ati nihukum eꞌbi saga bangsa panubuꞌ si Israꞌil kasangpūꞌ maka duwa. 29 Sasuku bay angꞌbbahan lumaꞌna atawa danakanna, atawa inaꞌ-mmaꞌna, atawa panganakna, atawa tanaꞌna, ma sabab katuyuꞌna ma aku, tinungbasan du iya paheka eꞌ Tuhan, lipat manglipat min bay bbahanna. Maka kaniyaꞌan du iya kallum taptap ni kasaumulan. 30 Sagōꞌ aheka aꞌa makarahū buwattinaꞌan, pinaramuli ma waktu sinōng. Aheka isab taramuli ma buwattinaꞌan, pinarahū ma waktu sinōng.”