18
Paralilan Pasal Balu Dꞌnda maka Huwis
1 Manjari aniyaꞌ paralilan pangissa eꞌ si Isa ma saga mulidna supaya sigām mbal sinumu angamuꞌ-ngamuꞌ ni Tuhan sakahabaꞌ waktu. 2 Yukna, “Ma dakayuꞌ lahat aniyaꞌ huwis mbal magmatāw ma Tuhan, mbal isab magaddat ma pagkahina manusiyaꞌ. 3 Aniyaꞌ isab ma lahat inān dakayuꞌ dꞌnda balu. Na, dꞌnda itu taga-palkalaꞌ ati pehēꞌ na paꞌin ni huwis inān angamuꞌ tabang. Angalogos iya mikipatuntul, yukna, ‘Tuwan, tabangin aku boꞌ mbal taraꞌug eꞌ kuntaraku.’ 4 Tagnaꞌ mbal anabang huwis inān, sagōꞌ pagtꞌggol-tꞌggol, ahꞌllingan iya di-na, yukna, ‘Aku itu mbal magmatāw ma Tuhan, mbal isab magaddat ma manusiyaꞌ. 5 Sagōꞌ dꞌnda itu hal makasasaw pikilanku angkan subay tabanganku. Bang iya mbal dūlanku, sinumu du aku ma pagpiꞌituna.’
6 “Na,” yuk si Isa, “hatiunbi bay pahꞌlling huwis ya mbal abontol inān. 7 Mbal bahāꞌ anabang Tuhan ma saga aꞌa tapeneꞌna, ya angamuꞌ tabang ni iya llaw-sangom? Magtanggu-tanggu giꞌ iya bahāꞌ amatuntul ma sigām? 8 Hakaꞌanta kam,” yuk si Isa, “alꞌkkas du eꞌ Tuhan amatuntul sigām. Sagōꞌ ma sinosōng, bang aku Anak Manusiyaꞌ pabalik piꞌitu ni dunya, aniyaꞌ bahāꞌ tabākku atotog angandol ma aku?”
Pasal Parisi maka Aꞌa Magaꞌāꞌ Sukay Parinta
9 Na, aniyaꞌ isab paralilan pinahꞌlling eꞌ si Isa ma saga aꞌa ya amista di-sigām abontol ati amareyoꞌ-deyoꞌ ma saga aꞌa kaseheꞌan. 10 Yuk si Isa, “Aniyaꞌ duwangan aꞌa bay patukad pehēꞌ ni langgal pagkulbanan boꞌ anambahayang. Dangan inān aꞌa Parisi, dangan aꞌa magaꞌāꞌ sukay parinta. 11 Mainaꞌan paꞌin sigām ma deyom langgal, anꞌngge aꞌa Parisi dangan-danganna ati anambahayang iya ni Tuhan. Yukna, ‘O Tuhanku, aheya pagsukulanku ni kaꞌa. Sabab in aku itu mbal buwat aꞌa kaseheꞌan, ya napsuhan maka angulliꞌ maka angaliyu-lakad min hꞌnda sigām. Magsukul isab aku in aku nggaꞌi ka buwat aꞌa magaꞌāꞌ sukay parinta itu. 12 Aku itu, min duwa magpuwasa ma deyom dapituꞌ, maka jakatanku isab kamemon tausahaku.’
13 “Sagōꞌ in aꞌa magaꞌāꞌ sukay parinta inān waꞌi anꞌngge ma tōng langgal, mbal minsan paharap ni sulgaꞌ. Tinꞌppak eꞌna daggahana kabowa susana. ‘O Tuhan,’ yukna, ‘maꞌaseꞌ paꞌin ka ma aku sabab dusahan aku.’
14 “Hakaꞌanta kam,” yuk si Isa, “amoleꞌ paꞌin aꞌa duwangan min langgal, aꞌa magāꞌ sukay ya abontol ma bistahan Tuhan, nggaꞌi ka aꞌa Parisi. Sababna sai-sai magpalanga ma baranna pinareyoꞌ du, maka sai-sai magpareyoꞌ di-na pinalanga du isab.”
Kalasa si Isa ma Kamanahutan
15 Na, aniyaꞌ saga aꞌa amowa anak sigām ni si Isa boꞌ supaya pinatꞌnnaꞌan tanganna. Pagꞌndaꞌ itu eꞌ saga mulidna, magtūy pinahꞌllingan eꞌ sigām saga aꞌa amowa inān. 16 Mandaꞌ nilinganan ondeꞌ-ondeꞌ inān eꞌ si Isa. Yukna ni saga mulidna, “Parūlunbi saga kamanahutan ilu piꞌitu ni aku. Daꞌa sigām lāngunbi sabab sai-sai makasaliꞌ ni ondeꞌ itu taga-palsukuꞌan du ma pagparinta Tuhan. 17 Bꞌnnal ya pangahakaku ma kaꞌam, bang aꞌa mbal pasulut ma pagparinta Tuhan buwat kapasulut ondeꞌ-ondeꞌ, na, aꞌa inān mbal makasōd ni deyom pagparintahan Tuhan.”
Pasal Aꞌa Taga-Karaya
18 Ma dakayuꞌ llaw aniyaꞌ Yahudi alanga pehēꞌ ni si Isa atilaw iya. “Tuwan Guru,” yukna, “kaꞌa ilu asal ahāp. Ai subay hinangku boꞌ kaniyaꞌan kallum ya taptap ni kasaumulan?”
19 Anambung si Isa, yukna, “Angay yuknu in aku itu ahāp? Halam aniyaꞌ ahāp, luwal Tuhan dakayuꞌ-kayuꞌ. 20 Kataꞌuwannu asal bay panohoꞌan Tuhan, daꞌa ka angaliyu-lakad ni nggaꞌi ka pagholaꞌnu. Daꞌa ka amonoꞌ. Daꞌa ka anangkaw. Daꞌa ka anaksiꞌ puting. Pagaddatin inaꞌ-mmaꞌnu.”
21 Yuk lꞌlla inān ni iya, “Tuwan, sangay min kaondeꞌ-ondeꞌku bay kabogboganku inaꞌan-i kamemon.”
22 Takale paꞌin itu eꞌ si Isa, yukna, “Aniyaꞌ giꞌ dakayuꞌ halam tahinangnu. Pehēꞌ ka, pabꞌllihin altaꞌnu kamemon boꞌ pamuwanun bꞌllihanna ma saga aꞌa miskin. Manjari aniyaꞌ du karayanu mainaꞌan ma deyom sulgaꞌ. Puwas eꞌ, piꞌitu ka ameyaꞌ ma aku.” 23 Sagōꞌ pagkale aꞌa itu ma bissala si Isa magtūy iya asusa sidda sabab landuꞌ aheka altaꞌna.
24 Taꞌndaꞌ eꞌ si Isa kasusana ati yukna ni iya, “Saga aꞌa dayahan kahunitan asal pasōd ni deyom pagparintahan Tuhan! 25 Kaluhayan giꞌ untaꞌ palabay min buliꞌ jalum min aꞌa dayahan pasōd ni deyoman pagparinta Tuhan.”
26 Takale paꞌin lling si Isa itu eꞌ saga aꞌa, yuk sigām, “Bang buwattēꞌ, sai bahāꞌ makasampay ni kasalamatan ma deyom sulgaꞌ?”
27 Yuk sambung si Isa, “Ya mbal takoleꞌ eꞌ manusiyaꞌ takoleꞌ du eꞌ Tuhan.”
28 Sakali ahꞌlling si Petros, yukna, “Ndaꞌun ba kami itu. Bay na bbahan kami ai-ai kamemon boꞌ ameyaꞌ ma kaꞌa.”
29 “Ahoꞌ,” yuk si Isa, “maka hakaꞌanta kam toꞌongan, sasuku bay angꞌbbahan lumaꞌna, atawa hꞌndana, atawa danakanna, atawa inaꞌ-mmaꞌna, atawa panganakna, ma sabab katuyuꞌna ma pagparinta Tuhan, 30 tinungbasan du iya eꞌ Tuhan ma dunya dakayuꞌ itu, lipat manglipat min bay bbahanna. Ati ma ahirat pinasukuꞌan iya kallum taptap ni kasaumulan.”
Amissala si Isa Pabīng Pasal Kamatayna
31 Manjari binowa eꞌ si Isa mulidna kasangpūꞌ maka duwa pasaddī min aꞌa kaseheꞌan boꞌ yampa sigām hakaꞌanna. “Pakale kam,” yukna. “Itiyaꞌ na kitam patukad ni Awrusalam. Mainaꞌan paꞌin kitam, pinamattan du kamemon bay tasulat eꞌ kanabi-nabihan ma pasalku, Anak Manusiyaꞌ. 32 Sinōngan aku ni pangꞌntanan saga aꞌa nggaꞌi ka Yahudi, ati pinagudjuꞌ-udjuꞌ aku eꞌ sigām. Nihalipulu isab aku, pinagludjaꞌan, pinagdaplosan maka pinapatay. 33 Sagōꞌ taꞌabut paꞌin tꞌllumbahangi min kamatayku allum du aku pabīng.”
34 Saguwāꞌ halam tahati eꞌ saga mulidna bang ai bissala si Isa inān. Halam makasobsob ni deyom pikilan sigām, maka halam tahati eꞌ sigām bang ai pinahꞌlling eꞌna.
Aꞌa Buta Kauliꞌan eꞌ si Isa
35 Manjari, asekot paꞌin disi Isa ni daꞌira Ariha, aniyaꞌ aꞌa buta aningkōꞌ ma bihing lān palabayan sigām. Hinangna angamuꞌ sīn. 36 Makakale paꞌin buta itu ma baꞌanan aꞌa maglaulabay minnaꞌan, tinilaw eꞌna bang ai sababanna. 37 Nihakaꞌan iya eꞌ saga aꞌa, yuk-i, “Ilu palabay si Isa, aꞌa min Nasaret.”
38 Pagkalena itu, magtūy iya angalingan pakosog. “O Isa,” yukna, “tubuꞌ Sultan Daꞌud, maꞌaseꞌ ka ba ma aku!” 39 Pinahꞌllingan iya eꞌ saga aꞌa ma mundaꞌan inān, sinōꞌ iya daꞌa maghibuk. Sagōꞌ pinakosog gom paꞌin pangalinganna. “O Isa, tubuꞌ Sultan Daꞌud,” yukna, “maꞌaseꞌ na ka!”
40 Jari pahondong si Isa ati sohoꞌna aꞌa buta inān binowa ni iya. Makasekot paꞌin, atilaw si Isa, yukna, 41 “Ai kabayaꞌannu hinangku ma kaꞌa?”
“Tuwan,” yukna, “kabayaꞌanku makaꞌndaꞌ pabīng.”
42 Yuk si Isa ni iya, “Makaꞌndaꞌ na ka. Pauliꞌ na matanu ma sabab pangandolnu ma aku.”
43 Saruꞌun-duꞌun du iya makaꞌndaꞌ pabīng ati ameyaꞌ paturul ma si Isa maka eꞌna ananglitan Tuhan. Pagꞌndaꞌ itu eꞌ baꞌanan aꞌa inān, ya du sigām kamemon ameyaꞌ ananglitan Tuhan.