10
Pasal Pagtiman Aꞌa Maglakibini
1 Manjari alaꞌan si Isa min lahat inaꞌan boꞌ pehēꞌ ni lahat Yahudiya maka ni jadjahan lahat ma liyu sapaꞌ Jordan. Aheka isab saga aꞌa patimuk ni iya, ati panduꞌanna sigām buwat asal kabiyaksahanna.
2 Na, aniyaꞌ pinaꞌan ni iya saga aꞌa Parisi ya magniyat anulayan iya boꞌ supaya tajallat ma bissalana. Yuk sigām ma iya, “Bang ma saraꞌtam, makajari bahāꞌ bang lꞌlla animanan hꞌndana?”
3 Anambung si Isa yukna, “Ai bay panohoꞌan kaꞌam ma saraꞌ si Musa?”
4 Yuk sambung sigām, “Bang ma saraꞌ si Musa, makajari lꞌlla animanan hꞌndana bang paꞌin aniyaꞌ sulatna pagpasahan.”
5 Yuk si Isa, “Ya angkan kam sinulatan saraꞌ buwattilu eꞌ si Musa sabab agagga kam. 6 Ma awal tagnaꞌ, ma waktu kapamapanjari Tuhan ma manusiyaꞌ, bay sigā pinapanjari eꞌna lꞌlla maka dꞌnda, buwat bay tasulat ma deyom Kitab, ya yuk-i, 7 ‘Angkanna lꞌlla angꞌbba min inaꞌ-mmaꞌna boꞌ parakayuꞌ ni hꞌndana. 8 Manjari in bay duwa baran, dabaran na.’ Nggaꞌi ka na sigā duwa baran,” yuk si Isa, “sagōꞌ dabaran na sigā karuwangan. 9 Angkan subay mbal pinapagbutas eꞌ manusiyaꞌ ya bay pinagdakayuꞌ eꞌ Tuhan.”
10 Maka-mareyom lumaꞌ paꞌin disi Isa pabīng, tinilaw iya eꞌ saga mulidna pasal pagtiman itu. 11 Yukna ni sigām, “Sai-sai animanan hꞌndana boꞌ maghꞌnda iya saddī, taga-dusa iya angaliyu-lakad min hꞌndana poꞌon. 12 Damikiyanna bang dꞌnda ya animanan hꞌllana boꞌ maghꞌlla saddī, taga-dusa isab iya angaliyu-lakad.”
Kalasa si Isa ma Kamanahutan
13 Na, aniyaꞌ saga aꞌa amowa anak sigām ni si Isa boꞌ supaya pinatꞌnnaꞌan tanganna. Sagōꞌ aꞌa amowa inān bay pinabukagan eꞌ kamuliran si Isa. 14 Jari pagꞌndaꞌ itu eꞌ si Isa, angastol iya ma saga mulid eꞌ ati yukna, “Parūlunbi piꞌitu ni aku saga kamanahutan ilu. Daꞌa lāngunbi. Sabab sai-sai makasaliꞌ kaul-piꞌilna ni buwat kamanahutan ilu, taga-palsukuꞌan du ma deyoman pagparinta Tuhan. 15 Bꞌnnal ya pangahakaku ma kaꞌam, bang aꞌa mbal pasulut ma pagparinta Tuhan buwat kapasulut ondeꞌ-ondeꞌ, aꞌa inān mbal pasōd ni pagparintahan Tuhan.” 16 Jari ginapus eꞌna saga ondeꞌ-ondeꞌ inān, pinatꞌnnaꞌ eꞌna tanganna ni sigām boꞌ yampa amuꞌanna kahāpan.
Pasal Aꞌa Taga-Karaya
17 Manjari itu, song paꞌin pauntas si Isa ni palꞌngngananna pabīng, aniyaꞌ dakayuꞌ lꞌlla paragan tudju ni iya. Angōk-tuꞌut aꞌa itu ma dahuan si Isa maka eꞌna atilaw, yukna, “Tuwan Guru, asal ka ahāp. Ai subay hinangku boꞌ supaya aku kaniyaꞌan kallum ya taptap ni kasaumulan?”
18 Yuk si Isa ni iya, “Angay yuknu in aku ahāp? Halam aniyaꞌ ahāp, luwal Tuhan dakayuꞌ-kayuꞌ. 19 Kataꞌuwannu asal bay panohoꞌan Tuhan: Daꞌa ka amonoꞌ. Daꞌa ka angaliyu-lakad ni nggaꞌi ka pagholaꞌnu. Daꞌa ka anangkaw, daꞌa ka anaksiꞌ puting. Daꞌa ka angulliꞌan pagkahinu boꞌ taꞌāꞌ altaꞌna. Pagaddatin inaꞌ-mmaꞌnu.”
20 Yuk lꞌlla ni iya, “Tuwan Guru, bay na kabogboganku inaꞌan-i kamemon sangay min kaondeꞌ-ondeꞌku.”
21 Pagꞌndaꞌ si Isa ma aꞌa itu, tꞌkkahan iya lasa ati yukna, “Aniyaꞌ giꞌ dakayuꞌ halam tahinangnu. Pehēꞌ ka, pabꞌllihin altaꞌnu kamemon boꞌ pamuwanun bꞌllihanna ma saga aꞌa miskin. Manjari aniyaꞌ du karayanu ma deyom sulgaꞌ. Puwas eꞌ piꞌitu ka ameyaꞌ ma aku.” 22 Pagkale aꞌa itu ma bissala si Isa, alaꞌat magtūy sꞌmmuna. Alaꞌan iya minnēꞌ maka eꞌna asusa sabab landuꞌ aheka pangaltaꞌna.
23 Angꞌndaꞌ si Isa ni saga mulidna boꞌ yukna ma sigām, “Saga aꞌa dayahan kahunitan pinasōd ni deyoman pagparinta Tuhan!” 24 Takuddat saga mulidna ma bissalana itu, sagōꞌ aniyaꞌ giꞌ sinugpatan, yuk-i, “Saga bagay, ahunit sidda kasōd aꞌa ni deyoman pagparinta Tuhan! 25 Kaluhayan giꞌ untaꞌ palabay min buliꞌ jalum min aꞌa dayahan pasōd ni pagparintahan Tuhan.”
26 Pasōng gom paꞌin kainu-inu saga mulid, ati yuk sigām ni iya, “Oy! Bang buwattēꞌ, sai bahāꞌ makasampay ni kasalamatan ni deyom sulgaꞌ?”
27 Pinandang eꞌ si Isa saga mulidna maka eꞌna ahꞌlling, yukna, “Bang manusiyaꞌ mbal toꞌongan makarapat sagōꞌ tarapat du eꞌ Tuhan sabab halam aniyaꞌ ahunit ma iya.”
28 Sakali ahꞌlling si Petros, yukna, “Ndaꞌun ba kami itu. Bay na bbahan kami ai-ai kamemon boꞌ ameyaꞌ ma kaꞌa.”
29 “Ahoꞌ,” yuk si Isa ma sigām, “maka hakaꞌanta kam toꞌongan, sasuku bay angꞌbbahan lumaꞌna, atawa danakanna, atawa inaꞌ-mmaꞌna, atawa panganakna, atawa tanaꞌna, tinungbasan du iya. Bang heꞌ-i bay bbahanna ma sabab katuyuꞌna ma aku maka ma sabab lapal ahāp, 30 tinungbasan du iya paheka eꞌ Tuhan ma dunya itu-i. Tinungbasan iya lumaꞌ, danakan, inaꞌ, panganak, maka tanaꞌ, lipat manglipat min bay bbahanna. Sagōꞌ pinatꞌkkahan iya kalaꞌatan isab ma dunya itu ma sabab pameyaꞌna ma aku. Ma dunya ahirat pinasukuꞌan du iya kallum taptap ni kasaumulan. 31 Sagōꞌ aheka aꞌa makarahū buwattinaꞌan pinaramuli du ma waktu sinōng. Aheka isab taramuli ma buwattinaꞌan pinarahū du ma waktu sinōng.”
Si Isa Amissala Pabīng Pasal Kamatayna
32 Na, ma labayan paꞌin disi Isa patukad tudju ni daꞌira Awrusalam, parahū si Isa min saga mulidna. Jariꞌ takꞌbbal deyom atay sigām, tināw isab saga aꞌa kaseheꞌan ya paturul min buliꞌan. Manjari binowa eꞌ si Isa mulidna kasangpūꞌ maka duwa pasaddī min aꞌa kaseheꞌan inān boꞌ pahatina sigām pasal pakaradjaꞌan ya song patꞌkka ni iya. 33 “Pakale kam,” yukna. “Itiyaꞌ kitam patukad ni Awrusalam, ati mainaꞌan paꞌin, in aku, ya pinagōnan Anak Manusiyaꞌ, sinōngan du ni pangꞌntanan saga kaimaman alanga maka saga guru saraꞌ agama. Pinataluwaꞌan aku hukuman ni kamatay. Puwas eꞌ niꞌndeꞌan aku ni pangꞌntanan saga aꞌa nggaꞌi ka Yahudi, 34 ati pinagudjuꞌ-udjuꞌ aku eꞌ bangsa inān sampay pinagludjaꞌan. Pinagdaplosan du aku boꞌ yampa nilansang pinapatay. Sagōꞌ apuwas paꞌin tꞌllumbahangi min kamatayku allum du aku pabīng.”
Kapangamuꞌ si Yakub maka si Yahiya
35 Sakali pinaꞌan ni si Isa si Yakub maka si Yahiya ya anak si Sibidi karuwangan. “Tuwan Guru,” yuk sigā, “aniyaꞌ amuꞌ kami bang paꞌin hinangannu kami.”
36 Yuk si Isa, “Ai amuꞌbi?”
37 Anambung sigā, yuk-i, “Bang taꞌabut waktu kapaningkōꞌnu ma kasahayaꞌannu, ya kabayaꞌan kami subay pinatingkōꞌ eꞌnu ma bihingnu, dakayuꞌ ma kowan, dakayuꞌ ma gibang.”
38 Yuk si Isa, “Mbal kataꞌuwanbi bang ai amuꞌbi ilu. Makasandal kam bahāꞌ pinananaman kasukkalan buwat pamasukkal aku ma sinosōng ilu? Atawa makasandal kam pinalabay min kabinasahan ya song labayanku?”
39 “Ahoꞌ, makasandal du kami,” yuk duwangan eꞌ.
Yuk si Isa, “Asal makananam du kam kasukkalan buwat song patꞌkka ni aku. Makalabay du kam min kabinasahan ya song labayanku. 40 Sagōꞌ halam aniyaꞌ kapatutku ameneꞌ bang sai pinatingkōꞌ ma bihingku kowan atawa ma bihingku gibang. Sukuꞌ koꞌ inān saga aꞌa ya tinagamahan paningkōꞌan inaꞌan-i eꞌ Tuhan.”
41 Takale paꞌin eꞌ saga sangpūꞌ mulid si Isa pasal bay niamuꞌ eꞌ si Yakub maka si Yahiya, magtūy in sigā karuwangan itu kinapꞌddiꞌan atay. 42 Angkan sigām sinōꞌ eꞌ si Isa patimuk ni atagna. Yukna, “Kataꞌuwanbi kajarihan saga aꞌa ma dunya itu. Ya binista taga-kapatut ma saga bangsa nggaꞌi ka Yahudi, ya na aꞌa magparintahan sigām maka magmandahan sasuku ma deyoꞌan sigām. Ya du saga puntuk nakuraꞌ sigām, angahagda asal ma sigām. 43 Sagōꞌ kaꞌam ilu mbal subay magbuwattēꞌ. Sai-sai kam bilahi taga-ōn ma deyomanbi, subay magsosohoꞌan ni kaseheꞌan. 44 Sai-sai kam bilahi pinalanga subay magpaꞌata ni aꞌa kamemon boꞌ anabangan sigām. 45 Subay iya paꞌanggil ni aku ya Anak Manusiyaꞌ itu,” yuk si Isa. “Ya piꞌituku ni dunya nggaꞌi ka aku subay pinaghinangan eꞌ saga manusiyaꞌ, sagōꞌ sigām ya subay tabangku. Piꞌitu isab aku boꞌ paglillaꞌku kallumku pangalꞌkkatku saga aꞌa aheka min paldusahan sigām.”
Si Bartimiyus Kauliꞌan eꞌ si Si Isa
46 Na, atꞌkka na disi Isa ni daꞌira Ariha. Jari itu, atulak paꞌin iya maka saga mulidna minnēꞌ, maka aheka isab aꞌa parongan ma sigām, aniyaꞌ aꞌa buta aningkōꞌ ma bihing lān palabayan sigām. Si Bartimiyus ōnna, ya anak si Timiyu. Hinangna anantiliꞌ.a 47 Makataꞌu paꞌin iya in si Isa min Nasaret inaꞌan palabay, magtūy iya angalingan pakosog. “O Isa,” yukna, “tubuꞌ sultan Daꞌud, maꞌaseꞌ ka ba ma aku!”
48 Pinabukagan iya eꞌ kahekaꞌan aꞌa inān, sinōꞌ daꞌa ahidjul. Sagōꞌ pinakosog gom paꞌin pangalinganna, yukna, “O Isa, tubuꞌ Sultan Daꞌud, maꞌaseꞌ na ka!”
49 Pahoggaꞌ si Isa boꞌ ahꞌlling ni saga seheꞌna. “Linganinbi iya piꞌitu,” yukna.
Jari nilinganan na iya, yuk-i, “Palasig ka. Anꞌngge ka sabab inaꞌan si Isa angalinganan kaꞌa.” 50 Magtūy palaksu buta itu min baina maka eꞌna angalaꞌanan manta bay pakꞌmmosna boꞌ pasekot ni si Isa.
51 Yuk si Isa ma iya, “Ai kabayaꞌannu hinangku ma kaꞌa?”
“Tuwan Guru,” yukna, “bilahi aku makaꞌndaꞌ pabīng.”
52 Yuk si Isa ma iya, “Amoleꞌ na ka. Pauliꞌ na matanu ma sabab pangandolnu ma aku.” Saruꞌun-duꞌun du iya makaꞌndaꞌ pabīng ati ameyaꞌ iya paturul ma si Isa ma palꞌngngananna.