16
Pasal Magmandul Atahaꞌ Akkalna
1 Manjari itu amissala giꞌ si Isa ma saga mulidna, yukna, “Aniyaꞌ aꞌa dayahan maka aniyaꞌ isab magmandul ma altaꞌna. Manjari tinuntutan magmandul itu in iya konoꞌ hal amakaꞌat altaꞌ nakuraꞌna. 2 Angkan tinambukuhan magmandul inān eꞌ nakuraꞌ, sinōꞌ patampal ni iya. Yuk nakuraꞌ, ‘Ai bahāꞌ takaleku pasal kaꞌa itu? Bistahun kamemon bay pangandolku ma kaꞌa, sabab mbal na ka magmandulan altaꞌku.’ 3 Amikil-mikilan di-na magmandul itu, yukna, ‘Ai tahinangku buwattinaꞌan sabab itiyaꞌ na aku pinalaꞌan min bay hinangku. Mbal na aku makakoleꞌ magkalga, maka aiyaꞌ aku angamuꞌ sin. 4 Ā, kataꞌuwanku na bang ai subay hinangku supaya aniyaꞌ bagay angokoman aku bang aku pinalaꞌan na min hinangku.’
5 “Jari nilinganan eꞌna saga aꞌa taga-utang ma nakuraꞌna, dangan maka dangan. Yukna ni aꞌa dahū pinaꞌan ni iya, ‘Pila utangnu ma nakuraꞌku?’
6 “Ya sambungna, ‘Dahatus mital nsꞌllan pagbꞌlla.’
“Yuk mandul ma iya, ‘Ā, itiyaꞌ katasnu. Pasaꞌut ka aningkōꞌ, sulatun limampūꞌ mital sadja.’ 7 Yukna isab ni aꞌa taga-utang pasunuꞌ, ‘Kaꞌa, pila utangnu?’
“Yuk aꞌa heꞌ, ‘Dahatus karut pai-tirigu.’
“Yuk mandul ma iya, ‘Itiyaꞌ katasnu. Sulatun mailu walumpūꞌ karut sadja.’
8 “Na, makakale paꞌin nakuraꞌ pasal hinang sosohoꞌanna angakkal itu, magtūy sanglitanna ma sabab katahaꞌ akkalna.” Yuk si Isa isab, “Saga aꞌa mbal ameyaꞌ ma Tuhan, atahaꞌ giꞌ akkal sigām min saga aꞌa ya ameyaꞌ ma Tuhan, sabab ataꞌu sigām anguntungan pagkahi sigām.
9 “Angkan pituwahanta kam,” yuk si Isa, “paggunahunbi altaꞌbi maitu ma dunya boꞌ supaya kam makabāk bagay. Manjari bang taꞌabut waktu kahalam altaꞌbi, tinaimaꞌ du kam mahēꞌ ma paglahatanbi kakkal. 10 Bang aꞌa kapangandolan ma altaꞌ arikiꞌ, kapangandolan du isab ma altaꞌ aheya. Damikiyanna isab bang aꞌa mbal pangandolan ma altaꞌ arikiꞌ, mbal isab kapangandolan ma altaꞌ aheya. 11 Na, abila kam pinasukuꞌan altaꞌ maitu ma dunya itu, boꞌ mbal kapangandolan, mbal du pinangandol ma kaꞌam altaꞌ bꞌnnal. 12 Maka bang kam mbal kapangandolan angꞌntan altaꞌ nggaꞌi ka sukuꞌbi, mbal du pangandol ma kaꞌam altaꞌ ya dī palsukuꞌanbi.
13 “Halam aniyaꞌ ipatan makapagduwa nakuraꞌ sabab tantu kabꞌnsihanna nakuraꞌ dakayuꞌ maka kalasahanna dakayuꞌ. Amalut iya ma dakayuꞌ ati taikutanna dakayuꞌ. Hatina mbal kam manjari maghinang ma Tuhan bang pilak ya paheyabi ma atay.”
Pamanduꞌ si Isa Kaseheꞌ
14 Takale paꞌin panduꞌ si Isa itu eꞌ saga Parisi, magtūy iya tinittowahan eꞌ sigām sabab napsuhan sigām ma pilak. 15 Sagōꞌ ahꞌlling si Isa ni sigām, yukna, “Kaꞌam ilu hal magbontol-bontol di-bi ma pangꞌndaꞌ aꞌa, sagōꞌ kinataꞌuwan asal deyom ataybi eꞌ Tuhan. Ya pinahalgaꞌ ma atay eꞌ manusiyaꞌ halam du aniyaꞌ kagunahanna bang ma Tuhan.”
16 Yukna isab, “Ma waktu halam giꞌ piꞌitu si Yahiya Magpapandi, ya na paꞌin pinagnasihat usulan saraꞌ bay pangꞌbba eꞌ si Musa maka sulat bay tasulat eꞌ kanabi-nabihan. Sagōꞌ buwattinaꞌan, sangay min waktu kapiꞌitu si Yahiya sampay ni llaw itu, ya pinagnasihat lapal ahāp pasal pagparinta Tuhan. Ati amanuyuꞌ toꞌongan saga aꞌa kamemon pasōd ni deyom pagparintahanna. 17 Sagōꞌ in saraꞌ bay pangꞌbba eꞌ si Musa mbal du apinda kapatutna. Aluhay giꞌ nilanyapan dunya itu maka langit, min dakayuꞌ balis ma saraꞌ pinindahan.”
18 Yukna isab, “Sai-sai animanan hꞌndana boꞌ angahꞌnda saddī, taga-dusa iya angaliyu-lakad min hꞌndana poꞌon. Maka sai-sai angahꞌnda bituꞌanun taga-dusa isab buwattēꞌ.”
Aꞌa Dayahan maka si Lasarus
19 Ahꞌlling giꞌ si Isa, yukna, “Aniyaꞌ aꞌa dayahan asal magsꞌmmek ahalgaꞌ, maka ahāp sadja kinakanna sakahabaꞌ llaw. 20 Aniyaꞌ isab aꞌa miskin ōnna si Lasarus, aliput baranna eꞌ dugsul. Ya kabiyaksahanna binowa iya palege ma atag lawang lumaꞌ aꞌa dayahan inān. 21 Sabab aholat iya kabuwanan lꞌbbi kinakan bang aniyaꞌ apakpak min pagkakanan aꞌa dayahan. Pehēꞌ isab saga eroꞌ angandelatan baꞌanan dugsulna.
22 “Manjari amatay miskin itu ati binowa iya eꞌ saga malaꞌikat ni deyom sulgaꞌ, ni pangayurahan si Ibrahim. Puwas eꞌ amatay isab aꞌa dayahan ati kinubul. 23 Mahēꞌ paꞌin ma ahirat, kapꞌddiꞌan toꞌongan aꞌa dayahan eꞌ. Jari pahangad iya ati taꞌndaꞌna si Ibrahim mahēꞌ ma kalawakan, maka si Lasarus isab mahēꞌ ma bihingna. 24 Angkan iya angalingan magtūy ni si Ibrahim. ‘O mboꞌ Ibrahim,’ yukna, ‘maꞌaseꞌ ka ma aku! Sohoꞌun si Lasarus piꞌitu. Bang paꞌin tꞌnnoꞌanna hal tōng tudluꞌna ni deyom boheꞌ boꞌ pꞌttakanna ni dꞌllaꞌku, sabab kapꞌddiꞌan aku toꞌongan ma deyom api itu.’
25 “Sagōꞌ anambung si Ibrahim. ‘Otoꞌ,’ yukna, ‘entomun jaman bay kallumnu lagiꞌ. Bay ka pinaniyaꞌan kahāpan indaginis, boꞌ si Lasarus ya bay pinaniyaꞌan kalaꞌatan. Sagōꞌ ma buwattinaꞌan itiyaꞌ iya taga-palasahan ahāp, boꞌ kaꞌa ya kabinasahan. 26 Maka nggaꞌi ka hal ilu-i, sabab aniyaꞌ butasan alalom pinatꞌnnaꞌ ma llotantam angkan sai-sai bilahi piꞌilu minnitu, mbal makalintas. Damikiyanna, halam aniyaꞌ minnilu makalintas piꞌitu.’
27 “Yuk aꞌa dayahan eꞌ, ‘Na, bang buwattilu, mboꞌ, ya amuꞌku junjung ni kaꞌa: sōꞌun sadja si Lasarus ilu pehēꞌ ni lumaꞌ mmaꞌku, 28 sabab aniyaꞌ lima danakanku lꞌlla mahēꞌ. Sohoꞌun sigām pinituwahan ma si Lasarus boꞌ mbal piꞌitu ni lahat pangananaman pꞌddiꞌ itu.’
29 “Yuk si Ibrahim, ‘Inaꞌan ma sigām kasulatan si Musa maka kanabi-nabihan pamituwa sigām. Ya na inaꞌan subay niꞌikut eꞌ sigām.’
30 “Yuk aꞌa dayahan, ‘Mbal sigām angikut, mboꞌ. Saguwāꞌ bang aniyaꞌ pinaꞌan ni sigām aꞌa bay amatay pabungkal na min kamatay, tantu du sigām angꞌbba min dusa sigām.’
31 “Yuk sambung si Ibrahim, ‘Bang mbal tabeyaꞌ eꞌ sigām bay tasulat eꞌ si Musa maka kanabi-nabihan, mbal sigām tabowa amꞌnnal minsan aniyaꞌ aꞌa pabungkal min kamatayna.’ ”