17
Pasal Aꞌa Amowa Pagkahina Magdusa
1 Amanduꞌ lagiꞌ si Isa ma saga mulidna, yukna, “Tantu aniyaꞌ sasat-manasat paniyaꞌ na paꞌin ma manusiyaꞌ makaparusa sigām. Saguwāꞌ makaꞌaseꞌ-aseꞌ sidda ya pamakadal ma sasuku anasat seheꞌna amowa magdusa, sabab bininasa du iya eꞌ Tuhan. 2 Ahāp lagiꞌ aꞌa inān pinagantungan batu abuhat ma kꞌllongna boꞌ yampa nihūg ni timbang, bang paꞌin daꞌa kalanduꞌan hinangna magparusa ma dakayuꞌ aꞌa areyoꞌ itu, ya taga-pangandol ma aku. 3 Angkan kam sohoꞌku subay kamayaꞌ-mayaꞌ,” yukna.
“Bang aniyaꞌ pagkahinu gantaꞌ makabuwan dusa ma kaꞌa, subay iya tōꞌannu bang ai dusana. Jari bang pagsusunanna dusana sampay bbahanna, subay iya ampunnu. 4 Bang min pituꞌ iya makabuwan dusa ma kaꞌa ma deyom dangꞌllaw, ati min pituꞌ iya magni-kaꞌa angamuꞌ ampun, subay iya ampunnu.”
Pasal Pangandol
5 Manjari ahꞌlling ni Panghūꞌ Isa saga mulidna bay kawakilanna. Yuk sigām, “Tuwan, pakosogun konoꞌ pangandol kami tudju ni Tuhan.”
6 Yuk Panghūꞌ, “Abila bay makasaliꞌ heya pangandolbi ni buwat heya bigi-tinanom landuꞌ anahut, makajari kam magpanohoꞌan ma kayu aheya itu, yukbi, ‘Pabubut ka minnilu boꞌ ka patꞌnnaꞌ ni deyom sꞌllang.’ Jari bineyaꞌ du buwat yukbi heꞌ.”
7 Ahꞌlling giꞌ si Isa, yukna, “Bang saupama aniyaꞌ sosohoꞌanbi, ya hinangna magararu ma tanaꞌbi atawa magipat saga hayopbi bili-bili. Bang iya tapoleꞌ min paghinanganna, ahꞌlling bahāꞌ kam ma iya, ‘Daiꞌ na ka amangan’? 8 Tantu mbal. Gom paꞌin yukbi, ‘Adjalun kinakanku boꞌ yampa ka asalin amuhatan aku. Subay na aku aubus amangan boꞌ yampa kaꞌa!’ 9 Magsukul kam bahāꞌ ma sosohoꞌanbi pagga hinangna panohoꞌanbi? Tantu mbal. 10 Damikiyanna isab kaꞌam ilu bang hinangbi kamemon bay panohoꞌan kaꞌam, subay yukbi, ‘Kami itu hal sosohoꞌan. Patut kami maghinang ai-ai ya panohoꞌan ma kami.’ ”
Sangpūꞌ Aꞌa Niꞌipul Kauliꞌan eꞌ si Isa
11 Manjari itu, ma palꞌngnganan paꞌin si Isa tudju ni Awrusalam, palabay iya min llot lahat Samariya maka lahat Jalil. 12 Pagtꞌkkana paꞌin ni dakayuꞌ kauman, aniyaꞌ pasampang ni iya sangpūꞌ aꞌa niꞌipul. Anꞌngge sigām ma kalawakan lagiꞌ 13 angalingan minnēꞌ. Yuk sigām, “O Isa! Tuwan! Maꞌaseꞌ na ka ma kami.”
14 Pagꞌndaꞌ si Isa ma sigām, yukna, “Pehēꞌ kam patūy ni saga imam boꞌ palilingunbi baranbi ma sigām, taꞌndaꞌ in kaꞌam kauliꞌan na.” Sakali itu, pasaltaꞌ sigām palꞌngngan pehēꞌ ni imam, na, kauliꞌan na. 15 Jari aniyaꞌ dangan min kasangpūꞌ inān, tananamna paꞌin in iya kauliꞌan na, pabīng iya magtūy maka atanog eꞌna ananglitan Tuhan. 16 Pasujud iya ni si Isa magsukul ni iya. Aꞌa itu bangsa Samariya asal. 17 Yuk si Isa, “Sangpūꞌ puhuꞌ kam bay kauliꞌan. Maꞌai na siyam-i? 18 Angay hal aꞌa liyu itu ya pabalik piꞌitu magsukul ni Tuhan?” 19 Manjari ahꞌlling si Isa ni aꞌa Samariya heꞌ, yukna, “Anꞌngge na ka boꞌ ka palanjal na. Kauliꞌan ka ma sabab pangandolnu.”
Pasal Kapagparinta Tuhan
20 Ma dakayuꞌ llaw aniyaꞌ saga Parisi atilaw si Isa bang sumiyan waktu pamatꞌnnaꞌ eꞌ Tuhan pagparintana ma manusiyaꞌ. Yuk sambung si Isa, “Bang patꞌnnaꞌ piꞌitu pagparinta Tuhan mbal taꞌndaꞌ kapiꞌituna. 21 Halam du aniyaꞌ ahꞌlling, ‘Ndaꞌunbi, itiyaꞌ maitu pagparintahan Tuhan!’ atawa ‘Inaꞌan na mainaꞌan!’ Sababna ilu na parinta Tuhan ma deyomanbi.”
22 Ahꞌlling giꞌ si Isa ma saga mulidna, yukna, “Aniyaꞌ du llaw ma sinosōng in kaꞌam ilu bilahi toꞌongan angꞌndaꞌ aku, Anak Manusiyaꞌ. Bilahi kam angꞌndaꞌ minsan ma dangꞌllaw sadja. Sagōꞌ mbal giꞌ taꞌndaꞌbi. 23 Aniyaꞌ aꞌa angahakaꞌan kaꞌam, yukna, ‘Inaꞌan iya mainaꞌan!’ atawa ‘Itiyaꞌ iya maitu!’ Sagōꞌ daꞌa kam pehēꞌ amiha aku. 24 Sabab bang taꞌabut llaw kapiꞌitu Anak Manusiyaꞌ pabalik, taꞌndaꞌ du eꞌ kamemon. Buwat du pakaꞌndaꞌ sigām ma lāt bang aninagan bꞌttong langit min bihing paruwambilaꞌ. 25 Sagōꞌ subay aku makananam kabinasahan aheya dahū giꞌ minnēꞌ. Subay aku sinulak eꞌ saga aꞌa ahil jaman itu boꞌ yampa taꞌabut llaw kapiꞌituku pabalik. 26-27 Jari bang taꞌabut waktu inaꞌan-i, saliꞌ du kahālanna maka kahālan bay ma masa si Nū. Bay sigām magkakanan na paꞌin maka maginuman. Bay sigām maghꞌnda-maghꞌlla sampay ni llaw karuwaꞌ disi Nū ni diyataꞌ adjung. Manjari nilatapan dunya eꞌ Tuhan ati magmula manusiyaꞌ kamemon. Na, buwattēꞌ du isab ya kahālan manusiyaꞌ bang aku Anak Manusiyaꞌ pabīng ni dunya.
28 “Damikiyanna isab saga aꞌa bay ma jaman lagiꞌ si Lōt. Magkakanan na paꞌin sigām maka maginuman, magbꞌlli maka magdagang, magtanom maka maghinang lumaꞌ. 29 Sagōꞌ taꞌabut paꞌin waktu kapalaꞌan si Lōt min daꞌira Sodom eꞌ, magtūy aniyaꞌ api maka mailang pinatumbuk saliꞌ ulan min deyom langit. Jari magmula saga aꞌa inān kamemon.
30 “Na, buwattēꞌ du isab kahālan saga aꞌa ma dunya itu bang taꞌabut llaw pamaꞌndaꞌ aku, in Anak Manusiyaꞌ itu. 31 Pagtꞌkka llaw inaꞌan, bang aniyaꞌ aꞌa gantaꞌ ma luwasan lumaꞌna boꞌ aniyaꞌ palsukuꞌanna tabba ma deyom lumaꞌ, subay mbal sōdna lumaꞌ inān. Damikiyanna isab bang aniyaꞌ aꞌa ma humana, subay mbal balikna lumaꞌna. 32 Pamintānginbi ya bay patꞌkka ni hꞌnda si Lōt bay ma masa awal eꞌ. 33 Sai-sai allogan kallum baranna, halam du aniyaꞌ kallumna taptap. Sagōꞌ sai-sai mbal allogan baranna ma sababku, minsan iya amatay, makabāk du kallum kakkal. 34 Hakaꞌanta kam,” yuk si Isa, “ma waktu pabalikku piꞌitu, aniyaꞌ aꞌa duwangan atuli ma dakayuꞌ du palegehan, jari niāꞌ dakayuꞌ inān ati tabba dakayuꞌ. 35 Aniyaꞌ du inān duwangan dꞌnda magtabang anganggiling tirigu. Niāꞌ dakayuꞌ ati taꞌbba dakayuꞌ. 36 Aniyaꞌ isab duwangan maghinang ma huma. Niāꞌ dakayuꞌ ati tabba dakayuꞌ.”
37 Manjari tinilaw si Isa eꞌ saga mulidna, yuk-i, “Tuwan, maingga patꞌkkahan ya yuknu ilu?”
Anambung si Isa magparalilan, yukna, “Maꞌingga-maꞌingga lahat aniyaꞌ patay, mainaꞌan du pagtipunan saga owak.”