9
1 Amissala giꞌ si Isa, yukna, “Bꞌnnal ya pahꞌllingku itu ma kaꞌam, aniyaꞌ maitu ma kaꞌam mbal amatay satꞌggol halam taꞌndaꞌna pagparinta Tuhan pinatꞌnnaꞌ beyaꞌ maka kawasa aheya.”
Kapinda Pangluwahan si Isa
2 Na, palabay paꞌin nnom llaw min waktu heꞌ-i, si Petros maka si Yakub maka si Yahiya waꞌi binowa eꞌ si Isa patukad ni būd alanga, hal sigām sadja. Mainaꞌan paꞌin, apinda pangluwahan si Isa ma pangꞌndaꞌ sigām. 3 Apoteꞌ toꞌongan sꞌmmekna, makasilaw sidda. Halam aniyaꞌ magdarakdak ma deyom dunya itu makapapoteꞌ sꞌmmek buwat kapoteꞌ sꞌmmekna inān. 4 Panyataꞌ isab pinaꞌan nabi Elija maka nabi Musa, taꞌndaꞌ eꞌ saga mulid eꞌ magsuli-suli maka si Isa. 5 Ahꞌlling si Petros ni si Isa, yukna, “Tuwan Guru, ahāp toꞌongan isab itiyaꞌ kami maitu. Angahinang kami tꞌllu panggung-panggung pasindunganbi maitu, dakayuꞌ ma kaꞌa, dakayuꞌ ma si Musa, maka dakayuꞌ ma si Elija.” 6 Buwattēꞌ tapamūngna sabab mbal kataꞌuwanna bang ai subay pahꞌllingna. Aheya sidda tāw saga mulid eꞌ.
7 Sakali aniyaꞌ gabun bay angalandungan sigām, maka aniyaꞌ suwala ahꞌlling minnēꞌ. Yuk suwala heꞌ, “Anakku koꞌ itu, ya kalasahanku. Iya ya kalehunbi.” 8 Pagꞌndaꞌ sigām paruruwambilaꞌ ma sigām, halam aniyaꞌ aꞌa taꞌndaꞌ sigām, luwal si Isa.
9 Manjari itu, paglūd paꞌin sigām min būd eꞌ, binandaꞌan sigām eꞌ si Isa, yukna, “Daꞌa kam angahaka ni sai-sai pasal bay taꞌndaꞌbi ma diyataꞌ būd. Subay na aku, Anak Manusiyaꞌ, tapakallum pabīng min kamatayku boꞌ yampa kam angahaka.”
10 Niasip eꞌ sigām kabtangan si Isa itu sagōꞌ magtilaw-tilaw sigām katꞌllungan bang ai hatina ya bay yukna pasal kapakallum min kamatay. 11 Sakali tinilaw iya eꞌ sigām, yuk-i, “Angay magpaꞌin saga guru saraꞌ agama in si Elija subay palahil dahū piꞌitu?”
12 Anambung si Isa ma sigām, yukna, “Bꞌnnal koꞌ ilu, palahil dahū si Elija min Al-Masi boꞌ anakapan kamemon. Saguwāꞌ tasulat asal ma deyom Kitab pasal Anak Manusiyaꞌ in iya subay makalabay kabinasahan aheya maka subay nihalipulu. Angay bahāꞌ? 13 Sagōꞌ hakaꞌanta kam pasal si Elija. Bay na iya palahil ati tahinang ma iya eꞌ saga manusiyaꞌ ai-ai kabayaꞌan sigām, buwat bay tasulat asal ma deyom Kitab ma pasalna.”
Ondeꞌ-ondeꞌ Sinōd Saitan Kauliꞌan eꞌ si Isa
14 Na, makabalik paꞌin disi Isa ni saga mulid kaseheꞌan, lumanduꞌan aheka aꞌa taꞌndaꞌ eꞌ sigām magtimuk. Aniyaꞌ isab saga guru saraꞌ agama taꞌndaꞌ eꞌ sigām magjawab maka saga mulid si Isa kaseheꞌ. 15 Pagꞌndaꞌ kahekaꞌan aꞌa itu ma si Isa, aheya kainu-inuhan sigām ati paragan sigām anampang iya. 16 Atilaw si Isa, yukna, “Ai pagjawabanbi ilu?”
17 Jari aniyaꞌ anambung min deyom katimukan aꞌa inān, yukna, “Tuwan Guru, bay bowaku ni kaꞌa anakku lꞌlla sabab sinōd iya saitan umaw. 18 Kahabaꞌ waktu, bang iya kasangonan eꞌ saitan itu, pinahantak iya ni tanaꞌ. Anuput-nuput bowaꞌna, magtageꞌot emponna, maka anuwas isab baranna. Bay amuꞌku pinalaꞌan eꞌ saga mulidnu itu sagōꞌ mbal takoleꞌ eꞌ sigām.”
19 Anambung si Isa, yukna, “Kaꞌam saga aꞌa ma tahun itu, halam toꞌongan aniyaꞌ imanbi! Subay buwattingga giꞌ tꞌggolku ma kaꞌam anandalan kabuwattilubi? Bowahun piꞌitu ondeꞌ ilu,” yukna. 20 Jari binowa iya ni si Isa.
Taꞌndaꞌ paꞌin si Isa eꞌ saitan, magtūy sinawan eꞌna ondeꞌ inān ati pinahantak ni tanaꞌ amaspad. Anuput-nuput isab bowaꞌna. 21 Atilaw si Isa ma mmaꞌ ondeꞌ inān, yukna, “Sumiyan giꞌ bay kabuwattituna itu?”
“Sangay min karikiꞌ-dikiꞌna,” yuk mmaꞌna. 22 “Araran iya pinahantak eꞌ saitan ni deyom api atawa ni deyom boheꞌ boꞌ pinapatay. Ndūꞌ tuwan, bang takoleꞌnu, maꞌaseꞌ ka ba. Tabangun kami!”
23 Yuk si Isa ma iya, “Angay tilawnu bang takoleꞌku? Bang aꞌa taga-iman,” yukna, “takoleꞌna kamemon.”
24 Atanog magtūy pahꞌlling mmaꞌ ondeꞌ heꞌ, yukna, “Aniyaꞌ imanku sagōꞌ kulang lagiꞌ. Tabangin aku boꞌ supaya pasōng kosogna.”
25 Pagꞌndaꞌ si Isa ma kahekaꞌan aꞌa inān song na pagipit ni iya, magtūy lāngna saitan eꞌ. “Kaꞌa saitan umaw maka bisu,” yukna, “sohoꞌta ka alaꞌan min deyom baran ondeꞌ ilu. Daꞌa ka pasōd piꞌilu pabīng!”
26 Jari itu, aubus paꞌin eꞌ saitan angolang pakosog maka eꞌna amaspad ondeꞌ inān, paluwas iya min baranna. Sakali angaluwa patay ondeꞌ inān, angkan yuk kahekaꞌan aꞌa inān, “Na! Amatay na!” 27 Sagōꞌ binalutan tangan ondeꞌ inaꞌan eꞌ si Isa boꞌ tabanganna papunduk. Anꞌngge iya magtūy.
28 Na, makasōd paꞌin si Isa ni deyom lumaꞌ, tinilaw iya eꞌ saga mulidna pagka sigām-sigām laꞌa. Yuk-i, “Angay kami bay mbal makapaluwas saitan eꞌ?”
29 Yuk si Isa, “Ya ginis saitan inaꞌan mbal tapaluwas, luwal bang niamuꞌan tabang min Tuhan.”
Si Isa Amissala Pabīng Pasal Kamatayna
30 Manjari palanjal na disi Isa minnaꞌan boꞌ palabay min tꞌngngaꞌ lahat Jalil. Ya kabayaꞌan si Isa subay halam aniyaꞌ makataꞌu bang piꞌingga palꞌngngananna, 31 sabab inaꞌan iya amanduꞌan saga mulidna. Yukna ni sigām, “Aku, Anak Manusiyaꞌ itu, araiꞌ na sinōngan ni pangꞌntanan saga aꞌa ati pinapatay du aku eꞌ sigām. Sagōꞌ puwas tꞌllumbahangi min kapamapatay ma aku, allum du aku pabīng.”
32 Saguwāꞌ halam tahati bissala si Isa inān eꞌ saga mulidna, maka mbal isab sigām makatawakkal anilaw iya.
Sai Ya Katapusan Alanga?
33 Manjari itu atꞌkka na sigām ni daꞌira Kapirnaum. Makasōd paꞌin si Isa ni deyom lumaꞌ, tinilaw eꞌna saga mulidna, yukna, “Ai bay paglugatanbi ma labayan eꞌ?”
34 Sagōꞌ mbal sigām bilahi anambung sabab ya paglugatan sigām bang sai ya katapusan alanga. 35 Jari aningkōꞌ si Isa boꞌ lingananna saga mulidna kasangpūꞌ maka duwa inaꞌan pabihing ni iya. Yukna ma sigām, “Sai-sai bilahi pinalanga toꞌongan subay magpatireyoꞌ di-na min kamemon. Subay iya magsosohoꞌan ni pagkahina kamemon.” 36 Sakali niāꞌ eꞌ si Isa dakayuꞌ ondeꞌ-ondeꞌ pinatꞌngge eꞌna ma dahuwan sigām. Ginapus paꞌin eꞌna ondeꞌ itu, yukna ni sigām, 37 “Sai-sai anaimaꞌ dakayuꞌ ondeꞌ-ondeꞌ buwattitu ma sabab ōnku ya pamanyabutanna, saliꞌ du baranku ya tinaimaꞌ eꞌna. Maka sai-sai isab anaimaꞌ aku, nggaꞌi ka hal aku ya taimaꞌna. Taimaꞌna isab Tuhan ya bay amapiꞌitu aku ni dunya.”
Sasuku Mbal Anaggaꞌ Kitam Amogbog du
38 Jari itu aniyaꞌ pahꞌlling si Yahiya ni si Isa, yukna, “Tuwan Guru, aniyaꞌ dakayuꞌ aꞌa taꞌndaꞌ kami anabbut ōnnu pamaluwasna saitan min deyom baran aꞌa. Bay iya lāng kami sabab nggaꞌi ka seheꞌtam.”
39 Saguwāꞌ ahꞌlling si Isa, yukna, “Daꞌa iya lāngunbi sabab bang aꞌa makahinang hinang kawasahan ma sabab aku ya panabbutanna, mbal magtūy tapahꞌllingna laꞌat ma pasalan aku. 40 Sabab sai-sai mbal anaggaꞌ kitam amogbog du ma kitam. 41 Hakaꞌanta kam toꞌongan, sai-sai amuwanan kaꞌam minsan laꞌa hal dasawan boheꞌ ma sabab sukuꞌ kam Al-Masi, tantu aꞌa inān tinungbasan kahāpan.”
Pasal Aꞌa Amowa Pagkahina Magdusa
42 Yuk si Isa lagiꞌ, “Bang aniyaꞌ gantaꞌ makaparusa ma dakayuꞌ aꞌa areyoꞌ buwat hantang ondeꞌ itu, aꞌa taga-pangandol ma aku, ahāp lagiꞌ bang aꞌa makaparusa inān pinagantungan batu abuhat ma kꞌllongna boꞌ yampa nihūg ni timbang, bang paꞌin mbal kalanduꞌan hinangna buwattēꞌ. 43 Bang tanganbi gantaꞌ amowa kaꞌam magdusa gom lagiꞌ pōnganbi boꞌ mbal kalanduꞌan dusa heꞌ. Ahāp lagiꞌ kam pasōd ni deyom sulgaꞌ ma apukul dambilaꞌ tanganbi, bang paꞌin kam daꞌa nilarukan ni deyom api nalkaꞌ ya mbal kapꞌddahan ma ajukup tanganbi karuwambilaꞌ. [ 44 Ya kabinasahan aꞌa ma deyom nalkaꞌ heꞌ halam aniyaꞌ hāranna, ya pꞌddiꞌna halam aniyaꞌ tobtobanna.] 45 Bang tapeꞌbi isab gantaꞌ amowa kaꞌam magdusa, gom lagiꞌ pōnganbi. Ahāp lagiꞌ kam pasōd ni deyom sulgaꞌ ma apukul dambilaꞌ tapeꞌbi, bang paꞌin kam daꞌa nilarukan ni deyom api nalkaꞌ ma ajukup tapeꞌbi karuwambilaꞌ. [ 46 Ya kabinasahan aꞌa ma deyom nalkaꞌ heꞌ halam aniyaꞌ hāranna, ya pꞌddiꞌna halam aniyaꞌ tobtobanna.] 47 Bang matabi isab amowa kaꞌam magdusa, gom na paꞌin lugitunbi boꞌ mbal kalanduꞌan dusa heꞌ. Ahāp lagiꞌ kam pasōd ni deyom pagparintahan Tuhan ma abuta dambilaꞌ matabi, bang paꞌin kam daꞌa nilarukan ni deyom api nalkaꞌ ma ajukup matabi karuwambilaꞌ. 48 Ya kabinasahan aꞌa ma deyom nalkaꞌ heꞌ halam aniyaꞌ hāranna, ya pꞌddiꞌna halam aniyaꞌ tobtobanna.”