17
Kapinda Pangluwahan si Isa
1 Palabay paꞌin nnom llaw min waktu heꞌ-i, binowa eꞌ si Isa si Petros maka duwangan magdanakan, ya si Yakub maka si Yahiya, patukad ni diyataꞌ būd alanga, sigām-sigām sadja. 2 Mainaꞌan paꞌin sigām, apinda luwa si Isa ma pangꞌndaꞌ sigām. Asahaya pamaihuꞌanna buwat mata llaw. Makasilaw sidda poteꞌ sꞌmmekna. 3 Sakali panyataꞌ pinaꞌan si Musa maka si Elijaa, taꞌndaꞌ eꞌ saga mulid inān magsuli-suli maka si Isa. 4 Ahꞌlling si Petros ni si Isa, yukna, “Tuwan Panghūꞌ, ahāp toꞌongan itiyaꞌ kami maitu. Bilahi ka bahāꞌ bang aku angahinang tꞌllu panggung-panggung pasindunganbi maitu, dakayuꞌ ma kaꞌa, dakayuꞌ ma si Musa itu, maka dakayuꞌ ma si Elija?”
5 Sabu paꞌin iya ahꞌlling, aniyaꞌ gabun asahaya bay angalandungan sigām, maka aniyaꞌ suwala ahꞌlling min deyomna. Yuk suwala heꞌ, “Anakku koꞌ itu kalasahanku. Landuꞌ aku kasulutan ma iya. Iya ya kalehunbi.”
6 Pagkale paꞌin suwala itu eꞌ saga mulid inān, landuꞌ toꞌongan sigām tināw angkan kumꞌppang magtūy sigām ni tanaꞌ. 7 Sagōꞌ pinaꞌan si Isa ni sigām amatꞌppak tanganna ma sigām. Yukna, “Pabungkal kam, daꞌa kam tināw.” 8 Pagtongas sigām, halam aniyaꞌ saddī taꞌndaꞌ eꞌ sigām, luwal si Isa.
9 Manjari itu, sabu paꞌin sigām palūd min būd eꞌ, binandaꞌan eꞌ si Isa saga mulidna, yukna, “Daꞌa kam angahaka ni sai-sai pasal bay taꞌndaꞌbi mahēꞌ ma diyataꞌ būd eꞌ. Subay na aku, Anak Manusiyaꞌ itu, tapakallum pabīng min kamatayku boꞌ yampa kam angahaka.”
10 Sakali tinilaw si Isa eꞌ sigām, yuk-i, “Angay saga guru saraꞌ agama magpinaꞌin in si Elija subay dahū palahil piꞌitu?”
11 Anambung si Isa, yukna, “Bꞌnnal koꞌ ilu, si Elija palahil dahū min Al-Masi anakapan kamemon. 12 Sagōꞌ hakaꞌanta kam, bay na palahil si Elija piꞌitu ati halam iya bay takilā eꞌ saga manusiyaꞌ. Bay tahinang eꞌ sigām ma iya ai-ai kabayaꞌan sigām. Damikiyanna aku, Anak Manusiyaꞌ, bininasa du isab eꞌ sigām.” 13 Minnēꞌ tahati eꞌ saga mulidna si Yahiya Magpapandi iya pinagbissala eꞌ si Isa.
Ondeꞌ-ondeꞌ Kapalaꞌanan Saitan
14 Na, makabīng paꞌin disi Isa ni kahekaꞌan aꞌa heꞌ, aniyaꞌ dakayuꞌ aꞌa pinaꞌan ni iya angōk-tuꞌut. 15 Yukna ni si Isa, “Tuwan, maꞌaseꞌ paꞌin ka ma anakku lꞌlla. Binawi-bawi iya, landuꞌ iya abinasa. Araran iya pahantak ni api atawa ni boheꞌ. 16 Bay bowaku iya ni saga mulidnu sagōꞌ mbal iya kauliꞌan eꞌ sigām.”
17 Anambung si Isa, yukna, “Kaꞌam saga aꞌa ma tahun itu-i, asāꞌ landuꞌ pikilanbi! Halam toꞌongan aniyaꞌ imanbi! Subay buwattingga giꞌ tꞌggolku ma kaꞌam anandalan kabuwattilubi boꞌ yampa kam magkahagad? Bowahun piꞌitu ondeꞌ ilu,” yukna. 18 Tabowa paꞌin ondeꞌ inān ni si Isa, magtūy pabukaganna saitan. Pinaluwas eꞌna min baran ondeꞌ ati saruꞌun-duꞌun du pahali sakina.
19 Puwas eꞌ tinilaw si Isa eꞌ saga mulidna, sigām-sigām sadja. Yuk sigām, “Angay kami bay mbal makapaluwas saitan eꞌ?”
20 Yuk si Isa, “Sabab akulang pangandolbi ma Tuhan. Hakaꞌanta kam toꞌongan, abila bay makasaliꞌ heya pangandolbi ni buwat heya bigi-tinanom anahut, tahinangbi du kamemon minsan buwattingga hunitna. Bang saupama sohoꞌbi būd itu papinda minnitu pinaꞌan, papinda du. [ 21 Sagōꞌ in ginis saitan inaꞌan-i mbal tapaluwas, luwal bang kam angamuꞌ-ngamuꞌ maka amuwasa dahū.]”
Si Isa Amissala Pabīng Pasal Kamatayna
22 Aniyaꞌ dakayuꞌ waktu magtimuk saga mulid ma lahat Jalil. Yuk si Isa ni sigām, “Aku itu, Anak Manusiyaꞌ, araiꞌ na sinōngan ni pagbayaꞌan saga aꞌa, 23 ati pinapatay aku eꞌ sigām. Sagōꞌ tꞌllumbahangi puwas min kamatayku allum du aku pabīng.” Minnēꞌ asusa toꞌongan saga mulidna.
Sukay Langgal Binayaran eꞌ si Isa
24 Pagtꞌkka si Isa maka saga mulidna ni daꞌira Kapirnaum, aniyaꞌ pinaꞌan ni si Petros saga aꞌa angāꞌ sukay langgal. Yuk sigām ni iya, “Gurubi ilu, amayad sukay langgal bahāꞌ?”
25 “Ahoꞌ,” yuk sambung si Petros.
Makasōd paꞌin si Petros ni deyom lumaꞌ arak angahaka, makarahū si Isa ahꞌlling ni iya, yukna, “Simun, bang ma kaꞌa, sai niāꞌan sukay eꞌ saga sultan ma babaw dunya itu? Anak-kampungna ka, atawa aꞌa saddī?”
26 “Aꞌa saddī,” yuk si Petros.
“Na,” yuk si Isa, “bang buwattilu, hatina in kitam panganak Tuhan itu mbal wajib magsukay. 27 Sagōꞌ mbal kitam bilahi kinapꞌddiꞌan atay eꞌ saga aꞌa inān, angkan ka subay pehēꞌ ni bihing danaw inān amuwang. Pagtinduk daing, hellaꞌun magtūy. Makabāk du ka sīn ma deyom bowaꞌna, sarang pamayadta sukay langgal. Ngāꞌun sīn inān boꞌ pamayarun pehēꞌ.”