18
Sai ya Katapusan Alanga?
1 Ma waktu heꞌ-i du, pinaꞌan ni si Isa saga mulidna atilaw iya, yuk sigām, “Sai alanga katapusan ma deyom pagparintahan Tuhan?”
2 Sakali nilinganan eꞌ si Isa dakayuꞌ ondeꞌ-ondeꞌ, sinōꞌ anꞌngge ma dahuwan sigām. 3 Yuk si Isa, “Hakaꞌanta kam toꞌongan, sai-sai mbal apinda palantarana ni buwat palantara ondeꞌ-ondeꞌ itu, mbal toꞌongan pinasōd ni deyom pagparintahan Tuhan. 4 Sai-sai amareyoꞌ atayna, pinasaliꞌ ni buwat atay ondeꞌ-ondeꞌ itu, ya na katapusan alanga ma deyom pagparintahan Tuhan. 5 Sai-sai isab anaimaꞌ dakayuꞌ ondeꞌ-ondeꞌ buwattitu ma sabab ōnku ya pamanyabutanna, saliꞌ aku baranku ya tinaimaꞌ eꞌna.”
Pasal Aꞌa Amowa Pagkahina Magdusa
6 Yuk si Isa lagiꞌ, “Bang aniyaꞌ aꞌa makaparusa ma dakayuꞌ ondeꞌ-ondeꞌ buwattitu ya taga-pangandol ma aku, ahāp lagiꞌ kadal aꞌa inān bang paꞌin iya pinagantungan batu abuhat ma kꞌllongna boꞌ nihūg ni timbang.
7 “Makaꞌaseꞌ-aseꞌ toꞌongan saga manusiyaꞌ itu, sabab aniyaꞌ na paꞌin sasat makaparusa ma sigām. Tantu paniyaꞌ saga sasat-manasat, sagōꞌ makaꞌaseꞌ-aseꞌ sidda ya pamakadal ma sasuku anasat seheꞌna amowa magdusa. 8 Bang tanganbi atawa tapeꞌbi gantaꞌ amowa kaꞌam magdusa, subay paggatunbi. Gom na paꞌin pukulinbi boꞌ tinimanan. Ahāp lagiꞌ kam allum ma deyom sulgaꞌ ma apukul dambilaꞌ tanganbi atawa tapeꞌbi, bang paꞌin kam daꞌa nilarukan ni deyom api nalkaꞌ ya mbal kapꞌddahan ma ajukup tapeꞌ-tanganbi. 9 Damikiyanna isab bang matabi gantaꞌ amowa kaꞌam magdusa, gom lagiꞌ lugitunbi boꞌ tinimanan. Ahāp lagiꞌ kam allum ma deyom sulgaꞌ ma abuta dambilaꞌ matabi, bang paꞌin kam daꞌa nilarukan ni deyom api nalkaꞌ ma ajukup matabi karuwambilaꞌ.”
Bili-bili Alungay
10 “Kamayaꞌ-mayaꞌ kam. Daꞌa palehomunbi saga kamanahutan itu. Sabab hakaꞌanta kam, inaꞌan anungguꞌan sigām saga malaꞌikat ya paharap na paꞌin ni Mmaꞌku Tuhan ma deyom sulgaꞌ. 11 (In aku, Anak Manusiyaꞌ, bay piꞌitu ni dunya angalappas saga aꞌa ya alawak min Tuhan.)
12 “Bistahunbi: bang saupama aniyaꞌ aꞌa taga-bili-bili dahatus hekana, boꞌ waꞌi pasihaꞌ dakayuꞌ, ai bahāꞌ hinangna? Tantu pasagaranna siyampūꞌ maka siyam mahēꞌ ma kabīd-bīran boꞌ iya pasaꞌut pehēꞌ amiha dakayuꞌ bay pasihaꞌ heꞌ. 13 Jari bang tabākna na, hakaꞌanta kam, kinōgan iya toꞌongan. Palabi lagiꞌ kakōganna ma bili-bili dakayuꞌ inān min siyampūꞌ maka siyam ya halam bay alungay. 14 Buwattēꞌ du isab Mmaꞌbi ma deyom sulgaꞌ, mbal iya bilahi aniyaꞌ alungay dakayuꞌ ondeꞌ-ondeꞌ min okomanna.”
Bang Aꞌa Makarusa ma Pagkahina
15 “Na, bang aniyaꞌ pagkahinu gantaꞌ makarusa ma kaꞌa, pehēꞌ ka ni iya ati hakaꞌin iya pasal kasāꞌanna. Sagōꞌ subay hal kaꞌam duwangan magbissala. Bang ka kinale eꞌna, boꞌ kabayaꞌanna maghāp maka kaꞌa, pahogot gom paꞌin kapagbagaybi. 16 Sagōꞌ bang hati mbal akuhanna dusana, bowahun dakayuꞌ atawa duwa aꞌa saddī anaksiꞌan ai-ai pagbissalahanbi, boꞌ supaya tabeyaꞌ panohoꞌan bay ma Kitab, ya yuk-i, ‘Bang aniyaꞌ palkalaꞌbi subay aniyaꞌ duwangan atawa tꞌllungan amuwan saksiꞌ boꞌ supaya pinagsabꞌnnal.’ 17 Sagōꞌ bang aꞌa inān agagga angasip ma saga aꞌa saddī ya bowanu inān, na, hakaꞌin saga seheꞌbi dajamaꞌahan kamemon. Jari bang iya mbal bilahi akale ma kagaraꞌan saga jamaꞌa kamemon, aꞌa inān subay niniyat eꞌbi saliꞌ aꞌa halam aniyaꞌ tuhanna, atawa aꞌa magaꞌāꞌ sukay parinta.”
Pangalāngan maka Pamarūl
18 “Hakaꞌanta kam toꞌongan, ai-ai lāngbi ma deyom dunya itu nilāng du isab ma deyom sulgaꞌ, maka ai-ai parūlbi ma deyom dunya itu pinarūl du isab ma deyom sulgaꞌ. 19 Aniyaꞌ isab pangahakaku ma kaꞌam, bang duwangan kam ma dunya itu maguyun angamuꞌ-ngamuꞌ ai-ai, tantu kam nirūlan eꞌ Mmaꞌku ma deyom sulgaꞌ. 20 Sababna bang aniyaꞌ duwangan atawa tꞌllungan aꞌa magtimuk pagka ōnku ya pamanyabutan sigām, inaꞌan du aku ma deyoman sigām.”
Pasal Aꞌa Mbal Angampun Seheꞌna
21 Puwas inaꞌan pehēꞌ si Petros ni si Isa atilaw. “Tuwan Panghūꞌ,” yukna, “min pila subay ampunku pagkahiku bang iya makarusa ma aku? Min pituꞌ bahāꞌ?”
22 Yuk si Isa, “Nggaꞌi ka hal min pituꞌ, sagōꞌ min pitumpūꞌ maka pituꞌ.” 23 Jari magparalilan si Isa, yukna, “In kapagparinta Tuhan saliꞌ dalil dakayuꞌ sultan ya bilahi amista palutangan saga tendogna. 24 Sakali itu, hinabuna magbista utang, aniyaꞌ binowa ni iya dakayuꞌ tendogna taga-utang laksaꞌan pilak. 25 Jari in sīn ma tendog inān mbal makabayaran utangna, angkan magpanohoꞌan sultan in aꞌa inān sampay anak-hꞌndana subay pinabꞌllihan nihinang ata. Subay pinabꞌllihan isab ai-aina kamemon pamayad utangna. 26 Na, angōk-tuꞌut magtūy tendog itu ma alopan sultan angamuꞌ junjung ni iya. ‘O tuwan,’ yukna, ‘patangguhun giꞌ aku. Bayaranku du utangku kamemon.’ 27 Manjari maꞌaseꞌ sultan inān ma tendogna. Pinahalam na utangna ati pinapoleꞌ iya.
28 “Na, pagluwas tendog inān min alopan sultan, aniyaꞌ talanggalna pagkahina, tendog sultan isab. In tendog damuli itu taga-utang dangkuriꞌ ma tendog tagnaꞌ. Magtūy iya niragtuꞌ maka pinꞌkkol eꞌ tendog tagnaꞌ. Yukna, ‘Bayarin na utangnu ma aku.’ 29 Magtūy angōk-tuꞌut tendog damuli itu anganjunjung, yukna, ‘Patangguhun giꞌ aku. Bayaranta du ka.’ 30 Sagōꞌ mbal pinatanggu, gom paꞌin niꞌisi ni deyom kalabusu satꞌggol mbal makapuwasan utangna kamemon. 31 Pagꞌndaꞌ paꞌin eꞌ saga tendog kaseheꞌan ma kahinangan tendog tagnaꞌ inān, magtūy sigām landuꞌ asukkal, ati pehēꞌ ni sultan angahaka pasal pakaradjaꞌan inān.
32 “Jari pinalinganan eꞌ sultan tendog bay aheka utangna heꞌ. ‘Jahulakaꞌ pahāp ka ilu!’ yukna. ‘Bay pahalamku utangnu kamemon ma sabab panganjunjungnu ma aku. 33 Arapun kaꞌaseꞌannu pagkahinu heꞌ, buwat bay kaꞌaseꞌku ma kaꞌa!’ 34 Jari sidda angastol sultan inān ma iya, angkan sohoꞌna tendog eꞌ niꞌisi ni deyom kalabusu sampay tiniksaꞌ satꞌggol halam giꞌ kabayaranna utangna.”
35 Yuk si Isa, “Buwattēꞌ du isab nihinang eꞌ Mmaꞌku ma sulgaꞌ ma kaꞌam dangan maka dangan, bang mbal ampunbi pagkahibi min deyom ataybi.”