15
Bili-bili Alungay
1 Ma dakayuꞌ llaw aheka saga aꞌa magaꞌāꞌ sukay parinta maka saga aꞌa baldusa kaseheꞌ patimuk pinaꞌan ni si Isa sabab bilahi akale ma panduꞌna. 2 Manjari saga Parisi maka saga guru saraꞌ agama magdugal na, yuk-i, “Aꞌa itu anaimaꞌ saga aꞌa baldusa, magsalu isab maka sigām!” 3 Angkan binissala eꞌ si Isa kissa pamaralilan itu, yukna.
4 “Bang saupama aniyaꞌ ma kaꞌam taga-bili-bili dahatus hekana, boꞌ waꞌi alungay dakayuꞌ, ai bahāꞌ hinangna? Tantu pasagaranna siyampūꞌ maka siyam mainaꞌan ma deya boꞌ yampa pehēꞌ amiha dakayuꞌ ya alungay satꞌggol mbal tabākna. 5 Tabākna paꞌin, tinanggung eꞌna tudju amoleꞌ maka eꞌna kinōgan sidda. 6 Pagtꞌkkana ni lumaꞌ, magtūy lingananna saga bagayna maka kakampunganna. Sohoꞌna sigām magtimuk ati yukna ma sigām, ‘Maglami-lami kitam sabab tabākku na bili-biliku bay alungay.’ 7 Damikiyanna,” yuk si Isa, “bang aniyaꞌ aꞌa dangan magsusun sampay angꞌbba min dusana, aheya kalasigan ma deyom sulgaꞌ. In kalasigan inaꞌan palabi lagiꞌ min kalasigan ma siyampūꞌ maka siyam aꞌa abontol ya halam aniyaꞌ dusa sigām pinagsusunan.”
Dublun Alungay
8 “Saupama isab,” yuk si Isa, “bang aniyaꞌ dꞌnda taga-dublun sangpūꞌ hekana, boꞌ alungay dakayuꞌ, ai bahāꞌ hinangna? Tantu iya anūꞌ palitaꞌan magtūy boꞌ sapuhanna deyom lumaꞌ ati pihana pahāp-hāp sampay tabākna. 9 Jari bang tabākna na, nilinganan eꞌna bagayna maka kakampunganna. Sinōꞌ sigām magtimuk ati yukna ma sigām, ‘Maglami-lami kitam sabab tabākku na dublunku bay alungay.’ 10 Damikiyanna isab,” yuk si Isa, “aheya kakōgan ma saga malaꞌikat Tuhan bang aꞌa dakayuꞌ aꞌa magsusun sampay angꞌbba min dusana.”
Anak Lꞌlla Alungay
11 Anuli-nuli giꞌ si Isa, yukna, “Aniyaꞌ inān dakayuꞌ aꞌa taga-anak duwa lꞌlla. 12 Dakayuꞌ llaw ahꞌlling anak siyali ni mmaꞌna, yukna, ‘Mmaꞌ, bahagiꞌun na altaꞌnu ati pamuwanun ma aku bahagiꞌku.’ Jari binahagiꞌ eꞌ mattoꞌa inān kaniyaꞌna ma anakna karuwangan. 13 Mbal atꞌggol, pinabꞌllihan eꞌ siyali itu bahagiꞌna ati binowa eꞌna bꞌllihanna ni lahat atala. Mahēꞌ paꞌin iya, pinakaꞌat eꞌna sīnna kamemon ma ai-ai kanapsuhanna. 14 Sakali itu, pagubus na sīnna kamemon, ginotom sidda lahat inān. Manjari aheya na kasukkalanna, 15 angkan iya pehēꞌ ni dakayuꞌ aꞌa ma lahat inān boꞌ magpatiata ma iya. Jari sinohoꞌ iya eꞌ aꞌa inān pehēꞌ ni humana angipat saga bawi. 16 Na, pagka mbal kasandalan lingantuna, bilahi iya amangan minsan kinakan bawi sagōꞌ halam aniyaꞌ bay amuwanan iya minsan ai.
17 “Daipara tasayuna karupanganna angkan yukna ma deyom atayna, ‘Saga ipatan mmaꞌku heꞌ maglabi-labi kinakan sigām, sagōꞌ aku itu itiyaꞌ na song amatay eꞌ otas. 18 Gom na aku amoleꞌ pehēꞌ ni si Mmaꞌ. Yukku ma iya, “Mmaꞌ, taga-dusa aku ni Tuhan sampay ni kaꞌa. 19 Mbal na aku manjari ōnannu anak. Bistahun aku saliꞌ hal dakayuꞌ tendognu.” ’ 20 Jari pabuhat iya min baina boꞌ palꞌngngan tudju ni mmaꞌna pabīng.
“Sagōꞌ atā-tā lagiꞌ iya min lumaꞌ, taꞌndaꞌ iya eꞌ mmaꞌna. Maꞌaseꞌ toꞌongan mmaꞌna ati paragan pehēꞌ boꞌ gapusna maka siyumna. 21 Yuk anakna inān ma iya, ‘Mmaꞌ, taga-dusa aku ni Tuhan sampay ni kaꞌa. Mbal na aku manjari ōnannu anak.’ 22 Sagōꞌ nilinganan eꞌ mmaꞌ inān saga ipatanna. Yukna ma sigām, ‘Palꞌkkas kam. Bowahunbi piꞌitu badjuꞌ kapuspusan ahāp ati pabadjuꞌinbi iya itu. Pasingsinginbi isab, maka pataumpaꞌinbi. 23 Puwas eꞌ pehēꞌ kam angāꞌ anak sapiꞌ ya bay palꞌmmokta heꞌ, boꞌ sumbaliꞌunbi. Magjamu kitam, maka maglami-lami. 24 Sabab anakku itu bay niyatku amatay, sagōꞌ itiyaꞌ na allum pabīng. Pangannalku bay na alungay sagōꞌ itu na tapoleꞌ.’ Manjari anagnaꞌ sigām maglami-lami.
25 “Na, pasaltaꞌ paꞌin itu-i, in anak siyaka waꞌi magusaha ma huma. Ma labayan paꞌin iya tudju amoleꞌ boꞌ asekot-sekot na ni lumaꞌ, aniyaꞌ takalena magkulintangan maka magpangigal ma deyom lumaꞌ. 26 Nilinganan eꞌna dakayuꞌ ipatan boꞌ tilawna bang magay ma lumaꞌ heꞌ. 27 Yuk ipatan, ‘Tapoleꞌ na siyalinu, maka bay sinōꞌ eꞌ mmaꞌnu sinumbaliꞌ anak sapiꞌ ya pinalꞌmmok inān, sabab atꞌkka na anakna ma halam aniyaꞌ baya-bayana.’ 28 Sagōꞌ akagit atay magtūy anak siyaka heꞌ, ya angkan mbal bilahi pasōd ni deyom lumaꞌ. Paluwas mmaꞌna angamuꞌ iya pasōd sagōꞌ mbal iya. 29 Yukna ni mmaꞌna, ‘Ndaꞌun, Mmaꞌ, ma tahunan na aku maghinang ma kaꞌa saliꞌ banyagaꞌnu. Halam aniyaꞌ panohoꞌannu minsan dakayuꞌ bay saggaꞌku, sagōꞌ halam aku bay buwanannu minsan laꞌa dakayuꞌ anak kambing supaya aku makapagjamu maka saga bagayku. 30 Talkalaꞌ makapoleꞌ paꞌin piꞌitu anaknu ilu, magtūy sumbaliꞌannu anak sapiꞌ pinalꞌmmok eꞌ, minsan bay pakaꞌatna altaꞌnu panambana saga dꞌnda maghinang alaꞌat.’ 31 Anambung mmaꞌna, yukna, ‘Otōꞌ, kakkal du ka ma aku, maka sukuꞌnu asal kaniyaꞌku itu kamemon. 32 Patut du bang kita maglami-lami maka magkalasigan sabab allum du siyalinu ya bay niyatta amatay-i. Pangannalta alungay sagōꞌ tapoleꞌ na iya.’ ”