14
Si Isa ma Lumaꞌ Aꞌa Parisi
1 Ma dakayuꞌ Sabtuꞌ, pinaꞌan si Isa amangan ma lumaꞌ dakayuꞌ nakuraꞌ Parisi abantug. Jari mainaꞌan paꞌin, pinatongan iya eꞌ saga aꞌa mainaꞌan. 2 Aniyaꞌ isab ma tongod si Isa aꞌa taga-saki, amꞌngkong tapeꞌ-tanganna. 3 Atilaw si Isa ni saga guru saraꞌ agama inān maka ni saga Parisi, yukna, “Bang kita saupama amauliꞌ saki aꞌa ma llaw Sabtuꞌ, langgal saraꞌ agamatam bahāꞌ, atawa mbal?”
4 Sagōꞌ halam sigām anambung. Jari niꞌntanan eꞌ si Isa aꞌa asaki inān ati pinauliꞌ eꞌna boꞌ yampa papoleꞌna. 5 Puwas eꞌ atilaw si Isa ma saga aꞌa inān, yukna, “Bang saupama aniyaꞌ anakbi atawa sapiꞌbi ahūg ni deyom lowang ma llaw paghali, ai hinangbi? Tantu ngāꞌbi pinaluwas min deyom lowang eꞌ minsan pasabu ma llaw paghali.” 6 Jari halam aniyaꞌ panganjawab sigām.
7 Tapandoga eꞌ si Isa bowahan saga aꞌa maglurukan pinaꞌan. Ameneꞌ sigām magtūy paningkōꞌan ahāp ya tōp ma aꞌa bangsahan, angkan buwattitu pamaralilanna ma sigām, yuk-i, 8 “Bang kam gantaꞌ niabbit paluruk ni pagkawinan, daꞌa kam magtūy aningkōꞌ ma kōkan, ma paningkōꞌan ahāp. Kalu aniyaꞌ aꞌa bangsahan giꞌ min kaꞌam bay sinōꞌ paluruk. 9 Jari piꞌilu ni kaꞌam aꞌa tag-hinangan, ya bay angabbit kaꞌam karuwangan paluruk pehēꞌ, ati yukna, ‘Papinda ka minnilu boꞌ patingkōꞌun lagiꞌ aꞌa itu.’ Jari kaiyaꞌ-iyaꞌan kam ati papinda kam aningkōꞌ ni tapeꞌan. 10 Sagōꞌ bang kam sinōꞌ paluruk, aningkōꞌ kam magtūy ma tapeꞌan. Jari piꞌilu du ni kaꞌam tag-hinangan ati yukna ni kaꞌam, ‘Bagay, papinda ka ni kōkan, ni paningkōꞌan labi ahāp.’ Manjari taꞌndaꞌ kam eꞌ saga luruk inān kamemon in kaꞌam patut pinagaddatan. 11 Sabab hatina sasuku maglanga-langa di-na pinareyoꞌ du. Maka sasuku magpatireyoꞌ di-na pinalanga du.”
12 Manjari ahꞌlling si Isa ni aꞌa bay angabbit iya amangan ma lumaꞌna, yukna, “Na, kaꞌa isab, bagay, bang ka angahinang pagjamuhan, daꞌa sohoꞌun paluruk saga bagaynu, atawa saga danakannu, atawa kahekanu, atawa lūng-kampungnu dayahan. Sabab bang sigām ya sōꞌnu paluruk, ya du kaꞌa sinōꞌ paluruk eꞌ sigām ma waktu dakayuꞌ. Jari katungbasan ka magtūy. 13 Saguwāꞌ bang ka gantaꞌ angahinang pagjamuhan, ya sohoꞌnu paluruk subay saga aꞌa miskin maka aꞌa pengkaꞌ, aꞌa akuꞌil maka aꞌa abuta. 14 Bang itu hinangnu, aheya du kahāpannu sabab halam aniyaꞌ ai-ai sigām panungbas ma kaꞌa. Tuhan ya anungbasan kaꞌa ma llaw damuli, ma waktu pamakallum pabalik saga aꞌa abontol.”
Jamuhan Aheya
15 Takale paꞌin bissala si Isa itu eꞌ aꞌa dangan ya amangan mainaꞌan, magtūy iya ahꞌlling, yukna, “Saga aꞌa palamud magjamu ma deyom pagparintahan Tuhan, aheya asal kahāpan sigām.”
16 Anambung si Isa, kissa pamaralilan lagiꞌ, yukna, “Aniyaꞌ aꞌa bay magsakap jamuhan aheya, ati aheka aꞌa bay abbitna paluruk. 17 Taꞌabut paꞌin llaw pagjamu, sinohoꞌ ipatanna pehēꞌ amataꞌuwan saga aꞌa bay taꞌabbitna. ‘Daiꞌ na kam,’ yuk ipatan eꞌ. ‘Sakap na kamemon.’ 18 Saguwāꞌ saliꞌ-saliꞌ sigām kamemon magpanumagal. Yuk aꞌa ya papehēꞌanna tagnaꞌ, ‘Mbal aku makaluruk sabab aniyaꞌ tanaꞌ bay bꞌlliku subay ndaꞌku dahū. Pehēꞌku lagiꞌ.’ 19 Yuk aꞌa dangan, ‘Bay na aku makabꞌlli saga sapiꞌ pagaꞌararu, sangpūꞌ hekana. Subay sulayanku giꞌ kosog sigām. Pehēꞌku giꞌ.’ 20 Yuk isab aꞌa dangan, ‘Bahaꞌu aku bay kinawin, angkan aku mbal makaluruk.’ 21 Manjari amoleꞌ ipatan inān angahakaꞌan nakuraꞌna. Apꞌddiꞌ toꞌongan atay nakuraꞌ heꞌ, ati yukna ma ipatanna, ‘Pasaꞌut ka pehēꞌ ni saga lān aluha maka lān akiput ya paglalabayan aꞌa ma daꞌira itu. Bowahun piꞌitu saga miskin, saga aꞌa akuꞌil, saga aꞌa buta maka saga aꞌa pengkaꞌ.’ 22 Jari pehēꞌ iya. Makapoleꞌ paꞌin, ahꞌlling iya ni nakuraꞌna, yuk-i, ‘Tahinangku na bay panohoꞌannu-i sagōꞌ masi giꞌ aniyaꞌ paningkōꞌan ma pagjamuhan.’ 23 Yuk nakuraꞌ, ‘Pehēꞌ ka ni paglalabayan aꞌa ma deya, ati logosun saga aꞌa piꞌitu boꞌ supaya apꞌnnoꞌ lumaꞌku. 24 Sabab hakaꞌanta kam,’ yukna, ‘in aꞌa bay taꞌabbitku dahū, halam aniyaꞌ min sigām makananam saga kinakan bay sakapku.’ ”
Pasal Pameyaꞌ ma si Isa
25 Palanjal isab si Isa ni palꞌngngananna maka landuꞌ aheka aꞌa ameyaꞌ parongan ma iya. Manjari harapna sigām ati yukna, 26 “Bang aniyaꞌ aꞌa bilahi ameyaꞌ ma aku nihinang mulidku, ya lasana ma aku subay palabi min lasana ma inaꞌ-mmaꞌna maka ma anak-hꞌndana, sampay ma saga danakanna lꞌlla-dꞌnda. Minsan lasana ma baranna subay mbal palabi min lasana ma aku. Bang nggaꞌi ka buwattēꞌ lasana mbal iya manjari mulidku. 27 Subay paglillaꞌna kabinasahan sampay ni kamatay ma sabab pameyaꞌna ma aku. Ya sapantunna aꞌa ananggung hāgna pamapatayan iya. Bang mbal akuhanna, mbal iya manjari mulidku.
28 “Bang saupama aniyaꞌ ma kaꞌam bilahi angahinang lumaꞌ pamantawan, subay iya amikil-mikil dahū boꞌ tabista bang pila gastuna, ati kataꞌuwanna bang makaꞌabut sīnna pangahinang lumaꞌ inān atawa mbal. 29 Sabab bang taosol na hāg, boꞌ mbal makaꞌabut sīnna pangubusna lumaꞌ, pinagtunggīngan iya eꞌ aꞌa kamemon angꞌndaꞌ pinaꞌan. 30 Yuk sigām, ‘Aꞌa itu bay makalanduꞌ angahinang lumaꞌ sagōꞌ mbal taubusna.’
31 Atawa bang saupama aniyaꞌ sultan sangpūꞌ ngibu sundaluna, song palanjal magbonoꞌ maka sultan saddī, aningkōꞌ giꞌ iya dahū amikil-mikil bang taraꞌugna sultan dakayuꞌ inān, ya taga-sundalu duwampūꞌ ngibu hekana. 32 Bang hati mbal taraꞌugna, magtūy iya amabeyaꞌ suluhan pasampang ni sultan dakayuꞌ ma masi giꞌ atala, boꞌ mikipagkahāp. 33 Damikiyanna isab kaꞌam,” yuk si Isa, “subay kam amikil-mikil dahū sabab mbal kam manjari mulidku bang kam mbal maglillaꞌ anaikutan kaniyaꞌbi kamemon.”
Pasal Asin Halam Aniyaꞌ Nanamna
34 Magparalilan na isab si Isa, yukna, “Kataꞌuwanbi, ahāp asal asin sagōꞌ halam aniyaꞌ pamabalik nanamna bang magtinuꞌ na. 35 Halam na aniyaꞌ kagunahanna. Mbal minsan taguna panambal tanaꞌ atawa pangalamud ni taiꞌ hayop, hal tinimanan sadja. Na,” yuk si Isa, “sasuku kam makakale, kalehunbi toꞌongan.”