16
Saga Parisi Mikipaꞌndaꞌ Paltandaꞌan
1 Manjari aniyaꞌ saga Parisi maka saga Saddusi bay pinaꞌan ni si Isa. Bilahi sigām anulayan iya boꞌ supaya iya tajallat ma bissalana. Angkanna sigām mikipaꞌndaꞌ paltandaꞌan, palsaksiꞌan in iya bꞌnnal taga-kapatut min Tuhan. 2 Sagōꞌ anambung si Isa, yukna, “Kaꞌam ilu, bang pasꞌddop llaw, yukbi, ‘Ā, tꞌddoꞌ du salung sabab ilu akeyat bihing langit.’ 3 Pagsubu-subu isab, yukbi, ‘Ulan llaw itu sabab akeyat bihing langit maka angandom.’ Ataꞌu kam angꞌndaꞌ pandoga ma bꞌttong langit, sagōꞌ mbal kapandogahanbi paltandaꞌan ya taꞌndaꞌbi ma masa itu-i. 4 Saga aꞌa ma patahunan itu alaꞌat sidda, maka mbal bilahi magtaꞌat ma Tuhan. Bilahi kam bahāꞌ angꞌndaꞌ paltandaꞌan barakatan? Halam aniyaꞌ paltandaꞌan pinaꞌndaꞌan kaꞌam, luwal paltandaꞌan bay min nabi Yunus ma masa awal eꞌ.” Puwas eꞌ niꞌbbahan saga aꞌa inān eꞌ si Isa, ati alaꞌan iya minnēꞌ.
Pagbandaꞌ Pasal Pamanduꞌ Parisi maka Saddusi
5 Pagtꞌkka saga mulid si Isa ni dambilaꞌ danaw, halam sigām bay makaentom amowa tinapay palutuꞌ sigām. 6 Yuk si Isa ni sigām, “Kamayaꞌ-mayaꞌ kam. Halliꞌinbi pasulig tinapay min saga Parisi maka min saga Saddusi.”
7 Magsuli-suli saga mulidna pasal pahꞌllingna heꞌ, sabab halam tahati eꞌ sigām. Yuk pangannal sigām, “Angkan araiꞌ buwattēꞌ pahꞌlling si Isa sabab halam kita bay amowa tinapay.”
8 Kinataꞌuwan asal eꞌ si Isa bang ai ya pinagsuli-suli eꞌ sigām, angkan yukna, “Angay pagsuli-sulibi pasal halam aniyaꞌ tinapaybi? Arikiꞌ pahāp pangandolbi ma aku! 9 Halam giꞌ tahatibi bahāꞌ? Halam taentombi bay waktu kapagpōng-pōngku tinapay lima hekana pamakan saga limangibu aꞌa heꞌ? Entomunbi bang pila ambung aheya bay pangisihanbi kapin kinakan eꞌ? 10 Maka tinapay pituꞌ hekana bay pamakan mpat ngibu aꞌa heꞌ. Pila ambung bay pangisihanbi kapin? 11 Daka angay kam mbal makahati. Nggaꞌi ka tinapay ya bay pagbissalaku heꞌ. Yukku, halliꞌinbi pasulig tinapay saga Parisi maka Saddusi!” 12 Minnēꞌ yampa tahati eꞌ sigām nggaꞌi ka pasulig pamasulig tinapay ya bay pahꞌllingna, sagōꞌ panduꞌ min saga Parisi maka min saga Saddusi. Ya na heꞌ subay nihalliꞌan pahāp.
Si Petros Magpasabꞌnnal Pasal Al-Masi
13 Na, palintas disi Isa ni jadjahan lahat ma kasekotan daꞌira Kesareya Pilipi. Mainaꞌan paꞌin, tinilaw eꞌna saga mulidna, yukna, “Bang ma pangupama aꞌa, sai konoꞌ aku Anak Manusiyaꞌ itu?”
14 Yuk sambung saga mulid eꞌ, “Bang ma aꞌa kaseheꞌan kaꞌa konoꞌ si Yahiya Magpapandi. Bang ma aꞌa kaseheꞌ in kaꞌa nabi Elija atawa nabi Irimiya. Maka bang ma aꞌa kaseheꞌ isab dakayuꞌ nabi ka bay ma masa awal eꞌ.”
15 “Na, bang ma kaꞌam,” yuk si Isa, “ai yukbi? Sai sa aku itu?”
16 Anambung si Simun Petros. “Kaꞌa Al-Masi,” yukna, “Anak Tuhan ya kakkal salama-lama.”
17 “Aheya kahāpan ma kaꞌa, Simun anak si Jona,” yuk si Isa, “sabab nggaꞌi ka min manusiyaꞌ ya angkan kataꞌuwannu ilu-i. Bay pamataꞌu kaꞌa eꞌ Mmaꞌku ma deyom sulgaꞌ. 18 Na, ya na itu pangahakaku ma kaꞌa: kaꞌa si Petros, hatina batu. Ati ma diyataꞌ batu lakit ilu pangahinanganku langgalku, hatina saga jamaꞌaku kamemon. Mbal sigām taraꞌug minsan amatay. 19 Buwananta ka kunsiꞌ, hatina kapatut angukab pasōran manusiyaꞌ tudju ni deyom pagparintahan Tuhan. Ai-ai lāngnu ma deyom dunya itu nilāng du isab ma deyom sulgaꞌ, maka ai-ai pamarūlnu ma deyom dunya itu pinarūl du isab ma deyom sulgaꞌ.” 20 Puwas eꞌ binandaꞌan eꞌ si Isa saga mulidna, daꞌa sinōꞌ angahaka ni sai-sai in iya Al-Masi.
Pamissala si Isa Pasal Kamatayna
21 Manjari puwas minnēꞌ, anagnaꞌ si Isa amahatian saga mulidna pasal ai tumꞌkka ni iya ma sinosōng. Yukna, “Subay aku pehēꞌ ni daꞌira Awrusalam. Aheka du kabinasahan pinatꞌkka ni aku eꞌ saga pagmattoꞌahan, eꞌ saga kaimaman alanga, maka eꞌ saga guru saraꞌ agama. Pinapatay du aku, sagōꞌ bang palabay na tꞌllumbahangi pinakallum du aku pabīng.”
22 Sakali si Petros bay amowa si Isa paokat min kaseheꞌan, boꞌ yampa pabukaganna, yuk-i, “Sꞌlleꞌ bale puhuꞌ, pinatā eꞌ Tuhan ya yuknu heꞌ boꞌ mbal makani-kaꞌa.”
23 Sagōꞌ nialop si Petros eꞌ si Isa. Yukna, “Alaꞌan ka min aku, saitan! Kabimbangan aku eꞌnu. Ya pamikilnu ilu pikilan manusiyaꞌ koꞌ, nggaꞌi ka pikilan Tuhan.”
24 Puwas eꞌ amissala si Isa ni saga mulidna. “Bang aniyaꞌ bilahi ameyaꞌ ma aku,” yukna, “subay nggaꞌi ka kabayaꞌan baranna ya dūlanna. Subay tinanggung eꞌna hāgna pamapatayan iya, hatina kabinasahan ma sababku. Minnēꞌ iya makajari ameyaꞌ ma aku. 25 Sai-sai allogan kallum baranna, amutawan du kallum-nyawana min Tuhan. Sagōꞌ sai-sai mbal allogan ma kallum-baranna, lillaꞌ isab amatay ma sababku, makabāk du iya kallum kakkal. 26 Sababna,” yuk si Isa, “bang aniyaꞌ aꞌa gantaꞌ kaniyaꞌan altaꞌ deyom dunya kamemon, aheya lugiꞌna bang halam aniyaꞌ kallumna kakkal. Sabab halam aniyaꞌ tapangalꞌkkatna kallum-nyawana bang amutawan na. 27 Aku Anak Manusiyaꞌ pabīng du piꞌitu, aliput eꞌ sahaya Mmaꞌku, maka sineheꞌan aku eꞌ saga malaꞌikatna. Tungbasanku manusiyaꞌ kamemon, pinapagtongod maka bay hinang sigām dangan maka dangan. 28 Bꞌnnal ya pahꞌllingku itu ma kaꞌam, aniyaꞌ maitu ma kaꞌam mbal amatay satꞌggol halam giꞌ piꞌitu in Anak Manusiyaꞌ boꞌ magparinta ma deyom dunya. Subay na aku taꞌndaꞌ eꞌ sigām boꞌ yampa sigām amatay.”