24
Pamandogahan ma Llaw Kiyamat
1 Manjari itu, makaluwas paꞌin si Isa min langgal pagkulbanan, pasekot ni iya saga mulidna anudluꞌ hinangan langgal eꞌ. 2 Yuk si Isa, “Taꞌndaꞌbi kahāpna. Sagōꞌ hakaꞌanta kam, ma sinosōng in langgal itu alubu du. Halam aniyaꞌ batuna angapin magbangkat, kinanat du kamemon.”
3 Puwas eꞌ, aningkōꞌ paꞌin si Isa mahēꞌ ma būd Jaitun, pehēꞌ ni iya saga mulidna, sigām-sigām sadja. Yuk sigām, “Pahatiun konoꞌ kami bang sumiyan paniyaꞌ ya bay yuknu insiniꞌ, maka bang paltandaꞌan ai pinatuwaꞌ boꞌ kinataꞌuwan in kapiꞌitunu asekot na, maka dunya itu song kiyamat na?”
4 Anambung si Isa, yukna, “Kamayaꞌ-mayaꞌ kam boꞌ kam mbal kaꞌakkalan. 5 Sabab ma sinosōng aheka piꞌitu anabbut ōnku, maglaku-laku in sigām Al-Masi, ati aheka tabowa-bowa niakkalan eꞌ sigām. 6 Makakale du kam pasal pagbonoꞌ ma kasekotan. Makakale kam isab hunub-hunub pasal pagbonoꞌ ma lahat saddī. Sagōꞌ daꞌa kam tināw. Tantu paniyaꞌ pagbonoꞌ sagōꞌ nggaꞌi ka inaꞌan-i llaw kiyamat. 7 Magbonoꞌ du bangsa dakayuꞌ maka dakayuꞌ, parinta dakayuꞌ isab maka parinta dakayuꞌ. Paniyaꞌ isab gotom ma sabarang lahat, maka linug ma kaluhaꞌan dunya. 8 Sagōꞌ in balaꞌ kamemon itu hal tagnaꞌanna sadja, saliꞌ dalil dꞌnda abꞌttong bang yampa tananamna amukaꞌ puhuꞌ.
9 “Bang atꞌkka saga pakaradjaꞌan inaꞌan-i, sinaggaw du kam, tinukbalan ni saga aꞌa boꞌ kam bininasa sampay pinapatay. Kinabꞌnsihan du kam eꞌ aꞌa kamemon ma sabab pameyaꞌbi ma aku. 10 Ma waktu inaꞌan aheka aꞌa bay bebeyaꞌanku angꞌbba min pagiman sigām. Aheka isab maglaꞌat-liyaꞌati maka anukbal pagkahi sigām ni saga aꞌa abꞌnsi ma si Isa. 11 Aheka maglaku-laku in sigām nabi min Tuhan, maka aheka tabowa niakkalan eꞌ sigām. 12 Pasōng na paꞌin kalaꞌatan indaginis ma waktu sinōng inān, angkan kahekaꞌan manusiyaꞌ mbal na maglasa-liyasahi. 13 Sagōꞌ lappasan du sai-sai ahogot imanna sampay ni kahinapusan. 14 Maka lapal ahāp pasal kapagparinta Tuhan, pinagnasihat na paꞌin ma kaluhaꞌan dunya supaya pasaplag saksiꞌ pasal si Isa ni sabarang bangsa. Puwas eꞌ kiyamat na dunya.”
Katiksaꞌan Landuꞌ Abisa
15 “Takallam asal eꞌ nabi Daniyel ma pasal waktu sinōng inān, yukna, aniyaꞌ ‘kasammalan makaharam’ patꞌnnaꞌ ma deyom langgal mahasussi. Sasuku kam amassa, sinōꞌ pahati. Bang taꞌndaꞌbi inaꞌan-i, 16 sasuku aꞌa patꞌnnaꞌ ma lahat Yahudiya subay alahi pehēꞌ ni kabūd-būran. 17 Bang aniyaꞌ aꞌa gantaꞌ ma luwasan lumaꞌna subay mbal sōdna lumaꞌna angāꞌ ai-aina. 18 Bang aniyaꞌ aꞌa ma humana subay mbal batukna badjuꞌna paghaggut. 19 Ndūꞌ, makaꞌaseꞌ-aseꞌ saga dꞌnda abꞌttong ma masa inaꞌan-i, maka saga dꞌnda taga-anak duruꞌan lagiꞌ. 20 Amuꞌinbi aseꞌ ni Tuhan bang paꞌin ya llaw kalahibi inān mbal magsabu maka musim haggut atawa llaw Sabtuꞌ, ya paghalibi ni Tuhan. 21 Sababna saga kabinasahan ya patumbuk ma masa sinōng inān,” yuk si Isa, “akalap giꞌ bisana min kabinasahan kamemon bay kalabayan manusiyaꞌ sangay min tagnaꞌ kapaniyaꞌ dunya, sampay ni kabuwattinaꞌanan. Maka mbal isab kabalikan. 22 Daipara kinulangan du eꞌ Tuhan tꞌggol kabinasahan inān. Bang bay mbal, halam aniyaꞌ angapin allum. Kinulangan du eꞌ Tuhan ma sabab saga aꞌana, ya asal tapeneꞌna.
23 “Na, bang taꞌabut waktu inaꞌan-i, boꞌ aniyaꞌ gantaꞌ anuhuma ni kaꞌam, yuk-i, ‘Ndaꞌunbi! Itiyaꞌ na Al-Masi,’ atawa ‘Inaꞌan na iya mainaꞌan’, daꞌa toꞌongan kahagarunbi. 24 Sabab ma waktu inaꞌan aniyaꞌ du patuwaꞌ saga aꞌa magnahuꞌ-nahuꞌ in sigām Al-Masi, atawa in sigām nabi min Tuhan. Magpaꞌndaꞌ sigām saga hinang barakatan maka saga paltandaꞌan kainu-inuhan aꞌa, boꞌ supaya kaꞌakkalan sampay aꞌa sukuꞌ Tuhan, bang hatiꞌ tabowa niakkalan. 25 Pakale kam,” yuk si Isa. “bay na kam pataꞌuku ma pasal inaꞌan-i ma halam giꞌ taꞌabut waktuna.
26 “Angkan koꞌ, bang aniyaꞌ angupama ni kaꞌam, yuk-i, ‘Inaꞌan Al-Masi ma lahat halam magaꞌa’, daꞌa kam pehēꞌ. Atawa bang yukna, ‘Inaꞌan iya patapuk mainaꞌan’, daꞌa beyaꞌunbi. 27 Sabab aku Anak Manusiyaꞌ itu, bang aku pabalik na, taꞌndaꞌ du kapiꞌituku, buwat lāt aninagan bꞌttong langit min sobangan sampay ni sꞌddopan.” 28 Magparalilan si Isa, yukna, “Maingga-maingga lahat kaniyaꞌan patay, inaꞌan du patipun saga owak.”
Pasal Kapabalik Al-Masi Piꞌitu ni Dunya
29 “Na,” yuk si Isa, “apuwas paꞌin saga kabinasahan bay sabbutku heꞌ,
‘Angalendom mata llaw,
mbal amuwan sawa mata bulan.
Saga bituꞌun magkapakpak na min diyataꞌ langit,
saga pandoga ma tongaꞌan ayan tabowa maglensa.’
30 “Ma waktu inaꞌan, patuwaꞌ du paltandaꞌan ma bꞌttong langit, paltandaꞌan sin Anak Manusiyaꞌ. Jari magdukka kabangsa-bangsahan kamemon ma deyom dunya. Taꞌndaꞌ eꞌ sigām in Anak Manusiyaꞌ piꞌitu labay min gabun, aheya barakatna maka sanglit sahayana. 31 Puwas eꞌ pinahꞌlling tiyup-tiyup boꞌ yampa sohoꞌna saga malaꞌikatna pehēꞌ ni mpat pidju alam animuk saga aꞌa bay tapeneꞌna, min bihing langit dambilaꞌ maka dambilaꞌ.”
Pamintāngan min Kayu Igira
32 “Pamintānginbi poꞌon kayu igira,” yuk si Isa. “Bang taꞌndaꞌbi kayu igira itu angugbus tōng engas-engasna, sampay angandahun na toꞌongan, minnēꞌ kataꞌuwanbi song musim pangꞌllaw na. 33 Damikiyanna bang taꞌndaꞌbi paniyaꞌ na bay pamissalaku ma kaꞌam eꞌ, minnēꞌ isab kataꞌuwanbi in kabalikku ni dunya asekot na. 34 Hakaꞌanta kam toꞌongan,” yuk si Isa, “ma halam giꞌ magpatayan kamemon saga aꞌa ya allum ma buwattinaꞌan, paniyaꞌ du pakaradjaꞌan kamemon bay pamissalaku heꞌ. 35 Papinda du langit maka dunya, sagōꞌ kabtanganku itu mbal toꞌongan magkapinda.”
Waktu Kabalik si Isa Mbal Kinataꞌuwan
36 “Halam aniyaꞌ makataꞌu bang sumiyan llaw maka waktu kabalikku piꞌitu ni dunya. Minsan bangsa malaꞌikat ma deyom sulgaꞌ, mbal kinataꞌuwan eꞌ sigām. Minsan aku, Anak Tuhan, mbal kataꞌuwanku. Luwal Mmaꞌku Tuhan ya makataꞌu. 37 Bang taꞌabut waktu kabalikku piꞌitu, saliꞌ du kahālanna maka kahālan bay ma masa si Nū heꞌ. 38 Saga aꞌa ma masa dahū lagiꞌ min latap aheya, hal magkakanan maka maginuman. Bay sigām maghꞌnda-hꞌlla, sampay taꞌabut waktu kasakat disi Nū ni diyataꞌ adjung. 39 Halam tataꞌu eꞌ saga aꞌa inān bang ai song tumꞌkka ni sigām. Yampa kinataꞌuwan bang sigām katumbukan latap na, maka tabowa alaglag kamemon. Buwattēꞌ isab kahālan saga aꞌa ma dunya itu bang aku, Anak Manusiyaꞌ, pabalik na piꞌitu. 40 Ma waktu inān aniyaꞌ duwangan aꞌa maghinang ma huma, jari niāꞌ dakayuꞌ ati tabba dakayuꞌ. 41 Aniyaꞌ duwangan dꞌnda magtabang anganggiling tirigu, niāꞌ dakayuꞌ ati tabba dakayuꞌ.
42 “Angkan kam subay pajaga, sabab mbal kataꞌuwanbi bang sumiyan waktu pabalik Panghūꞌbi piꞌitu. 43 Sagōꞌ pahati kam, bang aꞌa tag-dapu lumaꞌ bay ataꞌu bang lisag pila ya kasakat panangkaw ni lumaꞌna, tantu du iya magjaga boꞌ mbal tasōd lumaꞌna. 44 Angkan kam sohoꞌku subay patanam sakahabaꞌ waktu, sabab pabalik du Anak Manusiyaꞌ ma waktu mbal kataꞌuwanbi.”
Pasal Sosohoꞌan Kapangandolan
45 “Bang aniyaꞌ sosohoꞌan ahāp akkalna, aꞌa kapangandolan, ya na inaꞌan pineneꞌ eꞌ nakuraꞌna magmandul ma saga sosohoꞌan kaseheꞌan. Iya na isab magatas-pikil ma balanjaꞌ sigām. 46 Na, bang bay alikut nakuraꞌ inān boꞌ atꞌkka na pabīng, aheya kahāpan sosohoꞌan inān bang iya taꞌabut eꞌ nakuraꞌna anogol ma bay pamahinang iya. 47 Hakaꞌanta kam, tantu pangandol eꞌ nakuraꞌ inān altaꞌna kamemon ma sosohoꞌan kapangandolan eꞌ. 48 Sagōꞌ bang sosohoꞌan inān bay alaꞌat addatna, boꞌ yukna ma deyom atayna in nakuraꞌna atꞌggol giꞌ atꞌkka, 49 anagnaꞌ iya angalaꞌugan saga pagkahina sosohoꞌan eꞌ. Maglami-lami iya maka saga aꞌa paglalango. Magkakan iya sampay maginum maka sigām. 50 Sakali pataghaꞌ sadja ya tꞌkka nakuraꞌ inān, ma waktu halam kinataꞌuwan eꞌ sosohoꞌan. 51 Tantu iya nilagut eꞌ nakuraꞌna, sampay abugtang. Pinakadalan iya nalkaꞌ saliꞌ-saliꞌ maka saga aꞌa ya magbauꞌ-bauꞌ in addat sigām ahāp. Mainaꞌan sigām magtangis maka magtageꞌot empon sigām.”