25
Sangpūꞌ Budjang
1 Magparalilan si Isa pabalik, yukna, “Buwattitu ya kapagparinta Tuhan ma waktu kabīngku piꞌitu: saliꞌ dalil sangpūꞌ budjang bay amowa palitaꞌan sigām pakaniya-kaniya, patanam pehēꞌ anampang pangantin lꞌlla. 2 Lima budjang inān saliꞌ arupang, boꞌ lima inān atahaꞌ asal akkal sigām. 3 Na, in lima budjang arupang itu bay amowa palitaꞌan sagōꞌ halam bay amowa nsꞌllan maglabi pangisi ni palitaꞌan sigām bang song apꞌdda. 4 Ya lima budjang taga-akkal bay amowa pangisihan apꞌnnoꞌ eꞌ nsꞌllan, saddī isab ya ma deyom palitaꞌan. 5 Na, pagka atꞌggol tꞌkka pangantin lꞌlla, kinaruꞌ na sigām kamemon angkan tatuli.
6 “Taꞌabut paꞌin tongaꞌ bahangi, aniyaꞌ angalingan yukna, ‘Ilu na pangantin lꞌlla. Daiꞌ na kam anampang iya.’ 7 Abatiꞌ na kasangpūꞌ budjang inān ati pinahāp eꞌ sigām keyat palitaꞌan sigām. 8 Yuk saga budjang arupang ni budjang taga-akkal, ‘Amuwan kam konoꞌ nsꞌllanbi ilu, sabab song na apꞌdda palitaꞌan kami.’ 9 ‘Ē, mbal,’ yuk budjang taga-akkal eꞌ. ‘Mbal makaꞌabut nsꞌllan itu ma kitam kamemon. Pehēꞌ kam ni tinda amꞌllihan di-bi.’ 10 Na, pehēꞌ na ni tinda saga budjang arupang inān amꞌlli nsꞌllan. Alikut paꞌin sigām, magtūy atꞌkka pangantin lꞌlla. Ya lima budjang asal asakap bay ameyaꞌ ma iya pasōd ni deyom lumaꞌ pagkawinan boꞌ yampa tinambol lawang.
11 “Mbal atꞌggol atꞌkka budjang kaseheꞌan min tinda, ati angalingan ni pangantin lꞌlla. ‘O Tuwan,’ yuk sigām, ‘ukabin kami.’ 12 Sagōꞌ anambung pangantin lꞌlla yuk-i, ‘Mbal ukabku, mbal kam takilāku.’
13 “Na,” yuk si Isa, “subay kam pajaga toꞌongan, sabab mbal kataꞌuwanbi bang sumiyan llaw atawa waktu kabalikku piꞌitu.”
Tꞌllungan Sosohoꞌan
14 “Buwattitu ya kapagparinta Tuhan ma waktu kabīngku piꞌitu, saliꞌ dalil dakayuꞌ aꞌa magbantu atulak ni lahat saddī. Ma halam lagiꞌ iya palanjal, pinatimuk eꞌna saga sosohoꞌanna boꞌ pajagahanna altaꞌna ma sigām. 15 Ya pangꞌbbana ma sigām dangan maka dangan inān pinapagtongod maka akkal-kapandayanna. Dangan bay pangꞌbbahan limangibu pilak, dangan duwangibu pilak, maka dangan dangibu. Puwas eꞌ atulak na aꞌa tag-altaꞌ heꞌ. 16 Na, ya tendog bay pangꞌbbahan limangibu pilak inān, magtūy magusahaꞌan sīn ma iya ati makauntung iya limangibu pilak. 17 Damikiyanna sosohoꞌan pasunuꞌ, ya bay pangꞌbbahan duwangibu pilak, makauntung iya duwangibu pilak isab. 18 Sagōꞌ ya sosohoꞌan bay pangꞌbbahan dangibu pilak eꞌ, pehēꞌ angaliꞌ lowang panapukan sīn nakuraꞌna ma deyom tanaꞌ.
19 “Atꞌggol-tꞌggol paꞌin minnēꞌ amoleꞌ na nakuraꞌ sigām. Pagtꞌkkana, magbista iya maka sosohoꞌanna. 20 Ya sosohoꞌan bay pangꞌbbahan limangibu pilak eꞌ angꞌndeꞌan limangibu pilak bay tauntungna. Yukna ni nakuraꞌ, ‘Tuwan, bay aku pangꞌbbahannu limangibu pilak pagpoꞌon. Itiyaꞌ isab limangibu pilak bay tauntungku.’ 21 Yuk nakuraꞌ, ‘Ahāp hinangnu. Ahantap ka maka kapangandolan. Pagka kaꞌa ilu kapangandolan ma altaꞌ arikiꞌ, pangandolku du isab ma kaꞌa altaꞌ aheka toꞌongan. Daiꞌ ka, palamud ka ma kakoyaganku.’
22 “Puwas eꞌ pinaꞌan isab sosohoꞌan pasunuꞌ, ya bay pangꞌbbahan duwangibu pilak eꞌ. Yukna ni nakuraꞌ, ‘Tuwan, bay pangꞌbbahannu aku duwangibu pilak pagpoꞌon. Itiyaꞌ isab untungna duwangibu pilak.’ 23 Yuk nakuraꞌna, ‘Ahāp koꞌ hinangnu ilu. Ahantap ka maka kapangandolan. Pagka ka kapangandolan ma altaꞌ arikiꞌ, pangandolku isab ma kaꞌa altaꞌ aheka. Daiꞌ ka, palamud ka ma kakoyaganku.’
24 “Puwas eꞌ pinaꞌan isab sosohoꞌan dakayuꞌ, ya bay pangꞌbbahan dangibu pilak. Yukna ni nakuraꞌ, ‘Tuwan, kataꞌuwanku asal in kaꞌa akuriput. Angani ka minsan nggaꞌi ka kaꞌa ya bay magsangsāꞌ ananom. Amatimuk ka, minsan nggaꞌi ka kaꞌa ya bay maghampaꞌ. 25 Tināw aku ma kaꞌa, angkan bay tapukanku sīnnu ma deyom tanaꞌ. Ā! Itiyaꞌ na.’
26 “Anambung nakuraꞌ inān, yukna, ‘Alaꞌat ka! Lisuꞌan sidda! Kataꞌuwannu bahāꞌ in aku anguntung min nggaꞌi ka pagluꞌuganku, angāꞌ aku buwaꞌ isab min halam bay tanomku? 27 Na, bang buwattēꞌ, arapun bay patauꞌnu sīnku ma deyom bangko. Jari pagtꞌkkaku taꞌāꞌku du sīnku sampay anakna.’ 28 Puwas eꞌ ahꞌlling nakuraꞌ ni sosohoꞌan saddī, yukna, ‘Ngāꞌunbi sīn min iya itu ati pamuwanun ni aꞌa dakayuꞌ, ya aniyaꞌ sīnna sangpūꞌ ngibu pilak inān. 29 Sabab sasuku kapangandolan ma aheka, kinꞌnnopan du ma iya sampay ni manglabi-labihan. Sagōꞌ sasuku mbal kapangandolan minsan ma arikiꞌ, kinulangan du ai-ai bay ma iya. 30 Na, ya sosohoꞌan halam aniyaꞌ kapūsanna itu, larukinbi iya pehēꞌ ni deyom kalendoman. Magaluran saga aꞌa mahēꞌ, magtageꞌot isab empon sigām.’ ”
Pasal Hukuman ma Llaw Kahinapusan
31 Masi amanduꞌ si Isa, yukna, “Bang aku Anak Manusiyaꞌ pabalik piꞌitu maka sanglit-sahayaku, sineheꞌan du aku eꞌ kamemon saga malaꞌikat. Aningkōꞌ isab aku ma tingkōꞌan sultan. 32 Jari makatimuk paꞌin palbangsa-bangsahan ma alopanku, papagsaddīku sigām, buwat aꞌa magipat hayop amapagsaddī bili-bilina maka kambingna. 33 Saga aꞌa adil, ya saliꞌ hantang bili-bili, pasaddīku tampal ni kowan. Aꞌa kaseheꞌan, ya hantang kambing, pasaddīku tampal ni gibang. 34 Jari angallam aku, ya pagsultanan sigām. Yukku ma saga aꞌa ma atagku tampal ni kowan, ‘Kaꞌam kabuwanan kahāpan eꞌ Mmaꞌku, piꞌitu na kam boꞌ kaniyaꞌan palsukuꞌan ma deyom pagparintahanku, ya bay tinagamahan kaꞌam asal eꞌ Tuhan sangay min waktu kapaniyaꞌ dunya itu. 35 Ya na ilu panungbas kaꞌam. Sabab bay aku lingantu ati pakanbi aku. Bay aku patay boheꞌ ati painumbi aku. Bay aku aꞌa liyu ati paꞌiddabi aku ma deyom lumaꞌbi. 36 Bay halam aniyaꞌ sꞌmmekku ati pasꞌmmekanbi aku. Bay aku asaki ati ussapbi aku. Bay aku ma deyom kalabusu ati tibawbi.’
37 “Anambung du saga aꞌa adil inān, yuk-i, ‘Sumiyan ka bay taꞌndaꞌ kami lingantu, ati pakan kami ka, atawa patay boheꞌ ati painum kami ka? 38 Sumiyan ka bay taꞌndaꞌ kami saliꞌ aꞌa liyu, ati paꞌidda kami ka ma deyom lumaꞌ kami? Sumiyan ka bay taꞌndaꞌ halam aniyaꞌ sꞌmmeknu, ati pasꞌmmekan kami ka? 39 Sumiyan ka bay taꞌndaꞌ kami asaki atawa ma deyom kalabusu, ati tibaw kami ka?’ 40 Sambunganku du saga aꞌa inān, yukku, ‘Hakaꞌanta kam toꞌongan, sumiyan-sumiyan aniyaꞌ bay kahinanganbi buwattēꞌ ma dakayuꞌ bebeyaꞌanku areyoꞌ kapagaꞌana ilu, aku ya kahinanganbi.’
41 “Puwas eꞌ, ahꞌlling aku ni saga aꞌa kaseheꞌan inān, ya ma atagku tampal ni gibang. Yukku, ‘Alaꞌan kam min aku, saga pagmulkaꞌan Tuhan. Pehēꞌ kam ni api nalkaꞌ, ya tinagamahan nakuraꞌ saitan maka saga tendogna. 42 Ya na inaꞌan panungbas kaꞌam, sabab bay aku lingantu sagōꞌ halam aku bay pakanbi. Bay aku patay boheꞌ sagōꞌ halam aku bay painumbi. 43 Bay aku aꞌa liyu sagōꞌ halam aku bay paꞌiddabi ma deyom lumaꞌbi. Bay halam aniyaꞌ sꞌmmekku sagōꞌ halam aku bay pasꞌmmekanbi. Bay aku asaki, bay aku ma deyom kalabusu, sagōꞌ halam aku bay tibawbi.’
44 “Jari anambung du saga aꞌa inān, yuk sigām, ‘Sumiyan ka bay taꞌndaꞌ kami lingantu, atawa patay boheꞌ, atawa pinaꞌan ni lahat kami saliꞌ aꞌa liyu? Sumiyan ka bay taꞌndaꞌ kami halam aniyaꞌ sꞌmmeknu, atawa asaki, atawa ma deyom kalabusu, ati halam bay tinabang eꞌ kami?’ 45 Sambunganku sigām, yukku, ‘Hakaꞌanta kam toꞌongan, sumiyan-sumiyan kam halam bay anabang ma dakayuꞌ bebeyaꞌanku areyoꞌ kapagaꞌana itu, saliꞌ aku ya halam bay tabangbi.’ 46 Manjari saga aꞌa inān pinehēꞌ du ni kabinasahan ya anatas ni kasaumulan. Sagōꞌ in saga aꞌa adil pinaniyaꞌan kalluman kakkal ni kasaumulan.”