26
Pinagisunan si Isa
1 Aubus na eꞌ si Isa pamanduꞌna kamemon, ati ahꞌlling iya ni saga mulidna. 2 Yukna, “Asal kataꞌuwanbi, Hinang Paglakad na simuddai. Ya na koꞌ inaꞌan llaw pamatukbal Anak Manusiyaꞌ ni saga aꞌa boꞌ nilansang ni hāg pinapatay.”
3 Manjari saga imam alanga maka saga pagmattoꞌahan magtimuk pehēꞌ ni astanaꞌ si Kayapas ya Imam Muwallam. 4 Magisun sigām bang buwattingga eꞌ sigām anaggaw si Isa ma halam aniyaꞌ makataꞌu, boꞌ supaya iya pinapatay. 5 “Sagōꞌ,” yuk sigām, “daꞌa pasaltaꞌta ma pagjamu, boꞌ mbal ahiluhalaꞌ saga aꞌa kamemon.”
Si Isa Binuꞌusan Nsꞌllan Pahamut
6 Na, inaꞌan si Isa ma Betani, ma deyom lumaꞌ si Simun, aꞌa bay niꞌipul. 7 Ma pagkakanan paꞌin si Isa, aniyaꞌ pinaꞌan ni iya dakayuꞌ dꞌnda amowa bingkiꞌ-bingkiꞌ hinangan batu poteꞌ, isihan nsꞌllan pahamut landuꞌ ahalgaꞌ. Jari binusugan eꞌna kōk si Isa. 8 Pagꞌndaꞌ saga mulid, magtūy apꞌddiꞌ atay sigām. “Ahalgaꞌ nsꞌllan itu, angay pinakaꞌat?” yuk sigām. 9 “Arapun du paꞌin bay pinabꞌllihan ma hatusan pilak ati bꞌllihanna pamuwan ni saga aꞌa miskin.”
10 Sagōꞌ kinataꞌuwan eꞌ si Isa bang ai pinagbissala eꞌ saga mulid inān, angkan yukna, “Angay sasawbi dꞌnda itu? Ahāp sidda hinangna ma aku. 11 Paddas na paꞌin aniyaꞌ aꞌa miskin ma kaꞌam, sagōꞌ aku itu daiꞌ-daiꞌ du. 12 Ya angkan dꞌnda itu bay amuꞌusan nsꞌllan pahamut ni baranku, pangawal llaw pagkubul ma aku. 13 Hakaꞌanta kam,” yuk si Isa, “piꞌingga-piꞌingga lahat pagnasihatan lapal ahāp ma kaluhaꞌan dunya, kinissa du pasal bay hinang dꞌnda itu, pangentoman ma iya.”
Kapanipu si Judas Iskariyut ma si Isa
14 Puwas paꞌin inaꞌan, si Judas Iskariyut, dakayuꞌ mulid si Isa min kasangpūꞌ maka duwa, bay pehēꞌ ni kaimaman alanga amowa sigām magbissala. 15 Yukna, “Ai pamuwanbi aku bang si Isa sōnganku ni kaꞌam?” Niꞌitungan iya tꞌllumpūꞌ solag sīn dī pilak panamba iya. 16 Pagubus, amiha na si Judas waktu ahāp panōngna si Isa ni sigām.
Pagsakap ma Hinang Paglakada
17 Na, taꞌabut paꞌin tagnaꞌan llaw pangisbat Hinang Tinapay Halam Pasuligna, pehēꞌ ni si Isa saga mulidna atilaw iya, yuk-i, “Maingga kabayaꞌannu panakapan kami pagjamuhannu ma Hinang Paglakad?”
18 Yuk si Isa, “Aniyaꞌ dakayuꞌ aꞌa ma deyom daꞌira ilu, pehēꞌ kam ni iya ati hakaꞌinbi. Yukbi, ‘Sinōꞌ ka nihakaꞌan eꞌ guru, asekot na konoꞌ waktu ya panganggantaꞌ iya. Bilahi iya magjamu maka saga mulidna ma lumaꞌnu boꞌ maghinang Hinang Paglakad.’ ” 19 Na bineyaꞌ eꞌ saga mulid inān bay panohoꞌan si Isa, ati sinakap eꞌ sigām pagjamu Paglakad.
20 Pagabay kohap paꞌin, magtingkōꞌan na si Isa maka saga mulidna kasangpūꞌ maka duwa ma pagkakanan. 21 Amangan paꞌin, amissala si Isa ni sigām, yukna, “Bꞌnnal ya pahꞌllingku itu ma kaꞌam, aniyaꞌ dangan min kaꞌam magbantu anōngan aku ni bantaku.”
22 Magtūy landuꞌ asusa saga mulid heꞌ, ati atilaw sigām ma si Isa magsunuꞌ-sunuꞌ, yuk-i, “Nggaꞌi ka bahāꞌ aku, tuwan?”
23 Yuk sambung si Isa, “Ya seheꞌku magtꞌnnoꞌan tinapayna ni deyom pinggan itu, ya na iya anōngan aku. 24 Aku itu, Anak Manusiyaꞌ,” yuk si Isa, “amatay du buwat bay tasulat ma pasalanku. Sagōꞌ asiya-siya du aꞌa anōngan Anak Manusiyaꞌ ni bantana. Ahāp lagiꞌ aꞌa inān halam bay nianakan.”
25 Jari ahꞌlling si Judas, ya song anukbalan si Isa ni bantana. “Tuwan Guru,” yukna, “aku na bahāꞌ ya pagbissalanu ilu?”
Yuk si Isa, “Ahoꞌ, buwat na yuknu ilu.”
Jamuhan Pangentoman ma Panghūꞌ Isa
26 Hinabu sigām masi amangan, niāꞌ tinapay eꞌ si Isa. Niamuꞌan eꞌna pagsukulan boꞌ yampa pinagpōng-pōng eꞌna, ati pamuwanna ma saga mulidna. “Sambutunbi boꞌ kakanunbi,” yukna, “sabab in tinapay itu baranku koꞌ.”
27 Niāꞌ isab eꞌna dakayuꞌ sawan isihan binu-anggul, ati niamuꞌan isab pagsukulan boꞌ yampa sōnganna ni sigām. “Kaꞌam kamemon,” yukna, “inumunbi isi sawan itu. 28 Lahaꞌku koꞌ itu, tandaꞌ sin kapagsulutan Tuhan maka manusiyaꞌ. Song pinabuꞌus lahaꞌku ma sabab aꞌa aheka, pangampunan dusa sigām. 29 Hakaꞌanta kam, puwas itu mbal na aku anginum binu-anggul itu pabīng. Subay na kitam magbeyaꞌ anginum binu-anggul bahaꞌu ma deyom pagparintahan Mmaꞌku boꞌ yampa aku makainum pabīng.”
30 Aubus paꞌin eꞌ sigām angalang dakayuꞌ kalangan pamudji Tuhan, paluwas na sigām tudju ni būd Kayu Jaitun.
Papata si Isa Pasal Pamalilu si Petros
31 Manjari amūng si Isa ni sigām, yukna, “Sangom itu alahi du kam kamemon angꞌbba min aku, buwat tasulat ma Kitab Kanabi-nabihan, ya yuk-i,
‘Bonoꞌku,’ yuk Tuhan, ‘aꞌa angupiksaꞌ bili-bili,
ati akaukanat saga bili-bili bay daumpigan.’
32 Sagōꞌ bang aku tapakallum na pabīng min kamatayku, parahū aku min kaꞌam tudju ni lahat Jalil.”
33 Ahꞌlling si Petros ni si Isa, yukna, “Mbal ka bbahanku minsan ka niꞌbbahan eꞌ kaseheꞌan.”
34 Yuk si Isa ni iya, “Hakaꞌanta ka toꞌongan. Ma sangom itu, ma halam giꞌ angukkuꞌuk manuk, amalilu du ka min tꞌllu in aku mbal takilānu.”
35 Yuk sambung si Petros, “Minsan aku paunung amatay ma kaꞌa, mbal du ka paliluhanku.” Buwattēꞌ du isab pahꞌlling saga mulid kaseheꞌan.
Ma Kabbun Getsemane
36 Manjari palanjal na disi Isa ni kabbun niōnan Getsemane. Yuk si Isa ni saga mulidna, “Maitu kam aningkōꞌ. Pinaꞌan lagiꞌ aku anabbut Tuhan.” 37 Ya binowa eꞌ si Isa paneheꞌ, si Petros maka duwangan anak si Sibidi. Sakali magkasusahan si Isa, magkꞌbba-kꞌbba deyom atayna. 38 Yukna ni tꞌllungan mulidna heꞌ, “Aku itu agon-agon magkamamatay ma sabab kasusahan itu. Angagad kam maitu, seheꞌinbi aku magjaga.”
39 Makalawak-lawak paꞌin iya min sigām, kumꞌppang iya ni tanaꞌ maka eꞌna anabbut ni Tuhan. Yukna, “Arōy, Mmaꞌ! Bang makajari, laꞌanin lagiꞌ min aku sawan kabinasahan itu. Sagōꞌ nggaꞌi ka kabayaꞌanku subay nirūlan, bang paꞌin min kabayaꞌannu du.”
40 Puwas eꞌ pabīng si Isa ni seheꞌna katꞌllungan, boꞌ tabākna sigām magtulihan. Yukna ni si Petros, “Angay kam mbal makatatas magjaga maka aku minsan laꞌa hal danjām? 41 Pajaga kam, angamuꞌ kam tabang ni Tuhan boꞌ kam mbal tabowa-bowa eꞌ sasat. Lillaꞌ asal deyom ataybi sagōꞌ abuhat pamarananbi.”
42 Sakali pehēꞌ si Isa ni baina angamuꞌ-ngamuꞌ ni Tuhan pabīng. Yukna, “O Mmaꞌ, bang mbal kalaꞌanan kabinasahan itu, luwal bang kalabayanku, na, kaꞌa du iya abeyaꞌ.” 43 Makabalik paꞌin iya ni disi Petros, tabākna na isab sigām magtulihan pabīng sabab kinaruꞌ sidda.
44 Manjari pehēꞌ si Isa ni baina angamuꞌ-ngamuꞌ ni Tuhan pabīng buwat bay dahū, kamintꞌlluna na. 45 Puwas eꞌ pabalik iya ni mulidna katꞌllungan. Yukna, “Oy, atuli giꞌ kam? Pahali-hali giꞌ kam? Ndaꞌunbi ba, taꞌabut na waktuku. Aku, Anak Manusiyaꞌ itu, araiꞌ na tinukbalan ni pangꞌntanan saga aꞌa alaꞌat. 46 Pabungkal kam. Sūng kitam, sabab ilu na aꞌa ya anōngan aku ni sigām.”
Pagsaggaw ma Si Isa
47 Na, hinabu lagiꞌ si Isa ahꞌlling ni saga mulidna, magtūy atꞌkka pinaꞌan si Judas, dakayuꞌ mulid si Isa min kasangpūꞌ maka duwa heꞌ. Aheka aꞌa magbeyaꞌ maka iya magpamowa takos maka saga kakakal. Bay sigām sinōꞌ pinaꞌan eꞌ saga kaimaman alanga maka eꞌ saga pagmattoꞌahan. 48 Bay sigām asal kabuwanan pandoga eꞌ si Judas boꞌ aniyaꞌ pangilāhan sigām ma si Isa. Ya pamissalana ma sigām, “In aꞌa siyumku, ya na heꞌ saggawunbi.”
49 Pagtꞌkka si Judas pinaꞌan magtūy iya paꞌabut ni si Isa magaddat ma iya, yukna, “Salam, Tuwan Guru,” ati siyumna si Isa.
50 “Bagay,” yuk si Isa ni iya, “lanjalin hinangnu.”
Sakali pasekot ni si Isa saga aꞌa inān anaggaw iya, amalutan iya pahogot. 51 Sagōꞌ aniyaꞌ seheꞌ si Isa dakayuꞌ bay angahurusan pakokosna. Nilagut eꞌ aꞌa itu dakayuꞌ sosohoꞌan Imam Muwallam, autas magtūy dambilaꞌ taingana. 52 Yuk si Isa, “Pabalikun takosnu ni tagubanna ilu, sabab sasuku amowa kalis pamapatay aꞌa, amatay du isab iya eꞌ kalis. 53 Halam bahāꞌ kataꞌuwanbi, bang aku angamuꞌ tabang ni Mmaꞌku nirūlan sadja aku? Pinabeyaꞌan du aku malaꞌikatna ma ibuhan. 54 Sagōꞌ bang aku gantaꞌ angamuꞌ tabang, mbal magmaksud ya bay tasulat ma deyom Kitab, ya yukna in saga pakaradjaꞌan itu subay patꞌkka buwattitu.”
55 Manjari ahꞌlling si Isa ni baꞌanan aꞌa inān, yukna, “Pangannalbi bahāꞌ in aku itu mundu, ya poꞌon kam subay amowa takos maka kakakal panaggawbi aku? Llaw-llaw na paꞌin aku bay mahēꞌ aningkōꞌ amanduꞌ ma deyom langgal pagkulbanan, sagōꞌ halam aku saggawbi. 56 Patut bang saga pakaradjaꞌan itu kamemon pinatꞌkkahan aku boꞌ supaya aniyaꞌ kamaksuran ma bay tasulat eꞌ kanabi-nabihan ma deyom Kitab.” Magtūy maglahian saga mulid si Isa kamemon. Jari pinasagaran na iya.
Si Isa Paharap ni Tumpukan Maghuhukum
57 Manjari binowa si Isa eꞌ aꞌa bay anaggaw iya pinaꞌan ni lumaꞌ si Kayapas ya Imam Muwallam. Inaꞌan magtimuk saga guru saraꞌ agama maka pagmattoꞌahan. 58 Si Petros bay paturul ma si Isa sagōꞌ min katahan. Paturul iya sampay pasōd na ni deyom halaman lumaꞌ Imam Muwallam. Ma deyom paꞌin, magtingkōꞌan iya maka saga jaga imam bang paꞌin taꞌndaꞌna bang ai kamattihan si Isa. 59 Saga kaimaman alanga maka saga aꞌa ma Tumpukan Maghuhukum inān amiha sababan panuntut sigām ma si Isa, minsan nggaꞌi ka bꞌnnal, bang paꞌin aniyaꞌ pagsababan pamapatay sigām ma iya. 60 Saguwāꞌ minsan aheka aꞌa bay anaksiꞌ puting pasal si Isa, halam aniyaꞌ pagsababan bꞌnnal tabāk sigām. Ma katapusanna, aniyaꞌ duwangan aꞌa paꞌalop ma palhimpunan ahꞌlling, 61 yuk sigā, “Bay takale kami aꞌa itu ahꞌlling in iya angalubu langgal pagkulbanan, ati ma deyom tꞌllungꞌllaw konoꞌ tapatꞌnggena pabalik.”
62 Manjari anꞌngge Imam Muwallam amissala ma si Isa, yukna, “Kaꞌa ilu, halam bahāꞌ aniyaꞌ daꞌawanu ma panuntut kaꞌa itu?” 63 Sagōꞌ halam anambung si Isa. Amissala pabīng Imam Muwallam, yukna, “Pasapata ka ma ōn Tuhan ya kakkal salama-lama. Hakaꞌin kami toꞌongan bang kaꞌa Al-Masi, Anak Tuhan.”
64 “Ahoꞌ,” yuk si Isa, “ya na yuknu. Sagōꞌ hakaꞌanta kam, mbal du atꞌggol taꞌndaꞌbi du Anak Manusiyaꞌ aningkōꞌ ma bihing Tuhan Sangat Kawasa, tampal ni kowan. Maka taꞌndaꞌbi du iya piꞌitu ameyaꞌ ma gabun min deyom sulgaꞌ.”
65 Manjari gineseꞌ eꞌ Imam Muwallam pakayanna, kabowa astolna. Yukna, “Aꞌa itu amahꞌlling pangkal ni Tuhan! Daꞌa na kitam amiha saksiꞌ saddī! Takalebi na llingna pangkal! 66 Ai pangahukumbi?”
Yuk sambung sigām, “Subay iya pinatꞌnnaꞌan hukuman ni kamatay.”
67 Puwas eꞌ niludjaꞌan si Isa eꞌ sigām ma baihuꞌna, maka pinagtibuꞌ. Aniyaꞌ isab sigām bay anampak iya, 68 maka eꞌ sigām ahꞌlling, yuk-i, “Bang kaꞌa Al-Masi, tokorun bang sai ya bay anampak kaꞌa!”
Kapamalilu si Petros Pasal si Isa
69 Manjari inaꞌan si Petros aningkōꞌ ma halaman lumaꞌ heꞌ. Aniyaꞌ pehēꞌ ni iya dakayuꞌ dꞌnda, ipatan Imam Muwallam. Yuk dꞌnda itu ni iya, “Kaꞌa ilu, bay sa ka ameyaꞌ ma si Isa, ya aꞌa Jalil inān.”
70 Sagōꞌ amalilu si Petros ma alopan aꞌa inān kamemon. “Mbal kataꞌuwanku,” yukna, “bang ai ya pahꞌllingnu ilu.” 71 Puwas eꞌ pehēꞌ iya tudju ni bowaꞌ lawang, ati aniyaꞌ ipatan dꞌnda saddī bay makaꞌndaꞌ iya. Pagꞌndaꞌ dꞌnda itu ma si Petros, yukna ni saga aꞌa mainaꞌan, “Aꞌa itu bay ameyaꞌ ma si Isa, aꞌa Nasaret inān.”
72 Magtūy amalilu si Petros pabīng maka anapahan iya di-na. “Mbal kataꞌuwanku aꞌa inān!” yukna.
73 Mbal atꞌggol, pinaꞌan ni si Petros saga aꞌa ya asal magtꞌnggehan mainaꞌan. Yuk sigām, “Kataꞌuwan kami in kaꞌa bꞌnnal bay seheꞌ disi Isa sabab tapangliꞌta ka ma bissalanu.”
74 Minnēꞌ magbalik-balik si Petros anapahan di-na. Ya pahꞌllingna, “Mbal takilāku aꞌa inān!”