11
Kamatay si Lasarus
1 Na, aniyaꞌ dakayuꞌ lꞌlla asaki, ōnna si Lasarus. Inaꞌan iya maglahat ma kalumaꞌan Betani maka duwangan danakanna dꞌnda, si Mariyam maka si Marta. 2 In si Mariyam dakayuꞌ dꞌnda ya amuꞌusan nsꞌllan pahamut ni tapeꞌ Panghūꞌ Isa boꞌ sapuhanna maka buꞌunna. 3 Jari itu, pagga abangat saki si Lasarus, aniyaꞌ lapal pinabeyaꞌ eꞌ duwangan danakanna ni si Isa, yuk-i, “Tuwan, asaki bagaynu ya kalasahannu.”
4 Takale paꞌin lapal itu eꞌ si Isa, yukna, “Ya kamaujuran saki si Lasarus inān nggaꞌi ka du kamatay, sagōꞌ sanglit ni Tuhan, supaya sinanglitan isab Anak Tuhan.” 5 Na, alasa asal si Isa ma tꞌllungan magdanakan inān, disi Marta maka si Mariyam maka si Lasarus. 6 Sagōꞌ pagtaꞌuna in si Lasarus waꞌi asaki, angagad giꞌ iya duwangꞌllaw mahēꞌ ma patꞌnnaꞌanna. 7 Yuk si Isa ni saga mulidna, “Sūng kitam pabīng pehēꞌ ni lahat Yahudiya.”
8 Yuk saga mulidna ni iya, “Tuwan Guru, bahaꞌu ka arak pinagbantung eꞌ saga Yahudi boꞌ ka pinapatay. Ati maggaraꞌ na ka isab pabīng pehēꞌ?”
9 Anambung si Isa, yukna, “Daꞌa kam asusa. Aniyaꞌ sangpūꞌ maka duwanjām kasawahan ma deyom dangꞌllaw. Bang kita gantaꞌ lumꞌngngan ma waktu llaw mbal makarugtul tapeꞌta sabab asawa asal dunya. 10 Sagōꞌ bang kita lumꞌngngan waktu sangom makarugtul sadja sabab ma deyom kita lendom.” 11 Akatis paꞌin lling si Isa itu, yukna ni saga mulidna, “Si Lasarus bagaytam inān waꞌi tatuli. Sagōꞌ pehēꞌ aku amatiꞌ iya.”
12 Yuk saga mulidna ni iya, “Tuwan, pauliꞌ du iya bang hal atuli.”
13 Kinataꞌuwan asal eꞌ si Isa in si Lasarus amatay na, sagōꞌ bang ma pangannal saga mulidna dī tuli ya pagpaꞌinna. 14 Angkan pinatampal eꞌ si Isa llingna, yukna, “Amatay na si Lasarus. 15 Ahāp aku halam makamahēꞌ ma Betani ma waktu kasaki si Lasarus, sabab tantu du kam angandol ma aku bang taꞌndaꞌbi ka-eꞌku ma iya. Sūng kitam pehēꞌ.”
16 Manjari si Tomas, ya niranglay Kꞌmbal, ahꞌlling ni saga pagkahina, yukna, “Sūng. Parongan kitam kamemon minsan kitam paunung ma iya sampay ni kamatay.”
Si Isa ya Poꞌonan Kallum
17 Atꞌkka paꞌin disi Isa ni Betani, tataꞌuna mpat llaw na bay kapangubul si Lasarus. 18 Betani itu asal asekot ni Awrusalam, saga dabatu lawakna, 19 jari aheka saga aꞌa min lahat Yahudiya magbunyug pehēꞌ ni si Mariyam maka ni si Marta pasal kamatay danakan sigā lꞌlla. 20 Manjari itu, takale paꞌin eꞌ si Marta pasal si Isa ilu na, pehēꞌ iya anampang. Si Mariyam tabba ma deyom lumaꞌ. 21 Magbāk paꞌin si Marta maka si Isa, yukna ni si Isa, “Tuwan Panghūꞌ, bang ka bay maitu mbal du bay amatay danakanku! 22 Sagōꞌ kataꞌuwanku, minsan ma buwattitu, nirūlan ka eꞌ Tuhan ma ai-ai amuꞌnu.”
23 Yuk si Isa ni iya, “Allum du danakannu pabīng.”
24 Yuk si Marta, “Ahoꞌ, Tuwan, kataꞌuwanku. Pabangun du iya ni kallum ma llaw kahinapusan.”
25 Yuk si Isa ni iya, “Aku ya magpakallum saga aꞌa magpatayan, maka aku ya poꞌonan kallum. Sai-sai angandol ma aku allum du minsan iya amatay na. 26 Sasuku isab allum boꞌ angandol ma aku, mbal magkamatay sampay ni kasaumulan.” Manjari atilaw si Isa ni si Marta, yukna, “Magkahagad ka bahāꞌ?”
27 “Ahoꞌ, Panghūꞌku,” yuk si Marta, “magkahagad aku in kaꞌa Al-Masi, Anak Tuhan, ya lagaran kami piꞌitu ni dunya.”
28 Akatis paꞌin lling si Marta itu, pehēꞌ iya angalinganan danakanna si Mariyam boꞌ yampa singuꞌ-singuꞌna, yukna, “Itiyaꞌ na Tuwan Guru amiha kaꞌa.” 29 Pagkale itu eꞌ si Mariyam, pabuhat iya min paningkōꞌanna boꞌ paraiꞌ-daiꞌ pehēꞌ ni si Isa. 30 Halam giꞌ makasampay si Isa pehēꞌ ni kalumaꞌan sagōꞌ inaꞌan iya masi giꞌ ma bay pasampangan si Marta ma iya. 31 Aniyaꞌ saga aꞌa ma lumaꞌ magtingkōꞌan maka si Mariyam. Jari pagꞌndaꞌ sigām ma iya pabuhat maka paluwas magdaiꞌ-daiꞌ, magtūy du sigām paturul. Pangannal sigām in si Mariyam pehēꞌ ni kubul maglemong mahēꞌ.
32 Sagōꞌ si Isa ya papehēꞌanna. Pagꞌndaꞌna ma si Isa pasujud iya ni dahuan tapeꞌna, maka yukna, “Panghūꞌku, bang ka bay maitu, mbal du bay amatay danakanku.”
33 Makaꞌndaꞌ paꞌin si Isa ma si Mariyam maglemong, sampay saga seheꞌna Yahudi ameyaꞌ-meyaꞌ isab maglemongan, magtūy iya anganduꞌ-nganduꞌ maka ahansul deyom atayna. 34 “Maingga,” yukna, “bay pangubulanbi iya?”
Yuk sigām, “Tuwan, piꞌitu ka ndaꞌun.”
35 Anangis si Isa.
36 Yuk suli-suli saga aꞌa heꞌ, “Ndaꞌunbi ba kaheya lasana ma si Lasarus.”
37 Sagōꞌ yuk kaseheꞌ, “Si Isa itu bay makapakaꞌndaꞌ saga aꞌa buta. Angay halam tatabangna si Lasarus boꞌ mbal amatay?”
Kapakallum si Isa ma si Lasarus
38 Na, anganduꞌ-nganduꞌ si Isa pabīng boꞌ pehēꞌ ni kubul. In kubul inān bay ma deyom songab batu maka aniyaꞌ batu panambol iya. 39 Pagtꞌkka sigām ni kubul, yuk si Isa, “Laꞌaninbi batu ilu.”
Sagōꞌ ahꞌlling si Marta, danakan aꞌa bay amatay itu. Yukna ni si Isa, “Abau na iya, Tuwan, sabab kaꞌmpat llawna na.”
40 Yuk si Isa ma iya, “Bay na ka hakaꞌanku, makaꞌndaꞌ ka kawasa Tuhan, bang paꞌin ka magkahagad.” 41 Sakali nilaꞌanan eꞌ sigām batu panambol kubul. Pahangad si Isa angamuꞌ-ngamuꞌ ni Tuhan. “O Mmaꞌ,” yukna, “magsukul aku sabab takalenu pangamuꞌku. 42 Kataꞌuwanku in kaꞌa akale na paꞌin ma aku, sagōꞌ paluwasku bissalaku itu ma sabab saga aꞌa itu supaya sigām amꞌnnal in kaꞌa bay amapiꞌitu aku.” 43 Pagubus bissalana itu, angalingan iya pakosog yukna. “Lasarus! Paluwas ka piꞌitu.” 44 Magtūy paluwas aꞌa bay amatay. Masi saputna ma tapeꞌ-tanganna maka masi turung-mukana. Yuk si Isa ni sigām, “Laꞌaninbi saputna ilu, boꞌ pasagarinbi iya palꞌngnganan di-na.”
Pinagisunan si Isa boꞌ Sinaggaw
45 Aheka saga aꞌa, bay pinaꞌan ni si Mariyam, makaꞌndaꞌ hinang si Isa itu ati magkahagad na sigām ma iya. 46 Sagōꞌ aniyaꞌ sigām kaseheꞌ pehēꞌ ni saga Parisi anumbung pasal bay hinang si Isa. 47 Angkanna saga Parisi maka saga imam nakuraꞌ bay amapagtipun Tumpukan Maghuhukuma. Yuk sigām, “Ai bahāꞌ hinangtam ni aꞌa itu? Aheka na paltandaꞌan kainu-inuhan aꞌa, tahinang eꞌna. 48 Bang iya pasangdantam,” yuk sigām, “tantu magkahagad saga aꞌa kamemon ma iya. Ati piꞌitu saga nakuraꞌ Rōm angamula bangsatam sampay langgaltam.”
49 Aniyaꞌ dakayuꞌ anambung, ōnna si Kayapas. Imam Muwallam iya ma tahun inaꞌan-i. Yuk si Kayapas itu, “Saliꞌ halam aniyaꞌ panghatibi. 50 Hatiunbi itu: padpad magmula katibuꞌukan bangsatam kamemon, ahāp lagiꞌ bang dakayuꞌ aꞌa sadja amatay gantiꞌtam kamemon.”
51 Ya pinagbaꞌat itu eꞌ si Kayapas nggaꞌi ka min baranna. Buwattēꞌ pahꞌllingna sabab in iya Imam Muwallam ma tahun inaꞌan-i. Angkan tapagbaꞌat eꞌna in si Isa subay pinapatay panganggantiꞌ bangsa Israꞌil. 52 Nggaꞌi ka hal bangsa Israꞌil, saguwāꞌ amatay iya panganggantiꞌ saga panganak Tuhan ya apulak-palik ma kalahat-lahatan boꞌ supaya sigām pinapagdakayuꞌ. 53 Jari itu, tinagnaꞌan min llaw inaꞌan-i, maggaraꞌ na saga aꞌa inān amapatay si Isa. 54 Angkan iya mbal na patampal ni kahekaꞌan aꞌa mahēꞌ ma lahat Yahudiya. Gom paꞌin iya maka saga mulidna alaꞌan pehēꞌ ni Epraꞌim, kauman ma bihing lahat paslangan, ati mainaꞌan iya patꞌnnaꞌ maka saga mulidna.
55 Manjari asekot na paghinang saga Yahudi ya niōnan Hinang Paglakad. Aheka saga aꞌa min kalahat-lahatan waꞌi patukad ni Awrusalam magpandi sussi boꞌ supaya sigām manjari palamud ma paghinang. 56 Amiha na paꞌin sigām ma si Isa kalu iya inaꞌan ma Awrusalam, jari atipun paꞌin sigām ma deyom langgal pagkulbanan, magkihaka sigām dangan maka dangan. Yuk sigām, “Ai ma pikilanbi? Piꞌitu bahāꞌ si Isa ni paghinangan? Araiꞌ mbal, ā?” 57 Buwattēꞌ pagbissala sigām sabab aniyaꞌ bay panohoꞌan saga imam alanga maka saga Parisi, bang aniyaꞌ konoꞌ makataꞌuwan kamainaꞌanan si Isa, subay pataꞌuna magtūy saga nakuraꞌ supaya iya sinaggaw.