10
Pasal Aꞌa Angupiksaꞌ saga Bili-bilina
1 Manjari magparalilan si Isa, yukna, “Bꞌnnal pangahakaku itu ma kaꞌam, bang aniyaꞌ aꞌa pasōd ni deyom kuralan bili-bili, ma halam palabay min lawang sagōꞌ pasōd min palabayan saddī, aꞌa inān panangkaw maka pangalangpas. 2 Sagōꞌ bang aꞌa pasōd min lawang, ya na inaꞌan aꞌa angupiksaꞌ bili-bili. 3 Tantu iya niukaban eꞌ tungguꞌ lawang. Paglinganna ōn saga bili-bilina pakaniya-pakaniya, tapanhid suwalana eꞌ sigām ati bowana sigām paluwas min deyom kural. 4 Makaluwas paꞌin, parahū iya ati paturul saga bili-bili min buliꞌanna sabab tapanhid suwalana. 5 Bang aꞌa saddī, mbal du tinurul eꞌ bili-bili. Alahi sadja sigām sabab mbal tapanhid suwalana.” 6 Kissa itu bay pamaralil eꞌ si Isa ma saga aꞌa inān sagōꞌ halam tahati eꞌ sigām.
7 Angkanna ahꞌlling si Isa ma sigām pabalik, yukna, “Bꞌnnal ya pangahakaku itu ma kaꞌam, aku itu ibarat lawang palabayan saga bili-bili. 8 Saga aꞌa bay piꞌitu dahū min aku saliꞌ aꞌa anangkaw, aꞌa angalangpas. Saguwāꞌ halam sigām kinale eꞌ saga aꞌa sukuꞌku. 9 Aku itu ibarat lawang,” yuk si Isa. “Sai-sai pasōd labay min aku, lappasan du iya. Limaya du iya magsōd-luwas ati makabāk iya kalluman. 10 Bang aꞌa angalangpas, halam aniyaꞌ gawina piꞌitu saddī min anangkaw maka amapatay maka amakaꞌat. Sagōꞌ ya gawiku piꞌitu amuwan kallum ma manusiyaꞌ, kallum mamarahi hāpna.
11 “Aku itu,” yuk si Isa, “ibarat aꞌa tag-bili-bili ahāp sidda pangupiksaꞌna ma saga bili-bilina. Aꞌa inān maglillaꞌ amatay ma sabab sigām. 12 Sagōꞌ mbal magparuli toꞌongan aꞌa ginadjihan anungguꞌ sabab nggaꞌi ka iya tag-dapu. Angkan bang aniyaꞌ taꞌndaꞌna eroꞌ talun pasekot, magtūy pasagaranna saga bili-bili ati alahi iya minnēꞌ. Saga bili-bili kaseheꞌ tasꞌkkat eꞌ eroꞌ, kaseheꞌ akaukanat. 13 Ya angkan aꞌa inān alahi sabab ginadjihan sadja iya. Halam aniyaꞌ pagkaꞌinoganna ma saga bili-bili. 14-15 Aku itu,” yuk si Isa, “ibarat aꞌa tag-bili-bili ahāp pangupiksaꞌna ma saga bili-bilina. Kami maka Mmaꞌku magkataꞌu toꞌongan. Damikiyanna aku maka saga aꞌa sukuꞌku, ataꞌu aku ma sigām maka ataꞌu sigām ma aku. Maglillaꞌ isab aku amatay ma sabab sigām. 16 Aniyaꞌ giꞌ saga aꞌa sukuꞌku saddī minnitu. Ibarat sigām bili-bili ma kuralan saddī. Ya du sigām subay bowaku. Angasip du sigām ma suwalaku ati pagdakayuꞌku sigām, manjari dakayuꞌ du angupiksaꞌ sigām kamemon.
17 “Kinalasahan aku eꞌ Mmaꞌku Tuhan sabab maglillaꞌ aku amatay boꞌ supaya bawiꞌku kallumku pabīng. 18 Halam aniyaꞌ taga-kapatut amapatay aku, sabab aku ya magkabayaꞌan amatay maka mbal. Taga-kapatut aku maglillaꞌ kallum baranku, maka taga-kapatut amakallum baranku pabīng. Panohoꞌan Mmaꞌku koꞌ itu ma aku.”
19 Makakale paꞌin saga aꞌa ma pamissala si Isa inān, magtūy sigām abahagiꞌ duwa pabalik. 20 Aheka sigām angupama, yuk-i, “Aꞌa itu sinōd saitan! Binelaw! Angay iya kalebi?”
21 Sagōꞌ yuk kaseheꞌan, “Bang aꞌa kasōran saitan mbal iya makabissala buwat pamissalana itu. Maka bang saitan, mbal tapaꞌndaꞌna aꞌa buta.”
Mbal Magkahagad saga Yahudi
22 Manjari timpu paghaggut na, waktu isab Paghinang Pagsussi ma langgal pagkulbanan ma Awrusalam. 23 Inaꞌan si Isa ma deyom langgal lumꞌngngan ma saurung ya niōnan Saurung Sulayman. 24 Jari magtimukan saga aꞌa pehēꞌ ni sakalibutna. Yuk sigām ni iya, “Atꞌggol giꞌ ka bahāꞌ amahati kami bang sai ka? Bang ka bꞌnnal Al-Masi ya tapeneꞌ eꞌ Tuhan, subay kami hakaꞌannu pahāp.”
25 Anambung si Isa, yukna, “Bay na kam hakaꞌanku sagōꞌ halam aku bay pagkahagadbi. Ya amataꞌuwan kaꞌam bang sai aku, ya na saga hinang makainu-inu bay hinangku min ōn Mmaꞌku. 26 Sagōꞌ mbal aku pagkahagadbi sabab kaꞌam ilu nggaꞌi ka saga bili-biliku, nggaꞌi ka sukuꞌku. 27 Saga bili-biliku angasip du ma suwalaku. Kataꞌuwanku sigām maka paturul du sigām ma aku. 28 Buwananku sigām kallum kakkal ni kasaumulan. Mbal toꞌongan sigām amutawan min Tuhan sumiyan-sumiyan, maka halam aniyaꞌ makaragtuꞌ sigām min komkomanku. 29 Bay sigām pamasukuꞌan aku eꞌ Mmaꞌku, maka akawasa iya min kamemon. Halam aniyaꞌ makaragtuꞌ saga aꞌa sukuꞌku min komkomanna. 30 Aku maka Mmaꞌku dakayuꞌ du.”
31 Pagkale saga aꞌa ma lling si Isa heꞌ, amuwaꞌ sigām batu pabīng pamantung sigām ma iya. 32 Yukna ni sigām, “Aheka hinang ahāp bay paꞌndaꞌanku ni kaꞌam, saga hinang bay pamahinang aku eꞌ Mmaꞌku Tuhan. Hinang ingga ya kabꞌnsihanbi, ya angkan kam bilahi amantung aku?”
33 Yuk sambung saga aꞌa inān, “Nggaꞌi ka ma sabab hinangnu ahāp ya angkan kami magbamba amantung kaꞌa, sagōꞌ ma sabab llingnu pangkal tudju ni Tuhan. Manusiyaꞌ sadja ka, boꞌ paꞌin maglaku-laku ka in kaꞌa Tuhan.”
34 Yuk si Isa ni sigām, “Na, tasulat asal ma deyom Kitab Tawrat ya pamissala Tuhan ni saga manusiyaꞌ. Yuk-i, ‘Kaꞌam ilu saga tuhan.’ 35 Na, kataꞌuwantam in kamemon tasulat ma deyom Kitab mbal toꞌongan apinda salama-lama. Bang Tuhan angōn tuhan ma saga aꞌa bay pamuwananna lapalna, 36 ya lagiꞌna aku patut niōnan Anak Tuhan. Sabab tapeneꞌ aku eꞌ Tuhan boꞌ ma iya sadja, maka pinapiꞌitu aku eꞌna ni dunya. Jari angay yukbi in aku ahꞌlling pangkal tudju ni Tuhan pagka yukku in aku Anak Tuhan? 37 Bang aku saupama mbal angahinang saga hinang kabayaꞌan Mmaꞌku, daꞌa aku pagkahagarunbi. 38 Sagōꞌ bang magtaluwaꞌ hinangku maka kabayaꞌan Tuhan, na, pagkahagarunbi kahinanganku sadja, minsan kam mbal makabꞌnnal ma pahꞌllingku. Sabab minnēꞌ kataꞌuwanbi toꞌongan maka tahatibi in Mmaꞌku maka aku dakayuꞌ du.” 39 Magtūy pasulay saga aꞌa inān pabalik anaggaw si Isa, sagōꞌ makapuwas iya min pangꞌntanan sigām.
40 Puwas eꞌ pabalik si Isa pehēꞌ ni dambilaꞌ sapaꞌ Jordan, ni bay pagpandihan saga aꞌa eꞌ si Yahiya waktu tagnaꞌ. Patꞌnnaꞌ si Isa mainaꞌan daka pilambahangi. 41 Jari aheka aꞌa pehēꞌ ni iya. Yuk suli-suli sigām, “Si Yahiya halam bay makahinang saga paltandaꞌan kainu-inuhan aꞌa, sagōꞌ bꞌnnal sadja kamemon bay pahꞌllingna pasal si Isa.” 42 Ati aheka aꞌa mahēꞌ angandol ma si Isa.