9
Kauliꞌan Aꞌa bay Buta min Deyom Kandang
1 Palꞌngngan paꞌin si Isa, aniyaꞌ dakayuꞌ lꞌlla taꞌndaꞌna, aꞌa bay abuta min deyom kandang. 2 Tinilaw si Isa eꞌ saga mulidna, yuk-i, “Tuwan guru, angay aꞌa itu abuta? Min dusana atawa min dusa inaꞌ-mmaꞌna?”
3 Yuk sambung si Isa, “Ya kabutana itu nggaꞌi ka ma sabab dusana atawa dusa mattoꞌana. Abuta iya supaya iya pamaꞌndaꞌan kawasa Tuhan. 4 Satꞌggol halam pasꞌddop llaw, subay hinangta saga hinang Tuhan ya bay amapiꞌitu aku,” yuk si Isa. “Bang taꞌabut na sangom, halam aniyaꞌ makapaghinang. 5 Satꞌggolku maitu ma dunya amuwan aku kasawahan ma pikilan manusiyaꞌ.”
6 Apuwas pahꞌlling si Isa itu, angaludjaꞌ iya ni tanaꞌ. Pinapaglamugay ludjaꞌ maka tanaꞌ nihinang pisak, ati niakup eꞌna boꞌ pineheran ni mata aꞌa abuta inān. 7 Yuk si Isa ni iya, “Pehēꞌ ka ni tigbaw Silowam akulaꞌup.” (Ya hati Silowam itu, ‘pinabeyaꞌ’.) Manjari pehēꞌ na lꞌlla buta inān akulaꞌup. Pagbīngna minnēꞌ, makaꞌndaꞌ na iya.
8 Taꞌndaꞌ iya eꞌ saga seheꞌna dalūng maka eꞌ saga aꞌa bay makaꞌndaꞌ iya angamuꞌ sarakka. Yuk sigām, “Ya na itu bahāꞌ aꞌa bay aningkōꞌ angamuꞌ sarakka inān?”
9 Yuk kaseheꞌan, “Ahoꞌ, ya na koꞌ.”
Yuk kaseheꞌan isab, “Nggaꞌi ka. Hal iya angaluwa aꞌa buta heꞌ.”
Saguwāꞌ ahꞌlling magbaran in aꞌa buta, yukna, “Aku na koꞌ itu.”
10 “Buwattingga angkan kakaꞌndaꞌnu?” yuk tilaw sigām.
11 Anambung iya, yukna, “Aꞌa niōnan si Isa bay angakup pisak pineheran ni mataku. Puwas eꞌ sinōꞌ aku pehēꞌ ni tigbaw Silowam akulaꞌup, ati pehēꞌ aku. Makakulaꞌup paꞌin, magtūy aku makaꞌndaꞌ.”
12 “Maingga na aꞌa inān?” yuk sigām.
Yuk sambungna, “Sittaꞌa, mbal kataꞌuwanku.”
Aꞌa bay Abuta Pinariksaꞌ eꞌ saga Parisi
13 Sakali binowa lꞌlla bay abuta ni saga Parisi. 14 Na, ya llaw kapangakup pisak eꞌ si Isa maka kapamauliꞌna mata aꞌa buta heꞌ, llaw Sabtuꞌ. 15 Manjari pinariksaꞌ aꞌa itu eꞌ saga Parisi bang buwattingga iya makaꞌndaꞌ. Yukna ma sigām, “Bay iya amatꞌnnaꞌ pisak ni mataku. Puwas eꞌ akulaꞌup aku. Pagkulaꞌup itu magtūy aku makaꞌndaꞌ na.”
16 Yuk saga Parisi kaseheꞌ, “Aꞌa inān nggaꞌi ka min Tuhan, sabab talanggalna saraꞌ pasal llaw Sabtuꞌ pagka buwattēꞌ hinangna.”
Sagōꞌ yuk kaseheꞌ, “Bang aꞌa dusahan, mbal tahinangna buwat saga hinang makainu-inu itu.” Manjari mbal maguyun pikilan sigām.
17 Ma katapusanna atilaw sigām pabalik ma aꞌa buta heꞌ, yuk-i, “Ya yuknu in matanu bay kauliꞌan eꞌ aꞌa inān. Sai iya, bang ma bistahannu?”
Yuk aꞌa bay abuta heꞌ, “Bang ma aku, in iya dakayuꞌ nabi.”
18 Sagōꞌ mbal amꞌnnal saga nakuraꞌ Yahudi in aꞌa inān bay buta tagnaꞌ. Angkan nilinganan inaꞌ-mmaꞌna eꞌ sigām boꞌ tinilaw. 19 Yuk sigām, “Aꞌa itu, anakbi bahāꞌ? Bꞌnnal bahāꞌ, asal buta iya min deyom kandang? Buwattingga kakaꞌndaꞌna itu?”
20 Yuk saga mattoꞌana, “Ahoꞌ, anak kami koꞌ itu. Maka bꞌnnal isab, abuta iya asal min deyom kandang. 21 Sagōꞌ mbal kataꞌuwan kami bang buwattingga bay kakaꞌndaꞌna atawa bang sai bay makauliꞌ matana. Tilawunbi iya. Asangpot na iya, ataꞌu du anambung.” 22 Buwattēꞌ panambung saga mattoꞌa lꞌlla heꞌ sabab tināw sigā ma pagnakuraꞌan. Sabab bay na maggaraꞌ saga nakuraꞌ, bang aniyaꞌ aꞌa magsabꞌnnal ma si Isa in iya Al-Masi ya tapeneꞌ eꞌ Tuhan, mbal pinasōd ni deyom langgal. 23 Angkan yuk mattoꞌana, “Tilawunbi iya, asangpot na iya.”
24 Jari itu aꞌa bay abuta heꞌ nilinganan pabalik eꞌ saga nakuraꞌ Yahudi. Yuk sigām ni iya, “Pasapahanta ka, saksiꞌtam Tuhan. Kataꞌuwan kami, dusahan asal aꞌa bay amauliꞌ kaꞌa.”
25 Anambung aꞌa heꞌ, yukna, “Mbal kataꞌuwanku bang iya taga-dusa atawa halam. Sagōꞌ bang ma panaꞌuku, bay aku buta ati makaꞌndaꞌ na aku.”
26 Tinilaw iya pabalik eꞌ sigām, yuk-i, “Ai bay hinangna ni kaꞌa? Buwattingga eꞌna amauliꞌ matanu?”
27 Anambung iya, yukna, “Bay na kam hakaꞌanku sagōꞌ mbal aku kalebi. Angay kam bilahi akale pabīng? Bayaꞌan kam bahāꞌ magpamulid ma iya?”
28 Pinahꞌllingan iya laꞌat eꞌ saga nakuraꞌ inān, yuk sigām, “Kaꞌa mulidna. Kami itu mulid si Musa. 29 Kataꞌuwan kami in si Musa bay kapalmanan eꞌ Tuhan. Saguwāꞌ aꞌa inaꞌan, mbal minsan kataꞌuwan kami bang minningga.”
30 Anambung aꞌa bay abuta, yukna, “Ainu-inu aku. Mbal iya kataꞌuwanbi bang minningga, sagōꞌ makapauliꞌ iya mataku. 31 Kataꞌuwantam in Tuhan mbal akale ma aꞌa dusahan. Ya kinale eꞌ Tuhan bang aꞌa magmatāwan iya maka maghinang kabayaꞌanna. 32 Sangay min katagnaꞌ dunya, yambohoꞌ kita makakale aniyaꞌ makapauliꞌ aꞌa bay buta min deyom kandang. 33 Abila aꞌa inān nggaꞌi ka min Tuhan, tantu iya mbal makahinang saga hinang buwattitu.”
34 Pinabukagan iya eꞌ sigām, yuk-i, “Dusahan ka min llaw kapaganak ma kaꞌa sampay ni kaheyanu, ati panduꞌannu kami bahāꞌ?” Jari pinaluwas iya eꞌ saga nakuraꞌ inān min deyom langgal.
Manusiyaꞌ Saliꞌ Hantang Buta
35 Takale paꞌin eꞌ si Isa pasal aꞌa bay buta inān pinaluwas na min deyom langgal, magtūy pehēꞌ si Isa amiha iya. Tabāk paꞌin iya, yuk si Isa, “Magkahagad ka bahāꞌ ma aꞌa niōnan Anak Manusiyaꞌ?”
36 Anambung aꞌa itu, yukna, “Sai iya, Tuwan? Hakaꞌin aku supaya aku magkahagad ma iya.”
37 Yuk si Isa ma iya, “Taꞌndaꞌnu na iya, maka itiyaꞌ na iya anuli-nulihan kaꞌa buwattinaꞌan.”
38 Magtūy pasujud aꞌa itu ma dahuan si Isa, maka eꞌna ahꞌlling, “Tuwan Panghūꞌ, magkahagad aku ma kaꞌa.”
39 Yuk si Isa, “Angkan aku piꞌitu ni dunya, supaya papagsaddiku saga manusiyaꞌ. Jari sasuku aꞌa bay buta makaꞌndaꞌ du, maka sasuku bay makaꞌndaꞌ tabuta du.”
40 Takale paꞌin pahꞌlling si Isa itu eꞌ saga Parisi kaseheꞌan bay mainaꞌan, atilaw sigām ma iya. Yuk sigām, “Kami bahāꞌ pahꞌllingnu saliꞌ hantang buta?”
41 Anambung si Isa, yukna, “Abila kam bay buta, mbal du kam katōngan dusa. Pagka yukbi in kaꞌam makaꞌndaꞌ du, na, taga-dusa giꞌ kam sabab mbal beyaꞌbi kabayaꞌan Tuhan.”