8
Pasal Dꞌnda Taꞌabut Maghinang Alaꞌat
1 Sagōꞌ patukad si Isa pehēꞌ ni būd Kayu Jaitun. 2 Pagdaiꞌ llaw paꞌin, pehēꞌ iya pabīng ni langgal pagkulbanan. Magtipunan ni iya saga aꞌa aheka ati aningkōꞌ iya amanduꞌan sigām. 3 Manjari aniyaꞌ dakayuꞌ dꞌnda binowa ni iya eꞌ saga guru saraꞌ agama maka eꞌ saga Parisi. Dꞌnda itu bay taꞌabut angaliyu-lakad. Pinatampal iya ma kahekaꞌan aꞌa inān kamemon. 4 Yuk saga Parisi ni si Isa, “Tuwan guru, dꞌnda itu bay taꞌabut angaliyu-lakad. 5 Na, bang ma saraꞌ bay pangꞌbbahan kitam eꞌ si Musa, ya hukuman ma dꞌnda buwattitu subay binantung maka batu pinapatay. Na, bang ma kaꞌa?” 6 Buwattēꞌ pamissala sigām panulay sigām ma si Isa, kalu aniyaꞌ sāꞌ ma panambungna, jari aniyaꞌ sababan panuntut sigām ma iya. Saguwāꞌ patondok sadja si Isa anulat ma kuwit tanaꞌ maka tōng tudluꞌna.
7 Na sabu paꞌin iya sinumariya eꞌ sigām, patongas iya ati yukna ni sigām, “Sai-sai kam halam taga-dusa, wajib iya parahū amantung dꞌnda itu.” 8 Jari patondok iya pabīng anulat isab ma kuwit tanaꞌ. 9 Pagkale paꞌin eꞌ sigām pahꞌlling si Isa itu, magtūy sigām alaꞌan kamemon dangan maka dangan, tinagnaꞌan min mattoꞌa sampay ni kaseheꞌan. Luwal si Isa tabba mainaꞌan, maka dꞌnda masi ma bay panꞌnggehanna. 10 Pagtongas si Isa pabīng, yukna ni dꞌnda, “Maingga na sigām, arung? Halam aniyaꞌ amatꞌnnaꞌan kaꞌa hukuman?”
11 “Halam aniyaꞌ, Tuwan,” yuk sambung dꞌnda.
“Na,” yuk si Isa, “minsan aku, mbal du aku amatꞌnnaꞌan kaꞌa hukuman. Amoleꞌ na ka pehēꞌ sagōꞌ daꞌa angandusa pabīng.”
Si Isa Ibarat Sawa
12 Puwas eꞌ amissala si Isa ma saga Parisi pabīng, yukna, “Aku itu sawa pamasawa pikilan manusiyaꞌ. Sasuku ameyaꞌ ma aku, mbal toꞌongan palꞌngngan ma deyom kalendoman sabab aniyaꞌ ma deyom pikilanna sawa ya makabuwan kallum ma manusiyaꞌ.”
13 Yuk saga Parisi ni si Isa, “Kaꞌa ilu anaksiꞌan di-nu na. Mbal tabꞌnnal saksiꞌnu bang ka hal anaksiꞌan di-nu.”
14 Anambung si Isa, yukna, “Minsan aku anaksiꞌan di-ku, mattan asal panaksiꞌku sabab kataꞌuwanku du bang minningga aku, maka bang piꞌingga papehēꞌanku. Sagōꞌ kaꞌam ilu, mbal kataꞌuwanbi bang minningga aku atawa bang piꞌingga. 15 Bang aniyaꞌ hukumbi, paghonaꞌ-honaꞌ manusiyaꞌ ya pameyaꞌanbi. Aku itu mbal angahukum aꞌa. 16 Sagōꞌ abila aku saupama angahukum, abontol du hukumanku sabab nggaꞌi ka aku dangan-danganku ya angahukum. Duwangan kami angahukum sabab ginapiꞌ aku eꞌ Mmaꞌku, ya bay amapiꞌitu aku. 17 Tasulat ma deyom saraꞌbi,” yuk si Isa, “bang duwangan ya anaksiꞌ boꞌ maguyun panaksiꞌ sigā, magtaluwaꞌ na. 18 Jari bꞌnnal bissalaku sabab duwa saksiꞌku maguyun. Anaksiꞌan aku di-ku, maka Mmaꞌku, ya bay amapiꞌitu aku, anaksiꞌan aku du isab.”
19 Tinilaw si Isa eꞌ saga Parisi, yuk sigām, “Maingga mmaꞌnu?”
Yuk sambung si Isa, “Mbal kataꞌuwanbi Mmaꞌku, maka aku isab mbal kataꞌuwanbi. Sabab bang bay aku kataꞌuwanbi, ya du Mmaꞌku bay du isab kataꞌuwanbi.” 20 Binissala itu eꞌ si Isa sabuna magpanduꞌ ma deyom langgal pagkulbanan, ma atag pamatꞌnnaꞌan saga tuꞌung pangahūgan sarakka. Sagōꞌ halam aniyaꞌ makasaggaw iya sabab halam giꞌ taꞌabut waktu ya panganggantaꞌ Tuhan.
21 Manjari itu binalik eꞌ Isa bay pamissalana ma saga aꞌa inān, yukna, “Sōng na aku alaꞌan. Pihabi du aku sagōꞌ mbal aku tabākbi. Amatay sadja kam ma mbal taꞌampun dusabi. Mbal kam makapehēꞌ ni papehēꞌanku.”
22 Angkan magtilaw-tilaw saga nakuraꞌ Yahudi, yuk sigām, “Amapatay iya di-na bahāꞌ, ya angkan yukna in kita mbal makapehēꞌ ni papehēꞌanna?”
23 Amissala giꞌ si Isa, yukna, “Kaꞌam ilu porol asal ma babaw dunya itu. Sagōꞌ aku itu, sulgaꞌ ya lahatku. Kajarihanbi asal min dunya, boꞌ kajarihanku nggaꞌi ka. 24 Angkan kam hakaꞌanku, in kaꞌam amatay sadja ma mbal taꞌampun dusabi. Sabab bang mbal pagkahagadbi bay pahꞌllingku ma pasal baranku bang sai aku, tantu kam amatay ma dusabi.”
25 “Sai ka toꞌongan?” yuk tilaw sigām.
Anambung si Isa, yukna, “Buwat bay pangahakaku ma kaꞌam sangay min katagnaꞌ. 26 Maka aheka giꞌ pahꞌllingku pangahukum paldusahanbi. Daipara bꞌnnal sadja ya bay amapiꞌitu aku. Jari ai-ai takaleku min iya, ya heꞌ sadja pangahakaku ma saga manusiyaꞌ ma dunya itu.”
27 Saguwāꞌ halam tahati eꞌ sigām in Mmaꞌna Tuhan ya pinagbissala itu eꞌ si Isa. 28 Angkan yukna ni sigām, “Bang aku Anak Manusiyaꞌ taꞌangkatbi na ni hāg, minnēꞌ kataꞌuwanbi in aku baranku ya pahꞌllingku. Kataꞌuwanbi isab halam aniyaꞌ tahinangku bang min baran-baranku sadja, maka ai-ai pamanduꞌku bay pamanduꞌ aku eꞌ Mmaꞌku. 29 Taptap pagapiꞌ ma aku ya bay amapiꞌitu aku. Mbal aku pinasagaran eꞌna, sabab hinangku sadja ai-ai makasulut iya.” 30 Pagkale saga aꞌa inān ma pamissala si Isa, aheka sigām angandol ma iya.
Aꞌa Banyagaꞌ maka Aꞌa Nggaꞌi Ka Banyagaꞌ
31 Jari itu ahꞌlling si Isa ni saga Yahudi ya amꞌnnal ma iya. “Bang kam atuyuꞌ ameyaꞌ ma panduꞌku,” yukna, “mulidku na kam sabꞌnnal-bꞌnnal. 32 Makataꞌu du kam bang ingga ya kasabꞌnnalan min Tuhan, jari kasabꞌnnalan ya angaliyus kaꞌam min pagbanyagaꞌan.”
33 Anambung sigām, yuk-i, “Oy! Kami itu panubuꞌ si Ibrahim. Halam kami bay tabanyagaꞌ eꞌ sai-sai. Angay ka makabissala in kami papuwas min pagbanyagaꞌan?”
34 Yuk sambung si Isa, “Bꞌnnal ya pangahakaku itu ma kaꞌam, sasuku magdusa binanyagaꞌ du eꞌ bayaꞌna magdusa. 35 Banyagaꞌ itu mbal kakkal ma okoman tag-dapu. Ya kakkal mainaꞌan anakna lissi. 36 Angkan bang Anak Tuhan ya amalimaya kaꞌam min pagbanyagaꞌan, tantu du kam alimaya. 37 Kataꞌuwanku, panubuꞌ kam asal si Ibrahim. Sagōꞌ bilahi kam amapatay aku sabab mbal tataimaꞌbi panduꞌku. 38 Ya pamanduꞌku ma kaꞌam itu bay pamataꞌu aku eꞌ Mmaꞌku. Sagōꞌ nihinang eꞌbi saga hinang bay pamataꞌu kaꞌam eꞌ pagꞌmmaꞌanbi.”
39 Yuk saga Yahudi, “Si Ibrahim ya pagꞌmmaꞌan kami.”
Yuk si Isa, “Bang bay kam bꞌnnal saga panubuꞌ si Ibrahim, bay du tasꞌppubi si Ibrahim maghinang saga hinangna. 40 Sagōꞌ bilahi kam amapatay aku saukat na kam bay hakaꞌanku pasal kasabꞌnnalan bay takaleku min Tuhan. Halam bay makahinang buwattēꞌ si Ibrahim. 41 Ya hinangbi na paꞌin saga kahinangan mmaꞌbi!”
Magtūy anambung saga aꞌa inān, yuk sigām, “Luwal Tuhan dakayuꞌ-kayuꞌ ya pagꞌmmaꞌan kami. Maka kami itu anakna lissi.”
42 Yuk si Isa, “Bang Tuhan bꞌnnal pagꞌmmaꞌanbi, bay du kam alasahan aku sabab min Tuhan aku angkanna aku maitu. Halam aku bay piꞌitu min pagnahuꞌ-nahuꞌku, sagōꞌ pinapiꞌitu aku eꞌ Tuhan. 43 Angay mbal tahatibi bissalaku? Sabab mbal kam makatatas akale ma lapal pamanduꞌku.” 44 Yuk si Isa giꞌ ni sigām, “Nakuraꞌ saitan ya pagꞌmmaꞌanbi. Ya angutbi subay ameyaꞌ ma kabayaꞌan mmaꞌbi. Pamapatay asal iya min katagnaꞌ. Halam iya bay ameyaꞌ ma kasabꞌnnalan sabab halam aniyaꞌ bꞌnnal ma deyom kajarihanna. Kabiyaksahanna magputing angkan iya magputing na paꞌin. Putingan toꞌongan iya maka poꞌonan iya kaputingan kamemon. 45 Sagōꞌ aku,” yuk si Isa, “bꞌnnal sadja pahꞌllingku, ya poꞌon kaꞌam mbal magkahagad ma aku. 46 Halam aniyaꞌ ma kaꞌam makatōngan aku dusa. Bꞌnnal sadja pahꞌllingku, jari angay aku mbal pagkahagadbi? 47 Bang aꞌa gantaꞌ sukuꞌ Tuhan, ameyaꞌ iya ma panduꞌ Tuhan. Sagōꞌ kaꞌam ilu nggaꞌi ka sukuꞌ Tuhan, angkan kam mbal bilahi ameyaꞌ.”
Si Isa maka si Ibrahim
48 Sakali sinambungan si Isa eꞌ saga nakuraꞌ Yahudi heꞌ, yuk sigām, “Taluwaꞌ ya bay yuk kami, in kaꞌa nggaꞌi ka Yahudi. Aꞌa Samariya ka, maka pasōran ka saitan!”
49 Yuk si Isa, “Halam aku pasōran saitan. Aku itu, mahaldikaꞌku sadja Mmaꞌku, sagōꞌ kaꞌam ilu hal angahalipulu aku. 50 Mbal aku amiha kamahaldikaꞌanku. Aniyaꞌ saddī amiha, jari in iya angahukum. 51 Bꞌnnal ya pangahakaku itu ma kaꞌam, sasuku ameyaꞌ ma pamanduꞌku mbal toꞌongan amatay salama-lama.”
52 “Na,” yuk sigām, “makatantu kami toꞌongan in kaꞌa kasōran saitan! Minsan si Ibrahim maka kanabi-nabihan kamemon, waꞌi magpatayan. Ati yuknu mbal magkamatay salama-lama sasuku ameyaꞌ ma pamanduꞌnu. 53 Angay, palabi bahāꞌ kawasanu min kawasa kaꞌmboꞌan kami si Ibrahim? Minsan si Ibrahim, minsan saga kanabi-nabihan kamemon, bay du sigām amatay. Sai ka bahāꞌ angkan ka magnahuꞌ-nahuꞌ buwattilu?”
54 Anambung isab si Isa, yukna, “Bang aku saupama angamahaldikaꞌ di-ku, halam aniyaꞌ kapūsanna. Sagōꞌ Mmaꞌku ya angamahaldikaꞌ aku, ya yukbi in iya pagtuhananbi. 55 Mbal minsan kataꞌuwanbi Tuhan, sagōꞌ aku ya ataꞌuwan iya. Bang saupama yukku in aku mbal makataꞌuwan Tuhan, na, putingan aku buwat kaꞌam. Daipara kataꞌuwanku asal Tuhan, maka beyaꞌku saga panohoꞌanna. 56 Kaꞌmboꞌanbi si Ibrahim inān, bay kinōgan pagka kataꞌuwanna aniyaꞌ waktu sinosōng kapangꞌndaꞌna ma aku piꞌitu ni dunya. Manjari pagꞌndaꞌna ma kapiꞌituku landuꞌ iya akōd.”
57 Anambung sigām ma si Isa, yuk-i, “Buwattingga kapagꞌndaꞌnu maka si Ibrahim? Mbal giꞌ minsan limampūꞌ tahun umulnu.”