27
Si Isa Pinaharap ni Gubnul Pilatu
1 Taꞌabut paꞌin pagkꞌllat llaw, maggaraꞌ kaimaman alanga kamemon maka saga pagmattoꞌahan bangsa Yahudi bang buwattingga pamapatay sigām ma si Isa. 2 Manjari kinarenahan si Isa boꞌ yampa tinꞌkkahan ni si Pilatu, gubnul bangsa Rōm.
Kamatay si Judas
3 Pagtaꞌu si Judas, in si Isa pinatꞌnnaꞌan hukuman na ni kamatay, magtūy iya magsusun ma bay hinangna anukbalan iya ni bantana. Jari pehēꞌ iya ni kaimaman alanga maka ni pagmattoꞌahan, arak angꞌndeꞌ sīn bay panamba iya, tꞌllumpūꞌ solag sīn Yahudi, dī pilak. 4 Yukna ma sigām, “Aheya dusaku sabab katukbalanku aꞌa halam taga-dusa, maka itiyaꞌ iya araiꞌ na pinapatay.”
“Min kaꞌa koꞌ ilu,” yuk sigām. “Nggaꞌi ka min kami.”
5 Sakali nihantakan sīn inān eꞌ si Judas ni lantay langgal boꞌ yampa paluwas minnēꞌ maggantung di-na boꞌ amatay.
6 Manjari kaimaman inān amuwaꞌ sīn bay nihantakan eꞌ si Judas eꞌ. Yuk sigām, “Sīn itu haram bang ma agamata sabab bay tambahan pamapatay aꞌa. Mbal manjari pinatimbul ni sīn langgal.” 7 Arakayuꞌ paꞌin paggaraꞌ sigām pasal sīn inān, boꞌ waꞌi tapamꞌlli tanaꞌ min aꞌa magtatampa, ati ginuna pangubulan saga aꞌa liyu. 8 Angkan tanaꞌ inān niōnan, ‘Tanaꞌ tambahan lahaꞌ’ sampay ni kabuwattituhan. 9 Na, ma sabab hinang inān, aniyaꞌ kamaksuranna ma bay tasulat eꞌ nabi Irimiya, ya yukna, “Niāꞌ eꞌ sigām tꞌllumpūꞌ solag sīn dī pilak ya halgaꞌ baran aꞌa bang ma bangsa Israꞌil, 10 ati ginuna pamꞌlli tanaꞌ min aꞌa magtatampa. Ya na heꞌ bay panohoꞌan aku eꞌ Tuhan.”
Si Isa Sinumariya eꞌ si Pilatu
11 Manjari inaꞌan si Isa anꞌngge ma dahuan gubnul Pilatu, sinumariya eꞌna. “Na,” yuk gubnul, “sultan ka bahāꞌ ma bangsa Yahudi?”
Anambung si Isa, yukna, “Ya na yuknu ilu.” 12 Sagōꞌ halam bay sambunganna saga tuntut bay panuntut iya eꞌ kaimaman alanga maka pagmattoꞌahan.
13 Ahꞌlling si Pilatu ni iya, yukna, “Halam bahāꞌ takalenu panuntut saga aꞌa itu ma kaꞌa?”
14 Sagōꞌ halam anambung si Isa minsan dakabtang, angkan ainu-inu toꞌongan gubnul eꞌ.
Si Isa Pinatꞌnnaꞌan Hukuman ni Kamatay
15 Na, kahabaꞌ tahun, ma waktu paghinang bangsa Yahudi ma Hinang Paglakad, ya kabiyaksahan gubnul subay aniyaꞌ dakayuꞌ pilisu pinaluwas, sai-sai pineneꞌ eꞌ saga Yahudi. 16 Ma waktu inaꞌan aniyaꞌ dakayuꞌ pilisu babantugun, ōnna si Barabbas. 17 Manjari, makapagtimuk paꞌin pinaꞌan kahekaꞌan aꞌa, tinilaw sigām eꞌ si Pilatu. “Sai kabayaꞌanbi,” yukna, “subay paluwasku? Si Barabbas atawa si Isa, ya niōnan Al-Masi itu?” 18 Malaingkan kinataꞌuwan eꞌ gubnul bang ai sababanna angkan si Isa bay tinꞌkkahan ni iya. Tuꞌud sigām angihid ma si Isa.
19 Aningkōꞌ paꞌin si Pilatu ma lugal paghukuman, aniyaꞌ lapal pinabeyaꞌ ni iya eꞌ hꞌndana. Yuk lapal, “Daꞌa ka palamud ni hukuman aꞌa aꞌadil ilu. Sabab aniyaꞌ tauppiku dibuhiꞌ pasalanna, sidda aku bay maglimpa-limpa.”
20 Manjari baꞌanan aꞌa inān bay tapogos eꞌ kaimaman alanga maka eꞌ pagmattoꞌahan subay angamuꞌ pinaluwas si Barabbas, boꞌ si Isa ya sinōꞌ pinapatay. 21 Sagōꞌ tinilaw sigām pabīng eꞌ gubnul eꞌ. “Sai ma deyom duwangan pilisu itu,” yukna, “subay paluwasku?”
“Si Barabbas,” yuk sigām.
22 Atilaw si Pilatu ma sigām, yukna, “Inayku bahāꞌ si Isa itu, ya niōnan Al-Masi?”
“Lansangun iya ni hāg,” yuk sigām kamemon.
23 Sagōꞌ atilaw giꞌ si Pilatu. Yukna, “Ai bay hinangna alaꞌat?”
Luhūy pakosog pangolang saga aꞌa heꞌ, yuk-i, “Lansangun iya ni hāg!”
24 Pagtaꞌu si Pilatu in katimukan aꞌa inān mbal pahawid maka araiꞌ na aheya kahiluhalaꞌan, magtūy iya angāꞌ boheꞌ boꞌ yampa koseꞌanna tanganna ma dahuan sigām, paltandaꞌan in iya papuwas min palkalaꞌ heꞌ. Yukna ni sigām, “Bang paꞌin nggaꞌi ka min aku bang aꞌa itu pinapatay. Min kahinanganbi na.”
25 Anambung saga aꞌa inān kamemon, yuk-i, “Akuhan kami kamatayna, minsan kami kapellengan sampay ni magsuring-magsaingsing.”
26 Sakali si Barabbas ya pinaluwas eꞌ si Pilatu tudju ni baꞌanan aꞌa heꞌ. Sagōꞌ si Isa pinaraplosan eꞌna ma saga sundalu. Pagubus, sinōngan iya ni saga aꞌa ya angalansang iya ni hāg.
Si Isa Pinagtunggīng eꞌ Saga Sundalu
27 Manjari binowa si Isa eꞌ saga sundalu gubnul pehēꞌ ni deyom astanaꞌ, ati tinimuk iya heꞌ dambaꞌan sundalu. 28 Nilaꞌanan eꞌ sigām sꞌmmekna boꞌ pamajuba ma iya manta keyat saliꞌ hantang sultan. 29 Nilangbid isab bahan itingan eꞌ sigām, nihinang saliꞌ panumping sultan pinatꞌnnaꞌ ni kōkna. Puwas eꞌ pinaꞌntanan iya tungkud ma tanganna kowan, boꞌ yampa sigām angōk-tuꞌut ni dahuanna magtunggīng iya, yuk-i, “Mahaldikaꞌ! Mahaldikaꞌ! Sultan Yahudi!” 30 Pinagludjaꞌan iya eꞌ sigām, niāꞌ eꞌ sigām tungkud bay ma tanganna boꞌ pamꞌppok kōkna. 31 Na, aubus paꞌin kapagtunggīng sigām ma iya, magtūy niurusan manta bay pajubana inān ati pinasꞌmmekan iya maka bay sꞌmmekna tagnaꞌ. Puwas eꞌ binowa iya paluwas minnēꞌ boꞌ nilansang ni hāg pamapatayan iya.
Si Isa Nilansang ni Hāg
32 Saltaꞌ paꞌin sigām paluwas min daꞌira inān, aniyaꞌ talanggal sigām lꞌlla min lahat Kirini, ōnna si Simun. Minandahan iya eꞌ saga sundalu, sinōꞌ ananggung hāg si Isa. 33 Pagtꞌkka paꞌin sigām ni jadjahan lahat niōnan Golgota, hatina lahat ‘Peyaꞌ-peyaꞌ Kōk’, 34 arak pamainum sigām ma si Isa binu-anggul kalamuran tambal apaꞌit. Sagōꞌ pagꞌssana, mbal iya anginum.
35 Aubus paꞌin eꞌ saga sundalu bay angalansang si Isa ni hāg sampay amatꞌngge hāgna, maglegot na sigām boꞌ pinagtokoran eꞌ sigām sꞌmmekna bang sai katꞌnnaꞌanna. 36 Puwas eꞌ aningkōꞌ sigām mainaꞌan anganjaga. 37 Aniyaꞌ sulat panuntut bay pinatꞌnnaꞌ eꞌ sigām ma hāg min diyataꞌ kōk si Isa. Yuk sulat eꞌ,
‘SI ISA, SULTAN BANGSA YAHUDI.’
38 Aniyaꞌ isab duwangan mundu pinasambeyaꞌ ma si Isa. Nilansang sigām ma hāg, dakayuꞌ ma bihing si Isa tampal ni kowan, dakayuꞌ tampal ni gibang.
39 Na, pinagudjuꞌ na paꞌin si Isa eꞌ aꞌa maglaulabay, pinaghanduk-handukan. 40 “Allā,” yuk sigām, “kaꞌa iya angalangkat langgal pagkulbanan inān, ati pabangunnu konoꞌ pabīng ma deyom tꞌllungꞌllaw! Angalappasan ka di-nu bang ka bꞌnnal Anak Tuhan. Pareyoꞌ ka min hāg ilu!” 41 Ya du magpangudjuꞌ saga imam alanga maka saga guru saraꞌ agama maka saga pagmattoꞌahan. 42 “Aꞌa itu,” yuk sigām, “ataꞌu angalappas ma aꞌa saddī sagōꞌ mbal makalappas di-na. Sultan bangsa Israꞌil konoꞌ iya! Bang iya gantaꞌ makapareyoꞌan di-na min hāg, amꞌnnal kitam ma iya! 43 Angandol iya ma Tuhan, maka in iya konoꞌ Anak Tuhan. Ndaꞌta konoꞌ bang Tuhan bilahi angalappas iya!” 44 Ya du duwangan mundu bay nilansang pinasambeyaꞌ ma si Isa, ameyaꞌ-meyaꞌ isab angudjuꞌ iya.
Kamatay si Isa
45 Na, augtu paꞌin llaw, taluwaꞌ lendom kaluhaꞌan lahat eꞌ sampay ni lisag tꞌllu kohap. 46 Paglisag tꞌllu saga, akosog eꞌ si Isa angalingan, yukna, “Eli, Eli, lama sabaktani?” Hatina, “Tuhanku, O Tuhanku, angay aku pasagarannu?”
47 Pagkale itu eꞌ saga aꞌa magtꞌnggehan mainaꞌan, yuk sigām kaseheꞌ, “Angalinganan iya nabi Elija.” 48 Magtūy aniyaꞌ dakayuꞌ aꞌa paraiꞌ-daiꞌ angꞌggoman lꞌppus ni deyom binu alꞌssom boꞌ yampa pasagnatna ni tōng kayu-kayu. Arak pamainumna ma si Isa.
49 Sagōꞌ maginꞌmbal saga aꞌa kaseheꞌ, yuk-i, “Sagarinbi iya. Ndaꞌta lagiꞌ bang patuwaꞌ nabi Elija angalappas iya.”
50 Sakali angolang si Isa pabalik, magtūy abꞌkkat napasna.
51 Saruꞌun-duꞌun du ya kultina bay pangagpang ma deyom langgal pagkulbanan inān ageseꞌ duwa min diyataꞌna tudju pareyoꞌ. Ajogjog deyom dunya, maka magkabilaꞌ saga batu lakit. 52 Aniyaꞌ isab kakubulan aukab maka aheka saga aꞌa sukuꞌ Tuhan bay pabungkal, allum pabīng min kamatay sigām. 53 Magluwasan sigām min deyom kubul, jari allum paꞌin si Isa pabīng, pasōd sigām ni Awrusalam, ya daꞌira Mahasussi. Aheka aꞌa isab bay makaꞌndaꞌ sigām.
54 Tananam paꞌin linug maka pakaradjaꞌan inān kamemon eꞌ kapitan maka saga sundaluna ya bay anganjaga ma kamatay si Isa, magtūy sigām sidda sinōd tāw. Yuk sigām, “Bꞌnnal aꞌa itu Anak Tuhan!”
55 Aheka isab saga dꞌnda bay mainaꞌan angꞌndaꞌ min katahan. Sigām ya bay ameyaꞌ paumpig ma si Isa angussap iya, tinagnaꞌan ma lahat Jalil lagiꞌ. 56 Inaꞌan si Mariyam min Magdala, si Mariyam inaꞌ si Yakub maka si Yusup, maka hꞌnda si Sibidi.
Pagkubul ma si Isa
57 Pagabay kohap na, aniyaꞌ atꞌkka pinaꞌan dakayuꞌ aꞌa dayahan, aꞌa min lahat Arimati. Ōnna si Yusup. 58 Na pehēꞌ si Yusup itu paꞌalop ni si Pilatu angamuꞌ mayat si Isa. Jari magpanohoꞌan si Pilatu inān ni saga sundaluna, sinōꞌ niꞌndeꞌan mayat si Isa ni si Yusup. 59 Taꞌāꞌ paꞌin mayat, sinaput eꞌ si Yusup maka kakanaꞌ bahaꞌu 60 boꞌ yampa palegena ma kubul bay tagamahanna di-na, kubul bahaꞌu bay kineheꞌan ma deyom batu lakit. Puwas eꞌ ginulungan eꞌna batu aheya panaplok bowaꞌ lowang eꞌ boꞌ yampa iya alaꞌan minnaꞌan. 61 Mainaꞌan asal si Mariyam aꞌa Magdala, maka Mariyam isayna, aningkōꞌ ma dahuan kubul inān.
Nijagahan Kubul eꞌ Umpigan Sundalu
62 Pagkꞌllat llaw dakayuꞌ, hatina llaw Sabtuꞌ, patimuk ni si Pilatu saga kaimaman alanga maka saga Parisi. 63 Yuk sigām ni iya, “Tuwan, taentom kami ya bay lling aꞌa putingan inān ma waktu kallumna lagiꞌ. Yukna bang taꞌabut tꞌllungꞌllaw min kamatayna in iya allum du pabīng. 64 Angkan kubulna inān subay sohoꞌnu nijagahan sakuli-kuli sampay taꞌabut katꞌllungꞌllawna. Kalu pehēꞌ saga mulidna anangkaw mayatna boꞌ angahaka ni kaseheꞌan in iya allum pabīng min kamatayna. Bang gantaꞌ buwattēꞌ akalap lagiꞌ puting sigām damuli min bay dahū.”
65 “Na,” yuk si Pilatu. “Bowahunbi sundalu pehēꞌ ni kubul boꞌ pajagahunbi sakuli-kuli.”
66 Manjari maglaꞌanan na sigām minnēꞌ. Aniyaꞌ gindan pinikit eꞌ sigām ni taplok batu boꞌ kinataꞌuwan bang aniyaꞌ bay angukab iya. Sinōꞌ isab saga sundalu anganjaga mainaꞌan.