Kahinangan 1

KAHINANGAN

Saga Aꞌa Kawakilan

Kapaꞌangkat si Isa ni Sulgaꞌ

¹ 9Sulat min si Lukas ni si Teyopilus.

Tuwan Teyopilus, ma sulat bay sulatanku kaꞌa dahū, bay pangahakaku saga hinang maka panduꞌ si Isa kamemon, sangay min tagnaꞌ kapaghinangna ² sampay ni llaw bay pamaꞌangkat iya tudju ni sulgaꞌ. Ma halam giꞌ iya bay paꞌangkat, aniyaꞌ saga panohoꞌan pangꞌbba eꞌna ma saga aꞌa bay kawakilanna, labay min Rū Sussi. ³ Puwas paꞌin kamatay si Isa, ma deyom mpatpūꞌ llaw araran iya magpanyataꞌ magbaran ni saga aꞌa bay kawakilanna. Min heka iya amaꞌndaꞌan di-na boꞌ mattan toꞌongan in iya asal allum. Taꞌndaꞌ iya eꞌ sigām ati ma deyom mpatpūꞌ llaw heꞌ, amissala iya ni sigām pasal kapagparinta Tuhan. ⁴ Aniyaꞌ isab waktu kapagsalu si Isa maka saga mulidna inān, pasaltaꞌ magpanohoꞌan iya ma sigām, yukna, “Daꞌa giꞌ kam alaꞌan min daꞌira Awrusalam. Lagarinbi dahū paljanjiꞌan Mmaꞌku ya pamuwanna ma kaꞌam, buwat bay pamataꞌuku ma kaꞌam. ⁵ Si Yahiya heꞌ, boheꞌ ya bay pamandina saga aꞌa. Sagōꞌ saddī ya pamandi kaꞌam. Palabay daka pilangꞌllaw, pinahōpan du kam Rū Sussi.”

⁶ Manjari itu, magtimuk paꞌin sigām maka si Isa, atilaw sigām ni iya. “Tuwan Panghūꞌ,” yuk sigām, “ya na itu bahāꞌ waktu pamabīngnu ni bangsa kami Israꞌil ya bay kapatut kami tagnaꞌ angꞌntanan pagparinta?”

⁷ Yuk sambung si Isa, “Mbal kam makataꞌu pasal ilu-i, sabab Mmaꞌku sadja ya taga-kapatut amatꞌnnaꞌ waktu maka masa. ⁸ Saguwāꞌ,” yuk si Isa, “kabuwanan du kam kawasa ma waktu kahōp Rū Sussi ni kaꞌam, ati magpasabꞌnnal kam ma pasalku ma daꞌira Awrusalam itu, ma kaluhaꞌan lahat Yahudiya, ma lahat Samariya, sampay ma mpat pidju alam.”

⁹ Aubus paꞌin pamissala si Isa, tabowa iya paꞌangkat ni sulgaꞌ, ma sabu sigām magpangꞌndaꞌ. Sakali kalimbuhan iya eꞌ gabun, halam na taꞌndaꞌ eꞌ sigām. ¹⁰ Masi na paꞌin sigām angꞌndaꞌ papatong ni langit hinabu si Isa paꞌangkat, jari aniyaꞌ duwangan lꞌlla magpamakay poteꞌ anꞌngge ma atag sigām. ¹¹ Yuk duwangan itu ni sigām, “Kaꞌam saga aꞌa Jalil! Angay kam magtꞌnggehan na paꞌin papatong tudju ni langit? Si Isa, ya bay pinaꞌangkat min kaꞌam tudju ni sulgaꞌ, pabīng du, boꞌ kabīngna piꞌitu magsaliꞌ maka buwat bay kaꞌangkatna, ya taꞌndaꞌbi itu.”

Si Mattiyas Pineneꞌ Pagantiꞌ min si Judas

¹² Sakali amoleꞌ na saga aꞌa kawakilan eꞌ min būd Kayu Jaitun tudju ni Awrusalam, saga dakilometro lawakna. ¹³ Makatꞌkka paꞌin sigām ni Awrusalam, magtūy sigām pariyataꞌ ni bilik paghantiꞌan. Ya mainaꞌan disi Petros, si Yahiya, si Yakub, si Andariyas, si Pilip, si Tomas, si Bartolome, si Matiyu, si Yakub anak si Alpa, si Simun ya niranglay Pangangatu, maka si Judas dakayuꞌ ya anak si Yakub. ¹⁴ Araran sigām magtipun angamuꞌ-ngamuꞌ ni Tuhan. Pabeyaꞌ isab ma sigām saga karꞌndahan, sampay si Mariyam inaꞌ si Isa maka saga danakan si Isa lꞌlla.

¹⁵ Na mbal atꞌggol minnēꞌ, magtipun saga aꞌa magpangandol ma si Isa. Aniyaꞌ sigām kulang-labi dahatus maka duwampūꞌ. Manjari anꞌngge si Petros ma tꞌngngaꞌ-tꞌngngaꞌ sigām amissala. ¹⁶ “Saga dauranakanku,” yukna, “wajib subay aniyaꞌ kamaksuran ma lapal Rū Sussi, ya bay pinasulat ma si Daꞌud ma pasal si Judas. Si Judas Iskariyut, ya na bay anuliꞌan saga aꞌa anaggaw si Isa. ¹⁷ Si Judas itu bay danseheꞌan maka kitam. Bay iya kawakilan isab eꞌ si Isa maghinang buwat hinangtam.”

¹⁸ Ya sīn bay panamba si Judas ma hinangna alaꞌat, ya pamasaggawna si Isa ni saga bantana, bay pamꞌllina tanaꞌ. Tabꞌllina paꞌin tanaꞌ heꞌ, ahūg iya pareyoꞌ minnaꞌan ati abustak bꞌttongna. Paluwas tinaꞌina kamemon. ¹⁹ Kinataꞌuwan itu eꞌ aꞌa kamemon ma Awrusalam, angkan tanaꞌ inān niōnan eꞌ sigām Akeldama, ma buwat bahasa Yahudi, hatina ‘Tanaꞌ Tamba Lahaꞌ.’

²⁰ “Na,” yuk si Petros, “aniyaꞌ tasulat ma deyom Kitab Jabul, ya yuk-i,

‘Bang paꞌin asiya-siya palahatanna.

Subay halam aniyaꞌ patꞌnnaꞌ mainaꞌan pabīng.’

Maka aniyaꞌ isab ayat dakayuꞌ, yuk-i,

‘Subay aniyaꞌ aꞌa saddī pagantiꞌ ma bay hinangna heꞌ.’ ”

^21-22 Amissala giꞌ si Petros, yukna, “Angkanna subay aniyaꞌ ginꞌllal saddī ameyaꞌ ma kitam anaksiꞌ in Panghūꞌ Isa allum na pabīng. Ya subay pineneꞌ aꞌa bay seheꞌtam ma waktu kapagbeyaꞌ Panghūꞌ Isa maka kitam, min waktu bay kapamandi aꞌa eꞌ si Yahiya sampay ni llaw kaꞌangkat si Isa min kitam tudju ni sulgaꞌ.”

²³ Sakali itu sinabbut eꞌ sigām ōn duwangan lꞌlla pameneꞌan. Dakayuꞌ inān si Yusup, ya niōnan si Barsabbas (atawa si Justus), maka dakayuꞌ si Mattiyas. ²⁴ Angamuꞌ-ngamuꞌ disi Petros ni Tuhan, yuk sigām, “O Tuhan, kataꞌuwannu bang ai ma deyom pikilan manusiyaꞌ kamemon. Panduꞌin kami bang sai peneꞌnu ma duwangan itu ²⁵ gantiꞌ si Judas, boꞌ tahinangna hinang ya pamasukuꞌnu ma saga aꞌa kawakilan. Sabab hinang itu bay niꞌbbahan eꞌ si Judas, pagka waꞌi na iya amoleꞌ ni lahatna kakkal.” ²⁶ Puwas inaꞌan magkoꞌot-koꞌot na sigām ōn aꞌa pameneꞌan. Ya takoꞌot inān ōn si Mattiyas, jari pinakꞌnnop iya ni kasangpūꞌ maka ssa ya bay kawakilan si Isa inān.