2
Kapatulun Rū Sussi ma Llaw Pentekosta
1 Taꞌabut paꞌin llaw paghinang Pentekosta, magtimuk saga aꞌa magpangandol ma si Isa kamemon. 2 Saruꞌun-duꞌun du aniyaꞌ bahonos min langit, saliꞌ baliyu alandos patumbuk. Magtūy tasōd kaluhaꞌan lumaꞌ ya pagtingkōꞌan sigām inān. 3 Ati taꞌndaꞌ eꞌ sigām saliꞌ dꞌllaꞌ api asaplag patꞌnnaꞌ ma saga aꞌa inān pakaniya-pakaniya. 4 Manjari kamemon sigām inān kahōpan Rū Sussi ati anagnaꞌ sigām magbissala ma ginisan bahasa. Ai-ai pamuwan ma sigām min kawasa Rū Tuhan, ya na heꞌ pamissala eꞌ sigām.
5 Na, aniyaꞌ bay pahantiꞌ mainaꞌan ma Awrusalam saga aꞌa bangsa Yahudi bay min kalahatan, aꞌa magaꞌagama. 6 Pagkale sigām ma hidjul min deyom lumaꞌ inān, magtūy aheka sigām patimuk pinaꞌan. Ainu-inu isab sigām sabab takale sigām saga bebeyaꞌan si Isa magbissala ma buwat bahasa sigām pakaniya-pakaniya. 7 Kinoblaꞌan sigām kamemon, maka ainu-inu, angkan yuk sigām, “Daka ai takaletam itu! Ya magpamissala itu hal baꞌanan aꞌa min lahat Jalil! 8 Angay sigām makabissala bahasatam luggiyaꞌ, dangan maka dangan? 9 Kitam itu,” yuk sigām, “min kalahat-lahatan koꞌ. Aniyaꞌ itu min lahat Partiya, min Midiya, min Elam, aniyaꞌ min Mesopotami, min lahat Yahudiya itu, min Kappadoke, min Puntus maka min Asiya. 10 Aniyaꞌ isab kitam min Prigiya, min Pampiliya, min lahat Misil maka min kalahatan Libiya ya ma kasekotan lahat Kirini. Aniyaꞌ isab kitam min daꞌira Rōm. 11 Aniyaꞌ kitam kaseheꞌ bangsa Yahudi, maka aniyaꞌ kaseheꞌ nggaꞌi ka Yahudi ya papinda na ni agama Yahudi. Aniyaꞌ isab min pūꞌ Kerete maka min lahat Arab. Sagōꞌ minsan kitam minningga lahat, takaletam saga aꞌa itu amissala ma bahasatam. Takaletam pasal hinang kawasa ya nihinang eꞌ Tuhan.” 12 Manjari ainu-inu saga aꞌa magtimukan inān kamemon, maka saliꞌ asasaw. Atilaw na paꞌin sigām dangan maka dangan, yuk-i, “Ai bahāꞌ hatina itu?”
13 Sagōꞌ aniyaꞌ kaseheꞌ angudjuꞌ-ngudjuꞌ ma saga bebeyaꞌan si Isa inān. Yuk sigām, “Saga aꞌa itu nilango binu!”
Pagnasihat si Petros ma Katimukan Aꞌa
14 Sagōꞌ anꞌngge si Petros maka seheꞌna kasangpūꞌ maka ssa, ati akosog eꞌna amissala ma saga aꞌa magtimukan inān. “Kaꞌam saga pagkahiku Yahudi,” yukna, “sampay kaꞌam maglahat ma daꞌira Awrusalam itu! Pakale kam boꞌ kam pahatiku pasal pakaradjaꞌan ya takalebi itu. 15 Pangannalbi maraiꞌ nilango saga aꞌa magpamissala itu, saguwāꞌ nggaꞌi ka. Halam aniyaꞌ maglangohan bang yampa lisag siyam subu! 16 Ya taꞌndaꞌbi ma buwattinaꞌan, ya na koꞌ itu kamaksuran bay pinagkallam eꞌ nabi Jowel ma masa awal eꞌ, yuk-i,
17 ‘Ya itu hinangku ma saga llaw damuli, yuk Tuhan,
pahōpku Rū-ku ma manusiyaꞌ kamemon.
Saga panubuꞌbi lꞌlla-dꞌnda amaluwas du lapalku,
saga lꞌlla abataꞌ giꞌ makaꞌndaꞌ du pakaradjaꞌan halam giꞌ atꞌkka,
makauppi isab saga mattoꞌabi.
18 Ahoꞌ, yuk Tuhan, minsan saga ataku lꞌlla-dꞌnda,
pahōpanku du Rū-ku ma masa inaꞌan-i,
ati sigām ya amaluwas palmanku.
19 Hinangku isab hinang makainu-inu ma bꞌttong langit,
maka saga paltandaꞌan ma babaw dunya.
Paꞌndaꞌku lahaꞌ maka api maka humbu aheya.
20 Mata llaw magdoꞌom-doꞌom du,
maka bulan apinda ni keyat, saliꞌ luwa lahaꞌ,
Bang song atꞌkka llaw pangahukum eꞌ Panghūꞌbi,
llawna aheya, llaw mahaldikaꞌ.
21 Jari sai-sai anabbut ma ōn Tuhan mikitabang,
lappasan du iya.’ ”
22 Yuk giꞌ si Petros, “Kaꞌam pagkahiku bangsa Israꞌil, kalehunbi bissalaku itu. Si Isa, aꞌa Nasaret, bay pinatuman ma pangꞌndaꞌbi in iya bay sinohoꞌ eꞌ Tuhan. Sabab kabuwanan iya barakat angkan tahinangna saga hinang akawasa kainu-inuhan aꞌa, sampay saga paltandaꞌan. Kataꞌuwanbi asal, sabab maitu ma deyomanbi ya bay pangahinanganna saga hinang eꞌ. 23 In kamatay si Isa itu kinataꞌuwan asal eꞌ Tuhan ma halam giꞌ bay paniyaꞌ. Min niyatna maka maksudna angkan si Isa bay tinukbalan ni pangꞌntananbi, ati kaꞌam ya bay amapatay iya pagka pasagaranbi aꞌa jahulakaꞌ angalansang iya ni hāg. 24 Saguwāꞌ pinakallum iya pabalik eꞌ Tuhan. Pinaluhaya iya eꞌ Tuhan min katiksaꞌan kamatay, sabab in iya mbal toꞌongan kapagbayaꞌan eꞌ kamatay. 25 Aniyaꞌ bay tasulat eꞌ si Daꞌud ma masa awal eꞌ ma pasal si Isa Al-Masi itu, ya yuk-i,
‘Taꞌndaꞌku Panghūꞌku ma atagku sakahabaꞌ waktu.
Itiyaꞌ iya ma bihingku kowan, mbal aku tajogjog,
26 angkan akōd deyom atayku, angkan aku magkalasigan.
Minsan amatay baranku aholat sadja aku ma iya,
27 sabab mbal du aku bbahannu ma lahat saga magpatayan.
Aku ya sosohoꞌannu luggiyaꞌ,
mbal pasagarannu baranku angahaluꞌ ma deyom paliyangan.
28 Katuliꞌannu aku lān ya amowa ni kallum kakkal.
Sinōd aku kōg-koyag ma sabab kamaitunu ma aku.’
29 “Na, saga dauranakanku,” yuk si Petros, “patampalku pamissalaku ni kaꞌam pasal bay kaꞌmboꞌ-mboꞌantam si Daꞌud eꞌ. Bay iya amatay sampay kinubul, maka kubulna masi takilā sampay ni llaw itu. 30 Sagōꞌ in iya nabi, angkan kinataꞌuwan eꞌna bang ai bay panganjanjiꞌ Tuhan ma iya. Bay anapa isab Tuhan ma si Daꞌud ma pasal waktu sinōng. Subay aniyaꞌ dakayuꞌ panubuꞌna magsultan. 31 Na, pagka kinataꞌuwan eꞌ si Daꞌud bang ai pinatꞌkka eꞌ Tuhan ma waktu sinōng, bay iya angallam pasal kallum Al-Masi pabīng min kamatayna. Yuk pangallamna heꞌ, ‘Halam iya bay niꞌbbahan ma lahat saga magpatayan. Halam isab bay angahaluꞌ baranna ma deyom paliyangan.’ 32 Si Isa koꞌ inān,” yuk si Petros, “ya bay pinakallum eꞌ Tuhan pabīng. Ati kami kamemon itu saksiꞌ du, in kallumna pabalik asal bꞌnnal. 33 Pinabangsa na iya, pinatingkōꞌ ma bihing Tuhan tampal ni kowan, ati tasambut eꞌna min Mmaꞌna in Rū Sussi ya bay panganjanjiꞌ. Jari pinabeyaꞌ Rū itu eꞌ si Isa boꞌ pahōp ni kami, angkan saga kahinangan ya taꞌndaꞌ maka takalebi buwattinaꞌan. 34 Nggaꞌi ka si Daꞌud ya bay paꞌangkat ni sulgaꞌ, sagōꞌ buwattitu pamissalana, yuk-i
‘Bay ahꞌlling Tuhan ni Panghūꞌku, yukna,
Daiꞌ ka aningkōꞌ ma bihingku kowan,
35 sampay bowaku palbantahannu tatauꞌ ma deyoꞌ pād-tapeꞌnu.’
36 “Angkanna,” yuk si Petros, “in kaꞌam bangsa Israꞌil kamemon, subay kataꞌuwanbi in si Isa itu, ya bay palansangbi ni hāg, ginꞌllal na eꞌ Tuhan, in iya Panghūꞌ maka Al-Masi, ya pineneꞌ eꞌ Tuhan!”
37 Pagkale saga aꞌa ma pamissala si Petros itu magtūy alengog sidda pikilan sigām. Yuk sigām ni si Petros maka ni kaseheꞌan kawakilan eꞌ, “Saga dauranakan, ai subay hinang kami?”
38 Yuk sambung si Petros, “Taikutinbi toꞌongan dusabi. Ati kaꞌam dangan maka dangan subay pinandi min ōn si Isa Al-Masi, palsaksiꞌan in kaꞌam angandol na ma iya. Manjari niampun du dusabi maka pinaniyaꞌan du kam Rū Sussi, ya pamuwan Tuhan ma kaꞌam. 39 Sabab ya ilu janjiꞌna ma kaꞌam maka saga panubuꞌbi, sampay isab sigām min katāhan, sai-sai tapeneꞌ eꞌ Panghūꞌtam Tuhan.”
40 Aheka giꞌ bissala si Petros ma saga aꞌa inān. Binandaꞌan sigām eꞌna, niebot-ebotan pahāp, yukna, “Anabang kam di-bi boꞌ kam papuwas min saga aꞌa ya maghinang kalumuꞌan ma buwattinaꞌan!” 41 Manjari aheka amꞌnnal ma bissala si Petros inān ati pinandi sigām tandaꞌ in sigām sukuꞌ si Isa na. Ma llaw inān, aniyaꞌ saga tꞌllungibu heka aꞌa pinakꞌnnop ni saga aꞌa magpangandol ma si Isa.
Kapagdakayuꞌ Atay saga Bebeyaꞌan si Isa
42 Amogbog sigām ma bay pamanduꞌ eꞌ saga aꞌa kawakilan si Isa, maka magdakayuꞌ sigām maka saga aꞌa kaseheꞌ ya magpangandol. Magbahagiꞌ sigām tinapay maka magbeyaꞌ angarap ni Tuhan. 43 Aheka hinang makainu-inu maka paltandaꞌan bay tahinang eꞌ saga aꞌa kawakilan itu, angkan sinōd tāw saga aꞌa kamemon. 44 Magdakayuꞌ na paꞌin saga aꞌa magpangandol kamemon, maka magbahagiꞌ-biyahagiꞌi. 45 Pinabꞌllian ginisan pangaltaꞌ sigām ati bꞌllihanna pamahagiꞌ ni kaseheꞌan sasuku taga-sukkal. 46 Llaw-llaw sigām magsabu ma deyom langgal pagkulbanan. Magsalu sigām ma kalumaꞌan sigām. Akōd isab magbahagiꞌ kinakan min atay poteꞌ. 47 Ananglit na paꞌin sigām ma Tuhan, ati kasulutan aꞌa kamemon ma sigām. Sakahabaꞌ llaw aniyaꞌ na paꞌin aꞌa pinakꞌnnop ni sigām eꞌ Panghūꞌ, sasuku kalappasan min hukuman dusa.