3
Aꞌa Akuꞌil Kauliꞌan eꞌ si Petros
1 Manjari dakayuꞌ llaw, pehēꞌ si Petros maka si Yahiya ni langgal pagkulbanan ma waktu sambahayang luhul. 2 Mainaꞌan ma atag lawang langgal niōnan Lawang Alingkat, aniyaꞌ dakayuꞌ aꞌa mbal makalꞌngngan min deyom kandang inaꞌna giꞌ. Binowa iya llaw-llaw ni atag bowaꞌ lawang inān supaya iya makapangamuꞌ sarakka ni saga aꞌa maglabayan minnaꞌan tudju ni deyom langgal. 3 Pagꞌndaꞌna ma si Petros maka ma si Yahiya inaꞌan song pasōd, magtūy iya angamuꞌ sīn ni sigā. 4 Pinatongan iya eꞌ sigā, jari yuk si Petros, “Angꞌndaꞌ ka ni kami!” 5 Magtūy angꞌndaꞌ aꞌa inān, aholat kabuwanan ai-ai eꞌ sigā.
6 Sagōꞌ ahꞌlling si Petros ma iya, yukna, “Halam toꞌongan aniyaꞌ altaꞌku sagōꞌ ya pamuwanku ma kaꞌa bang ai aniyaꞌ ma aku. Min kawasa ōn si Isa Al-Masi aꞌa Nasaret, sohoꞌta ka palꞌngngan!” 7 Ati binalutan iya eꞌ si Petros ma tanganna kowan, tinabang boꞌ makatꞌngge. Saruꞌun-duꞌun du iya kabuwanan kosog ma tapeꞌna sampay ma buku-bukuna. 8 Magtūy iya anꞌngge boꞌ yampa lumꞌngngan. Puwas eꞌ magbeyaꞌ iya maka disi Petros pasōd ni deyom langgal. Palꞌngngan iya maka eꞌna maglaksu sampay ananglit ma Tuhan. 9 Taꞌndaꞌ iya eꞌ saga aꞌa magtimuk mainaꞌan, palꞌngngan maka ananglit na paꞌin ma Tuhan. 10 Takilā iya eꞌ sigām in iya bay aningkōꞌ angamuꞌ sarakka ma langgal ma bowaꞌ lawang ya pinagōnan Lawang Alingkat. Magtūy sigām kinoblaꞌan maka ainu-inu ma bay tahinang ma aꞌa inān.
Magnasihat si Petros ma Deyom Langgal
11 Amalut lagiꞌ aꞌa inān ma si Petros maka si Yahiya mainaꞌan ma saurung langgal ya niōnan Saurung si Sulayman. Angkan ainu-inu saga aꞌa kamemon ati paragan sigām pinaꞌan ni disi Petros. 12 Pagꞌndaꞌ paꞌin si Petros ma saga aꞌa inān, amissala iya, yukna, “Oy, kaꞌam aꞌa Israꞌil! Angay itu kainu-inuhanbi! Angay kami patonganbi? Pangannalbi bahāꞌ min kawasa kami atawa min kasussi atay kami, ya angkan aꞌa itu makalꞌngngan na? 13 Tuhan ya pagtuhanan si Ibrahim, si Isaꞌak maka si Yakub, sampay kaꞌmboꞌ-mboꞌantam, bay amabangsa sosohoꞌanna si Isa. Sagōꞌ tꞌkkahanbi iya ni saraꞌ boꞌ pinapatay ati sulakbi iya ma matahan gubnul Pilatu, minsan iya anganiyat amaluhaya si Isa. 14 Asussi si Isa maka aꞌadil, saguwāꞌ bay taikutanbi. Ya bay amuꞌbi pinaluwas eꞌ gubnul aꞌa pamomonoꞌ. 15 Bay iya papataybi, ya poꞌonan kallum, sagōꞌ pinakallum iya pabīng eꞌ Tuhan. Kami itu saksiꞌ in inaꞌan bꞌnnal. 16 Na,” yuk si Petros, “min kawasa ōn si Isa, angkan aꞌa bay akuꞌil itu kabuwanan kosog boꞌ makalꞌngngan na. Taꞌndaꞌbi na iya, maka takilābi asal. Ahoꞌ, min pangandolna ma ōn si Isa, angkan iya kauliꞌan ma pangꞌndaꞌbi.
17 “Saga dauranakanku,” yuk si Petros, “kataꞌuwanku in kaꞌam maka saga nakuraꞌbi bay aꞌawam, angkan bay hinangbi buwattēꞌ ma si Isa. 18 Saguwāꞌ ya na heꞌ katumanan pagkallam Tuhan, ya bay pinataꞌu eꞌ kanabi-nabihan min awal giꞌ heꞌ. Pinataꞌu eꞌ sigām in Al-Masi subay makalabay kabinasahan. 19 Na,” yuk si Petros, “taikutinbi na dusabi. Papinda kam ni Tuhan boꞌ pinapasan eꞌna dusabi, ati boꞌ kam pinaniyaꞌan kahayangan atay eꞌ Panghūꞌ. 20 Jari pinapiꞌitu du si Isa, ya Al-Masi bay tapeneꞌ eꞌ Tuhan magbayaꞌ ma kaꞌam. 21 Sagōꞌ subay mainaꞌan giꞌ iya ma sulgaꞌ sampay taꞌabut waktu pamahāp Tuhan ma kamemon ai-ai, buwat bay janjiꞌna labay min kanabi-nabihan ma masa awal. 22 Sabab si Musa bay angallam ma bangsa Israꞌil, yukna, ‘Ma sinosōng aniyaꞌ du dakayuꞌ nabi buwat aku pinaniyaꞌan kaꞌam eꞌ Panghūꞌbi Tuhan. Aꞌa bangsabi iya. Wajib iya subay kalebi ma ai-ai pamissalana ma kaꞌam. 23 Sai-sai mbal akale ma nabi inān, pinaokat du iya eꞌ Tuhan min bangsa sukuꞌna sampay minula.’
24 “Buwattēꞌ na paꞌin pangallam saga nabi kamemon, tinagnaꞌan min si Samwel pasal pakaradjaꞌan ya paniyaꞌ ma waktu itu. 25 Manjari kaꞌam ya makasambut kahāpan min kanabi-nabihan, maka kaꞌam ya pinasukuꞌan paljanjiꞌan Tuhan ya bay panganjanjiꞌna ma kaꞌmboꞌ-mboꞌanbi. Bay anganjanjiꞌ Tuhan ma si Ibrahim, yukna, ‘Kamemon saga bangsa ma dunya itu pinaniyaꞌan kahāpan ma sabab panubuꞌnu.’ 26 Angkan tapeneꞌ eꞌ Tuhan sosohoꞌanna si Isa, ati pinapiꞌitu iya ni kaꞌam dahū boꞌ kam pinaniyaꞌan kahāpan pagka kam binowa eꞌna angꞌbba min kahinanganbi alaꞌat.”