4
Pinatampal disi Petros ni Tumpukan Maghuhukum
1 Masi giꞌ si Petros maka si Yahiya amissala ma saga aꞌa, aniyaꞌ pinaꞌan ni sigā saga imam maka kapitan jaga langgal pagkulbanan, maka saga Saddusi.a 2 Landuꞌ asasaw pikilan sigām sabab inaꞌan disi Petros amanduꞌan saga aꞌa in si Isa allum pabalik min kamatayna. 3 Manjari sinaggaw disi Petros. Kinalabusub sigā sampay ni llaw dakayuꞌ sabab abay-kohap na. 4 Sagōꞌ aheka aꞌa bay akale ma bissala disi Petros boꞌ amꞌnnal ma si Isa. Ya heka sigām angandol inān saga limangibu bang lꞌlla sadja ya niꞌitung.
5 Pagꞌllaw dakayuꞌ, magtimuk ma Awrusalam saga kanakuraꞌan bangsa Yahudi, saga pagmattoꞌahan, maka saga guru saraꞌ agama. 6 Inaꞌan isab mainaꞌan si Annas Imam Muwallam, maka disi Kayapas, si Yahiya, si Iskandar, maka saga kampung si Annas kaseheꞌ. 7 Manjari duwangan aꞌa kawakilan eꞌ sinōꞌ paꞌalop ni sigām. Tinilaw sigā eꞌ saga nakuraꞌ inān, yuk-i, “Kawasa ai bay pangahinangbi saga kahinanganbi diꞌilaw eꞌ? Atawa ōn sai bay panabbutanbi?”
8 Manjari si Petros inān pinahōpan Rū Sussi, ati kasambunganna saga nakuraꞌ inān, yukna, “Kaꞌam saga nakuraꞌ bangsa Yahudi, maka kaꞌam saga pagmattoꞌahan ilu, 9 bang ya panumariyahanbi kami pasal kahāpan bay tahinang ma aꞌa akuꞌil itu, maka pasal bang buwattingga bay kapamauliꞌ ma iya, 10 na, ya itu subay tōp kataꞌuwanbi. Pataꞌu kam maka kamemon saga bangsa Israꞌil. Ya aꞌa anꞌngge ma dahuanbi itu, angkan iya kauliꞌan na sabab kawasa si Isa Al-Masi aꞌa Nasaret! Bay iya palansangbi ni hāg, sagōꞌ pinakallum iya min kamatayna eꞌ Tuhan. 11 Si Isa itu bay kinallam ma deyom Kitab, ya yuk-i,
‘Ya batu bay sinulak eꞌbi saga aꞌa maghinang lumaꞌ,
ya na inaꞌan batu tapeneꞌ pamapagon lumaꞌ.’
12 Halam toꞌongan aniyaꞌ saddī min si Isa ma kaluhaꞌan dunya itu makalappas kitam min mulkaꞌ. Luwal ōn si Isa bay pamuwan eꞌ Tuhan panabbutan manusiyaꞌ, boꞌ supaya kitam lappasan.”
13 Sakali ainu-inu saga kanakuraꞌan inān pagꞌndaꞌ sigām ma kaesog si Petros maka si Yahiya amissala. Kinataꞌuwan isab in sigā karuwangan itu aꞌa areyoꞌ asal, halam bay makalabay pangadjiꞌ alanga. Manjari kinilā sigā pahāp eꞌ kanakuraꞌan heꞌ, in sigā magbeyaꞌ maka si Isa. 14 Malaingkan halam aniyaꞌ panganjawab eꞌ saga nakuraꞌ, sabab inaꞌan ma pangꞌndaꞌ sigām aꞌa bay kauliꞌan eꞌ, anꞌngge ma atag disi Petros. 15 Angkan sigām magpanohoꞌan pinaluwas disi Petros minnēꞌ boꞌ sigām magisun. 16 Yuk sigām, “Ai bahāꞌ subay hinangtam ma saga aꞌa itu? Mbal kitam makapalilu pasal bay tahinang eꞌ sigā, sabab kinataꞌuwan eꞌ aꞌa kamemon ma daꞌira Awrusalam itu aniyaꞌ hinang landuꞌ akawasa bay tahinang eꞌ sigā duwangan itu. 17 Sagōꞌ,” yuk sigām, “sanggupantam sigā supaya mbal patanyag palkalaꞌ itu. Bandaꞌantam subay daꞌa amissala pabīng min ōn si Isa.”
18 Angkan pinalinganan pabalik si Petros maka si Yahiya eꞌ saga nakuraꞌ inān. Binandaꞌan sigā subay daꞌa toꞌongan amissala atawa amanduꞌ min ōn si Isa minsan panduꞌ ai. 19 Sagōꞌ anambung si Petros maka si Yahiya yuk-i, “Kumpasunbi konoꞌ bang ingga ya abontol ma pangꞌndaꞌ Tuhan: kaꞌam manusiyaꞌ ya patut bineyaꞌ, atawa iya? 20 Sabab mbal kami makajari pahali angahakaꞌan saga aꞌa pasal bay taꞌndaꞌ kami maka bay takale kami heꞌ.”
21 Gom paꞌin pinakosog eꞌ saga nakuraꞌ inān ya sanggup sigām ma disi Petros boꞌ yampa sigā pinaluhaya. Halam aniyaꞌ sababan paminasa saga nakuraꞌ inān ma disi Petros, sabab inaꞌan kamemon saga aꞌa ananglitan Tuhan ma sabab hinang kawasahan bay tahinang eꞌ. 22 Na, ya aꞌa bay kauliꞌan kuꞌilna labi mpatpūꞌ tahun umulna.
Angamuꞌ-ngamuꞌ Saga Aꞌa Bebeyaꞌan si Isa
23 Na, tapaluwas paꞌin disi Petros, magtūy sigā pabīng ni kaseheꞌan sigā angahaka pasal kamemon bay pahꞌlling saga kaimaman alanga maka saga pagmattoꞌahan. 24 Takale paꞌin inaꞌan-i eꞌ sigām, magtūy sigām magbeyaꞌ angamuꞌ-ngamuꞌ ni Tuhan. “O Panghūꞌ Sangat Kawasa,” yuk sigām, “kaꞌa ya bay amapanjari langit maka dunya, tahik maka kaboheꞌan, sampay binangsa kamemon ma deyomna. 25 Bay pabissalanu sosohoꞌannu si Daꞌud, pangkat kami, ati angallam iya deyoꞌ bay min Rū Sussi, yuk-i,
‘Angay angkan magpananggup saga kabangsa-bangsahan?
Angay sigām magkagaraꞌan ma halam aniyaꞌ pūsna?
26 Magdakayuꞌ saga kasultanan boꞌ magsakap,
Magtipun saga kanakuraꞌan angatu ma Panghūꞌ,
maka ma Al-Masi ya tapeneꞌna magbayaꞌ!’
27 Bꞌnnal pangallam eꞌ,” yuk pangamuꞌ-ngamuꞌ sigām. “sabab bay magtipun ma daꞌira itu saga aꞌa Yahudi maka aꞌa nggaꞌi ka Yahudi, sultan Herod maka gubnul Puntus Pilatu. Maggaraꞌ sigām anguntara ma si Isa, sosohoꞌannu sussi ya bay gꞌllalnu Al-Masi. 28 Jari tahinang eꞌ sigām ya bay niyatnu min awal lagiꞌ, luwas min kawasanu maka kahandaknu. 29 Na, Panghūꞌ, kalehun sanggup sigām ma kami. Tabangin kami saga sosohoꞌannu, boꞌ kami mbal tināw amissala lapalnu. 30 Paluwasun kosog kawasanu amauliꞌ saga aꞌa sakihan. Pahinangun hinang makainu-inu maka paltandaꞌan min kawasa ōn si Isa, ya sosohoꞌannu sussi.”
31 Na, aubus paꞌin pangamuꞌ-ngamuꞌ sigām inān, ajogjog lumaꞌ ya pagtipunan sigām ati pinahōpan sigām Rū Sussi. Minnēꞌ sigām amissala lapal Tuhan, halam toꞌongan aniyaꞌ tāw sigām ma aꞌa.
Magbahagiꞌ Sama-sama saga Bebeyaꞌan si Isa
32 Manjari itu magdaꞌatay maka magdakayuꞌ kagaraꞌan kamemon magpangandol ma si Isa inān. Halam aniyaꞌ ahꞌlling in kaniyaꞌna inaꞌan sukuꞌna sadja, sagōꞌ sama-bahagiꞌ sigām kamemon ma ai-ai sigām. 33 Saga aꞌa kawakilan inān magabut-abut anaksiꞌ pasal kallum Panghūꞌ Isa pabīng min kamatayna. Jari akawasa toꞌongan panaksiꞌ sigām, ati landuꞌ sigām kinahāpan eꞌ Tuhan. 34 Halam aniyaꞌ ma deyoman sigām kakulang-kabusan. Bang aniyaꞌ waktu pamabꞌlli sigām tanaꞌ atawa lumaꞌ, 35 niꞌndeꞌan bꞌllihanna ni saga aꞌa kawakilan inān. Jari in sīn inān bay pinagbahagiꞌan ma sasuku taga-kasusahan.