5
Si Ananiyas maka si Sappira
1 Na aniyaꞌ inān dakayuꞌ aꞌa niōnan si Ananiyas, hꞌndana si Sappira. Aniyaꞌ tanaꞌna bay pabꞌllihanna, 2 sagōꞌ in bꞌllihanna kaseheꞌ bay tatauꞌna. Niuyunan isab itu eꞌ hꞌndana, jari ya sīn bay takapin min bꞌllihan eꞌ bay niꞌndeꞌan ni saga aꞌa kawakilan.
3 Yuk si Petros ma iya, “Ananiyas, angay pasagarannu nakuraꞌ saitan pahōp ma deyom pangatayannu, amowa-mowa kaꞌa amutingan Rū Sussi? Sabab ilu bay tauꞌnu sīn kaseheꞌan bay bꞌllihan tanaꞌnu heꞌ. 4 Ma halam lagiꞌ bay pabꞌllihannu, sukuꞌnu asal tanaꞌ inān. Maka minsan bay kapabꞌllihanna, sukuꞌnu du bꞌllihanna inān paggunabi. Jari angay tapikilnu maghinang buwattilu? Nggaꞌi ka manusiyaꞌ ya pagputingannu ilu, sagōꞌ Tuhan!”
5 Pagkale paꞌin si Ananiyas ma lling itu, magtūy iya pahantak amatay. Jari sasuku makakale ma pasal kamatayna inān sinōd tāw sidda. 6 Sakali pasōd pinaꞌan saga kalꞌllahan abataꞌ giꞌ anaput mayatna boꞌ yampa binowa paluwas minnēꞌ, kinubul.
7 Na, palabay paꞌin saga tꞌllunjām, atꞌkka pinaꞌan hꞌnda si Ananiyas, sagōꞌ halam kinataꞌuwan eꞌna bang ai bay tumꞌkka heꞌ. 8 Yuk si Petros ma iya, “Hakaꞌin aku. Ya na bahāꞌ itu sīn kamemon bay taꞌāꞌbi maglakibini min bꞌllihan tanaꞌbi?”
“Ahoꞌ,” yuk dꞌnda, “ya na koꞌ ilu.”
9 Yuk si Petros, “Angay kam maglakibini bay maggaraꞌ anulayan Rū Panghūꞌ! Ndaꞌun, ilu na ma bowaꞌ lawang saga aꞌa bay angubul hꞌllanu insiniꞌ. Maka ya du kaꞌa binowa du isab eꞌ sigām.” 10 Saruꞌun-duꞌun du pahantak dꞌnda inān ma atag tapeꞌ si Petros, amatay. Pagsōd paꞌin saga kalꞌllahan abataꞌ eꞌ, taꞌndaꞌ iya eꞌ sigām amatay na ati binowa iya kinubul ma bihing hꞌllana. 11 Minnēꞌ sidda tināw saga jamaꞌa si Isa kamemon sampay sasuku bay makakale ma pasal inaꞌan-i.
Aheka Saki Kauliꞌan eꞌ saga Aꞌa Kawakilan
12 Aheka saga paltandaꞌan maka hinang makainu-inu bay tahinang ma deyoman saga aꞌa Awrusalam inān eꞌ saga aꞌa kawakilan. Jari sasuku magpangandol ma si Isa araran magtipunan kamemon ma Saurung si Sulayman. 13 Halam aniyaꞌ aꞌa saddī makatawakkal palamud ni sigām, minsan aheya pagaddat saga aꞌa kamemon ma sigām. 14 Sagōꞌ paganap na paꞌin boꞌ paganap saga aꞌa lꞌlla-dꞌnda angandol ma Panghūꞌ Isa. 15 Ya kaluwasanna, binowa saga aꞌa sakihan paluwas min lumaꞌ ni kalān-lānan boꞌ pinalege ma kantil atawa ma tepo supaya taluwaꞌ lambung si Petros bang iya gantaꞌ palabay minnaꞌan. 16 Aheka isab saga aꞌa bay pinaꞌan min saga kauman ma sakalingkal Awrusalam, amowa seheꞌ sigām sasuku magsakihan atawa aꞌa sinōd saitan. Jari kauliꞌan sigām kamemon.
Pininjalaꞌ Saga Aꞌa Kawakilan si Isa
17 Pagubus, angimbū Imam Muwallam maka baꞌanan pagkahina Saddusi ma saga aꞌa kawakilan. 18 Jari pinasaggaw eꞌ sigām saga kawakilan eꞌ boꞌ kinalabusu. 19 Sagōꞌ ma sangom inān aniyaꞌ malaꞌikat min Tuhan bay pinaꞌan angukab tambol kalabusu, amowa saga aꞌa kawakilan inān paluwas. 20 Yuk malaꞌikat ni sigām, “Pehēꞌ kam anꞌngge ma halaman langgal pagkulbanan amanduꞌan saga aꞌa pasal kallum bahaꞌu itu, bang ai hatulanna.”
21 Jari pagdaiꞌ-llaw dakayuꞌ, pehēꞌ na sigām ni halaman langgal buwat bay panohoꞌan malaꞌikat eꞌ, ati anagnaꞌ sigām amanduꞌan saga aꞌa.
Atꞌkka paꞌin pinaꞌan Imam Muwallam maka saga seheꞌna, pinatimuk eꞌ sigām Tumpukan Maghuhukum boꞌ magsakaum kamemon saga pagmattoꞌahan bangsa Israꞌil. Pagubus, sinōꞌ saga nakuraꞌ jaga pehēꞌ ni kalabusu boꞌ pinaꞌalop saga aꞌa kawakilan ni Maghuhukum eꞌ. 22 Sagōꞌ pagtꞌkka saga jaga itu ni kalabusu, halam mainaꞌan saga aꞌa kawakilan. Jari pabīng ni Maghuhukum angahaka. 23 Yuk sigām, “Pagtꞌkka kami ni kalabusu, masi ahogot saga tambol lawangna. Maka inaꞌan isab saga sundalu jaga masi anꞌngge ma luwasan lawang kalabusu eꞌ. Sagōꞌ pagukab kami, halam aniyaꞌ tabāk kami ma deyom!” 24 Na, takale paꞌin haka inān eꞌ nakuraꞌ jaga langgal sampay eꞌ kaimaman alanga, asasaw pamikil sigām bang ai katꞌkkahan saga pakaradjaꞌan itu.
25 Sakali aniyaꞌ aꞌa atꞌkka pinaꞌan amowa haka, yukna, “Pakale kam! Ya aꞌa bay pakalabusubi, inaꞌan na ma deyom langgal amanduꞌan saga aꞌa!” 26 Magtūy pehēꞌ nakuraꞌ jaga maka saga aꞌana angāꞌ disi Petros. Sagōꞌ halam sigām makapissokoꞌ disi Petros sabab tināw sigām binantung maka batu eꞌ baꞌanan aꞌa mainaꞌan.
27 Binowa saga aꞌa kawakilan itu eꞌ sigām pinatampal ni Tumpukan Maghuhukum, jari sinumariya sigām eꞌ Imam Muwallam. 28 Yuk-i, “Bay na kam sanggupan kami toꞌongan sinōꞌ daꞌa amanduꞌ pasal aꞌa ya pameyaꞌanbi ilu. Sagōꞌ ndaꞌunbi na ya kahinanganbi itu! Asaplag deyom Awrusalam ma sabab pamanduꞌbi. Tuꞌud kam magniyat amatanggung dusa ni kami ma pasal kamatay aꞌa inān!”
29 Anambung si Petros maka kaseheꞌan bay kawakilan eꞌ, yuk sigām, “Panohoꞌan Tuhan ya subay beyaꞌ kami, nggaꞌi ka panohoꞌan manusiyaꞌ. 30 Si Isa inān,” yuk sigām, “bay sohoꞌbi nilansang ni hāg boꞌ pinapatay. Sagōꞌ bay iya pinakallum pabīng eꞌ Tuhan, ya asal pagtuhanan saga pangkattam. 31 Tapabangsa na iya eꞌ Tuhan, pinatꞌnnaꞌ ma bihingna tampal ni kowan boꞌ magnakuraꞌ sampay Manglalappas ma manusiyaꞌ, boꞌ supaya aniyaꞌ pagtaubatan maka kaꞌampunan dusa ma bangsa Israꞌil. 32 Kami itu,” yuk disi Petros, “anaksiꞌ in pakaradjaꞌan pamissalaku itu bꞌnnal sadja. Ya du Rū Sussi, ya pamuwan eꞌ Tuhan ma sasuku ameyaꞌ ma panohoꞌanna.”
33 Pagkale paꞌin lling itu eꞌ ma Tumpukan, apasuꞌ toꞌongan atay sigām ati maggaraꞌ sigām amapatay saga aꞌa kawakilan inān. 34 Sagōꞌ aniyaꞌ mainaꞌan dakayuꞌ Parisi niōnan si Gamaliyal, aꞌa pagguruhan saraꞌ agama. Aꞌa iya pinagaddatan eꞌ kamemon. Na anꞌngge si Gamaliyal itu ma Tumpukan Maghuhukum boꞌ sohoꞌna pinaluwas daiꞌ-daiꞌ saga aꞌa sinumariya heꞌ. 35 Yuk si Gamaliyal, “Kaꞌam pagkahiku bangsa Israꞌil, kamayaꞌ-mayaꞌ kam ma ai-ai song hinangbi ma saga aꞌa ma luwasan itu. 36 Entomunbi bay palabay heꞌ, aniyaꞌ bay niōnan si Tiyudas magheya-heya di-na. Aniyaꞌ isab saga mpat hatus aꞌa bay paumpig ma iya. Sagōꞌ ya kamattihanna, pinapatay si Tiyudas ati akaukanat saga tendogna. Ya inaꞌan katobtobanna. 37 Puwas min si Tiyudas, aniyaꞌ isab pasunuꞌ dakayuꞌ aꞌa Jalil, ōnna si Judas, ma timpu pagsulat ōn aꞌa kamemon eꞌ parinta. Aheka isab saga aꞌa bay tabowana ameyaꞌ ma iya, sagōꞌ ya du iya bay pinapatay maka akaukanat isab tendogna kamemon. 38 Angkan kam bandaꞌanku na ma pasal palkalaꞌ itu. Daꞌa inayunbi saga aꞌa itu. Pasagarinbi sadja na sigām. Sabab bang hal min pikilan manusiyaꞌ ya minaksud maka nihinang eꞌ sigām itu, halam du aniyaꞌ kasōnganna. 39 Sagōꞌ bang min Tuhan, mbal tapaggatbi. Gōm paꞌin saggaꞌbi na kabayaꞌan Tuhan!”
40 Manjari bineyaꞌ eꞌ saga aꞌa inān pamissala si Gamaliyal. Nilinganan eꞌ sigām saga aꞌa kawakilan inān pinasōd boꞌ yampa sinōꞌ niraplosan. Binandaꞌan sigām daꞌa amanduꞌ pabalik min ōn si Isa, ati pinaluwas sigām.
41 Sagōꞌ alaꞌan paꞌin saga aꞌa kawakilan min Tumpukan eꞌ, makalanduꞌ akōd sigām sabab tabista sigām eꞌ Tuhan tōp pinalabay min kabinasahan ma sabab pangandol sigām ma ōn si Isa. 42 Sakahabaꞌ llaw inaꞌan sigām ma deyom langgal pagkulbanan sampay ma saga kalumaꞌan, magpanduꞌ na paꞌin maka magnasihat lapal ahāp pasal si Isa in iya Al-Masi.