6
Pituꞌ Aꞌa Pineneꞌ Anabang
1 Ma waktu inān magheheka na paꞌin saga aꞌa bebeyaꞌan si Isa. Jari aniyaꞌ palkalaꞌ ma sigām: saga Yahudi ya amissala bahasa Girīk magsaggaꞌ maka saga Yahudi porol ma lahat Yahudiya. Ya makalaꞌat atay saga Yahudi amissala Girīk inān, in karꞌndahan sigām balu takalipat konoꞌ ma waktu kapagbahagiꞌ balanjaꞌ kahabaꞌ llaw. 2 Angkan saga bebeyaꞌan si Isa kamemon sinōꞌ pinatimpuk eꞌ sangpūꞌ maka duwa aꞌa kawakilan ati ahꞌlling ni sigām. Yuk-i, “Mbal taluwaꞌ bang kami angꞌbbahan hinang kami magnasihat palman Tuhan, ati boꞌ amahagiꞌ saga balanjaꞌ. 3 Angkanna, saga dauranakan, subay kam ameneꞌ pituꞌ lꞌlla min deyomanbi ilu, aꞌa kahōpan eꞌ Rū Sussi, maka taga-pangitaꞌu alalom. Bang tapeneꞌbi na, patanggung kami ni sigām ya hinang amahagiꞌ balanjaꞌ itu. 4 Manjari kami itu,” yuk aꞌa kawakilan eꞌ, “amanuyuꞌ na paꞌin angamuꞌ-ngamuꞌ ni Tuhan maka anganasihat palmanna.”
5 Na, kasulutan aꞌa inān kamemon ma bay kagaraꞌan eꞌ, ati tapeneꞌ eꞌ sigām si Esteban, aꞌa bal-iman maka kahōpan eꞌ Rū Tuhan. Tapeneꞌ isab si Pilip, si Prokoros, si Nikanur, si Timun, si Parmenas, maka si Nikulas min Antiyuk. Si Nikulas itu nggaꞌi ka Yahudi, aꞌa ya bay apinda ni agama Yahudi. 6 Ya kapituꞌ aꞌa itu bay binowa patampal ni saga aꞌa kawakilan boꞌ niamuꞌan tabang min Tuhan. Pinatꞌppakan isab sigām tangan, tandaꞌ in sigām pinasukuꞌan hinang inān.
7 Manjari pasaplag na paꞌin palman Tuhan. Pakꞌnnop toꞌongan heka saga aꞌa ameyaꞌ ma si Isa ma deyom Awrusalam, maka aheka isab kaimaman ameyaꞌ angandol ma si Isa.
Si Esteban Sinaggaw
8 Si Esteban inān aꞌa sidda tinabang eꞌ Tuhan, aꞌa binarakatan, angkan aheka hinang makainu-inu maka paltandaꞌan bay tahinang eꞌna ma deyoman saga aꞌa ma Awrusalam. 9 Sagōꞌ aniyaꞌ saga aꞌa anaggaꞌ iya, jamaꞌa min dakayuꞌ langgal niōnan Langgal Aꞌa Aluhaya. Saga aꞌa inān asal min daꞌira Kirini maka min daꞌira Iskandari. Jari magbeyaꞌ sigām maka saga Yahudi kaseheꞌ min lahat Silisi maka min lahat Asiya isab, ati amowa magjawab ma si Esteban. 10 Daipara saga aꞌa inān mbal makaꞌatu ma bissala si Esteban ma sabab pangitaꞌu ya asal pamuwan ma iya eꞌ Rū Tuhan.
11 Sakali aniyaꞌ aꞌa saddī tinambahan eꞌ saga anaggaꞌ inān. Binidjakan sigām, sinōꞌ angahaka puting pasal si Esteban. Ya yuk puting sigām, “Bay takale kami aꞌa itu amūng-mūng pangkal ma si Musa maka ma Tuhan.”
12 Minnēꞌ aniyaꞌ sasaw ma kahekaꞌan aꞌa inān maka ma saga pagmattoꞌahan maka saga guru saraꞌ agama. Angkan sigām pinaꞌan anaggaw si Esteban, ati tinandanan iya ni Tumpukan Maghuhukum. 13 Aniyaꞌ isab saga aꞌa binidjakan eꞌ sigām magsaksiꞌ puting ma pasal si Esteban. Yuk saksiꞌ heꞌ, “Aꞌa itu mbal pahali amissala kalaꞌatan pasal langgaltam sussi itu, maka pasal saraꞌ agamatam. 14 Bay iya takale kami ahꞌlling in si Isa, aꞌa Nasaret eꞌ, song angalangkat langgal itu. Maka pinindahan konoꞌ eꞌna pangaddatan kamemon bay pangꞌbba kitam eꞌ si Musa.”
15 Manjari pinatongan si Esteban eꞌ saga aꞌa aningkōꞌ ma Paghuhukum eꞌ, ati tandaꞌ eꞌ sigām pamaihuꞌan si Esteban angaluwa pamaihuꞌan malaꞌikat.