16
Si Isa Allum Pabalik
1 Palabay paꞌin llaw Sabtuꞌ, inaꞌan si Mariyam aꞌa Magdala, maka si Salome, maka si Mariyam inaꞌ si Joses, amꞌlli laksiꞌ maka nsꞌllan pahamut pamahilalaꞌ sigām ma mayat si Isa. 2 Manjari pagkꞌllat llaw Ahad, boꞌ subu-subu toꞌongan, pehēꞌ sigām ni pagkubulan. 3 Magsuli-suli na paꞌin sigām ma labayan, yuk-i, “Sai bahāꞌ anganggulungan batu panaplok lowang eꞌ boꞌ kitam makasōd?” Sabab aheya asal batu inān. 4 Pagtꞌkka sigām pinaꞌan taꞌndaꞌ eꞌ sigām batu waꞌi na bay ginulungan. 5 Jari pasōd sigām ni deyom lowang kubul ati aniyaꞌ taꞌndaꞌ eꞌ sigām dakayuꞌ lꞌlla abataꞌ lagiꞌ magnijuba poteꞌ, aningkōꞌ tampal ni kowan. Magtūy sigām takuddat sidda.
6 Yuk lꞌlla itu ma sigām, “Daꞌa kam tināw. Kataꞌuwanku asal, ya pihabi si Isa aꞌa Nasaret ya bay nilansang ni hāg pinapatay. Halam na iya maitu. Allum na iya pabīng! Ndaꞌunbi lugal bay pamalegehan iya. 7 Na, pehēꞌ na kam,” yukna, “amowa haka itu ni saga mulidna maka ni si Petros. Yukbi ni sigām, ‘Parahū du iya min kaꞌam ni lahat Jalil. Mahēꞌ du kam angꞌndaꞌ ma iya buwat bay llingna ma kaꞌam.’ ”
8 Manjari paluwas saga dꞌnda heꞌ ati paragan min kubul. Angenog-ngenog sigām maka halam aniyaꞌ pahꞌlling sigām ni sai-sai sabab tināw sigām.
Si Isa Panyataꞌ Magbaran ni si Mariyam
9 Na, allum paꞌin si Isa pabīng min kamatayna ma daiꞌ-llaw Ahad inān, magtūy iya patuwaꞌ dahū ni si Mariyam dꞌnda min Magdala, ya bay kapaluwasan eꞌna pituꞌ saitan. 10 Maka si Mariyam itu bay pehēꞌ angahakaꞌan saga mulid si Isa. Inaꞌan sigām magdukka maka magtangis. 11 Sagōꞌ kahakaꞌan paꞌin sigām eꞌ si Mariyam in si Isa allum maka bay konoꞌ taꞌndaꞌna, mbal sigām amꞌnnal.
Magpanyataꞌ si Isa ni Duwa Mulidna
12 Puwas eꞌ magpanyataꞌ isab si Isa ni duwangan mulidna hinabu sigā lumꞌngngan tudju kaleya, boꞌ saddī pangluwahanna. 13 Manjari pabalik duwangan mulid eꞌ ni Awrusalam angahakaꞌan saga seheꞌ sigā. Sagōꞌ ya du sigā halam binꞌnnal eꞌ kaseheꞌan inān.
Magpanyataꞌ si Isa ni Mulidna Kasangpūꞌ ka Ssa
14 Puwas eꞌ magpanyataꞌ na si Isa ni mulidna kasangpūꞌ maka ssa hinabu sigām amangan. Pinabukagan sigām eꞌna sabab mbal amꞌnnal maka atuwas kōk sigām. Mbal sigām bilahi magkahagad minsan sigām nihakaꞌan eꞌ saga aꞌa bay makaꞌndaꞌ si Isa maka kallumna pabīng min kamatayna. 15 Manjari amissala iya ni sigām, yukna, “Pehēꞌ kam ni sabarang lahat ma kaluhaꞌan dunya boꞌ nasihatunbi lapal ahāp itu ni manusiyaꞌ kamemon. 16 Sai-sai amꞌnnal sampay pinandi tandaꞌ in sigām angandol ma aku,” yuk si Isa, “lappasan du saumul-umul. Saguwāꞌ sai-sai mbal amꞌnnal, pinatꞌnnaꞌan du iya hukuman. 17 Saga aꞌa angandol ma aku kabuwanan du kawasa maghinang saga hinang makainu-inu. Makapalaꞌan du sigām saga saitan sabab min kawasa ōnku. Makabissala isab sigām ma saga bahasa saddī halam bay kinataꞌuwan eꞌ sigām. 18 Bang sigām gantaꞌ makaꞌntanan sowa, atawa makainum ai-ai makamula, mbal du makainay ma sigām. Maka bang pinaꞌabut tangan sigām ni aꞌa taga-saki, kauliꞌan du saga aꞌa inān.”
Paꞌangkat si Isa Tudju ni Sulgaꞌ
19 Manjari itu, aubus paꞌin Panghūꞌ Isa bay magbissala maka saga mulidna, tabowa iya paꞌangkat tudju ni sulgaꞌ ati aningkōꞌ iya ma bihing Tuhan tampal ni kowan. 20 Jari lumꞌngngan na saga mulidna magnasihat lapal ahāp ma sabarang lahat. Ginapiꞌ sigām eꞌ Panghūꞌ Isa, binuwanan sigām barakat maghinang saga hinang kawasahan boꞌ supaya kinataꞌuwan in panduꞌ sigām asal bꞌnnal. Tammat