20
Kubul Halam Magaꞌa
1 Pagdaiꞌ llaw paꞌin ma llaw Ahad, ma halam giꞌ apoteꞌ sobangan, pehēꞌ ni kubul si Mariyam, dꞌnda min lahat Magdala. Taꞌndaꞌna in batu panambol lowang kubul bay na nilaꞌanan. 2 Sakali paragan iya pehēꞌ angahakaꞌan si Simun Petros maka mulid dakayuꞌ, ya kinalasahan asal eꞌ si Isa. Yuk si Mariyam ni sigā, “Halam na mainaꞌan Panghūꞌtam. Aniyaꞌ bay angalaꞌanan iya min deyom kubul maka mbal kataꞌuwan kami bang maingga pamatꞌnnaꞌan sigām ma iya.”
3 Manjari si Petros maka mulid dakayuꞌ magdaiꞌ-daiꞌ pehēꞌ ni kubul. 4 Paragan sigā karuwangan sagōꞌ alꞌkkas giꞌ mulid dakayuꞌ min si Petros, ati makarahū iya atꞌkka ni kubul. 5 Pakuruꞌ iya pasīb ni deyomna ati taꞌndaꞌna saga saput mainaꞌan, sagōꞌ halam iya pasōd. 6 Jari atꞌkka na si Petros min buliꞌanna ati patūy pasōd ni deyom kubul. Taꞌndaꞌna saput si Isa patꞌnnaꞌan di-na mainaꞌan, 7 maka taꞌndaꞌna turung-mukana palūn. Saddī katꞌnnaꞌanna, mbal magbeyaꞌ maka saput eꞌ. 8 Ma katapusanna, pasōd na isab mulid dakayuꞌ, ya bay makarahū pinaꞌan. Pagꞌndaꞌna saput, magtūy iya magkahagad na pasal si Isa. 9 (Aniyaꞌ asal bay tasulat ma deyom Kitab ma pasalan si Isa, in iya subay allum pabīng min kamatayna, sagōꞌ halam giꞌ bay tahati lapal Kitab inān eꞌ saga mulid eꞌ.) 10 Manjari amoleꞌ na sigā karuwangan.
Si Isa Panyataꞌ Magbaran ni si Mariyam
11 Sagōꞌ anꞌngge-nꞌngge na paꞌin si Mariyam mahēꞌ ma atag kubul eꞌ, maka eꞌna anangis. Hinabuna anangis, pakuruꞌ iya pasīb ni deyom kubul. 12 Aniyaꞌ taꞌndaꞌna duwa malaꞌikat magjuba poteꞌ aningkōꞌ mainaꞌan ma bay pamatꞌnnaꞌan mayat si Isa, dangan min bay kōkna, dangan min bay tapeꞌna. 13 Yuk saga malaꞌikat itu ni iya, “Arung, angay ka angkan anangis?”
Anambung si Mariyam, yukna, “Sabab waꞌi bay nilaꞌanan eꞌ sigām mayat Panghūꞌku, maka mbal kataꞌuwanku bang piꞌingga ya pamatꞌnnaꞌan sigām ma iya.”
14 Masi paꞌin ahꞌlling si Mariyam, palingiꞌ iya ati taꞌndaꞌna si Isa anꞌngge mainaꞌan. Sagōꞌ halam takilāna bang iya na si Isa. 15 Yuk si Isa ni iya, “Arung, angay ka anangis? Sai pihanu?”
Kinabāꞌ eꞌ si Mariyam in aꞌa inān tungguꞌ kabbun, angkan yukna ni iya, “Tuwan, bang kaꞌa bay amowa mayatna minnitu, hakaꞌin aku bang maingga pamatꞌnnaꞌannu iya boꞌ aku pehēꞌ angāꞌ iya pabīng.”
16 Yuk si Isa ni iya, “Mariyam.”
Magtūy iya paharap ni si Isa ati yukna ni iya ma buwat bahasa Hibrani, “Rabbuni!” Hatina ‘guru’.
17 Yuk si Isa ni iya, “Daꞌa aku balutin sabab halam giꞌ aku bay makapoleꞌ ni Mmaꞌku. Sagōꞌ pehēꞌ ka ni saga dauranakanku. Hakaꞌin sigām in aku song amoleꞌ ni Mmaꞌku maka Tuhanku, hatina ni Mmaꞌ sigām maka Tuhan sigām.” 18 Jari si Mariyam, dꞌnda min Magdala, pehēꞌ na angahakaꞌan saga mulid pasal kapangꞌndaꞌna ma Panghūꞌ Isa maka pasal bay pahꞌlling si Isa ma iya.
Magpaꞌndaꞌ si Isa ni Saga Mulidna
19 Sangom Ahad paꞌin, magtimuk na saga mulid si Isa ma deyom lumaꞌ. Saga lawangna bay sinularan pahogot sabab tināw sigām ma saga nakuraꞌ Yahudi. Sakali pinaꞌan si Isa anꞌngge ma tꞌngngaꞌ-tꞌngngaꞌ sigām ati ahꞌlling ni sigām, yukna, “Mura-murahan, bang paꞌin kam kaniyaꞌan kasannangan atay.” 20 Manjari paꞌndaꞌanna sigām saga limpaꞌ ma tanganna maka ma kīdna. Akōd toꞌongan saga mulidna inān pagꞌndaꞌ sigām ma Panghūꞌ.
21 Ahꞌlling si Isa pabīng, yukna ma sigām, “Mura-murahan, bang paꞌin kam kaniyaꞌan kasannangan atay. Sohoꞌta kam pehēꞌ ni dunya buwat bay kapanohoꞌ eꞌ Mmaꞌku ma aku.” 22 Puwas eꞌ anganapas si Isa ma sigām maka eꞌna ahꞌlling, yukna, “Taimaꞌunbi na Rū Sussi. 23 Bang ampunbi dusa aꞌa, niampun du dusa sigām eꞌ Tuhan. Bang mbal ampunbi, mbal du isab niampun eꞌ Tuhan.”
Si Isa maka si Tomas
24 Na, ma waktu katuwaꞌ si Isa ni saga mulidna inān halam bay mainaꞌan si Tomas. Si Tomas itu dakayuꞌ mulid si Isa min kasangpūꞌ maka duwa, ya niranglay Kꞌmbal. 25 Manjari nihakaꞌan iya eꞌ kaseheꞌan, yuk-i, “Bay taꞌndaꞌ kami in Panghūꞌ.”
Sagōꞌ yuk si Tomas, “Bang mbal tanyataꞌku maka tasadsadku limpaꞌ lansang ma pād tanganna, maka bang mbal tasadsadku bakat ma kīdna, mbal du aku magkahagad.”
26 Palabay paꞌin pitungꞌllaw minnēꞌ magtimuk na pabalik saga mulid si Isa ma deyom lumaꞌ, maka inaꞌan na isab si Tomas. Kasularan asal saga lawang eꞌ, sagōꞌ pinaꞌan sadja si Isa anꞌngge ma tꞌngngaꞌ-tꞌngngaꞌ sigām ati yukna, “Mura-murahan, bang paꞌin kam kaniyaꞌan kasannangan atay.” 27 Jari ahꞌlling iya ni si Tomas, yukna, “Ndaꞌun tanganku itu. Abutun maka tōng tangannu. Paꞌabutun tangannu piꞌitu ni kīdku. Daꞌa na ka magduwa-ruwa. Magkahagad na ka toꞌongan.”
28 Ahꞌlling si Tomas, yukna, “Ya Panghūꞌku maka Tuhanku!”
29 Yuk si Isa ni iya, “Yampa ka magkahagad bahāꞌ, pagka taꞌndaꞌnu na aku? Aheya kalasigan saga aꞌa magkahagad ma aku minsan aku halam taꞌndaꞌ eꞌ sigām.”
Pasal Jūd itu Angkan Sinulat
30 Aheka giꞌ saga hinang makainu-inu bay tahinang eꞌ si Isa ma pangꞌndaꞌ saga mulidna, saddī min saga hinang ya tasulat ma jūd itu. 31 Sagōꞌ angkan sinulat saga kahinangan itu ma deyom jūd itu, boꞌ supaya pamꞌnnalanbi si Isa in iya bꞌnnal Al-Masi, Anak Tuhan, maka supaya kam kaniyaꞌan kallum kakkal ni kasaumulan ma sabab pagkahagadbi ma iya.