24
Si Isa Allum Pabīng
1 Pagkꞌllat llaw Ahad boꞌ subu-subu toꞌongan, pehēꞌ saga dꞌnda heꞌ ni kubul amowa saga laksiꞌ bay sakap sigām. 2 Pagtꞌkka pehēꞌ, taꞌndaꞌ eꞌ sigām taplok batu waꞌi bay ginulungan min lowang kubul. 3 Pasōd sigām ni deyom sagōꞌ taꞌndaꞌ in mayat si Isa halam na mainaꞌan, 4 ati asasaw pikilan sigām ma sabab inaꞌan-i. Sakali aniyaꞌ anꞌngge ma bihing sigām duwangan lꞌlla, makasilaw sidda sꞌmmek sigā. 5 Sinōd tāw saga dꞌnda inaꞌan, angkan sigām hal patondok. Sagōꞌ yuk duwangan lꞌlla inān, “Angay pihabi aꞌa allum maitu ma deyom kakubulan saga aꞌa magpatayan? 6 Halam na maitu si Isa. Allum na iya pabalik. Entomunbi bay pahꞌllingna ma kaꞌam, waktu kamaheꞌna lagiꞌ ma lahat Jalil. 7 Yukna heꞌ, ‘In aku, Anak Manusiyaꞌ, sinōngan du pehēꞌ ni pangꞌntanan saga aꞌa dusahan boꞌ nilansang eꞌ sigām ni hāg pinapatay. Ma katꞌllu llawna, allum du aku pabīng.’ ”
8 Jari taentom eꞌ saga dꞌnda itu bay pahꞌlling si Isa heꞌ, 9 ati amoleꞌ sigām min kubul ni lumaꞌ. Nihaka eꞌ sigām saga pakaradjaꞌan itu kamemon ma saga mulid si Isa kasangpūꞌ maka ssa, maka ma saga mulidna kaseheꞌ. 10 Ya dꞌnda angahaka itu si Mariyam aꞌa min Magdala, maka si Joanna, maka si Mariyam inaꞌ si Yakub, maka saga dꞌnda saddī bay seheꞌ sigām. 11 Sagōꞌ mbal amꞌnnal saga aꞌa kawakilan ma haka saga dꞌnda inān sabab kinabāꞌ hal magligaw. 12 Sagōꞌ anꞌngge si Petros min baina boꞌ paragan ni kubul. Pagtꞌkkana pehēꞌ, pakuruꞌ iya pasīb, sagōꞌ halam aniyaꞌ taꞌndaꞌna ma deyom, luwal saga saput patꞌnnaꞌan di-na. Jari alaꞌan iya minnēꞌ maka eꞌna ainu-inu ma bay paniyaꞌ inān.
Ma Labayan Tudju ni Kauman Emmaus
13 Ma llaw inaꞌan-i aniyaꞌ duwangan mulid si Isa palꞌngngan tudju ni kalumaꞌan Emmaus, lawakna saga sangpūꞌ maka dda kilometro (atawa batu) min Awrusalam. 14 Magsuli-suli na paꞌin sigā pasal kamemon ya bahaꞌu bay patꞌkka inān. 15 Hinabu paꞌin sigā magsuli-suli, pasekot pinaꞌan si Isa boꞌ magdongan maka sigā. 16 Taꞌndaꞌ iya eꞌ sigā sagōꞌ halam takilā in iya si Isa.
17 Yukna ma sigā, “Ai pagsuli-sulihanbi ma palꞌngngananbi ilu?”
Pahoggaꞌ sigā magtūy, maka alaꞌat pamaihuꞌan sigā sabab asusa. 18 Jari anambung dangan inān, ya niōnan Kleyopas. “Alō!” yukna, “Hal du kaꞌa ma deyom daꞌira Awrusalam aꞌawam pasal pakaradjaꞌan ya bahaꞌu bay patꞌkka mainaꞌan siꞌ, sabab kinataꞌuwan na eꞌ aꞌa kamemon!”
19 “Angay? Pakaradjaꞌan ai?” yuk si Isa.
“Ya tahinang ma si Isa, aꞌa Nasaret,” yuk sigā. “Nabi asal iya, taga-kawasa ma pamissalana kamemon maka ma kahinanganna kamemon ma pangꞌndaꞌ Tuhan maka ma pangꞌndaꞌ manusiyaꞌ. 20 Bay iya niꞌndeꞌan ni gubnul eꞌ saga kaimaman kami alanga maka eꞌ saga aꞌa pagnakuraꞌan kami. Niꞌndeꞌan iya pehēꞌ supaya pinatꞌnnaꞌan hukuman ni kamatay, ati nilansang iya ni hāg boꞌ pinapatay. 21 Na, bay kami angasa-ngasa toꞌongan in iya itu dakayuꞌ-kayuꞌ pinabeyaꞌ eꞌ Tuhan amaluwas kami saga tubuꞌ si Israꞌil min kasigpitan. Saguwāꞌ halam dapat, sabab aniyaꞌ na tꞌllumbahangi min bay kapamapatay sigām ma iya. 22 Lāgi, aniyaꞌ isab saga dꞌnda seheꞌ kami bay amowahan kami haka makakuddat insiniꞌ. Daiꞌ llaw sīꞌ bay sigām pehēꞌ konoꞌ paluꞌaw ni kubul si Isa, 23 sagōꞌ halam na mainaꞌan mayatna. Jari pabalik sigām ni kamainaꞌanan kami. Yuk sigām aniyaꞌ saga malaꞌikat bay magpanyataꞌ ni sigām. Bay ahꞌlling konoꞌ malaꞌikat eꞌ in si Isa allum na. 24 Sakali aniyaꞌ saga seheꞌ kami bay anganyataꞌ pehēꞌ ni kubul ati taꞌndaꞌ eꞌ sigām buwat bay pangahaka saga karꞌndahan eꞌ. Sagōꞌ halam taꞌndaꞌ si Isa.”
25 Manjari ahꞌlling si Isa ni duwangan itu, yukna, “Ndūꞌ, babbal pahāp kaꞌam ilu! Angay halam kahagadbi kamemon bay pangabtang eꞌ kanabi-nabihan? 26 Sabab bang ma sigām in Al-Masi wajib subay makalabay kabinasahan dahū boꞌ yampa pinabangsa.” 27 Jari pinahati duwangan itu eꞌ si Isa pasal kamemon ya tasulat ma deyom Kitab ma sababna. Tinagnaꞌan eꞌna min kasulatan si Musa, sampay ni kasulatan kanabi-nabihan kamemon.
28 Makasekot paꞌin sigā ni kalumaꞌan ya papeheꞌan sigā, magbauꞌ-bauꞌ si Isa palanjal giꞌ. 29 Mandaꞌ iya tinaggahan eꞌ sigā, yuk-i, “Piꞌitu na ka ameyaꞌ ma kami sabab kohap na toꞌongan. Sōng na sangom.” Angkan pasōd si Isa boꞌ pahantiꞌ ma sigā. 30 Makatingkōꞌ paꞌin sigām magsalu, niāꞌ eꞌna tinapay ati niamuꞌan pagsukulan ni Tuhan. Puwas eꞌ pinagpōng-pōng eꞌna boꞌ yampa pamuwanna ma sigā. 31 Minnēꞌ pasawa pangꞌndaꞌ sigā ati takilā iya. Sagōꞌ alanyap iya magtūy. 32 Jari magsuli-suli sigā duwangan. “Angkan du kita landuꞌ kahōpan ma hꞌllingna ma palꞌngnganan eꞌ, pagpahatina ma kita pasal Kitab.”
33 Pabuhat sigā magtūy boꞌ pabīng ni Awrusalam. Pagtꞌkka sigā pehēꞌ, tabāk saga mulid si Isa kasangpūꞌ maka ssa magtimuk maka mulid kaseheꞌan. 34 Yuk sigām ma duwangan itu, “Allum na Panghūꞌtam pabalik! Allum iya toꞌongan! Bay iya patuwaꞌ ni si Simun!” 35 Manjari anuli-nuli isab duwangan itu pasal bay kalabayan sigā ma lān, maka pasal pakakilā sigā ma si Isa ma saltaꞌna magpōng-pōng tinapay.
Si Isa Magpaꞌndaꞌ na ma saga Mulidna
36 Hinabu paꞌin magsuli-suli duwangan eꞌ, pinaꞌan si Isa anꞌngge ma tꞌngngaꞌ-tꞌngngaꞌ sigām. Ahꞌlling iya, yukna, “Bang paꞌin kam kaniyaꞌan kasannangan.”
37 Takuddat sigām magtūy maka nileyaꞌ-leyaꞌ toꞌongan, sabab pangannal sigām in si Isa inān umagad. 38 Sagōꞌ yukna ma sigām, “Angay takꞌbbal deyom ataybi? Angay kam masi magduwa-ruwa? 39 Ndaꞌunbi tanganku maka tapeꞌku itu. Aku na koꞌ itu. Ntaninbi ba baranku itu boꞌ kataꞌuwanbi in aku itu nggaꞌi ka umagad. Sabab umagad itu halam aniyaꞌ baranna aponod. Taꞌndaꞌbi du aku, aniyaꞌ baranku.”
40 Buwattēꞌ pahꞌllingna ma sigām. Ati paꞌndaꞌanna tanganna maka tapeꞌna ma sigām. 41 Sagōꞌ masi sigām kahunitan magkahagad in inaꞌan bꞌnnal, sabab mamarahi sidda kakōgan maka kainu-inuhan sigām. Angkan yuk si Isa ma sigām, “Aniyaꞌ bahāꞌ maitu ai-ai takakan?” 42 Sinōngan iya dangkuriꞌ daing tinapa. 43 Niāꞌ eꞌna ati kinakan eꞌna ma pangꞌndaꞌ sigām. 44 Puwas eꞌ ahꞌlling iya, yukna, “Ya na koꞌ itu bay pahꞌllingku ma kaꞌam tagnaꞌ, waktu kapameyaꞌku giꞌ ma kaꞌam. Yukku tantu aniyaꞌ kamaujuran ma kamemon bay tasulat ma pasal aku, ya tasulat ma Kitab Tawrat maka ma Kanabi-nabihan, maka ma Jūd Kalangan. Ai-ai patꞌkka itu ma aku, ya na kamaujuran saga sulat sigām.”
45 Manjari pinasawa eꞌ si Isa pikilan sigām boꞌ supaya makahati ma lapal Kitab eꞌ. 46 Yukna ma sigām, “Ya na itu asal tasulat ma deyom Kitab: in Al-Masi subay pinananaman kabinasahan sampay pinapatay. Jari taꞌabut paꞌin katꞌllu llaw min kamatayna allum du iya pabīng. 47 Subay pinagnasihatan isab saga bangsa kamemon pasal kaꞌampunan dusa. Bang sigām magtaubat sampay angꞌbbahan dusa sigām, niampun sigām eꞌ Tuhan ma sabab Al-Masi. Subay tinagnaꞌan pagnasihat itu min Awrusalam. 48 Kaꞌam ya bay makaꞌndaꞌ ma ai-ai patꞌkka ma aku, jari kaꞌam ya subay amuwan saksiꞌ. 49 Pabeyaꞌanku kaꞌam ya bay panganjanjiꞌ Mmaꞌku Tuhan. Sagōꞌ daꞌa kam alaꞌan min daꞌira itu satꞌggol kam halam pinahōpan kawasa min sulgaꞌ.”
Paꞌangkat si Isa Tudju ni Sulgaꞌ
50 Jari binowa sigām eꞌ si Isa paluwas min Awrusalam sampay makaꞌabut na ni kauman Betani. Pagabut sigām pinaꞌan, pinatꞌngge eꞌ si Isa tanganna pangamuꞌna kahāpan ma sigām. 51 Pasaltaꞌ paꞌin iya angamuꞌ-ngamuꞌ ni Tuhan, alaꞌan iya min sigām ati tabowa paꞌangkat ni sulgaꞌ. 52 Amudji sigām ma iya mainaꞌan boꞌ yampa pabīng tudju ni Awrusalam. Landuꞌ aheya kakōgan sigām, 53 ati mainaꞌan na paꞌin sigām ananglitan Tuhan ma langgal pagkulbanan. Tammat