23
Binowa si Isa Paharap ni Gubnul Pilatu
1 Manjari magtꞌnggehan saga aꞌa palhimpunan kamemon ati binowa si Isa eꞌ sigām paharap ni gubnul Pilatu. 2 Mainaꞌan paꞌin, tinuntutan eꞌ sigām si Isa, yuk-i, “Taꞌabut kami aꞌa itu amowa bangsa kami anaggaꞌ ma parinta. Tasohoꞌna saga aꞌa subay daꞌa amayad sukay ni Sultan Mahatinggi. Maglaku-laku isab iya in iya Al-Masi, ya tapeneꞌ eꞌ Tuhan magsultan.”
3 Atilaw si Pilatu ma si Isa. “Kaꞌa ilu,” yukna, “sultan ka bahāꞌ ma bangsa Yahudi?”
Anambung si Isa, yukna, “Ya na yuknu ilu.”
4 Yuk si Pilatu ni saga kaimaman alanga maka ni kahekaꞌan aꞌa inān, “Halam aniyaꞌ tapihaku sababan pamatꞌnnaꞌanku iya hukuman.”
5 Saguwāꞌ angegot na paꞌin sigām, yuk-i, “Pinalengog eꞌna saga aꞌa ma kaluhaꞌan lahat Yahudiya sabab min pamanduꞌna. Bay tagnaꞌanna hinangna ma lahat Jalil, manjari itiyaꞌ na iya pasampay piꞌitu ni Awrusalam.”
Tinꞌkkahan si Isa ni Sultan Herod
6 Na, pagkale itu eꞌ si Pilatu, magtūy tilawna bang min lahat Jalil si Isa. 7 Makataꞌu paꞌin si Pilatu in si Isa asal min lahat pagsultanan si Herod, sinōꞌ iya tinꞌkkahan ni si Herod sabab inaꞌan iya ma Awrusalam pasaltaꞌ ma waktu inaꞌan-i. 8 Pagꞌndaꞌ si Herod ma si Isa, akōd iya toꞌongan sabab atꞌggol na bayaꞌna angꞌndaꞌ iya. Aheka bay takalena pasal si Isa angkan bilahi angꞌndaꞌ iya hinabuna maghinang hinang kawasahan. 9 Aheka panilaw si Herod ma si Isa, sagōꞌ mbal iya anambung. 10 Manjari pasekot pinaꞌan saga kaimaman alanga maka saga guru saraꞌ agama, ati akosog eꞌ sigām anuntutan si Isa. 11 Manjari pinagtunggīngan si Isa eꞌ si Herod maka saga sundaluna, nihalipulu isab eꞌ sigām. Pinasꞌmmekan iya maka juba landuꞌ alingkat boꞌ yampa pinabīng ni si Pilatu heꞌ. 12 Na, ya na inaꞌan llaw kapaghāp si Herod maka si Pilatu, sabab bay sigām magbanta tagnaꞌ.
Pinatꞌnnaꞌan si Isa Hukuman ni Kamatay
13 Manjari nilinganan eꞌ si Pilatu saga kaimaman alanga maka saga pagnakuraꞌan maka saga aꞌa kamemon. Sinōꞌ sigām patimuk ni iya. 14 Yukna ma sigām, “Bay bowabi aꞌa itu ni aku, pagka yukbi in iya amidjakan saga aꞌa anaggaꞌ ma parinta. Bay na iya pariksaꞌku maitu ma pangꞌndaꞌbi sagōꞌ halam aku makabāk dusa ma iya buwat panuntutbi. 15 Buwattēꞌ isab ma si Herod, angkan pabowana si Isa pabalik piꞌitu. Atampal koꞌ itu, halam aniyaꞌ laꞌat bay tahinang eꞌ aꞌa itu pamatꞌnnaꞌan iya hukuman ni kamatay. 16 Angkan sōꞌku iya niraplosan sadja boꞌ yampa pinalꞌppa.”
[ 17 Angkan buwattēꞌ pahꞌlling si Pilatu sabab ya kabiyaksahanna kahabaꞌ tahun, bang maghinang saga Yahudi ma Hinang Paglakad, subay iya amalꞌppa dakayuꞌ pilisu.]
18 Makakale paꞌin saga katimukan aꞌa ma lling si Pilatu, magtūy sigām magpangolang kamemon. Yuk sigām, “Papatayun aꞌa ilu! Si Barabbas ya kabayaꞌan kami pinalꞌppa.” 19 Na, si Barabbas itu bay pinakalabusu ma sabab hiluhalaꞌ bay tahinangna ma daꞌira Awrusalam, maka ma sabab hinangna amonoꞌ.
20 Jari amissala pabalik si Pilatu ni saga aꞌa heꞌ, sabab bilahi amalꞌppa si Isa. 21 Sagōꞌ magpangolang sidda sigām, yuk-i, “Lansangun iya ni hāg! Lansangun iya ni hāg!”
22 Ahꞌlling giꞌ si Pilatu, kamintꞌlluna na. “Angay?” yukna. “Ai bay hinangna alaꞌat? Halam aniyaꞌ tabākku sababan pamapatay iya. Sōꞌku sadja iya niraplosan boꞌ yampa pinalꞌppa.”
23 Sagōꞌ angabut-ngabut sigām angolang pakosog in si Isa subay nilansang ni hāg. Jari hal magpabeyaꞌ laꞌa si Pilatu, 24 angkan patꞌnnaꞌna hukuman ma si Isa buwat pangamuꞌ sigām. 25 Pinalꞌppa eꞌna aꞌa ya niamuꞌ eꞌ sigām pinaluwas, aꞌa bay takalabusu ma sabab panaggaꞌna ma parinta maka ma sabab pamonoꞌna. Sagōꞌ tinukbalan si Isa ni sigām boꞌ tahinang buwat kabayaꞌan sigām.
Nilansang si Isa ni Hāg
26 Manjari itu binowa si Isa eꞌ saga sundalu paluwas minnēꞌ. Pasaltaꞌ, aniyaꞌ aꞌa talanggal eꞌ sigām palūd min deya tudju ni Awrusalam. Ōnna si Simun, aꞌa min lahat Kirini. Minandahan iya eꞌ saga sundalu, pinatanggung ma iya hāg ya song pangalansangan si Isa. Sinōꞌ iya ananggung min buliꞌan si Isa.
27 Aheka toꞌongan saga aꞌa paturul ma si Isa, maka aniyaꞌ isab saga dꞌnda angolang maka magtangis ma sababna. 28 Palingiꞌ si Isa angꞌndaꞌ ma sigām ati yukna, “Kaꞌam saga dꞌnda Awrusalam, daꞌa aku panangisanbi. Baranbi maka panganakbi ya subay panangisinbi. 29 Sabab aniyaꞌ llaw atꞌkka ma sinosōng in kaꞌam amissala du, ‘Ahāp sukud saga dꞌnda halam bay makapangiram, ya halam bay makaꞌanak maka halam bay makaparuruꞌ ondeꞌ.’ 30 Ya na koꞌ inān waktu kapanuknaꞌ manusiyaꞌ di-sigām, yuk-i, ‘Bang paꞌin paligid ni aku saga būd itu! Bang paꞌin aku katambunan eꞌ saga kabūd-būran!’ ” 31 Ahꞌlling giꞌ si Isa, yukna, “Bang makaꞌaseꞌ-aseꞌ kahālanbi ma buwattinaꞌan, akalap lagiꞌ ma waktu sinōng inān. Buwat sapantun poꞌon kayu, bang tatunuꞌ ma masi lagiꞌ allum, lubaꞌ-lagiꞌna bang atohoꞌ na.”
32 Aniyaꞌ giꞌ duwangan aꞌa saddī min si Isa binowa eꞌ sigām pinapatay, aꞌa bay makalanggal saraꞌ. 33 Jari pagtꞌkka sigām ni lahat niōnan “Peyaꞌ-peyaꞌ Kōk”, na nilansang si Isa eꞌ sigām ni hāg inān. Nilansang isab saga aꞌa makalanggal saraꞌ ma hāg sigām. Dakayuꞌ inān pinatꞌngge ma bihing si Isa kowan maka dakayuꞌ ma bihingna gibang. 34 Anabbut si Isa ni Tuhan. “O Mmaꞌ,” yukna, “ampunun saga aꞌa angalansang aku itu, sabab mbal tahati eꞌ sigām bang ai hinang sigām.”
Maglegot saga sundalu, pinagtokoran eꞌ sigām saga sꞌmmek si Isa bang ma sai dapuna. 35 Magtꞌnggehan mainaꞌan saga aꞌa angꞌndaꞌ-ngꞌndaꞌ ma si Isa, maka pinagudjuꞌ iya eꞌ saga pagnakuraꞌan bangsa Yahudi. Yuk sigām, “Aꞌa itu, makalappas aꞌa saddī. Subay iya angalappas di-na bang sabꞌnnal-bꞌnnal iya Al-Masi, ya tapeneꞌ eꞌ Tuhan magsultan!”
36 Pinagtunggīng isab iya eꞌ saga sundalu. Pasekot sigām ni iya anōngan binu alꞌssom pamainum iya. 37 Yuk sigām, “Bang ka sabꞌnnal-bꞌnnal sultan saga Yahudi, angalappas ka di-nu!”
38 Maka aniyaꞌ sulat bay pinatꞌnnaꞌ ma hāg min diyataꞌ kōkna, yuk-i, “SULTAN BANGSA YAHUDI.”
39 Pinamūng-mūngan isab si Isa eꞌ dakayuꞌ aꞌa langgal saraꞌ bay nilansang inān. Yukna, “Kaꞌa ya Al-Masi bahāꞌ? Angalappas ka di-nu, boꞌ kami isab bowahun.”
40 Sagōꞌ pinahꞌllingan iya eꞌ aꞌa langgal saraꞌ dakayuꞌ, yukna, “Angay? Halam aniyaꞌ tāwnu ma Tuhan? Saliꞌ-saliꞌ hukuman ma kitam tꞌllungan. 41 Sagōꞌ kita duwangan itu, wajib kita subay pinapatay buwattitu sabab ya na tungbas saga kahinanganta. Sagōꞌ aꞌa itu, halam aniyaꞌ laꞌat bay tahinangna.” 42 Jari yukna ni si Isa, “Isa, entomun aku bang taꞌabut na waktu kapagparintanu.”
43 Yuk si Isa ma iya, “Bꞌnnal ya pangahakaku itu ma kaꞌa, llaw itu du magbeyaꞌ kita ma lahat Tuhan.”
Kamatay si Isa
44 Jari itu, augtu paꞌin llaw, angalendom mata llaw ati taluwaꞌ lendom kaluhaꞌan lahat eꞌ sampay ni lisag tꞌllu kohap. 45 Maka ageseꞌ duwa in kultina ya pangagpang ma deyom langgal pagkulbanan inān. 46 Manjari angolang si Isa pakosog, yukna, “O Mmaꞌ, sōnganku na nyawaku ni komkomannu.” Aubus paꞌin pahꞌllingna itu, magtūy abꞌkkat napasna.
47 Pagꞌndaꞌ kapitan sundalu ma pakaradjaꞌan itu, sanglitanna Tuhan. Yukna, “Bꞌnnal aꞌa itu ahāp asal addatna.” 48 Sampay saga aꞌa magtimuk mainaꞌan, pagꞌndaꞌ sigām ma bay paniyaꞌ inān, magpamoleꞌ sigām anꞌppak daggaha sigām sabab kaheya susa sigām. 49 Inaꞌan isab magpanꞌngge min katāhan saga bagay si Isa kamemon sampay saga dꞌnda bay ameyaꞌ paumpig ma iya min lahat Jalil lagiꞌ. Angꞌndaꞌ-ngꞌndaꞌ sigām ma pakaradjaꞌan itu kamemon.
Pagkubul ma si Isa
50-51 Na, aniyaꞌ aꞌa mainaꞌan niōnan si Yusup, aꞌa min kalumaꞌan Arimati ya ma lahat Yahudiya. Aꞌa abontol asal iya, ahāp addat-tabiꞌatna. Atuyuꞌ iya angagad ma waktu pamatꞌnnaꞌ parinta Tuhan ma manusiyaꞌ. Dakayuꞌ iya pagmattoꞌahan, sagōꞌ halam iya bay pauyun ma kagaraꞌan maka kahinangan pagkahina pamapatay ma si Isa. 52 Jari pehēꞌ si Yusup itu paꞌalop ni si Pilatu angamuꞌ mayat si Isa. 53 Pinareyoꞌ eꞌna min hāg ati sinaput eꞌna boꞌ yampa patꞌnnaꞌna ma deyom pagkubulan bay kinehean ma deyom batu lakit. Bahaꞌu asal kubul inān, halam lagiꞌ bay kapangubulan. 54 Kohap Jumaꞌat na ma buwattēꞌ, song llaw Sabtuꞌ, araiꞌ na pasꞌddop llaw.
55 Bay ameyaꞌ isab ma si Yusup saga dꞌnda bay paumpig ma si Isa min lahat Jalil lagiꞌ, ati taꞌndaꞌ eꞌ sigām kubul maka buwattingga eꞌ si Yusup amatꞌnnaꞌ mayat si Isa. 56 Jari amoleꞌ na sigām anakap saga laksiꞌ maka nsꞌllan pahamut pamahilalaꞌ sigām ma mayatna.
Taꞌabut paꞌin llaw Sabtuꞌ, pahali na sigām buwat panohoꞌan saraꞌ agama.