19
1 Manjari itu magpanohoꞌan si Pilatu in si Isa subay niraplosan. 2 Puwas eꞌ aniyaꞌ bahan itingan tinabid eꞌ saga sundalu, nihinang saliꞌ luwa korona pamaporong kōk si Isa. Pinajubahan isab iya eꞌ sigām maka juba taluk. 3 Patampal sigām ni iya magbalik-balik boꞌ magtunggīng. Yuk pagtunggīng sigām, “Mahaldikaꞌ! Mahaldikaꞌ! Sultan Yahudi!” Jari pinagsampak iya eꞌ sigām ma baihuꞌna.
4 Paluwas pabīng si Pilatu amissalahan saga aꞌa magtimukan inān, yukna, “Ndaꞌunbi. Itiyaꞌ si Isa paluwasku ni kaꞌam boꞌ supaya kataꞌuwanbi halam aniyaꞌ tabākku sababanna pamatꞌnnaꞌanku iya hukuman.” 5 Jari paluwas isab si Isa. Masi giꞌ bahan itingan paporong ma kōkna, maka masi giꞌ jubana taluk. Yuk si Pilatu ni saga aꞌa, “Ndaꞌunbi. Ya na itu aꞌa!”
6 Pagꞌndaꞌ paꞌin saga imam alanga maka saga jaga langgal ma si Isa, magtūy sigām magpangolang, yuk-i, “Papatayun iya! Lansangun iya ni hāg!”
Yuk si Pilatu ni sigām, “Bayaꞌ-bayaꞌbi na! Ngāꞌunbi boꞌ kaꞌam na angalansang iya ni hāg. Sagōꞌ bang ma aku, halam aniyaꞌ sababanna tabākku pamatꞌnnaꞌan iya hukuman ni kamatay.”
7 Yuk saga Yahudi inān ni iya, “Aniyaꞌ saraꞌ kami, yukna, aꞌa ilu subay pinapatay sabab magpinaꞌin iya in iya konoꞌ Anak Tuhan.”
8 Makakale paꞌin si Pilatu ma lling saga aꞌa itu, gom paꞌin pasōng gawana. 9 Binowa eꞌna si Isa pasōd pabalik ni deyom astanaꞌ boꞌ tilawna, yukna, “Minningga ka?” Sagōꞌ halam anambung si Isa. 10 Yuk si Pilatu ni iya, “Angay? Mbal aku sambungannu bahāꞌ? Kalu mbal kataꞌuwannu aniyaꞌ kapatutku amaluhaya kaꞌa. Maka aniyaꞌ kapatutku angalansang kaꞌa ni hāg boꞌ ka pinapatay.”
11 Anambung si Isa, yukna, “Bang nggaꞌi ka ya Tuhan amuwanan kaꞌa kapatut, halam aniyaꞌ kapatutnu amapatay aku. Angkanna aꞌa bay anukbalan aku ni kaꞌa aheya giꞌ dusana min dusanu.”
12 Puwas eꞌ amiha lawang si Pilatu pamaluhayana ma si Isa. Sagōꞌ magpangolang na paꞌin baꞌanan Yahudi heꞌ, yuk sigām, “Bang kaꞌa amaluhaya aꞌa ilu, nggaꞌi na ka bagay Sultan Mahatinggi. Sai-sai magsultan-sultan di-na magbanta du maka Sultan Mahatinggi.”
13 Pagkale pamissala saga aꞌa inān eꞌ si Pilatu, binowa eꞌna si Isa paluwas. Ati aningkōꞌ si Pilatu ma pangahukuman, ya ma halaman niōnan Halaman Batu. (Gabbata ōnna bang ma bahasa Hibrani.) 14 Llaw pagsakap jamu, ma Hinang Paglakad koꞌ inān, maka song ugtu llaw na. Jari pagtingkōꞌ si Pilatu, yukna ni saga aꞌa, “Ilu na Sultanbi!”
15 Sagōꞌ magpangolang sadja saga aꞌa inān, yuk sigām, “Laꞌanin iya! Laꞌanin! Lansangun iya ni hāg!”
Tinilaw sigām eꞌ si Pilatu, yukna, “Papatayku bahāꞌ sultanbi?”
Anambung saga imam alanga, yuk-i, “Halam aniyaꞌ sultan kami, luwal Sultan Mahatinggi ma Rōm!”
16 Ya katapusanna, niꞌndeꞌan si Isa eꞌ si Pilatu pehēꞌ ni kaimaman eꞌ, supaya iya pinalansang ni hāg pinapatay.
Si Isa nilansang ni hāg
Manjari binowa na si Isa eꞌ saga sundalu. 17 Paluwas iya min daꞌira maka eꞌna ananggung hāg ya song pangalansangan iya. Patudju iya ni lugal niōnan Peyaꞌ-peyaꞌ Kōk. (Golgota ōnna bang ma bahasa Hibrani.) 18 Pagmahēꞌ paꞌin, nilansang si Isa ni hāg eꞌ saga sundalu ati pinatꞌngge hāg eꞌ. Aniyaꞌ isab duwangan lꞌlla nilansang ni hāg sigā min bihing si Isa karuwambilaꞌ. 19 Aniyaꞌ sulat pamataꞌu bay sinulat eꞌ gubnul Pilatu, sinōꞌ pinehēꞌ ni diyataꞌ hāg si Isa. Yuk sulat eꞌ, “SI ISA AꞌA NASARET, SULTAN BANGSA YAHUDI.” 20 Aheka aꞌa bay makabassa sulat itu sabab asekot ni Awrusalam lahat pamapatayan si Isa inān, maka sulat itu bay tasulat ma bahasa Hibrani maka ma bahasa Rōm maka ma bahasa Girīk. 21 Mbal bilahi saga imam alanga ma bay tasulat eꞌ sultan, angkan yuk sigām pehēꞌ ni si Pilatu, “Daꞌa sulatun ‘Sultan bangsa Yahudi.’ Sulatun, ‘Aꞌa magpinaꞌin in iya sultan Yahudi.’ ”
22 Anambung si Pilatu, yukna, “Bay na tasulat sulatku.”
23 Talansang paꞌin si Isa ni hāg eꞌ saga sundalu, ningāꞌ eꞌ sigām sꞌmmekna ati binahagiꞌ mpat pamahagiꞌ sigām dangan maka dangan. Aniyaꞌ giꞌ dakayuꞌ badjuꞌ si Isa dalos hinanganna. 24 Magsuli-suli saga sundalu, yuk-i, “Daꞌa geseꞌta badjuꞌ itu. Ahāp lagiꞌ pagtokoranta boꞌ kataꞌuwanta bang sai katꞌnnaꞌanna.” Pagka buwattēꞌ hinang saga sundalu inān aniyaꞌ kamaksuran ma bay tasulat ma deyom Kitab, ya yuk-i,
“Kapagbahagiꞌan sꞌmmekku eꞌ saga aꞌa.
Kapagtokoran eꞌ sigām badjuꞌku bang sai katꞌnnaꞌanna.”
25 Na, inaꞌ si Isa, maka danakan inaꞌna, maka si Mariyam hꞌnda si Klopas, maka si Mariyam min lahat Magdala, inaꞌan magtꞌnggehan ma bihing hāg bay pangalansangan si Isa. 26 Taꞌndaꞌ eꞌ si Isa inaꞌna maka dakayuꞌ mulidna ya kalasahanna anꞌngge mainaꞌan, ati yukna ni inaꞌna, “Inaꞌ, anaknu na mulid ilu.” 27 Yukna isab ni mulidna inān, “Ilu na inaꞌnu.” Angkanna, puwas min llaw inaꞌan, inaꞌ si Isa bay binowa eꞌ mulid inān paokom ma iya.
Kamatay si Isa
28 Manjari itu kinataꞌuwan eꞌ si Isa ajukup na kamemon bay pamahinang ma iya. Sakali yukna, “Patay boheꞌ aku.” Buwattēꞌ pahꞌllingna boꞌ aniyaꞌ kamaksuran ma bay tasulat ma deyom Kitab. 29 Aniyaꞌ mainaꞌan dakayuꞌ poga-poga isihan binu alꞌssom, angkan saga sundalu bay angalꞌggoman lꞌppus ni deyom binu heꞌ. Pinasagnat eꞌ sigām ni tōng kayu-kayu boꞌ yampa pinaꞌabut pehēꞌ ni bowaꞌ si Isa. 30 Makasꞌssop paꞌin si Isa ma binu, yukna, “Atalus na hinangku.” Jari patoyok kōkna maka abꞌkkat napasna.
31 Na, pagka llaw Jumaꞌat na, angamuꞌ saga nakuraꞌ Yahudi pehēꞌ ni si Pilatu, sinōꞌ pinōngan tapeꞌ saga aꞌa tꞌllungan bay nilansang ni hāg inān, boꞌ supaya alꞌkkas amatay, jari tapareyoꞌ min hāg ma halam giꞌ taꞌabut llaw Sabtuꞌ. Mbal bilahi saga nakuraꞌ bang patay inān paddas pinasagaran ma hāg sampay ma llaw Sabtuꞌ, sabab ya na llaw landuꞌ ahalgaꞌ ma bogbog sigām. 32 Angkan pehēꞌ saga sundalu amōngan tapeꞌ saga aꞌa duwangan bay nilansang ni hāg sambeyaꞌ maka si Isa, ubus tapeꞌ dangan boꞌ dangan. 33 Sagōꞌ makaꞌabut paꞌin sigām ni si Isa, taꞌndaꞌ eꞌ sigām in iya amatay na asal, angkan halam kalaꞌusan pinōngan tapeꞌna. 34 Gom paꞌin nihiyak kīdna maka budjak eꞌ dakayuꞌ sundalu inān ati paluwas magtūy lahaꞌ maka boheꞌ. 35 Aꞌa bay makanyataꞌ ya tahinang itu ma si Isa, sinulat eꞌna saga pakaradjaꞌan itu supaya kam magkahagad isab. Kapangandolan panaksiꞌ aꞌa anulat itu, maka kataꞌuwanna bꞌnnal asal bissalana. 36 Patꞌkka buwattitu supaya aniyaꞌ kamaksuran ma bay tasulat ma deyom Kitab, ya yuk-i, “Halam aniyaꞌ toꞌolangna apōng minsan dakayuꞌ.” 37 Maka aniyaꞌ giꞌ ayat Kitab dakayuꞌ, ya yuk-i, “Angꞌndaꞌ du sigām ma aꞌa bay tahiyak eꞌ sigām.”
Pagkubul ma si Isa
38 Puwas eꞌ aniyaꞌ dakayuꞌ aꞌa min lahat Arimati pehēꞌ ni si Pilatu. Ōnna si Yusup, mulid si Isa bay maglimbung pasal kapagmulidna sabab tināw nilaꞌat eꞌ saga nakuraꞌ Yahudi. Pehēꞌ si Yusup itu ni si Pilatu amaꞌid angāꞌ mayat si Isa. Pinatugutan iya eꞌ si Pilatu angkan iya pinaꞌan amareyoꞌ mayat si Isa min hāg. 39 Seheꞌna si Nikudimas, ya bay pehēꞌ ni si Isa waktu sangom. Si Nikudimas itu amowa saga limampūꞌ kilu laksiꞌ, mira maka alosa, pinaglamugay. 40 Manjari niāꞌ mayat si Isa eꞌ saga aꞌa duwangan itu boꞌ yampa sinaput eꞌ sigā maka kuku poteꞌ pinabeyaꞌan laksiꞌ, buwat addat bangsa Yahudi bang amahilalaꞌ mayat. 41 Aniyaꞌ kabbun ma atag bay pamapatayan si Isa, maka aniyaꞌ ma deyom kabbun inān pangubulan bahaꞌu bay kinehean ma deyom batu. Halam giꞌ aniyaꞌ bay takubul mainaꞌan. 42 Jari itu, pagka song sangom Sabtuꞌ na, kinubul mayat si Isa mainaꞌan sabab asekot du pangubulan inān ni bay pamapatayan iya.