28
Kallum si Isa Pabīng min Kamatay
1 Pagka palabay na llaw Sabtuꞌ, boꞌ pagkꞌllat llaw Ahad, inaꞌan si Mariyam aꞌa Magdala maka dakayuꞌ isayna pehēꞌ angꞌndaꞌ kubul si Isa. 2 Saruꞌun-duꞌun ajogjog lahat eꞌ linug akosog. Aniyaꞌ dakayuꞌ malaꞌikat min Tuhan bay pareyoꞌ min sulgaꞌ anganggulungan taplok batu min lowang kubul boꞌ yampa aningkōꞌ ma diyataꞌ batu heꞌ. 3 Asahaya pangluwahan malaꞌikat inān buwat sawa lāt, maka sꞌmmekna apoteꞌ toꞌongan. 4 Saga sundalu anganjaga inān bay sinōd tāw angkan magpamidpid. Saliꞌ sigām aꞌa amatay, halam makasayu.
5 Manjari amissala malaꞌikat ni duwangan dꞌnda heꞌ. “Daꞌa kam tināw,” yukna. “Kataꞌuwanku in kaꞌam amiha si Isa, ya bay pinapatay ma hāg. 6 Halam na iya maitu sabab allum na pabīng, buwat bay llingna. Piꞌitu kam angꞌndaꞌ ni bay palegehanna. 7 Puwas eꞌ, pasaꞌut kam pehēꞌ ni saga mulidna amowahan sigām haka in iya pinakallum min kamatayna. Parahū du iya min sigām ni lahat Jalil, ati mainaꞌan sigām angꞌndaꞌ iya. Entomunbi bay pangahakaku itu ma kaꞌam.”
8 Magtūy sakadjap sadja sigām alaꞌan min kubul. Tināw sigām dambilaꞌ, kinōgan isab dambilaꞌ. Paragan sigām pehēꞌ angahaka ni saga mulid si Isa. 9 Ma labayan paꞌin, saruꞌun-duꞌun du patuwaꞌ si Isa amāk sigām. “Kaꞌam sa ilu,” yukna. Paꞌabut sigām ni iya amalutan tapeꞌna maka eꞌ sigām amudji iya. 10 Yuk si Isa, “Daꞌa kam tināw. Pehēꞌ na kam angahakaꞌan saga danakanku inān in sigām subay pehēꞌ ni lahat Jalil. Mahēꞌ sigām angꞌndaꞌ aku.”
Pangahaka saga Jaga ma Kaimaman
11 Sabu paꞌin duwangan dꞌnda inān palanjal ni palꞌngnganan sigām, aniyaꞌ pabalik ni deyom daꞌira saga sundalu kaseheꞌ bay anganjagahan kubul. Kahakaꞌan eꞌ sigām kaimaman alanga pasal bay pakaradjaꞌan ma pagkubulan eꞌ. 12 Manjari magtimuk kaimaman maka saga pagmattoꞌahan maggaraꞌ. Ya paggaraꞌ sigām in saga sundalu inān subay binuwanan sīn aheka. 13 Yuk saga imam eꞌ, “Hakaꞌinbi saga aꞌa in kamuliran si Isa bay pehēꞌ waktu sangom anangkaw mayatna hinabubi bay atuli. 14 Sagōꞌ daꞌa kam asusa bang itu gantaꞌ tataꞌu eꞌ gubnul. Binissalahan iya pahāp boꞌ supaya kam mbal pinagamahan.” 15 Manjari niāꞌ sīn inān eꞌ saga sundalu ati pangahaka eꞌ sigām buwat bay panohoꞌan kaimaman eꞌ. Sampay ni kabuwattituhan ya na heꞌ hunub-hunub pinasaplag ma deyom bangsa Yahudi, hatina in mayat si Isa bay tinangkaw eꞌ saga mulidna.
Panohoꞌan Mbal Kaliyuhan
16 Manjari in kasangpūꞌ maka dda mulid si Isa waꞌi ni lahat Jalil, patukad ni būd ya bay pangahaka si Isa ma sigām. 17 Pagꞌndaꞌ sigām ma si Isa, magtūy sigām amudji iya, sagōꞌ aniyaꞌ sigām kaseheꞌan magduwa-ruwa ma deyom atay sigām bang inaꞌan-i bꞌnnal si Isa. 18 Pasekot si Isa ni sigām, yukna, “Bay na aku kabuwanan kawasa magbayaꞌ ma dunya sampay ma sulgaꞌ. 19 Angkan kam sohoꞌku pehēꞌ ni sabarang bangsa boꞌ sigām bowahunbi pamulid ma aku. Pandihunbi sigām min ōn Tuhan Mmaꞌ, maka min ōn Anak, maka min ōn Rūa Sussi. 20 Panduꞌinbi sigām subay ameyaꞌ ma kamemon bay panohoꞌanku kaꞌam. Maka itu entomunbi pahāp, pagapiꞌ du aku ma kaꞌam sampay niabutan masa.” Tammat