21
Magpaꞌndaꞌ si Isa ni Pituꞌ Mulidna
1 Puwas daka pilangꞌllaw minnēꞌ magpaꞌndaꞌ si Isa pabīng ni saga mulidna mahēꞌ ma bihing danaw Tibiri. Buwattitu ya katuwaꞌna ni sigām: 2 Si Simun Petros bay mainaꞌan magbeyaꞌ maka si Tomas ya niranglay Kꞌmbal, maka si Natanael ya min kauman Kana ma lahat Jalil. Inaꞌan isab magbeyaꞌ saga anak si Sibidi, maka duwangan mulid si Isa saddī. 3 Na, ahꞌlling si Simun Petros, yukna. “Kaut giꞌ aku amokot.”
“Ameyaꞌ kami,” yuk kaseheꞌan eꞌ. Jari paruwaꞌ sigām ni bayanan boꞌ pauntas kaut, sagōꞌ halam aniyaꞌ taꞌāꞌ sigām sampay ni karaiꞌ-llawan.
4 Baya-baya paꞌin llaw, inaꞌan si Isa anꞌngge ma bihing tampe sagōꞌ halam iya takilā eꞌ saga mulidna. 5 Angalingan iya pehēꞌ ni sigām, yukna, “Owaꞌ saga bagay, halam bahāꞌ aniyaꞌ taꞌāꞌbi?”
“Halam,” yuk sigām.
6 “Na,” yuk si Isa, “hūgunbi pokot min bihingbi kowan ilu ati makaꞌāꞌ kam.” Paghūg paꞌin, mbal sigām makahellaꞌ pokot ma sabab kaheka daing.
7 Manjari ahꞌlling dakayuꞌ mulid ya kinalasahan eꞌ si Isa. Yukna ni si Petros, “Panghūꞌta koꞌ inān!” Makakale paꞌin si Simun Petros itu, magtūy sulugna pabīng badjuꞌ bay urusanna, boꞌ pakuppa ni danaw tudju pehēꞌ ni si Isa. 8 Saga mulid kaseheꞌan paturul min bayanan sigām, maka eꞌ sigām angangguyud pokot apꞌnnoꞌ eꞌ daing. Asekot asal sigām ni bihing, aniyaꞌ saga limampūꞌ dꞌppa lawakna. 9 Makaruwaꞌi paꞌin sigām ni bihing, aniyaꞌ taꞌndaꞌ eꞌ sigām api maka saga daing patapa ma bagana, maka aniyaꞌ isab saga tinapay.
10 Yuk si Isa ni sigām, “Bowahunbi piꞌitu saga daing min bay taꞌāꞌbi ilu.”
11 Angkan pehēꞌ si Simun Petros paruwaꞌ pabīng ni bayanan sigām boꞌ guyudna pokot tudju kaleya. Apꞌnnoꞌ pokot inān eꞌ daing aꞌaslag, dahatus maka limampūꞌ maka tꞌllu hekana. Sagōꞌ pokot eꞌ halam ageseꞌ minsan sōdna aheka makalanduꞌ. 12 Yuk si Isa ni sigām, “Daiꞌ kam amangan.” Halam aniyaꞌ ma saga mulidna inān makatawakkal atilaw iya bang sai iya, sabab kinataꞌuwan eꞌ sigām in iya Panghūꞌ sigām. 13 Jari pehēꞌ si Isa angāꞌ tinapay boꞌ pamuwanna ni sigām, damikiyanna saga daing. 14 Kamintꞌlluna na itu magpaꞌndaꞌ si Isa ni saga mulidna damuli paꞌin min llaw bay pamakallum iya min kamatay.
Si Isa maka si Petros
15 Aubus paꞌin eꞌ sigām amangan, amissala si Isa ni si Simun Petros. “Simun anak si Yahiya,” yukna, “lasanu ni aku, alabi giꞌ bahāꞌ min saga seheꞌnu itu?”
“Ahoꞌ Panghūꞌ,” yuk si Petros, “kataꞌuwannu in aku alasa ma kaꞌa.”
Yuk si Isa, “Na, upiksaꞌun saga bili-biliku.” 16 Atilaw si Isa pabīng, yukna, “Simun anak si Yahiya, kalasahannu aku bahāꞌ?”
“Ahoꞌ, Panghūꞌ,” yukna, “kataꞌuwannu du in aku alasa du ma kaꞌa.”
Yuk si Isa, “Na, ipatun saga bili-biliku.” 17 Kamintꞌlluna na patilaw si Isa ma si Petros. “Simun anak si Yahiya,” yukna, “kalasahannu bahāꞌ aku?”
Asusa na si Petros sabab pinamintꞌllu giꞌ eꞌ si Isa patilawna ma iya, ya yukna, “Alasa ka bahāꞌ ma aku.” Angkan anambung si Petros ma si Isa, yukna, “Panghūꞌ, kataꞌuwannu kamemon. Kataꞌuwannu in aku alasa du ma kaꞌa.”
Yuk si Isa ma iya, “Na, upiksaꞌun saga bili-biliku. 18 Bꞌnnal ya pangahakaku itu ma kaꞌa,” yuk si Isa, “ma kabataꞌnu lagiꞌ bay ka amasꞌmmekan di-nu. Bay ka lumꞌngngan piꞌingga-piꞌingga kabayaꞌannu. Sagōꞌ bang ka atoꞌa na pahꞌnnatnu du tangannu ati aꞌa saddī ya angengkotan kaꞌa boꞌ ka binowa ni papehēꞌan ya nggaꞌi ka kabayaꞌannu.” 19 Binissala itu eꞌ si Isa pamataꞌuna bang ai bowahan kamatay si Petros ma waktu sinōng, kamatay pangamahaldikaꞌna ma Tuhan. Puwas eꞌ yuk si Isa ma si Petros, “Ameyaꞌ sadja ka ma aku.”
20 Jari palingiꞌ si Petros ati taꞌndaꞌna paturul ma iya mulid dakayuꞌ, ya kinalasahan eꞌ si Isa. Ya na itu mulid bay paliꞌid ni si Isa ma waktu kapagjamu sigām, maka bay atilaw iya, ya yukna, “Tuwan Panghūꞌ, sai bahāꞌ song anōngan kaꞌa ni saga bantanu?” 21 Pagꞌndaꞌ si Petros ni mulid dakayuꞌ itu, yukna ni si Isa, “Panghūꞌ, buwattingga aꞌa inaꞌan-i?”
22 Yuk si Isa ni si Petros, “Bang kabayaꞌanku aꞌa inān subay allum sampay ni kabīngku piꞌitu, daꞌa na kasusahun. Ameyaꞌ sadja ka ma aku.” 23 Jari tinuhuma eꞌ saga bebeyaꞌan si Isa pasal mulidna dakayuꞌ itu mbal magkamatay. Sagōꞌ halam si Isa bay amissala in aꞌa inān mbal du amatay. Ya sadja yukna, bang saupama kabayaꞌanna mulidna inān subay allum sampay kabīngna ni dunya, nggaꞌi ka kasusahan si Petros.
24 Ya mulid pinagsuli-suli itu, ya na aꞌa angahaka pasal saga pakaradjaꞌan itu, maka iya isab bay anulat itu kamemon. Maka kataꞌuwan kami in hakana asal bꞌnnal.
25 Aheka toꞌongan saga hinang saddī bay tahinang eꞌ si Isa. Bang saga hinang itu gantaꞌ tasulat kamemon ma saga kitab, kumpasku mbal sꞌddong ma deyom dunya saga kitab ya panulatan iya. Tammat