13
Si Isa Angoseꞌan Tapeꞌ saga Mulidna
1 Sōng paꞌin tinagnaꞌan Hinang Paglakad, kinataꞌuwan asal eꞌ si Isa taꞌabut na waktu kalaꞌanna min dunya boꞌ pabīng ni Mmaꞌna. Bay na kalasahanna asal saga aꞌa sukuꞌna ma dunya itu, sagōꞌ paꞌndaꞌanna sigām bang buwattingga kaheya lasana.
2 Manjari pagabay kohap paꞌin, magkakan disi Isa maka saga mulidna. Si Judas anak si Simun Iskariyut aubus na bay pinahōpan pikilan eꞌ nakuraꞌ saitan subay anōngan si Isa ni saga bantana. 3 Kinataꞌuwan asal eꞌ si Isa in iya baranna kabuwanan kapatut eꞌ Mmaꞌna Tuhan magagi ma kamemon. Kataꞌuwanna isab in iya bay piꞌitu min Tuhan maka pabalik du iya ni Tuhan. 4 Jari pabuhat si Isa min pagkakanan ati hurusanna dallapis badjuꞌna boꞌ yampa aꞌampiꞌ maka jimpawa. 5 Anumpahan iya boheꞌ ni deyom undam ati anagnaꞌ iya angoseꞌan tapeꞌ saga mulidna pakaniya-pakaniya. Puwas eꞌ sinapuhan eꞌna tapeꞌ sigām maka jimpaw ya paꞌampiꞌna. 6 Pagabutna ni si Simun Petros, yuk si Petros ni iya, “Panghūꞌ, koseꞌannu bahāꞌ tapeꞌku?”
7 Anambung si Isa, yukna, “Mbal tahatinu buwattinaꞌan bang ai hinangku itu sagōꞌ tahatinu du ma sinosōng.”
8 Yuk si Petros, “Mbal toꞌongan pakoseꞌku tapeꞌku ma kaꞌa.”
“Bang mbal koseꞌanku tapeꞌnu,” yuk sambung si Isa, “mbal ka mulidku.”
9 Yuk si Simun Petros ma iya, “Na Panghūꞌ, bang buwattēꞌ du, daꞌa hal tapeꞌku, koseꞌin sampay tanganku maka kōkku.”
10 Anambung si Isa, yukna, “Bang aꞌa bay amandi alanuꞌ na baranna. Hal tapeꞌna laꞌa ya subay koseꞌanna pabīng. Kaꞌam kamemon, alanuꞌ na pangatayanbi, haliyu sadja min aꞌa dangan ilu.” 11 Buwattēꞌ pahꞌlling si Isa sabab kataꞌuwanna asal bang sai song anōngan iya ni saga bantana, angkan yukna in sigām alanuꞌ pangatayan sigām kamemon, haliyu min aꞌa dangan.
12 Aubus paꞌin kinoseꞌan eꞌ si Isa tapeꞌ saga mulidna, abadjuꞌ iya pabīng boꞌ aningkōꞌ ma baina. Atilaw iya ni saga mulidna, yukna, “Tahatibi bahāꞌ bang ai bay hinangku itu ma kaꞌam? 13 Ōnanbi aku Guru maka Panghūꞌ. Taluwaꞌ koꞌ inān, sabab gurubi du aku maka panghūꞌbi. 14 Manjari, pagka aku gurubi maka panghūꞌbi bay angoseꞌan tapeꞌbi, subay aku panunuranbi. Kaꞌam ilu subay isab magkoseꞌan tapeꞌ seheꞌbi dangan kam maka dangan. 15 Bay hinangku itu pamintānganbi, supaya aku panunuranbi magpareyoꞌ atay. 16 Bꞌnnal ya pangahakaku itu ma kaꞌam, in banyagaꞌ mbal alanga min nakuraꞌna, maka sosohoꞌan mbal alanga min aꞌa anohoꞌ iya. 17 Pagka tahatibi na pamanduꞌku itu, tantu aheya kahāpan ma kaꞌam bang beyaꞌbi du.”
18 Yuk si Isa lagiꞌ, “Nggaꞌi ka kaꞌam kamemon ya pagsambatku itu. Kataꞌuwanku du bang sai bay tapeneꞌku ameyaꞌ ma aku. Sagōꞌ subay du aniyaꞌ kamaujuran ma bay pinagkallam ma deyom Kitab, ya yuk-i, ‘Nilaꞌat du aku eꞌ aꞌa dangkakanan maka aku.’ 19 Hakaꞌanta kam pasal itu ma halam lagiꞌ patꞌkka, jari bang patꞌkka, bꞌnnalbi du bay pahꞌllingku tagnaꞌ ma pasalan baranku, hatina ‘aku na Iya’. 20 Bꞌnnal ya pangahakaku itu ma kaꞌam,” yuk si Isa, “sasuku anaimaꞌ aꞌa sohoꞌku, saliꞌ baranku ya tinaimaꞌ. Maka sasuku anaimaꞌ aku, tataimaꞌna isab ya bay amapiꞌitu aku.”
Haka si Isa Pasal Aꞌa Sōng Anipu Iya
21 Aubus paꞌin ahꞌlling si Isa itu, asasaw pangatayanna ati yukna ni saga mulidna, “Bꞌnnal llingku itu ma kaꞌam, aniyaꞌ dangan min kaꞌam song anukbalan aku ni saga bantaku.”
22 Magpatong-piyatongi saga mulid. Tuꞌud halam kinataꞌuwan eꞌ sigām bang sai pinahꞌlling eꞌ si Isa. 23 Jari aniyaꞌ mulid dakayuꞌ, ya kalalasahan si Isa, inaꞌan pasandig ma bihing si Isa. 24 Sininyal mulid itu eꞌ si Simun Petros ati yuk si Petros, “Tilawun konoꞌ si Isa bang sai pahꞌllingna.”
25 Manjari paliꞌid mulid inān ni si Isa atilaw, yuk-i, “Panghūꞌ, sai bahāꞌ anōngan kaꞌa ni bantanu?”
26 Anambung si Isa, yukna, “Ya aꞌa buwananku tinapay aubus bay tꞌnnoꞌanku ni lohoꞌ, ya na koꞌ inān aꞌa-i.” Sakali niāꞌ tinapay eꞌ si Isa, tinꞌnnoꞌan eꞌna ni lohoꞌ boꞌ yampa pamuwanna ma si Judas anak si Simun Iskariyut. 27 Pagāꞌ tinapay itu eꞌ si Judas, magtūy pahōp nakuraꞌ saitan ni deyom pikilanna. Yuk si Isa ni si Judas, “Daiꞌ-daiꞌun na ya song hinangnu ilu.” 28 Halam aniyaꞌ minsan dangan min mulidna kaseheꞌ makahati bang ai bay pahꞌlling si Isa ma si Judas eꞌ. 29 In iya asal amatuntul sīn sigām, angkan pangannal saga mulid kaseheꞌ in si Judas sinōꞌ amꞌlli sakap paghinang atawa sinōꞌ amuwan tutulungan ma saga miskin. 30 Manjari pagsambut paꞌin tinapay eꞌ si Judas, magtūy iya paluwas minnēꞌ. Sangom na ma waktu heꞌ-i.
Panohoꞌan Bahaꞌu
31 Paglikut si Judas, yuk si Isa, “Buwattinaꞌan pinaꞌndaꞌan na kamahaldikaꞌan ma aku, Anak Tuhan. Pinaꞌndaꞌan isab kawasa Tuhan sabab min aku. 32 Jari bang kapaꞌndaꞌan kawasa Tuhan sabab min aku, song isab paꞌndaꞌanna pangamahaldikaꞌna ma aku. Mbal na atꞌggol. 33 Na, saga anak-mulidku,” yuk si Isa, “mbal na aku atꞌggol maitu ma kaꞌam. Pihabi du aku, sagōꞌ balikanku bay pangahakaku ma saga nakuraꞌ Yahudi: ‘Mbal kam makapehēꞌ ni papehēꞌanku inān.’ 34 Na, aniyaꞌ panohoꞌan bahaꞌu pangꞌbbaku ma kaꞌam. Subay kam maglasa-liyasahi. Maglasa kam buwat kalasaku ma kaꞌam. 35 Bang kam gantaꞌ maglasa-liyasahi, minnēꞌ kinataꞌuwan eꞌ saga manusiyaꞌ kamemon in kaꞌam bꞌnnal mulidku.”
Kapamalilu si Petros
36 Yuk si Simun Petros ni si Isa, “Tuwan Panghūꞌ, piꞌingga ka?”
Yuk sambung si Isa, “Mbal na aku karonganannu ni papehēꞌanku heꞌ, sagōꞌ parongan du ka ma sinosōng.”
37 “Tuwan,” yuk si Petros ni iya, “angay aku mbal makarongan ma kaꞌa buwattinaꞌan? Maglillaꞌ aku pinapatay ma sababnu.”
38 Sinambungan iya eꞌ si Isa, yukna, “Paglillaꞌnu bahāꞌ barannu pinapatay ma sababku? Bꞌnnal ya pangahakaku ma kaꞌa, ma mbal giꞌ angukkuꞌuk manuk, amalilu du ka min tꞌllu in aku mbal kataꞌuwannu.”