14
Pinahantap eꞌ si Isa Pangatayan saga Mulidna
1 Yuk si Isa ni saga mulidna, “Daꞌa pasusahunbi deyom ataybi pasal llingku inān. Angandol sadja kam ma Tuhan maka angandol kam ma aku. 2 Aheka patꞌnnaꞌan mainaꞌan ma okoman Mmaꞌku Tuhan. Bang nggaꞌi ka bꞌnnal, bay du kam hakaꞌanku. Pehēꞌ du aku anagamahan kaꞌam patꞌnnaꞌan. 3 Na, bang aubus eꞌku anagamahan kam patꞌnnaꞌan, pabalik du aku piꞌitu angāꞌ kaꞌam binowa pehēꞌ, supaya kitam magdakayuꞌ patꞌnnaꞌan. 4 Kataꞌuwanbi isab labayan tudju ni papehēꞌanku.”
Si Isa Lalabayan Tudju ni Mmaꞌna
5 Yuk si Tomas ni iya, “Tuwan Panghūꞌ, mbal kataꞌuwan kami bang piꞌingga papehēꞌannu. Daka buwattingga eꞌ kami makatullus pehēꞌ!”
6 Yuk si Isa ma iya, “Aku ya labayan tudju ni Tuhan. Aku ya poꞌonan kasabꞌnnalan. Aku ya poꞌonan kallum. Halam aniyaꞌ makapehēꞌ ni Mmaꞌku Tuhan bang nggaꞌi ka aku ya palabayanna. 7 Bang aku kataꞌuwanbi du, kataꞌuwanbi isab Mmaꞌku. Puwas min llaw itu kataꞌuwanbi du iya, maka taꞌndaꞌbi.”
8 Yuk si Pilip ni si Isa, “Tuwan Panghūꞌ, paꞌndaꞌin Mmaꞌnu ma kami, ati kaꞌamuhan kami.”
9 Anambung si Isa, yukna, “Tꞌggol kamailuku na ma kaꞌam, Pilip, mbal giꞌ kataꞌuwannu aku bang sai? Sai-sai makaꞌndaꞌ aku, saliꞌ Mmaꞌku toꞌongan ya taꞌndaꞌna. Jari angay angkan yuknu in Mmaꞌku subay pinaꞌndaꞌan ni kaꞌam? 10 Mbal ka bahāꞌ amꞌnnal, Pilip, in aku maka Mmaꞌku dakayuꞌ du? Saga panduꞌ bay pamanduꞌku ma kaꞌam inān, nggaꞌi ka min paghonaꞌ-honaꞌku sagōꞌ min Mmaꞌku, ya pataptap itu ma aku. Angahinang iya hinangna labay min aku.” 11 Yuk si Isa lagiꞌ, “Subay aku pagkahagadbi pagka yukku in aku maka Mmaꞌku dakayuꞌ du. Sagōꞌ bang aku gantaꞌ mbal pagkahagadbi ma pamissalaku hal, pagkahagarunbi aku ma sabab saga hinang ya bay tahinangku. 12 Bꞌnnal ya pangahakaku itu ma kaꞌam, sai-sai taga-pangandol ma aku, tahinang eꞌna saga hinang bay hinangku. Maka pasōng lagiꞌ saga hinangna min bay hinangku, sabab maraiꞌ na aku pehēꞌ ni Mmaꞌku Tuhan. 13 Ai-ai amuꞌbi ni Mmaꞌku ma sabab aku ya panabbutanbi, hinangku du ma kaꞌam supaya aniyaꞌ mahaldikaꞌ ma Mmaꞌku sabab min aku. 14 Ai-ai amuꞌbi ni aku ma sabab ōnku ya panabbutanbi, paniyaꞌku sadja du ma kaꞌam.”
Panganjanjiꞌ si Isa pasal Rū Sussi
15 Yuk si Isa lagiꞌ, “Bang aku kalasahanbi du, tantu beyaꞌbi saga panohoꞌanku. 16 Angamuꞌ aku ni Mmaꞌku ati aniyaꞌ paniyaꞌna ma kaꞌam gantiꞌku anabangan kaꞌam. Pataptap du iya ma kaꞌam saumul-umul. 17 Rū Tuhan koꞌ itu, ya pinagsambatan Rū kasabꞌnnalan. Mbal iya tataimaꞌ eꞌ saga aꞌa mbal angisbat, sabab mbal taꞌndaꞌ eꞌ sigām maka mbal takilā. Sagōꞌ kaꞌam ilu, takilābi du Rū Tuhan sabab ilu iya ma kaꞌam maka pataptap ma deyom ataybi.
18 “Minsan aku alaꞌan min kaꞌam, mbal kam siya-siyaku. Pabalik du aku piꞌitu ni kaꞌam. 19 Maraiꞌ na waktu in aku mbal taꞌndaꞌ eꞌ saga aꞌa ya mbal angisbat Tuhan. Sagōꞌ taꞌndaꞌbi du aku ati allum du kam salama-lama pagka aku ya asal allum. 20 Taꞌabut paꞌin waktu inaꞌan, kataꞌuwanbi du in aku maka Mmaꞌku dakayuꞌ du, maka kataꞌuwanbi isab in kaꞌam maka aku dakayuꞌ du. 21 Sai-sai anaimaꞌ saga panohoꞌanku sampay ameyaꞌ, ya ilu aꞌa alasa ma aku. Jari sasuku alasahan aku, kinalasahan iya eꞌ Mmaꞌku. Ya du aku alasahan iya, maka amakilā aku di-ku ma iya.”
22 Sakali tinilaw si Isa eꞌ si Judas, (ya nggaꞌi ka Judas Iskariyut.) “Panghūꞌ,” yukna, “ai sababna angkan hal kami ya pataꞌunu ma pasalnu, nggaꞌi ka manusiyaꞌ kamemon?”
23 Anambung si Isa, yukna, “Bang aꞌa alasahan aku, tantu beyaꞌna pamanduꞌku. Jari kinalasahan iya eꞌ Mmaꞌku ati pinaꞌan du kami maka Mmaꞌku patꞌnnaꞌ ma iya. 24 Sagōꞌ bang aꞌa mbal alasa ma aku, mbal isab beyaꞌna saga panduꞌku. Saga kabtangan ya takalebi min aku, nggaꞌi ka min honaꞌ-honaꞌku sagōꞌ min Mmaꞌku, ya bay amapiꞌitu aku.
25 “Bay na itu pamissalaku ni kaꞌam ma waktu kamaituku ma kaꞌam. 26 Sagōꞌ ma sinosōng pinanduꞌan du kam pasal kamemon eꞌ Rū Sussi, ya pinabeyaꞌ eꞌ Mmaꞌku anabangan kaꞌam pagantiꞌ min aku, maka amaentoman kaꞌam pasal kamemon bay pamanduꞌku.”
27 Yuk si Isa lagiꞌ, “Ya pangꞌbbaku ma kaꞌam kasannangan atay. Kasannangan itu min aku asal, maka halam aniyaꞌ saliꞌna ma deyom dunya. Angkan yukku ma kaꞌam, daꞌa pasusahunbi ataybi maka daꞌa kam tināw. 28 Bay na takalebi pahꞌllingku, ya yuk-i, ‘Alaꞌan aku min kaꞌam sagōꞌ pabalik du aku piꞌilu ni kaꞌam.’ Bang aku kalasahanbi, tantu du kam kinōgan pagka aku pehēꞌ ni Mmaꞌku, sabab alanga iya min aku. 29 Bay na itu pataꞌuku ma kaꞌam buwattinaꞌan hinabuku halam lagiꞌ alaꞌan, supaya aku pagkahagadbi bang taꞌabut na waktu inaꞌan. 30 Mbal na aku makatꞌggol amissalahan kaꞌam, sabab maraiꞌ na atꞌkka nakuraꞌ saitan ya magagi ma babaw dunya itu. Mbal aku kapagagihan eꞌna, 31 sagōꞌ subay anganad saga manusiyaꞌ kamemon in aku alasa asal ma Mmaꞌku, ya angkan aku amanuyuꞌ angahinang ai-ai panohoꞌan Mmaꞌku ma aku.
“Na, sūng na,” yuk si Isa. “Palanjal kitam minnitu.”