15
Si Isa Dalil Dī Poꞌonan Tinanom
1 Manjari itu magparalilan si Isa. Yukna ni saga mulidna, “Aku itu dalil dī poꞌonan tinanom, maka Mmaꞌku dalil aꞌa angayuput. 2 Sinagpeꞌ eꞌna kamemon kasangahanku ya mbal amuwan buwaꞌ, maka nihawanan eꞌna kamemon kasangahanku taga-buwaꞌ boꞌ paganap buwaꞌna. 3 Kaꞌam ilu saliꞌ dalil sanga ati hawananna kaꞌam maka saga lapal pamanduꞌku kaꞌam. 4 Subay kam patꞌttog ma aku ati patꞌttog aku ma kaꞌam, sabab in sanga mbal abuwaꞌan di-na, luwal bang dalos maka poꞌonanna. Damikiyanna kaꞌam ilu, mbal kam makahinang ahāp luwal bang aku ya paralosanbi kakkal.
5 “Aku itu dī poꞌonan tinanom, boꞌ kaꞌam ya dalil kasangahanku. Sai-sai kam patꞌttog ma aku, boꞌ aku isab patꞌttog ma iya, aheka buwaꞌna ma kaul maka piꞌil. Sabab bang aꞌa gantaꞌ autas min aku, halam aniyaꞌ tahinangna ahāp. 6 Sai-sai mbal patꞌttog ma aku, saliꞌ iya dalil sanga asagpeꞌ, tinimanan maka alanosan di-na. Manjari saga sanga alanos itu tinimuk du boꞌ nilarukan ni deyom api tinunuꞌ. 7 Sagōꞌ bang kam patꞌttog ma aku, maka bang tauꞌbi panduꞌku ma deyom ataybi, nirūlan du kam eꞌ Tuhan ma ai-ai amuꞌbi. 8 Bang kam amuwan buwaꞌ paheka ma kaul maka piꞌil, minahaldikaꞌ du Mmaꞌku, ati minnēꞌ talhakit in kaꞌam mulidku sabꞌnnal-bꞌnnal.
9 “Alasa aku ma kaꞌam buwat kalasa Mmaꞌku ma aku. Daꞌa kam pabutas min lasaku. 10 Bang beyaꞌbi saga panohoꞌanku, mbal du kam abutas min lasaku. Buwat aku, beyaꞌku asal saga panohoꞌan Mmaꞌku ma aku ati mbal aku abutas min lasana. 11 Angkan buwattitu pahꞌllingku ma kaꞌam, supaya kam makahampit kakōran, halam aniyaꞌ kulangna. 12 Ya na itu panohoꞌanku ma kaꞌam, subay kam maglasa-liyasahi buwat paglasaku ma kaꞌam. 13 Bang aniyaꞌ aꞌa lillaꞌ amatay ma sabab lasana ma bagayna, mbal kaliyuhan lasa buwattēꞌ. 14 Kaꞌam ilu, bagayku du kam bang hinangbi saga panohoꞌanku ma kaꞌam. 15 Mbal na kam ōnanku sosohoꞌan sabab sosohoꞌan itu mbal pinataꞌu bang ai na paꞌin nihinang eꞌ nakuraꞌna. Saguwāꞌ kaꞌam ilu bay na pataꞌuku pasal kamemon ya takaleku min Mmaꞌku, angkan kam ōnanku na saga bagayku. 16 Nggaꞌi ka kaꞌam ya bay ameneꞌ aku, sagōꞌ aku ya bay ameneꞌ kaꞌam, maka bay angwakilan kaꞌam supaya aheka kahāpan tahinangbi, kahāpan mbal apinda, sapantun kayu magbuwaꞌ paheka. Jari ai-ai pangamuꞌbi ni Tuhan ma sabab ōnku ya panabbutanbi, tantu kam nirūlan eꞌna. 17 Ya itu panohoꞌanku: maglasa-liyasahi kam.”
Kinabꞌnsihan saga Bebeyaꞌan si Isa
18 Yuk si Isa ni saga mulidna, “Bang kam gantaꞌ kinabꞌnsihan eꞌ saga aꞌa mbal angisbat Tuhan, entomunbi aku. Ya du aku kinabꞌnsihan eꞌ sigām dahū giꞌ min kaꞌam. 19 Bang bay kam dambeyaꞌan maka saga aꞌa mbal angisbat eꞌ, bay du kam kinalasahan eꞌ sigām pagka dambeyaꞌan maka sigām. Sagōꞌ saddī na kam. Bay kam peneꞌku pinasaddī min saga aꞌa inān, angkan kam kinabꞌnsihan. 20 Entomunbi bay pahꞌllingku ma kaꞌam, ya yukku, ‘In banyagaꞌ mbal alanga min nakuraꞌna.’ Na, bang aku nakuraꞌbi nilaꞌat eꞌ saga aꞌa inān, tantu isab kaꞌam nilaꞌat du eꞌ sigām. Bang sigām bay ameyaꞌ ma pamanduꞌku, ameyaꞌ du isab sigām ma pamanduꞌbi. 21 Sagōꞌ kinabꞌnsihan kam eꞌ sigām maka nilaꞌat ma sabab sukuꞌku kam. Tuꞌud sigām halam makakilā ma Tuhan ya bay amapiꞌitu aku. 22 Bang bay halam aku piꞌitu ni dunya amanduꞌan sigām, mbal sigām katōngan dusa. Saguwāꞌ ma buwattinaꞌan mbal na sigām makaraꞌawa pasal saga dusa sigām. 23 Sai-sai abꞌnsihan aku, abꞌnsi isab iya Mmaꞌku. 24 Bang bay halam tahinangku ma pangꞌndaꞌ sigām saga hinang ya mbal tahinang eꞌ aꞌa saddī, halam du sigām bay katōngan dusa. Sagōꞌ bay na taꞌndaꞌ eꞌ sigām kahinanganku inān, malaingkan masi abꞌnsihan aku maka Mmaꞌku. 25 Tantu du aku kinabꞌnsihan eꞌ sigām boꞌ supaya atuman ya bay tasulat ma Kitab, ya yuk-i, ‘Kinabꞌnsihan aku eꞌ sigām ma halam aniyaꞌ poꞌon sababna.’ ”
26 Ahꞌlling giꞌ si Isa, yukna, “Piꞌilu du ni kaꞌam Pananabang, hatina Rū Tuhan ya luwas min haddarat Tuhan. Angahaka ya kasabꞌnnalan pasal Tuhan. Papiꞌituku iya ni kaꞌam min Mmaꞌku. Jari pagmailu na iya anaksiꞌ iya ma sababku. 27 In kaꞌam isab, anaksiꞌ du isab ma sababku, sabab seheꞌku asal kam sangay min katagnaꞌ.”