16
1 Yuk si Isa ni saga mulidna, “Awalanku pangahakaku itu ma kaꞌam boꞌ supaya kam mbal angꞌbba min pangandolbi ma aku. 2 Kaꞌam ilu song mbal tinugutan pasōd ni deyom langgal eꞌ saga nakuraꞌ agama. Maka atꞌkka du waktu, bang aniyaꞌ aꞌa amapatay kaꞌam, ya pangannal sigām in hinang sigām maguyun maka kabayaꞌan Tuhan. 3 Angkan buwattēꞌ hinang aꞌa ma kaꞌam sabab halam sigām bay makataꞌu pasalan Mmaꞌku atawa aku. 4 Hakaꞌanta kam pasal itu supaya kam makaentom bang taꞌabut waktu pamatꞌkka saga pakaradjaꞌan itu. Nientom eꞌbi bay pangahakaku itu ma kaꞌam. Halam kam bay hakaꞌanku dahū minnitu sabab masi aku bay ma kaꞌam.”
Hinang Rū Sussi
5 “Sagōꞌ buwattinaꞌan tugilaꞌku na ni kaꞌam sabab song na aku pabalik pehēꞌ ni bay amapiꞌitu aku, boꞌ paꞌin halam aniyaꞌ min kaꞌam atilaw aku bang piꞌingga aku. 6 Makalanduꞌ na kasusahanbi pagka kam kahakaꞌanku na. 7 Sagōꞌ bꞌnnal sadja ya pangahakaku itu ma kaꞌam, aheya giꞌ kahāpan ma kaꞌam bang aku alaꞌan min kaꞌam. Sabab bang aku saupama bay mbal alaꞌan, mbal du piꞌilu ni kaꞌam ya Pananabang eꞌ. Sagōꞌ bang aku alaꞌan, papiꞌiluku du iya ni kaꞌam. 8 Pagpiꞌilu paꞌin Pananabang itu, amanduꞌan iya saga manusiyaꞌ ma dunya itu pasal dusa, maka pasal kaꞌadilan, maka pasal hukuman Tuhan. 9 Pinahati sigām eꞌna pasal dusa sigām pagga mbal magkahagad ma aku. 10 Pinahati isab sigām pasal kaꞌadilan, sabab in aku itu pehēꞌ na ni Mmaꞌku ati mbal taꞌndaꞌbi. 11 Pinahati du isab sigām pasal hukuman Tuhan, sabab tahukum na nakuraꞌ saitan, ya magagi ma babaw dunya itu.
12 “Aheka giꞌ pangahakaku ma kaꞌam,” yuk si Isa, “sagōꞌ mbal taꞌanggapbi buwattinaꞌan. 13 Subay na atꞌkka piꞌilu in Rū Kasabꞌnnalan, boꞌ yampa kam bowana ataꞌu pasal kasabꞌnnalan kamemon. Mbal iya amanduꞌ min pagnahuꞌ-nahuꞌna, sagōꞌ ai-ai takalena min Tuhan, ya na heꞌ pamanduꞌna ma kaꞌam. Maka pinataꞌu kam eꞌna pasal pakaradjaꞌan ya patꞌkka ma sinosōng. 14 Pinagmahaldikaꞌan isab aku, sabab kamemon ya pamataꞌu Rū Tuhan ma kaꞌam asal min aku. 15 Ai-ai palsukuꞌan Mmaꞌku, palsukuꞌanku du isab, angkan yukku ma kaꞌam, in kamemon pamataꞌu Rū Tuhan ma kaꞌam asal bay min aku.”
Karukkaꞌan maka Kalasigan
16 Yuk si Isa, “Mbal atꞌggol, mbal na aku taꞌndaꞌbi. Pagpuwas inaꞌan isab, mbal atꞌggol taꞌndaꞌbi du aku pabīng.”
17 Magsuli-suli saga mulid si Isa kaseheꞌan, yuk sigām, “Ai bahāꞌ hatina, ya yukna ‘mbal na atꞌggol ati mbal na iya taꞌndaꞌtam, maka puwas inaꞌan-i mbal atꞌggol ati taꞌndaꞌta iya pabīng?’ Maka bay pahꞌllingna isab, ya yukna-i, ‘sabab pehēꞌ na iya konoꞌ ni Mmaꞌna?’ 18 Ai bahāꞌ hatina ‘mbal na atꞌggol?’ Hē! Mbal tahati!”
19 Kinataꞌuwan asal eꞌ si Isa in mulidna inān bilahi atilaw iya pasal bissalana. Angkan yukna ni sigām, “Bay yukku ma kaꞌam insiniꞌ, ‘mbal atꞌggol ati mbal aku taꞌndaꞌbi, maka mbal du isab atꞌggol ati taꞌndaꞌbi du aku pabīng.’ Ya na itu bahāꞌ pagtilaw-tilawanbi dangan maka dangan? 20 Bꞌnnal sadja pangahakaku itu ma kaꞌam, kaꞌam ilu maglemong du maka magdukka, saltaꞌ paꞌin kinōgan saga aꞌa mbal angisbat Tuhan. Taluwaꞌ du kam kasusahan sagōꞌ papinda du susabi ni kalasigan. 21 Ya dalilna buwat dꞌnda anganak. Asusa iya sasangna song anganak. Sagōꞌ pagma-luwasan paꞌin anakna, mbal na taentomna pꞌddiꞌ bay kalabayanna. Gom paꞌin iya kinōgan sabab aniyaꞌ ondeꞌ-ondeꞌ palahil ni dunya. 22 Damikiyanna ma kaꞌam. Ma buwattinaꞌan asusa kam, sagōꞌ magꞌndaꞌ du kitam pabīng. Manjari magkōg-koyag du kam toꞌongan ma halam aniyaꞌ makalaꞌanan kōg-koyagbi inān.
23 “Bang taꞌabut llaw pagꞌndaꞌtam pabalik mbal aniyaꞌ panilawanbi aku. Bꞌnnal pangahakaku itu ma kaꞌam, ai-ai amuꞌbi ni Mmaꞌku ma sabab ōnku ya pamanyabutanbi, tantu kam nirūlan eꞌna. 24 Dahū minnitu halam kam bay angamuꞌ ai-ai ma sabab ōnku ya pamanyabutan. Angamuꞌ na kam, ati nirūlan sadja kam boꞌ ajukup kakōganbi.”
Taraꞌug saga Aꞌa Mbal Angisbat Tuhan
25 Yuk si Isa ni sigām, “Dahū, bay aku magparalilan, sagōꞌ aniyaꞌ waktu mbal na aku magparalilan ma kaꞌam. Atampal sadja pamissalaku ma kaꞌam pasal Mmaꞌku. 26 Taꞌabut paꞌin llaw inaꞌan-i, angamuꞌ du kam ni Tuhan ma sabab ōnku ya pamanyabutanbi. Nggaꞌi ka na aku angamuꞌan kaꞌam ni Mmaꞌku, 27 sabab Mmaꞌku alasa asal ma kaꞌam. Kinalasahan kam eꞌna ma sabab aku ya kalasahanbi maka ma sabab pamꞌnnalbi in aku bay piꞌitu min Tuhan. 28 Ahoꞌ, bay aku piꞌitu min Mmaꞌku Tuhan boꞌ pasampay ni dunya itu, ati ma buwattinaꞌan alaꞌan na aku min dunya boꞌ pabīng pehēꞌ ni Mmaꞌku.”
29 Yuk saga mulidna ni iya, “Buwattinaꞌan ahangpat na pamissalanu, nggaꞌi ka bissala paralilan. 30 Kataꞌuwan kami na in kaꞌa makasakupan kamemon. Mbal na kagunahannu akale ma panilaw saga aꞌa sabab kataꞌuwannu asal deyom pikilan sigām. Angkanna kami amꞌnnal toꞌongan in kaꞌa bay piꞌitu min Tuhan.”
31 Yuk si Isa ma sigām, “Magkahagad na kam bahāꞌ buwattinaꞌan? 32 Sōng na waktu, araiꞌ na toꞌongan, in kaꞌam ilu magkaukanat du. Maglahian du kam ni kalumaꞌanbi pakaniya-pakaniya ati bbahanbi du aku dangan-danganku. Sagōꞌ ya bꞌnnalna, nggaꞌi ka aku dangan-danganku sabab patꞌttog du Mmaꞌku ma aku. 33 Hakaꞌanta na kam pasal itu kamemon boꞌ supaya asannang deyom ataybi ma sabab kapameyaꞌbi ma aku. Maitu ma dunya, bininasa du kam eꞌ saga aꞌa mbal angisbat Tuhan, sagōꞌ daꞌa kam tināw. Taraꞌugku na sigām.”