17
Pangamuꞌ-ngamuꞌ si Isa Pasal Baranna
1 Akatis paꞌin itu binissala eꞌ si Isa, pahangad iya tudju ni sulgaꞌ anabbut ni Tuhan. “O Mmaꞌ,” yukna, “taꞌabut na waktu. Mahaldikaꞌun aku, Anaknu, supaya aku makamahaldikaꞌ kaꞌa. 2 Bay aku kawakilannu magagi ma manusiyaꞌ kamemon boꞌ supaya buwananku kallum kakkal ni sasuku aꞌa ya pamasukuꞌnu aku. 3 Buwattitu hatulan kallum kakkal itu: sasuku ataꞌu ma kaꞌa in kaꞌa Tuhan tunggal sabꞌnnal-bꞌnnal, maka makataꞌu isab ma si Isa Al-Masi ya papiꞌitunu ni dunya, aniyaꞌ na kallumna kakkal ni kasaumulan. 4 Bay na patuwaꞌku kabangsanu maitu ma dunya, sabab atalus na eꞌku saga hinang bay pamahinangnu aku. 5 O Mmaꞌ, mahaldikaꞌun aku mailu ma pajātannu,a buwat bay mahaldikaꞌku ma halam lagiꞌ aniyaꞌ dunya pinapanjari.”
Angamuꞌ-ngamuꞌ si Isa pasal Saga Mulidna
6 “Bay na ka pataꞌuku ni saga aꞌa ya pamasukuꞌnu aku maitu ma dunya. Sukuꞌnu asal sigām, ati pasukuꞌnu sigām ma aku. Tabeyaꞌ eꞌ sigām lapal palmannu, 7 maka kinataꞌuwan eꞌ sigām in kamemon pamuwannu aku, asal min kaꞌa. 8 Bay na pasampayku ni sigām lapal pamuwannu aku, maka tataimaꞌ na eꞌ sigām. Kinataꞌuwan na eꞌ sigām in aku sabꞌnnal-bꞌnnal deyoꞌ bay min kaꞌa, maka magkahagad na sigām in kaꞌa bay amapiꞌitu aku.
9 “O Mmaꞌ, amuꞌanku junjung saga aꞌa itu. Nggaꞌi ka manusiyaꞌ kamemon ya amuꞌanku itu, luwal saga aꞌa ya pamasukuꞌnu aku, sabab sukuꞌnu du isab. 10 Ma kaꞌa asal sukuꞌku kamemon, maka ma aku isab sukuꞌnu kamemon. Talhakit isab kabangsaku ma sabab saga aꞌa ya sukuꞌku itu. 11 Na, maraiꞌ na aku pabalik piꞌilu ni kaꞌa. Sōng na bbahanku dunya itu, sagōꞌ in sigām sukuꞌku itiyaꞌ masi ma dunya. O Mmaꞌku Sussi, hampanin sigām sabab min barakat ōnnu, ya ōn bay pamuwannu aku, boꞌ supaya sigām magdakayuꞌ atay buwat kita. 12 Tꞌggolku masi maitu ma saga aꞌa ya pamasukuꞌnu aku, bay sigām hampananku min barakat ōnnu, ōn bay pamuwannu aku. Bay sigām tungguꞌanku angkan halam aniyaꞌ min sigām bay amutawan min kaꞌa. Halam aniyaꞌ alungay min kaꞌa, luwal dakayuꞌ, ya gantaꞌanna pabutawan, ati minnēꞌ atuman du paꞌin in bay pinagbaꞌat ma deyom Kitab.”
13 Angamuꞌ-ngamuꞌ lagiꞌ si Isa, yuk-i, “Na, Mmaꞌ, maraiꞌ na aku pabalik piꞌilu ni kaꞌa. Angkan koꞌ, tꞌggolku masi ma dunya itu pamanduꞌku na paꞌin llingku itu boꞌ aheya kakōgan saga mulidku, luwas isab min kakōganku. 14 Bay na pasampayku palmannu ni sigām ati kinabꞌnsihan eꞌ saga aꞌa ya mbal angisbat kaꞌa, sabab magsaddī sigām maka aꞌa heꞌ. Pasaliꞌ sigām ni aku, sabab ya du aku halam aniyaꞌ lamudku ma saga aꞌa ya mbal angisbat kaꞌa ma dunya itu. 15 Mbal aku angamuꞌ subay palaꞌannu saga aꞌa sukuꞌku min dunya. Ya amuꞌku bang paꞌin sigām hampanannu boꞌ mbal tapagagihan eꞌ nakuraꞌ saitan, ya patilaꞌatun. 16 Pasaliꞌ sigām ni aku, pagka nggaꞌi ka dunya itu ya lahat sigām luggiyaꞌ. 17 Pasaddīhun maka sussihun sigām supaya sigām ma kaꞌa sadja. Ya panussi sigām panduꞌnu bꞌnnal, hatina palmannu. 18 Bay sigām sohoꞌku pehēꞌ ni saga aꞌa ma dunya, buwat bay panohoꞌnu aku piꞌitu ni deyom dunya. 19 Ma sabab sigām, ya angkan aku magpasukuꞌ di-ku ma kaꞌa, supaya sigām sukuꞌnu toꞌongan.
20 “Nggaꞌi ka hal saga mulidku ītu ya amuꞌanku,” yuk si Isa, “sagōꞌ saga aꞌa kamemon ya song magkahagad ma aku ma sabab lapal sigām. 21 O Mmaꞌ, angamuꞌ aku junjung ni kaꞌa, bang paꞌin sigām daꞌatay buwat kita, sabab pataptap na paꞌin ka ma aku, maka pataptap isab aku ma kaꞌa. Mura-murahan, bang paꞌin sigām patꞌttog ma kita, bang paꞌin isab sigām magdakayuꞌ atay kamemon supaya magkahagad saga aꞌa ma dunya in kaꞌa bay amapiꞌitu aku. 22 Bay sigām pabangsaku buwat bay pamabangsanu ma aku, supaya sigām magdakayuꞌ atay buwat kita. 23 Hatina pataptap aku mainaꞌan ma sigām buwat kaꞌa pataptap asal ma aku, boꞌ supaya sigām daꞌatay toꞌongan. Jari minnēꞌ kinataꞌuwan eꞌ saga aꞌa ma dunya itu in kaꞌa bay amapiꞌitu aku, maka kinataꞌuwan isab in saga aꞌa magkahagad ma aku kalasahannu du buwat panglasanu ma aku.
24 “O Mmaꞌ! Bay pamasukuꞌnu aku saga aꞌa itu, ati kabayaꞌanku sigām subay parongan ma aku, boꞌ sigām makaꞌndaꞌ sahaya ya pamuwannu aku. Sabab kalasahannu aku asal ma halam giꞌ aniyaꞌ dunya. 25 O Mmaꞌ, aꞌadil ka. Mbal ka kinataꞌuwan eꞌ saga aꞌa porol ma dunya itu, sagōꞌ aku itu makataꞌuwan kaꞌa du. Maka saga aꞌa sukuꞌku itu, ataꞌu isab sigām in kaꞌa bay amapiꞌitu aku. 26 Bay na ka pataꞌuku ma sigām, maka pataꞌuku na paꞌin boꞌ supaya sigām pahōpannu lasa tudju ni pagkahi sigām, buwat lasanu ma aku. Pataꞌuku isab sigām supaya aku pataptap ma deyom atay sigām.”