19
Si Isa maka si Sakkiyas
1 Pasōd na si Isa ni daꞌira Ariha boꞌ palabay min tꞌngngaꞌ kalumaꞌanna. 2 Na, aniyaꞌ aꞌa maglahat mahēꞌ, ōnna si Sakkiyas. Nakuraꞌ asal iya ma saga aꞌa magaꞌāꞌ sukay parinta, maka dayahan iya. 3 Bilahi toꞌongan aꞌa itu angꞌndaꞌ bang sai si Isa, sagōꞌ mbal taꞌndaꞌna sabab apandak iya maka aheka aꞌa magtimukan. 4 Angkan iya paragan parahū min kahekaꞌan aꞌa inān boꞌ parāg ni diyataꞌ kayu sikamor supaya taꞌndaꞌna si Isa bang palabay na minnēꞌ.
5 Pagtꞌkka si Isa ni tongod kayu inān, pahoggaꞌ iya boꞌ pahangad, maka yukna ma si Sakkiyas, “O Sakkiyas, palꞌkkas ka pareyoꞌ sabab pahantiꞌ aku ma lumaꞌnu llaw itu.”
6 Jari paraiꞌ-daiꞌ si Sakkiyas pareyoꞌ, maka kinōgan iya amowa si Isa ni lumaꞌna. 7 Sakali magpanoway saga aꞌa kamemon, yuk-i, “Allā! Waꞌi iya pehēꞌ amangan ma lumaꞌ aꞌa baldusa!”
8 Ma lumaꞌ paꞌin, anꞌngge si Sakkiyas ati yukna ni si Isa, “Tuwan, pakale ka. Santongaꞌ altaꞌku panarakkaku na ma saga miskin. Maka bang aniyaꞌ aꞌa bay akkalanku, papoleꞌku na ni iya sīnna nilipat mpat.”
9 Yuk si Isa ni iya, “Llaw itu lappasan ka sampay anak-hꞌndanu sabab tubuꞌ ka isab si Ibrahim. 10 Aku Anak Manusiyaꞌ, ya maksudku piꞌitu ni dunya subay amiha saga aꞌa atala min Tuhan boꞌ sigām lappasan.”
Paralilan Pasal Tꞌllungan Sosohoꞌan
11 Hinabu paꞌin akale saga aꞌa ma si Isa, aniyaꞌ kissa pamaralilan pahꞌllingna ma sigām, sabab asekot na iya ni daꞌira Awrusalam. Ya pangannal sigām in pagparinta Tuhan ma manusiyaꞌ araiꞌ na tinagnaꞌan toꞌongan. 12 Buwattitu pamaralilna: “Aniyaꞌ,” yukna, “aꞌa bangsahan magbamba palintas ni lahat atala boꞌ ginꞌllal sultan mahēꞌ. Puwas eꞌ, pabalik konoꞌ iya ni lahatna magsultan. 13 Manjari itu, ma song paꞌin atulak, nilinganan eꞌna sangpūꞌ sosohoꞌanna. Binuwanan sigām eꞌna dublun bulawan pakaniya-pakaniya. Yukna ma sigām, ‘Pangalituhunbi altaꞌ itu tꞌggolku alikut.’
14 “Sagōꞌ kinabꞌnsihan aꞌa bangsahan itu eꞌ saga aꞌa ma lahatna, angkan sigām amabeyaꞌ aꞌa amowahan iya lapal, yuk-i, ‘Mbal kami bilahi bang kaꞌa ya pagsultanan kami.’
15 “Sagōꞌ ginꞌllal iya magsultan ati pabīng ni lahatna. Pagtꞌkkana na, magtūy sohoꞌna paꞌalop ni iya saga sosohoꞌan bay buwananna dublun boꞌ kataꞌuwanna bang pila tauntung eꞌ sigām dangan maka dangan.
16 “Jari paꞌalop ni iya sosohoꞌan dahū, yukna, ‘Tuwan, ya dublun dakayuꞌ bay pamuwannu aku taga-untung na sangpūꞌ dublun.’
17 “ ‘Ahāp hinangnu,’ yuk sultan. ‘Sosohoꞌan ahantap ka. Pagka ka kapangandolan ma altaꞌ arikiꞌ-dikiꞌ, buwananta ka kapatut magagi ma sangpūꞌ daꞌira.’
18 “Puwas eꞌ paꞌalop ni iya sosohoꞌan karuwana. ‘Tuwan,’ yukna, ‘ya dublun bay pamuwannu aku taga-untung na lima.’
19 “Yuk sultan ni iya, ‘Ahāp. Kaꞌa isab buwananku kapatut magagi ma lima daꞌira.’
20 “Jari paꞌalop isab pinaꞌan sosohoꞌan dakayuꞌ ati yukna, ‘Tuwan, oꞌo, itiyaꞌ du dublunnu. Bay putusku maka panyuꞌ boꞌ tauꞌku sakuli-kuli. 21 Tuꞌud aku tināw sabab kaꞌa ilu mbal maꞌaseꞌ ma aꞌa. Ngāꞌnu ya halam bay paghulas-sangsāꞌannu, maka aninu ya halam bay pagluꞌugannu.’
22 “Yuk sultan ni iya, ‘Oy! Pilliyu! Sosohoꞌan alaꞌat ka. Papellengku ni kaꞌa bay llingnu sīꞌ boꞌ ka taluwaꞌ hukuman. Kataꞌuwannu bahāꞌ in aku mbal maꞌaseꞌ? Ngāꞌku bahāꞌ ya halam bay paghulas-sangsāꞌanku? Aniku bahāꞌ ya halam bay pagluꞌuganku? 23 Bang hatiꞌ buwattēꞌ, angay halam bay patauꞌnu sīnku ni deyom bangko boꞌ aniyaꞌ anakna? Manjari bang aku makapoleꞌ, taꞌāꞌku du sīnku sampay anakna.’
24 “Puwas eꞌ ahꞌlling sultan ni saga aꞌa magpanꞌngge mainaꞌan. ‘Ngāꞌunbi dublun min iya ati pamuwanunbi ni sosohoꞌan dakayuꞌ, ya taga-dublun sangpūꞌ inān.’
25 “Yuk saga aꞌa inān, ‘Tuwan! Aniyaꞌ na sangpūꞌ dublunna!’
26 “ ‘Hakaꞌanta kam,’ yuk sultan, ‘sasuku kapangandolan ma aheka, kinꞌnnopan du ma iya, sagōꞌ sasuku mbal kapangandolan minsan ma arikiꞌ, kinulangan du ai-ai bay ma iya. 27 Na, saga bantaku inān,’ yuk sultan, ‘aꞌa mbal bilahi bang aku pagsultanan sigām, bowahunbi piꞌitu. Papatayunbi sigām maitu ma matahanku.’ ”
Kapagmahaldikaꞌ ma si Isa Pagsōdna ni Awrusalam
28 Aubus paꞌin bissala si Isa itu, lumꞌngngan iya parahū min sigām tudju ni Awrusalam. 29 Makasekot paꞌin iya ni kauman Betpage maka Betani, ya ma kasekotan būd Jaitun inān, anohoꞌ iya duwangan mulidna parahū min kaseheꞌan. 30 Yukna ma sigā, “Pehēꞌ na kam ni kalumaꞌan ma dahuanbi ilu. Jari pagtꞌkkabi pinaꞌan, makabāk du kam dakayuꞌ anak kuraꞌ pahengkot, kuraꞌ halam bay tapanguraꞌan aꞌa. Hubaranbi boꞌ bowahunbi piꞌitu. 31 Bang aniyaꞌ gantaꞌ atilaw kaꞌam bang angay hubaranbi, hakaꞌinbi, ‘Tuꞌud pagguna eꞌ nakuraꞌ.’ ”
32 Sakali pehēꞌ na duwangan mulid eꞌ, ati tabāk eꞌ sigā buwat bay panohoꞌan si Isa.
33 Sabu paꞌin sigā angahubad anak kuraꞌ, ahꞌlling saga tag-dapuna ma sigā, yuk-i, “Oy! Angay hubaranbi ilu?”
34 Ya sambung sigām, “Tuꞌud pagguna eꞌ nakuraꞌ.”
35 “Jari binowa eꞌ sigā anak kuraꞌ inān ni si Isa. Nilampikan bukutna maka saga badjuꞌ sigā boꞌ yampa si Isa pinatingkōꞌ ma diyataꞌ. 36 Na, makakuraꞌ paꞌin iya, binꞌllat eꞌ saga aꞌa sꞌmmek sigām ma lān palabayanna.
37 Pagka asekot na si Isa ni Awrusalam, boꞌ inaꞌan na ma lān ma lūran būd Jaitun, ya baꞌanan anak-mulidna inān kamemon anagnaꞌ magpananglit ma Tuhan. Pinatanog suwala sigām ananglitan iya ma sabab saga hinang barakatan bay taꞌndaꞌ sigām. 38 Yuk sanglit sigām,
“Bang paꞌin binarakatan sultan itu,
ya kawakilan eꞌ Tuhan piꞌitu.
Kasannangan asal ma deyom sulgaꞌ,
maka sanglit ma Tuhan Mahatinggi!”
39 Jari ahꞌlling ni si Isa saga Parisi bay ma deyom kahekaꞌan aꞌa, yuk-i, “Tuwan Guru, sōꞌun saga mulidnu itu pahali!”
40 Anambung iya, yukna, “Hakaꞌanta kam, bang sigām mbal ahꞌlling, pagantiꞌ saga batu ma lān itu angolang magmahaldikaꞌan aku.”
Pinagtangisan Daꞌira Awrusalam eꞌ si Isa
41 Asekot-sekot paꞌin si Isa ni daꞌira Awrusalam, boꞌ taꞌndaꞌna saga kalumaꞌanna, tatangis iya. 42 Yukna, “Allā, minsan ma llaw itu na, bang bay kataꞌuwanbi bang ai ya makabowahan kam kasannangan. Malaingkan kalimbungan na min kaꞌam. 43 Ma waktu sinōng aniyaꞌ balaꞌ atꞌkka ni kaꞌam. Niagpangan daꞌirabi eꞌ saga bantabi, kinutaꞌan sakalibutna eꞌ sigām boꞌ kam mbal makalahi. 44 Nilubu eꞌ sigām kalumaꞌanbi ilu kamemon sampay halam na aniyaꞌ batu pagdayaw lumaꞌ takapin magbangkat-bangkat. Maka kaꞌam kamemon magtaiꞌanak ya maglahat mailu, pinapatay isab eꞌ sigām. Paniyaꞌ du balaꞌ itu ma kaꞌam sabab halam takannalbi waktu kapangalappas Tuhan ma kaꞌam.”
Si Isa ma Langgal Pagkulbanan
45 Manjari pagtꞌkka si Isa pehēꞌ, pasōd iya ni deyom langgal pagkulbanan ati anagnaꞌ amalaꞌan saga aꞌa magdagang mainaꞌan. 46 Yukna ma sigām, “Tasulat asal bay pagkallam Tuhan ya yuk-i, ‘Lumaꞌku itu niōnan lumaꞌ pagsambahayangan saga aꞌa.’ Sagōꞌ hinangbi na saliꞌ lumaꞌ patapukan mundu.”