2
Pagkawin ma Kalumaꞌan Kana
1 Palabay paꞌin duwangꞌllaw, aniyaꞌ pagkawin ma kalumaꞌan Kana ya ma lahat Jalil. Waꞌi inaꞌ si Isa paluruk pehēꞌ. 2 Ya du disi Isa maka saga mulidna bay sinōꞌ paluruk. 3 Ahagin paꞌin binu-anggul, ahꞌlling inaꞌ si Isa ni iya, yukna, “Halam na aniyaꞌ binu-anggul sigām.”
4 Ya sambung si Isa, “Inaꞌ, minsan aku mbal sohoꞌnu, aku ya magkabayaꞌan. Halam giꞌ taꞌabut waktu pamatuwaꞌ barakatku.”
5 Jari anohoꞌ inaꞌ si Isa ma saga ipatan ma lumaꞌ inān. “Ai-ai panohoꞌanna ma kaꞌam,” yukna, “hinangunbi.”
6 Na aniyaꞌ nnom poga batu mainaꞌan pangisihan boheꞌ pagailan saga aꞌa, pagka addat sigām bangsa Yahudi. Dakayuꞌ poga inān isihan saga dahatus litru. 7 Ahꞌlling si Isa ni saga ipatan eꞌ, yukna, “Pꞌnnoꞌinbi saga poga ilu maka boheꞌ.” Magtūy pinꞌnnoꞌan eꞌ sigām, pinagsamaintib maka bowaꞌna. 8 Puwas eꞌ anohoꞌ si Isa, yukna, “Saukunbi min poga ilu boꞌ binowa ni nakuraꞌ ya tag-jamuhan.” Magtūy binowa eꞌ sigām pehēꞌ ni nakuraꞌ heꞌ, 9 ati kininaman eꞌna binu-anggul bay boheꞌ. Halam kataꞌuwanna bang minningga binu inān sagōꞌ kinataꞌuwan asal eꞌ saga ipatan ya bay anauk iya. Pagkinam paꞌin eꞌ nakuraꞌ, magtūy lingananna pangantin lꞌlla. 10 “Kamaumuhanna,” yukna, “bang ma pagkawinan, binu ahāp ya pamainum dahū ma saga aꞌa maglurukan. Subay aheka tainum eꞌ sigām boꞌ yampa pamainum binu kulang hāpna. Sagōꞌ bang kaꞌa,” yukna, “binu ahāp ya tauꞌnu sampay ma buwattinaꞌan.”
11 Ya na itu paltandaꞌan tagnaꞌ nihinang eꞌ si Isa. Nihinang eꞌna mahēꞌ ma Kana ya ma lahat Jalil. Minnēꞌ pinaꞌndaꞌan eꞌna kawasana, manjari magkahagad ma iya saga mulidna.
12 Puwas eꞌ, palūd disi Isa pehēꞌ ni daꞌira Kapirnaum. Ya seheꞌna inān inaꞌna maka saga danakanna maka saga mulidna. Inaꞌan sigām pahantiꞌ daka pilambahangi.
Si Isa ma Langgal Pagkulbanan
13 Manjari itu asekot na waktu paghinang Yahudi ya niōnan Hinang Paglakad, angkan si Isa patukad ni Awrusalam. 14 Pagtꞌkkana pehēꞌ, pasōd iya ni deyom langgal pagkulbanan. Aniyaꞌ taꞌndaꞌna ma deyomna inān saga aꞌa magdagang sapiꞌ maka bili-bili maka assang. Taꞌndaꞌna isab saga aꞌa pagsasambiꞌan sīn aningkōꞌ ma lamisahan sigām. 15 Pagꞌndaꞌ itu eꞌ si Isa, angāꞌ iya lubid nihinang lulubak boꞌ sꞌssolna saga aꞌa kamemon paluwas min deyom langgal, beyaꞌ isab saga sapiꞌ maka saga bili-bili. Binulangkayat eꞌna saga lamisahan aꞌa magsasambiꞌ sīn, maka pinakaukanat sīn sigām. 16 Yukna ni saga magdaragang assang. “Laꞌaninbi daganganbi ilu! Langgal itu mbal manjari nihinang tabuꞌ sabab lumaꞌ Mmaꞌku Tuhan!” 17 Pagꞌndaꞌ saga mulid si Isa ma hinangna itu, taentom eꞌ sigām sulat Kitab, ya yuk-i, “Pagtuyuꞌku ma lumaꞌnu, O Tuhan, saliꞌ hantang api ma deyom atayku agon makamula.”
18 Sakali tinilaw si Isa eꞌ saga nakuraꞌ Yahudi, yuk-i, “Ai kapatutnu maghinang saga hinangnu ilu? Pandaꞌin kami hinang makainu-inu tandaꞌ saksiꞌ in kaꞌa taga-kapatut.”
19 Anambung si Isa, yukna, “Lubuhunbi langgal itu ati bangunku pabalik ma deyom tꞌllungꞌllaw.”
20 “Ōy!” yuk saga nakuraꞌ heꞌ. “Langgal itu, mpatpūꞌ maka nnom tahun bay kapangahinang iya. Tabangunnu pabīng bahāꞌ ma deyom tꞌllungꞌllaw sadja?” 21 Malaingkan ya langgal pinagbissala eꞌ si Isa inān baranna du. 22 Angkanna, taꞌabut paꞌin waktu kallum si Isa pabalik min kamatayna, taentom eꞌ saga mulidna bissalana itu ati tapagkahagad eꞌ sigām sulat Kitab maka bissala si Isa.
23 Mahēꞌ paꞌin si Isa ma Awrusalam saltaꞌ ma Hinang Paglakad, aheka aꞌa magkahagad ma iya pagka taꞌndaꞌ eꞌ sigām saga hinangna makainu-inu. 24 Sagōꞌ mbal angandol si Isa ma sigām, sabab kataꞌuwanna asal kajarihan sigām kamemon. 25 Minsan halam aniyaꞌ amataꞌu, kataꞌuwanna asal bang ai ma deyom atay manusiyaꞌ.