3
Si Isa maka si Nikudimas
1 Manjari itu aniyaꞌ aꞌa min umpigan Parisi, ōnna si Nikudimus. 2 Ma dakayuꞌ sangom pehēꞌ iya ni si Isa boꞌ ahꞌlling, yukna, “Tuwan Guru, kataꞌuwan kami in kaꞌa guru pinapiꞌitu eꞌ Tuhan. Sabab mbal ka makahinang saga hinang makainu-inu ya hinangnu ilu, luwal bang ka tinabang eꞌ Tuhan.”
3 Anambung si Isa, yukna, “Bꞌnnal ya pahꞌllingku itu ma kaꞌa, halam aniyaꞌ manusiyaꞌ makaꞌndaꞌ pagparinta Tuhan, luwal bang aꞌa nianakan min duwa.”
4 Yuk si Nikudimus, “Buwattingga aꞌa nianakan pabalik bang aumul na? Tantu iya mbal makasōd pabalik ni deyom kandang inaꞌna boꞌ nianakan pabalik!”
5 Anambung si Isa, yukna, “Bꞌnnal ya pahꞌllingku itu ma kaꞌa, halam aniyaꞌ aꞌa makasōd ni pagparintahan Tuhan, luwal bang aꞌa nianakan min boheꞌ maka min Rū Tuhan. 6 Ya nianakan eꞌ manusiyaꞌ, manusiyaꞌ asal, sagōꞌ ya nianakan min Rū Tuhan tahinang anak Tuhan taga-rū isab. 7 Daꞌa ka ainu-inu pagka yukku ma kaꞌa in kaꞌam subay nianakan pabalik. 8 Dalilta baliyu, ya ameyaꞌ piꞌingga-piꞌingga kabayaꞌanna. Takalenu bahonosna, sagōꞌ mbal kataꞌuwannu bang minningga atawa piꞌingga. Buwattēꞌ du isab bang aꞌa nianakan min Rū Tuhan, mbal kinataꞌuwan bang minningga kaniyaꞌna.”
9 “Buwattingga kajarina itu?” yuk tilaw si Nikudimus.
10 Anambung si Isa, yukna, “Mbal tahatinu bahāꞌ? Guru babantugun lagiꞌ ka ma bangsata Israꞌil? 11 Bꞌnnal ya pahꞌllingku itu ma kaꞌa, amissala kami pasal ai-ai kataꞌuwan kami, maka anaksiꞌ kami pasal bay taꞌndaꞌ kami. Sagōꞌ kaꞌam ilu mbal magkahagad. 12 Buwattingga eꞌbi magkahagad ma bissalaku pasal sulgaꞌ, bang minsan bissalaku pasal dunya mbal pagkahagadbi? 13 Halam aniyaꞌ bay makapehēꞌ ni sulgaꞌ, luwal aku Anak Manusiyaꞌ, ya piꞌitu asal deyoꞌ bay min sulgaꞌ.
14 “Ma waktu awal, hinabu ma lahat paslangan lagiꞌ bangsa Israꞌil, aniyaꞌ sowa dī tumbaga bay niangkat eꞌ si Musa ma hāg boꞌ taꞌndaꞌ eꞌ saga aꞌa bay keket sowa. Jari sai-sai makaꞌndaꞌ bay kauliꞌan. Damikiyanna in aku Anak Manusiyaꞌ subay niangkat ma hāg, 15 jari sasuku angandol ma aku pinaniyaꞌan kallum kakkal ni kasaumulan.
16 “Aheya toꞌongan lasa Tuhan ma manusiyaꞌ, ya poꞌon paglillaꞌna Anakna tunggal pinapatay boꞌ supaya sasuku angandol ma Anakna itu mbal binutawanan min Tuhan, sagōꞌ kakkal kallumna sampay ni kasaumulan. 17 Nggaꞌi ka hukuman dusa ya minaksud eꞌ Tuhan angkan papiꞌituna Anakna. Ya maksudna subay lappasan min hukuman bangsa manusiyaꞌ kamemon labay min si Isa. 18 Sasuku angandol ma Anak Tuhan mbal taluwaꞌ hukuman Tuhan. Sagōꞌ sasuku mbal angandol, asal taluwaꞌ hukuman, sabab halam sigām bay angandol ma si Isa, ya tunggal anak Tuhan. 19 Buwattitu ya pangahukuman Tuhan: si Isa ya bay piꞌitu ni dunya amasawa deyom pikilan manusiyaꞌ sagōꞌ manusiyaꞌ itu mbal bilahi ma kasawahan. Ya kabayaꞌan sigām subay kalendoman sabab alaꞌat saga hinang sigām. 20 Sasuku maghinang alaꞌat abꞌnsi toꞌongan ma kasawahan, maka mbal pasekot ni kasawahan sabab mbal bilahi taꞌndaꞌ saga hinang sigām alaꞌat. 21 Sagōꞌ sasuku maghinang abontol bilahi ni kasawahan supaya talhakit in hinang sigām ameyaꞌ du ma panohoꞌan Tuhan.”
Si Isa maka si Yahiya
22 Puwas eꞌ pehēꞌ si Isa maka saga mulidna ni lahat Yahudiya. Atꞌggol-tꞌggol kamahēꞌna maka sigām. Magpandi isab iya saga aꞌa mainaꞌan. 23-24 Pasaltaꞌ, magpandi na paꞌin si Yahiya ma lahat Anon ya ma atag kauman Salim, sabab aheka boheꞌ mainaꞌan maka angabut-ngabut saga aꞌa pinaꞌan ni iya mikipandi. Dahū koꞌ inān min waktu kapangalabusu ma iya. 25 Jari aniyaꞌ pagsuꞌalan saga mulid si Yahiya maka dakayuꞌ Yahudi pasal addat sigām magail. 26 Pehēꞌ sigām ahꞌlling ni si Yahiya, yuk-i, “Tuwan Guru, taentomnu bahāꞌ aꞌa bay ma kaꞌa ma dambilaꞌ sapaꞌ Jordan eꞌ, ya bay saksiꞌannu? Na, inaꞌan iya magpandi saga aꞌa buwattinaꞌan. Pinaꞌan ni iya saga aꞌa kamemon.”
27 Anambung si Yahiya, yukna, “Halam aniyaꞌ kapatut manusiyaꞌ bang nggaꞌi ka Tuhan ya amuwanan iya. 28 Kaꞌam ilu makasaksiꞌan aku du, bay na sa yukku in aku nggaꞌi ka Al-Masi. Tuꞌud aku sinōꞌ parahū min iya anakapan ai-ai. 29 Sapantun magkawin, pangantin lꞌlla ya tag-hꞌnda. Sagōꞌ panonna, ya anꞌngge ma atag inaꞌan akale-kale, kinōgan asal pagka takalena lagam pangantin lꞌlla. Buwattēꞌ kahālanna ma kami maka si Isa,” yuk si Yahiya. “Halam aniyaꞌ kulang ma kakōganku pagka iya inān takale na. 30 Subay pasōng kabantugan si Isa, maka aku itu subay pakōꞌ-kōꞌ.”
Ya Piꞌitu min Sulgaꞌ
31 Ya piꞌitu min sulgaꞌ alanga asal min kamemon. Hal kahālan dunya ya tasuli-suli eꞌ aꞌa min dunya, sabab sukuꞌ dunya iya. Sagōꞌ alanga asal min kamemon ya piꞌitu min sulgaꞌ. 32 Pamanduꞌna ai-ai bay taꞌndaꞌna maka takalena mahēꞌ ma sulgaꞌ, sagōꞌ halam aniyaꞌ magkahagad ma lapalna. 33 Ya balikna, sasuku magkahagad, angahoꞌ du in pangallam Tuhan asal bꞌnnal kamemon. 34 Bang aniyaꞌ pinapiꞌitu eꞌ Tuhan, lapal Tuhan ya pamissalana sabab kabuwanan iya Rū Tuhan ma halam aniyaꞌ kulangna. 35 Alasa Tuhan ma Anakna ati pamuwanna ma iya kapatut angꞌntanan kamemon. 36 Taga-kallum kakkal ni kasaumulan sasuku angandol ma Anak Tuhan. Sasuku mbal angandol maka mbal ameyaꞌ ma Anak Tuhan, halam aniyaꞌ kallum sigām kakkal sagōꞌ patꞌddas du sigām ma mulkaꞌ Tuhan.