4
Si Isa Magbissala maka Dꞌnda min Samariya
1 Jari itu takale eꞌ saga Parisi pasal saga aꞌa pinandi eꞌ si Isa nihinang mulidna. Labi aheka konoꞌ min saga aꞌa ya tahinang mulid si Yahiya. 2 Sagōꞌ ya bꞌnnalna, nggaꞌi ka si Isa baranna ya magpandi, luwal saga mulidna. 3 Na, pagka kinataꞌuwan eꞌ si Isa bang ai pinagsuli-suli heꞌ, alaꞌan iya maka saga mulidna min lahat Yahudiya boꞌ pabīng ni lahat Jalil. 4 Ya lān palꞌngnganan sigām palabay asal min tꞌngngaꞌ lahat Samariya.
5 Mahēꞌ sigām ma lahat Samariya, atꞌkka sigām pehēꞌ ni dakayuꞌ daꞌira niōnan Sikar. Asekot lahat itu ni tanaꞌ bay pamuwan eꞌ si Yakub ni anakna si Yusup ma masa awal eꞌ. 6 Aniyaꞌ ma tanaꞌ inān boheꞌ kali bay tahinang eꞌ si Yakub ati aningkōꞌ si Isa ma bihing boheꞌ inān sabab binaleꞌ iya ma paglꞌngnganan. Augtu na llaw ma buwattinaꞌan.
7-8 Halam mainaꞌan saga mulidna sabab waꞌi sigām ni daꞌira amꞌlli kinakan sigām. Sakali itu aniyaꞌ dꞌnda Samariya pinaꞌan anambuꞌ boheꞌ. Ahꞌlling si Isa ni iya, yukna, “Buwanin konoꞌ aku boheꞌ inumku.”
9 Anambung dꞌnda, yukna, “Oy, bangsa Yahudi ka, maka aku itu bangsa Samariya koꞌ! Angay aku pangamuꞌannu boheꞌ?” Angkan buwattēꞌ pahꞌlling dꞌnda sabab bangsa Yahudi mbal bilahi angangguna kapanyapan saga aꞌa Samariya.
10 Anambung si Isa, yukna, “Bangsiꞌ kataꞌuwannu bang ai pamuwan Tuhan ma manusiyaꞌ, maka bang sai aku ya angamuꞌ boheꞌ itu ni kaꞌa, tantu du ka angamuꞌ boheꞌ ni aku. Jari painumta du ka boheꞌ makakallum.”
11 “Tuwan,” yuk dꞌnda, “minningga panambuꞌannu boheꞌ makakallum? Halam aniyaꞌ panambuꞌnu, maka alalom pahāp pagboheꞌan itu. 12 Boheꞌ kali itu bay pangꞌbba kami eꞌ kaꞌmboꞌ-mboꞌantam si Yakub. Sigām magtaiꞌanak sampay saga hayop sigām bay anginum min boheꞌ itu. Palabi bahāꞌ kawasanu min kawasa si Yakub eꞌ?”
13 Anambung si Isa, yukna, “Tantu patay boheꞌ pabīng sasuku anginum boheꞌ kali itu. 14 Sagōꞌ sasuku anginum boheꞌ pamainumku, mbal toꞌongan iya patay boheꞌ pabīng. Sabab boheꞌ pamainumku iya sapantun tuburan boheꞌ amuwal ma deyom atayna, amuwanan iya boheꞌ makakallum saumul-umul.”
15 “Tuwan,” yuk dꞌnda, “buwanin aku boheꞌ ya pahꞌllingnu itu boꞌ aku mbal patay boheꞌ pabīng. Ati mbal na aku piꞌitu anambuꞌ boheꞌ.”
16 “Pehēꞌ ka, ngāꞌun hꞌllanu,” yuk si Isa, “ati bowahun iya piꞌitu.”
17 “Halam aniyaꞌ hꞌllaku,” yuk sambung dꞌnda.
Yuk si Isa ni iya, “Bꞌnnal ya yuknu ilu, halam aniyaꞌ hꞌllanu. 18 Sabab min lima ka bay maghꞌlla sagōꞌ ya lꞌlla parakayuꞌannu buwattitu nggaꞌi ka hꞌllanu. Taluwaꞌ llingnu ilu.”
19 Yuk dꞌnda, “Tuwan, taꞌndaꞌku in kaꞌa nabi. 20 Bay anambahayang kaꞌmboꞌ-mboꞌan kami bangsa Samariya maitu ma būd itu. Sagōꞌ bang ma kaꞌam saga Yahudi, Awrusalam ya panambahayangantam Tuhan.”
21 Yuk si Isa ni iya, “Arung, bꞌnnalun llingku itu. Aniyaꞌ du waktu ma sinosōng, bang aꞌa magpamudji ma Mmaꞌtam Tuhan, nggaꞌi ka ma būd itu atawa mahēꞌ ma Awrusalam ya lugal pagpudjihan sigām. 22 Kaꞌam saga aꞌa Samariya mbal ataꞌu bang ai ya pagtaꞌatanbi. Saguwāꞌ in kami makataꞌu asal, sabab in paglappas ma manusiyaꞌ paluwaꞌ min bangsa Yahudi. 23 Sagōꞌ buwattitu, atꞌkka na waktu bay nilagaran, waktu kapamudji Mmaꞌtam Tuhan eꞌ saga aꞌa magpamudji sabꞌnnal-bꞌnnal, min itikad maka min kasabꞌnnalan. Buwattēꞌ asal kabayaꞌan Tuhan. 24 In Tuhan rū asal, maka sasuku amudji iya subay min itikad sigām maka min kasabꞌnnalan.”
25 Yuk dꞌnda ni si Isa, “Asal kataꞌuwanku, ma sinosōng piꞌitu du Al-Masi (ya pineneꞌ eꞌ Tuhan angaliyusan bangsana min kasigpitan).”
26 Yuk si Isa, “Aku na koꞌ, ya amissala itu ma kaꞌa.”
27 Sakali atꞌkka saga mulid si Isa pabīng pehēꞌ. Ati ainu-inu sigām pagka taꞌndaꞌ si Isa eꞌ sigām magsuli-suli maka dꞌnda. Sagōꞌ halam aniyaꞌ min sigām anilaw dꞌnda inān bang ai gawina, atawa anilaw si Isa bang angay iya magsuli-suli maka iya.
28 Manjari itu niꞌbbahan eꞌ dꞌnda inān kibut pagboheꞌanna boꞌ yampa pabalik pehēꞌ ni kalumaꞌan. Pagtꞌkkana pehēꞌ ahꞌlling iya ni saga aꞌa mainaꞌan. 29 “Daiꞌ na kam,” yukna. “Ndaꞌunbi aꞌa bay angahakaꞌan aku pasal kamemon bay hinangku. Ya itu bahāꞌ Al-Masi?” 30 Jari paluwas saga aꞌa inān min daꞌira boꞌ palꞌngngan pehēꞌ angꞌndaꞌ si Isa.
31 Na, makalaꞌan paꞌin dꞌnda heꞌ, anganjunjung saga mulid si Isa bang paꞌin iya amangan. Yuk sigām, “Tuwan, amangan ka.”
32 Sagōꞌ anambung si Isa, yukna, “Aniyaꞌ kinakanku mbal kataꞌuwanbi.”
33 Magtilawan di-sigām saga mulid eꞌ, yuk-i, “Aniyaꞌ bahāꞌ bay amowahan iya kinakan?”
34 Yuk si Isa ma sigām, “Ya makaꞌssohan aku bang tahinangku kabayaꞌan Tuhan, ya amapiꞌitu aku. Maka subay talusku saga hinang bay pamahinangna ma aku. 35 Inggay aniyaꞌ bissalabi, ya yuk-i, ‘Mpat bulan giꞌ boꞌ yampa waktu pagani?’ Sagōꞌ hakaꞌanta kam,” yuk si Isa, “taꞌabut na waktu pagani. Ndaꞌunbi saga aꞌa magpiꞌitu inān. Sapantun sigām buwaꞌ huma atigumaꞌ na, sakap na pinagani. 36 Ahāp tungbas ma sasuku animuk buwaꞌ itu. Hatina animuk iya manusiyaꞌ pinaniyaꞌan kallum kakkal. Angkan magdakayuꞌ magkōg-koyagan saga aꞌa magtanom maka aꞌa magtimuk. 37 Bꞌnnal bissala inān ya yuk-i, ‘Saddī aꞌa magtanom, saddī aꞌa magani.’ 38 Bay sohoꞌku kaꞌam magani buwaꞌ minsan nggaꞌi ka pagluꞌuganbi. Saddī iya bay magluꞌug, sagōꞌ makahampit du kam min pagluꞌugan sigām.”
39 Manjari aheka saga aꞌa Samariya min daꞌira Sikar magkahagad ma si Isa ma sabab bay lling dꞌnda, ya yuk-i, “Kahakaꞌan aku eꞌna pasal kamemon bay tahinangku.” 40 Angkan pagtꞌkka saga aꞌa Samariya pehēꞌ ni si Isa, nilogos iya eꞌ sigām subay patꞌnnaꞌ giꞌ ma lahat sigām. Jari duwambahangi ya pahantiꞌna mainaꞌan.
41 Pasaltaꞌ paꞌin si Isa mainaꞌan, aheka lagiꞌ saga aꞌa magkahagad ma iya ma sabab pamanduꞌna. 42 Yuk saga aꞌa itu ma dꞌnda, “Buwattinaꞌan magkahagad na kami ma si Isa, nggaꞌi ka ma sabab pangahakanu ma kami sagōꞌ ma sabab baran kami makakale na ma pamanduꞌna. Kataꞌuwan kami na in iya sabꞌnnal-bꞌnnal maglalappas ma saga manusiyaꞌ ma deyom dunya itu.”
Anak Bagꞌllal Kauliꞌan eꞌ si Isa
43 Apuwas paꞌin duwambahangi kahantiꞌ disi Isa ma daꞌira Sikar eꞌ, alaꞌan sigām minnēꞌ tudju ni lahat Jalil. 44 (Aniyaꞌ asal bay pamissala si Isa, ya yuk-i, “In nabi mbal pinagaddatan eꞌ saga aꞌa ma lahatna luggiyaꞌ.”) 45 Pagtꞌkka disi Isa ni lahat Jalil, pasampang ni iya saga aꞌa mainaꞌan, sabab bay sigām ma Awrusalam pasabu ma waktu Hinang Paglakad, ati taꞌndaꞌ eꞌ sigām kamemon ya tahinang eꞌ si Isa mainaꞌan.
46 Manjari pabalik si Isa pehēꞌ ni Kana ma lahat Jalil. Ya na koꞌ heꞌ lahat bay pamindahanna boheꞌ ni binu-anggul. Sakali itu aniyaꞌ dakayuꞌ bagꞌllal sultan pasabu pehēꞌ. Waꞌi anakna lꞌlla asaki ma daꞌira Kapirnaum. 47 Pagkale bagꞌllal itu in si Isa inaꞌan bay atꞌkka ni lahat Jalil min lahat Yahudiya, magtūy iya pehēꞌ ni si Isa anganjunjung bang paꞌin pinauliꞌ anakna, sabab song na magkamamatay. 48 Yuk si Isa ni iya, “Tantu kam mbal magkahagad, luwal bang kam makaꞌndaꞌ saga paltandaꞌan nihinang pagkainu-inuhan aꞌa.”
49 Yuk bagꞌllal ni iya, “Ndūꞌ, Tuwan, pasaꞌut lagiꞌ ka ma aku sabab saꞌat-saꞌat amatay anakku.”
50 “Pehēꞌ na ka,” yuk si Isa. “Pauliꞌ du anaknu.”
Pinarassaya eꞌ bagꞌllal pahꞌlling si Isa itu ati alaꞌan iya tudju amoleꞌ. 51 Ma labayan paꞌin, tasampang iya eꞌ saga sosohoꞌanna ati nihakaꞌan iya eꞌ sigām, yuk-i, “Kauliꞌan na anaknu.” 52 Tinilaw sigām eꞌna bang lisag pila bay kauliꞌ sakina ati yuk sambung sigām, “Lisag dakayuꞌ kohap-in bay kalaꞌan pasuꞌna.” 53 Jari nientom eꞌ mmaꞌ ondeꞌ inān ya na toꞌongan waktu bay kapahꞌlling si Isa ni iya, ya yuk-i, “Pauliꞌ du anaknu.” Angkanna bagꞌllal inān sampay saga aꞌa kamemon ma okomanna magkahagad na ma si Isa.
54 Paltandaꞌan si Isa karuwana itu bay tahinang eꞌna pagkainu-inuhan aꞌa ma lahat Jalil, waktu kabalikna pehēꞌ min lahat Yahudiya.