5
Aꞌa ma Bihing Tigbaw Kauliꞌan eꞌ si Isa
1 Puwas eꞌ patukad disi Isa ni Awrusalam sabab aniyaꞌ paghinang saga Yahudi mahēꞌ. 2 Na, aniyaꞌ ma Awrusalam inān boheꞌ tigbaw, ōnna Betsata bang ma bissala Hibrani. Boheꞌ itu asekot ni lawang pagsōd-luwasan daꞌira, ya niōnan Lawang Bili-bili, maka aniyaꞌ lima saurung mainaꞌan pagsindungan aꞌa. 3 Na, ma waktu inaꞌan aheka aꞌa asaki maglegehan ma baꞌanan pagsindungan inān. Aniyaꞌ sigām abuta, aniyaꞌ apengkaꞌ maka aniyaꞌ amatay ugatna. [Ya nilagaran eꞌ sigām kagawgaw boheꞌ. 4 Sababna bang pasān aniyaꞌ malaꞌikat min Tuhan pareyoꞌ ni boheꞌ inān anganggawgaw. Jari sai-sai makarahū pehēꞌ ni deyom boheꞌ aubus paꞌin bay ginawgaw, kauliꞌan du minsan ai sakina.] 5 Jari itu aniyaꞌ mainaꞌan aꞌa taga-saki, tꞌllumpūꞌ na maka waluntahun ya tꞌggol sakina. 6 Taꞌndaꞌ iya eꞌ si Isa palege mainaꞌan, maka kataꞌuwanna atꞌggol na kasaki aꞌa inān. Jari atilaw ma iya si Isa, yukna, “Bilahi ka bahāꞌ kauliꞌan?”
7 Anambung aꞌa sakihan, yukna, “Ahoꞌ, Tuwan, sagōꞌ halam aniyaꞌ amuhat aku pehēꞌ ni tigbaw bang pagawgaw boheꞌna. Hinabuku paingsud pehēꞌ, aniyaꞌ parahū min aku.”
8 Yuk si Isa ni iya, “Pabungkal ka, bowahun palegehannu boꞌ ka magtūy lumꞌngngan.” 9 Saruꞌun-duꞌun du kauliꞌan aꞌa inān, magtūy iya lumꞌngngan amowa palegehanna.
Na, llaw inaꞌan llaw Sabtuꞌ, 10 angkan buwattitu pamissala saga Yahudi ma aꞌa bay kauliꞌan sakina inān, yuk-i, “Oy, llaw paghali koꞌ itu! Talanggalnu saraꞌtam pagka buhatnu palegehannu.”
11 Anambung iya ma sigām, yukna, “Ya aꞌa bay amauliꞌ aku bay anohoꞌ aku amowa palegehanku, maka anohoꞌ aku lumꞌngngan.”
12 “Sai aꞌa bay anohoꞌ kaꞌa?” yuk sigām.
13 Sagōꞌ mbal kinataꞌuwan eꞌ aꞌa inān bang sai, sabab bay pasꞌllot si Isa magtūy min katimukan aꞌa.
14 Puwas eꞌ tabāk aꞌa itu eꞌ si Isa ma deyom langgal pagkulbanan. Yuk si Isa ni iya, “Ndaꞌun ba, kauliꞌan na sakinu, angkan ka subay angꞌbba min saga dusanu. Ya aniyaꞌ, patꞌkkahan ka laꞌat akosog giꞌ min bay dahū.”
15 Manjari alaꞌan aꞌa inān minnaꞌan ati pehēꞌ angahakaꞌan saga nakuraꞌ Yahudi in si Isa bay amauliꞌ iya. 16 Angkanna si Isa nilaꞌat eꞌ saga Yahudi, sabab kauliꞌan eꞌna saki aꞌa pasaltaꞌ ma llaw paghali. 17 Ahꞌlling si Isa ni sigām, yukna, “Mmaꞌku Tuhan maghinang na paꞌin sampay ni kabuwattinaꞌan, damikiyanna aku subay maghinang isab.”
18 Ya heꞌ poꞌonna angkan saga Yahudi inān luhūy amanuyuꞌ amapatay iya. Nggaꞌi ka ma sabab kalanggalna ma saraꞌ pasal llaw paghali, sagōꞌ ma sabab hꞌllingna pasal in Tuhan Mmaꞌna lissi, hatina in iya magsaliꞌ maka Tuhan.
Kapatut si Isa min Mmaꞌna Tuhan
19 Manjari sinambungan eꞌ si Isa saga aꞌa inān, yukna, “Bꞌnnal ya pangahakaku itu ma kaꞌam, halam aniyaꞌ tahinangku bang min baran-baranku. Sagōꞌ ai-ai taꞌndaꞌku nihinang eꞌ Mmaꞌku, ya na inaꞌan hinangku. Kamemon nihinang eꞌ Mmaꞌ, ya du isab nihinang eꞌ Anak. 20 Kinalasahan asal aku eꞌ Mmaꞌku, maka pamataꞌuna isab ma aku kamemon ya hinangna. Ma sinosōng isab pahinangna giꞌ ma aku saga hinang labi abarakat min bay tahinangku dahū, ati ainu-inu du kaꞌam kamemon. 21 Mmaꞌku Tuhan ya amakallum saga aꞌa magpatayan. Damikiyanna aku itu, Anak Tuhan, amakallum isab sai-sai kabayaꞌanku. 22 Maka nggaꞌi ka Mmaꞌku ya angahukum saga manusiyaꞌ, sagōꞌ pamuwanna na ma aku kapatut angahukum 23 boꞌ supaya aku pinagmahaldikaꞌan eꞌ kamemon, buwat pagmahaldikaꞌ sigām ma Tuhan. Sai-sai mbal angamahaldikaꞌ aku, Anak Tuhan, mbal isab mahaldikaꞌna Mmaꞌku ya bay amapiꞌitu aku.
24 “Bꞌnnal ya pangahakaku itu ma kaꞌam, sasuku makakale ma saga pamissalaku, maka magkahagad isab ma bay amapiꞌitu aku, kakkal du kallumna sampay ni kasaumulan. Mbal iya taluwaꞌ hukuman Tuhan ma sabab dusana, sagōꞌ apuwas iya min mulkaꞌ ati allum salama-lama. 25 Bꞌnnal ya pangahakaku itu ma kaꞌam,” yuk si Isa, “taꞌabut na waktu bay pangalagad. Jari akale saga aꞌa magpatayan ma suwala Anak Tuhan ati allum salama-lama sasuku akale. 26 Mmaꞌku ya poꞌonan kallum, maka kabuwanan aku eꞌna kapatut amakallum ma manusiyaꞌ. 27 Pamuwanna isab ma aku kapatut angahukum saga manusiyaꞌ, sabab Anak Manusiyaꞌ asal aku.
28 “Daꞌa kainu-inuhinbi hꞌllingku itu,” yuk si Isa. “Ma sinosōng, akale saga aꞌa magpatayan kamemon ma suwalaku. 29 Pagkale itu, paluwas du sigām min deyom kakubulan sigām. Paluwas saga aꞌa bay maghinang ahāp boꞌ allum salama-lama. Paluwas isab saga aꞌa bay maghinang alaꞌat boꞌ taluwaꞌ hukuman ma sabab dusa sigām.”
Saga Saksiꞌ Pasal si Isa
30 Amissala giꞌ si Isa, yukna, “Halam aniyaꞌ tahinangku bang hal min baran-baranku. Angahukum sadja aku buwat bay panohoꞌan aku eꞌ Tuhan, angkan abontol hukumanku. Sabab nggaꞌi ka kabayaꞌanku ya tuyuꞌanku nihinang, sagōꞌ kabayaꞌan Tuhan ya bay amapiꞌitu aku. 31 Bang hal aku anaksiꞌan di-ku, mbal du aku binꞌnnal. 32 Sagōꞌ aniyaꞌ saddī anaksiꞌan aku, maka kataꞌuwanku in panaksiꞌna ma aku bꞌnnal sadja.”
33 Yuk si Isa giꞌ ni saga Yahudi, “Bay papehēꞌbi saga aꞌabi ni si Yahiya atilaw iya, maka bꞌnnal bay pangahakana ma pasalku. 34 Sagōꞌ nggaꞌi ka saksiꞌ min manusiyaꞌ ya pasangdolanku. Sabbutku si Yahiya inān boꞌ supaya kam lappasan min hukuman dusa. 35 Si Yahiya itu sapantun palitaꞌan amuwan sawa ma pikilan manusiyaꞌ, maka kaꞌam ilu bay kaꞌamuhan daiꞌ-daiꞌ ma sawana.
36 “Sagōꞌ aniyaꞌ saksiꞌ ma aku labi giꞌ akosog min panaksiꞌ si Yahiya, hatina saga hinang ya bay pamahinang aku eꞌ Mmaꞌku Tuhan. Saga hinangku itu anaksiꞌan aku in aku bꞌnnal bay pinapiꞌitu eꞌ Mmaꞌku. 37 Maka Mmaꞌku, ya bay amapiꞌitu aku, anaksiꞌ isab ma pasalku. Sagōꞌ kaꞌam ilu, halam kam bay makakale suwalana atawa makaꞌndaꞌ baihuꞌna. 38 Halam isab bay pasobsob lapalna ni deyom pangatayanbi sabab mbal kam magkahagad ma aku, ya pinapiꞌitu eꞌna ni dunya. 39 Atuyuꞌ kam sidda angadjiꞌ Kitab sabab pangannalbi minnēꞌ kam kaniyaꞌan kallum kakkal ni kasaumulan. Sagōꞌ aku ya binissala ma kakitaban itu. 40 Malaingkan kaꞌam ilu mbal bilahi piꞌitu ni aku supaya kam pinaniyaꞌan kallum kakkal.”
41 Amissala giꞌ si Isa ni saga nakuraꞌ inān, yukna, “Mbal aku anambut sanglit min manusiyaꞌ. 42 Saguwāꞌ kataꞌuwanku bang ai ma deyom ataybi maka kataꞌuwanku halam aniyaꞌ lasabi ma Tuhan. 43 Minsan aku piꞌitu taga-kapatut deyoꞌ bay min Mmaꞌku, mbal aku taimaꞌbi. Sagōꞌ bang aniyaꞌ aꞌa saddī piꞌitu amapatut di-na, taimaꞌbi du iya. 44 Buwattingga eꞌbi magkahagad ma aku bang ya angutbi sanglit min pagkahibi manusiyaꞌ, ati mbal angutbi sanglit min Tuhan dakayuꞌ-kayuꞌ.
45 “Daꞌa pikilunbi in aku anuntutan kaꞌam ni Mmaꞌku ma llaw hukuman. Ya anuntutan kaꞌam si Musa, ya pangaholatanbi. 46 Bang kam bay magkahagad sabꞌnnal-bꞌnnal ma si Musa, ya du aku kahagadbi du isab, sabab aku ya pinagsulat eꞌna ma Kitab Tawrat. 47 Sagōꞌ buwattingga pagkahagadbi ma bissalaku, pagka mbal kahagadbi bay tasulat si Musa?”