13
Pamandogahan ma Llaw Kiyamat
1 Manjari itu, pasaltaꞌ paꞌin si Isa paluwas min langgal pagkulbanan, aniyaꞌ dakayuꞌ mulidna ahꞌlling ni iya, “Ndaꞌun ba, tuwan!” yukna. “Alingkat landuꞌ langgal itu maka saga batu bay pangahinang iya!”
2 Anambung si Isa, yukna, “Taꞌndaꞌnu kaheya langgal itu kamemon, ā? Sagōꞌ hakaꞌanta ka, ma sinosōng in langgal itu alubu du. Halam du aniyaꞌ batuna angapin magbangkat, kinanat du kamemon.”
Kasigpitan maka Kabinasahan
3 Puwas eꞌ, aningkōꞌ paꞌin si Isa ma būd Kayu Jaitun, ma anggopan langgal pagkulbanan, pinaꞌan ni iya si Petros, si Yakub, si Yahiya maka si Andariyas, hal sigām-sigām sadja. 4 Yuk sigām ni si Isa, “Pahatiun konoꞌ kami bang sumiyan paniyaꞌ ya bay yuknu insiniꞌ, maka bang paltandaꞌan ai pinatuwaꞌ boꞌ kinataꞌuwan in pakaradjaꞌan inān kamemon song patꞌkka na?”
5 Anambung si Isa yukna, “Kamayaꞌ-mayaꞌ kam boꞌ mbal niakkalan. 6 Sabab ma sinosōng aheka piꞌitu anabbut ōnku, maglaku-laku in sigām Al-Masi, ati aheka tabowa-bowa niakkalan eꞌ sigām. 7 Bang aniyaꞌ takalebi hunub-hunub pagbonoꞌ ma kasekotan atawa habal pasal pagbonoꞌ ma lahat saddī, daꞌa kam agawa. Tantu paniyaꞌ pagbonoꞌ, sagōꞌ nggaꞌi ka giꞌ inaꞌan-i llaw kiyamat. 8 Magbonoꞌ du bangsa dakayuꞌ maka dakayuꞌ, parinta dakayuꞌ isab maka parinta dakayuꞌ. Paniyaꞌ du isab linug ma sabarang lahat, maka paniyaꞌ isab gotom. Saguwāꞌ in balaꞌ itu kamemon hal tagnaꞌanna sadja, saliꞌ dalil dꞌnda abꞌttong bang yampa tananamna amukaꞌ puhuꞌ.
9 “Sagōꞌ kaꞌam ilu,” yuk si Isa, “subay painsap toꞌongan sabab sinaggaw du kam boꞌ tinandanan ni paghukuman. Pinagdaplosan du kam ma deyom kalanggalan Yahudi. Pinatampal kam ni saga gubnul maka ni saga sultan ma sabab aku ya pameyaꞌanbi, ati makasaksiꞌ du kam ni sigām ma pasalanku.
10 “Lapal ahāp itu subay pinagnasihat dahū ni sabarang bangsa boꞌ yampa taꞌabut llaw kiyamat dunya. 11 Bang kam gantaꞌ sinaggaw boꞌ tinandanan ni saraꞌ, daꞌa kam magsusa bang ai subay pamissalabi. Pamissalahunbi lapal ai-ai ya pamatulun kaꞌam bang taꞌabut waktuna. Sababna nggaꞌi ka baranbi ya ahꞌlling ma waktu eꞌ-i, sagōꞌ Rū Sussi. 12 Ma waktu sinōng inān aniyaꞌ du saga aꞌa anukbalan danakan sigām ni sai-na boꞌ pinapatay. Aniyaꞌ du isab saga mattoꞌa lꞌlla anukbalan anakna boꞌ pinapatay. Saga anak isab amantahan mattoꞌa sigām, anohoꞌ isab subay pinapatay. 13 Maka kaꞌam saga mulidku,” yuk si Isa, “kinabꞌnsihan du eꞌ aꞌa kamemon ma sabab aku ya pameyaꞌanbi. Sagōꞌ lappasan du sasuku ahogot imanna ma deyom kabinasahan sampay ni kahinapusan.”
Katiksaꞌan Sangat Abisa
14 “Ma sinosōng aniyaꞌ taꞌndaꞌbi ‘kasammalan makaharam’ patꞌnnaꞌ ma nggaꞌi ka patꞌnnaꞌanna (sai-sai amassa itu sinōꞌ pahati). Bang heꞌ-i paniyaꞌ na, sasuku patꞌnnaꞌ ma tanaꞌ Yahudiya subay alahi pehēꞌ ni kabūd-būran. 15 Bang aniyaꞌ aꞌa ma luwasan lumaꞌna subay mbal sōdna lumaꞌna angāꞌ ai-aina. 16 Bang aniyaꞌ aꞌa ma humana subay mbal pabīng ni lumaꞌ angāꞌ badjuꞌna paghaggut. 17 Ndūꞌ, makaꞌaseꞌ-aseꞌ saga dꞌnda abꞌttong ma masa inaꞌan-i maka saga dꞌnda taga-anak duruꞌan lagiꞌ. 18 Amuꞌinbi aseꞌ ni Tuhan bang paꞌin pakaradjaꞌan inān mbal magsabu maka musim paghaggut. 19 Sabab ya kabinasahan patumbuk ma masa sinōng ilu,” yuk si Isa, “akalap giꞌ bisana min kabinasahan kamemon bay kalabayan manusiyaꞌ sangay min waktu kapamapanjari dunya eꞌ Tuhan, sampay ni waktu itu. Maka mbal isab kabalikan. 20 Daipara kinulangan eꞌ Tuhan tꞌggol kabinasahan inān. Bang bay mbal, halam du aniyaꞌ angapin allum. Kinulangan du eꞌ Tuhan ma sabab saga aꞌana ya asal tapeneꞌna.
21 “Na, bang taꞌabut waktu inaꞌan-i boꞌ aniyaꞌ gantaꞌ anuhuma ni kaꞌam, yuk-i, ‘Ndaꞌunbi! Itiyaꞌ na Al-Masi,’ atawa, ‘Inaꞌan na iya mainaꞌan,’ daꞌa toꞌongan kahagarunbi. 22 Sababna ma waktu sinōng inān aniyaꞌ du patuwaꞌ saga aꞌa magnahuꞌ-nahuꞌ in sigām Al-Masi atawa in sigām nabi min Tuhan. Magpaꞌndaꞌ sigām hinang barakatan maka saga paltandaꞌan kainu-inuhan aꞌa boꞌ supaya kaꞌakkalan sampay aꞌa sukuꞌ Tuhan ya asal tapeneꞌna, bang tabowa niakkalan. 23 Sagōꞌ painsap kam,” yuk si Isa ni saga mulidna heꞌ. “Bay na kam pataꞌuku pasal pakaradjaꞌan ilu kamemon ma halam giꞌ taꞌabut waktuna.”
Pasal Kapabalik Al-Masi Piꞌitu ni Dunya
24 “Ma llaw sinōng ilu,” yuk si Isa, “apuwas paꞌin saga kabinasahan bay sabbutku heꞌ,
‘angalendom mata llaw,
mbal amuwan sawa mata bulan.
25 Saga bituꞌun magkapakpak min diyataꞌ langit,
saga pandoga ma tongaꞌan ayan tabowa maglensa.’
26 “Puwas eꞌ makaꞌndaꞌ du saga manusiyaꞌ ma aku, in Anak Manusiyaꞌ, ameyaꞌ min gabun tudju piꞌitu. Taꞌndaꞌ du eꞌ sigām kosog barakatku maka sahayaku. 27 Papehēꞌku saga malaꞌikatku ni mpat pidju alam animuk saga aꞌa bay tapeneꞌku, min bihing langit dambilaꞌ maka dambilaꞌ.”
Pamandogahan ma Pagbalik Al-Masi
28 “Pamintānginbi poꞌon kayu igira,” yuk si Isa. “Bang taꞌndaꞌbi angugbus tōng engas-engasna sampay angandahun na toꞌongan, minnēꞌ kataꞌuwanbi song musim pangꞌllaw na. 29 Damikiyanna bang taꞌndaꞌbi paniyaꞌ na bay pamissalaku ma kaꞌam eꞌ, minnēꞌ isab kataꞌuwanbi in kabalikku ni dunya asekot na. 30 Bꞌnnal ya pangahakaku itu ma kaꞌam, ma mbal giꞌ magpatayan saga aꞌa ya allum ma buwattinaꞌan, paniyaꞌ du pakaradjaꞌan kamemon ya pamissalaku itu. 31 Papinda du langit maka dunya sagōꞌ kabtanganku itu mbal toꞌongan magkapinda.”
Waktu Kapabalik si Isa Mbal Kinataꞌuwan
32 “Halam aniyaꞌ makataꞌu,” yuk si Isa, “bang sumiyan llaw maka waktu kabalikku piꞌitu ni dunya. Minsan bangsa malaꞌikat ma deyom sulgaꞌ, mbal kinataꞌuwan eꞌ sigām. Minsan aku, Anak Tuhan, mbal kataꞌuwanku. Luwal Mmaꞌku Tuhan ya makataꞌu. 33 Painsap kam! Pajaga kam, sabab mbal kataꞌuwanbi inaꞌan-i bang sumiyan waktu kapamaniyaꞌ iya. 34 Ya dalilna saliꞌ aꞌa magbamba alaꞌan min lumaꞌna atulak ni lahat saddī. Pajagahanna ai-aina ma saga sosohoꞌanna. Patꞌnnaꞌanna sigām hinang pakaniya-pakaniya, ati amay-amayanna tungguꞌ lawang, sinōꞌ pajaga toꞌongan.
35 “Na,” yuk si Isa, “ya du kaꞌam subay pajaga sabab mbal kataꞌuwanbi bang sumiyan waktu katꞌkka tag-dapu lumaꞌ, bang abay-kohap ka, tongaꞌ bahangi ka, waktu pangukkuꞌuk manuk ka, atawa waktu pagkꞌllat llaw. 36 Minsan pataghaꞌ tꞌkkana subay kam mbal tabāk eꞌna magtulihan. 37 Ya pangamay-ngamayku ma kaꞌam saliꞌ du maka llingku ma kamemon: ‘Pajaga kam!’ ”