4
Kapanulay ma si Isa
1 Manjari itu pabīng si Isa min sapaꞌ Jordan. Kahōpan iya eꞌ Rū Sussi ati binowa iya kaleya ni lahat paslangan. 2 Mpatpūꞌ ngꞌllaw, mpatpūꞌ bahangi ya kamaheꞌna sinasat na paꞌin eꞌ nakuraꞌ saitan, kalu tabowa magdusa. Halam iya bay makatimtim ai-ai tꞌggolna mahēꞌ. Pagpuwas inaꞌan-i aheya lingantuna.
3 Ahꞌlling nakuraꞌ saitan ma iya, yukna, “Bang kaꞌa sabꞌnnal-bꞌnnal Anak Tuhan sohoꞌun saga batu itu papinda ni tinapay.”
4 Saguwāꞌ anambung si Isa, yukna, “Tasulat asal ma deyom Kitab, ya yuk-i, ‘nggaꞌi ka hal kinakan baran ya makakallum ma manusiyaꞌ.’ ”
5 Puwas eꞌ binowa iya eꞌ nakuraꞌ saitan ni kalangkawan boꞌ yampa pinaꞌndaꞌan kalahatan kamemon ma deyom dunya, pinalaman sadja min matana. 6 Yuk nakuraꞌ saitan ni iya, “Buwananta ka kapatut boꞌ ka makapagbayaꞌ ma saga kalahatan itu maka karayana kamemon. Sabab bay pamasukuꞌ ma aku kamemonna itu, ya angkan aku taga-kapatut amuwan ma sai-sai kabayaꞌanku. 7 Na, bang ka amudji aku pamuwanku itu kamemon ma kaꞌa.”
8 Ya sambung si Isa ma saitan eꞌ, “Tasulat asal ma deyom Kitab, yuk-i, ‘Panghūꞌbi Tuhan sadja ya subay pudjibi. Tunggal iya paghinanganbi!’ ”
9 Puwas eꞌ binowa si Isa eꞌ nakuraꞌ saitan ni daꞌira Awrusalam ati pinaꞌatag iya ma puttuk langgal pagkulbanan. Yuk saitan eꞌ ni iya, “Bang ka bꞌnnal Anak Tuhan, pakuppa ka minnilu 10 sabab aniyaꞌ tasulat ma deyom Kitab, ya yuk-i, ‘Sinohoꞌ eꞌ Tuhan saga malaꞌikatna anganjagahan kaꞌa.’ 11 Aniyaꞌ isab dakayuꞌ sulat, ya yuk-i, ‘Tinayak ka eꞌ sigām boꞌ mbal makahantak tapeꞌnu ni batu.’ ”
12 Anambung si Isa, yukna, “Yuk Kitab, ‘Daꞌa sulayinbi kawasa Panghūꞌbi Tuhan.’ ”
13 Na, aubus paꞌin kaginisan sasat ya panasat eꞌ nakuraꞌ saitan, angꞌbba iya min si Isa, boꞌ amiha llaw saddī.
Sinulak si Isa eꞌ saga Aꞌa Nasaret
14 Manjari itu pabīng si Isa ni lahat Jalil, abarakat asal eꞌ Rū Sussi. Jari pasaplag habal ma pasalanna ni saga aꞌa ma kaluhaꞌan lahat inān. 15 Amanduꞌ na paꞌin iya ma kalanggal-langgalan sigām ati sinanglitan iya eꞌ aꞌa kamemon.
16 Pinaꞌan iya ni Nasaret, ya lahat pasuliganna. Taꞌabut paꞌin llaw Sabtuꞌ, pehēꞌ iya ni langgal buwat kabiyaksahanna. Ma langgal paꞌin, anꞌngge iya amassa Kitab. 17 Sinōngan ni iya lūnan jūd nabi Isaya. Pagbꞌllatna, tabassana saga ayat itu, ya yuk-i,
18 “Itiyaꞌ aku kapagbayaꞌan eꞌ Rū Panghūꞌ,
sabab tapeneꞌ aku eꞌna
amasampay lapal ahāp ni saga aꞌa kamiskinan.
Sinohoꞌ aku piꞌitu angahakaꞌan saga pilisu in sigām pinaluwas du,
saga aꞌa buta in sigām makaꞌndaꞌ du pabīng.
Sinohoꞌ aku eꞌna amuwasan sasuku niꞌinyaya,
19 amasaplag isab in waktu pangalappas Panghūꞌ
ma saga aꞌana, taꞌabut na.”
20 Puwas eꞌ nilūn eꞌ si Isa jūd bay pamassahanna heꞌ. Niꞌndeꞌan eꞌna ni bilal boꞌ yampa aningkōꞌ. Sakali pinatongan iya eꞌ aꞌa kamemon ma deyom langgal inān, 21 ati anagnaꞌ iya amissala ni sigām, yukna, “Ma llaw itu taga-kamaksuran na saga ayat bay tabassaku ma pangalehanbi.”
22 Kaꞌamuhan saga aꞌa inān kamemon ma si Isa. Ainu-inu sigām ma sabab kapanday bissalana. Sagōꞌ aniyaꞌ pahꞌlling sigām, yuk-i, “Bang kami mbal asāꞌ, anak si Yusup koꞌ itu!”
23 Yuk si Isa ma sigām, “Tantu du kam amahꞌllingan aku buwat bay papata kamattoꞌahan, ya yuk-i, ‘Pagka ka ataꞌu anambal, anambalan ka di-nu.’ Tantu isab kam anohoꞌ aku subay angahinang maitu ma lahatku luggiyaꞌ saga hinang ya takalebi bay hinangku ma lahat Kapirnaum eꞌ. 24 Hakaꞌanta kam toꞌongan,” yuk si Isa, “in nabi mbal du pinagaddatan ma lahatna luggiyaꞌ. 25 Halam aniyaꞌ duwa-ruwana, ma masa lagiꞌ nabi Elija halam bay angulan ma deyom tꞌlluntahun maka tongaꞌ, maka landuꞌ ginotom kaluhaꞌan lahat inān. Bꞌnnal aheka balu dꞌnda bay maitu ma lahat Israꞌil ma waktu gotom inān, 26 sagōꞌ nggaꞌi ka dꞌnda Israꞌil ya bay pamapehēꞌan si Elija. Dꞌnda bangsa saddī koꞌ inān, aꞌa min Sarepta, ma jadjahan Sidun. 27 Damikiyanna isab ma bay waktu nabi Elisa,” yuk si Isa. “Aheka aꞌa niꞌipul ma bangsa Israꞌil sagōꞌ halam aniyaꞌ minsan dakayuꞌ bay kauliꞌan ipulna. Luwal aꞌa min bangsa Siriya niōnan si Naꞌaman.”
28 Takale paꞌin bissala si Isa itu eꞌ saga aꞌa ma deyom langgal inān, magtūy apꞌddiꞌ toꞌongan atay sigām. 29 Magpanꞌngge sigām kamemon boꞌ angahellaꞌ si Isa paluwas min kauman inān. Binowa iya ni diyataꞌ būd ya paꞌatagan daꞌira heꞌ, boꞌ nihūg min diyataꞌ pampang eꞌ. 30 Daipara pasꞌllot iya min tꞌngngaꞌ-tꞌngngaꞌ sigām ati alaꞌan na minnēꞌ.
Si Isa Amauliꞌ Aꞌa Pasōran Saitan
31 Palūd na si Isa min Nasaret inān tudju ni Kapirnaum, dakayuꞌ kauman ma lahat Jalil. Pagka llaw Sabtuꞌ na, amanduꞌ iya ma saga aꞌa. 32 Ainu-inu ma pamanduꞌna saga aꞌa makakale inān sabab taga-kawasa iya bang amissala. 33 Na, aniyaꞌ ma deyom langgal inān aꞌa sinōd saitan. Angolang iya pakosog, 34 yuk-i, “Allō! Isa min Nasaret! Ai maksudnu piꞌitu? Piꞌitu ka bahāꞌ amakaꞌat kami? Kataꞌuwanku bang sai ka. Kaꞌa ya Dakayuꞌ-kayuꞌ Asussi ya piꞌitu min Tuhan.”
35 Saguwāꞌ nilāng saitan inān eꞌ si Isa, yukna, “Pahali ka! Paluwas ka min aꞌa ilu!” Magtūy aꞌa bay sinōd inān pinahantak eꞌ saitan ma tꞌngngaꞌ-tꞌngngaꞌ saga aꞌa. Puwas eꞌ paluwas na saitan, boꞌ halam du ainay baran aꞌa heꞌ.
36 Landuꞌ ainu-inu saga aꞌa inān kamemon. Magsuli-suli sigām dangan maka dangan, yuk-i, “Minningga bahāꞌ pamanduꞌna itu? Taga-kawasa iya maka taga-kapatut magpanohoꞌan saga saitan paluwas min aꞌa ati bineyaꞌ iya.” 37 Manjari pasaplag na paꞌin habal pasal si Isa ni kaluhaꞌan lahat ma jadjahan inaꞌan-i.
Aheka Aꞌa Kauliꞌan eꞌ si Isa
38 Puwas eꞌ paluwas si Isa min langgal Kapirnaum boꞌ pinaꞌan ni lumaꞌ si Simun. Na, matoꞌa si Simun dꞌnda niꞌmmunan sidda, ati sinabi si Isa eꞌ sigām amauliꞌ iya. 39 Pinaꞌan si Isa anꞌngge ma atag palegehan dꞌnda heꞌ ati sohoꞌna alaꞌan mmunna. Jari pahali bay mmunna heꞌ ati punduk iya magtūy boꞌ angalabot disi Isa.
40 Pasꞌddop paꞌin llaw, binowa ni si Isa sasuku taga-saki indaginis. Pinaꞌabut eꞌna tanganna ma sigām dangan maka dangan ati kauliꞌan. 41 Aheka isab saga aꞌa bay kapaluwasan saitan. Angolang pakosog saga saitan inān, yuk-i, “Kaꞌa ya Anak Tuhan!” Sagōꞌ nilāng sigām eꞌ si Isa, sinōꞌ daꞌa angahaka buwattēꞌ sabab kinilā iya eꞌ sigām in iya Al-Masi.
42 Daiꞌ llaw paꞌin, alaꞌan si Isa minnēꞌ ni jadjahan halam magaꞌa. Piniha iya eꞌ saga aꞌa ati tabāk iya mainaꞌan. Arak iya tinaggahan eꞌ sigām boꞌ mbal makalaꞌan minnēꞌ, 43 sagōꞌ ahꞌlling si Isa ma sigām, yukna, “Subay aku pehēꞌ isab ni saga kauman saddī boꞌ magnasihat lapal ahāp pasal pagparinta Tuhan, sabab ya na itu poꞌonanna angkan aku pinapiꞌitu eꞌ Tuhan.” 44 Jari magnasihat na paꞌin si Isa ma deyom kalanggal-langgalan mahēꞌ ma lahat Yahudiya.