6
Pagtabang ma Miskin
1 “Kamayaꞌ-mayaꞌ kam. Bang aniyaꞌ kahāpan hinangbi pagtaꞌatbi ni Tuhan, daꞌa hinangunbi ma mata mairan. Sabab bang buwattēꞌ hinangbi, halam aniyaꞌ tungbasbi min Tuhan, ya Mmaꞌbi ma sulgaꞌ.
2 “Angkanna, bang aniyaꞌ pamuwanbi ma aꞌa kulang-kabus, daꞌa pagbantugunbi. Daꞌa sꞌppuhunbi aꞌa maglaku-laku in sigām ahāp, ya anarakka ma matahan saga aꞌa kamemon, ma deyom langgal ka atawa ma paglabayan. Tuꞌud sigām bilahi sinanglitan eꞌ saga manusiyaꞌ. Hakaꞌanta kam toꞌongan, sanglit min manusiyaꞌ ya panungbas sigām, halam saddī. 3 Sagōꞌ kaꞌam ilu, bang aniyaꞌ tabangbi aꞌa miskin, subay halam aniyaꞌ makataꞌuwan iya, minsan bagaybi. 4 Subay halam aniyaꞌ makataꞌu. Jari bang buwattēꞌ, tinungbasan du kam eꞌ Mmaꞌbi Tuhan, ya makaꞌndaꞌ ma ai-ai hinangbi minsan halam aniyaꞌ makataꞌu.”
Pasal Panambahayang
5 “Bang kam anambahayang, daꞌa sengorinbi saga aꞌa maglaku-laku in addat sigām ahāp. Sabab tagian sigām anꞌngge anambahayang ma deyom langgal atawa ma paglalabayan aꞌa boꞌ supaya taꞌndaꞌ eꞌ kamemon. Hakaꞌanta kam toꞌongan, bang sigām kasanglitan eꞌ aꞌa, ya na heꞌ panungbas sigām. Halam aniyaꞌ saddī. 6 Sagōꞌ kaꞌam ilu, bang kam anambahayang, pasōd kam ni deyom bilik. Tambolunbi lawang boꞌ yampa kam anambahayang ni Mmaꞌbi Tuhan, ya mbal taꞌndaꞌ. Ati Mmaꞌbi, ya makaꞌndaꞌ ma ai-ai hinangbi minsan halam aniyaꞌ makataꞌu, anungbas du ma kaꞌam.
7 “Bang kam anambahayang, daꞌa paggunahunbi baꞌanan kabtangan halam aniyaꞌ pūsna, buwat panambahayang saga aꞌa ya magtaꞌat ma tuhan-tuhan saddī. Sabab kinabāꞌ eꞌ sigām in panambahayang sigām kinale eꞌ Tuhan saukat na atahaꞌ sidda. 8 Daꞌa sigām sengorinbi, sabab kinataꞌuwan asal eꞌ Mmaꞌbi Tuhan bang ai kasusahanbi minsan mbal pahꞌllingbi. 9 Jari itu, bang kam anambahayang subay buwattitu kalꞌngngananna:
‘O Mmaꞌ kami Tuhan ma sulgaꞌ,
bang paꞌin pinagaddatan ōnnu eꞌ kamemon,
10 Bang paꞌin mbal atꞌggol boꞌ ka magparinta ma kamemon manusiyaꞌ,
Bang paꞌin bineyaꞌ kabayaꞌannu ma dunya itu
buwat asal bineyaꞌ mailu ma sulgaꞌ.
11 Jukupin kami balanjaꞌ ma llaw itu.
12 Ampunun saga dusa kami,
buwat kapangampun kami ma sai-sai makarusa ma kami.
13 Daꞌa kami tugutin binowa ni deyom sasat,
sagōꞌ papuwasun kami min nakuraꞌ saitan, ya patilaꞌatun.’
14 “Bang kam angampun saga aꞌa makarusa ni kaꞌam, ya du kaꞌam niampun eꞌ Mmaꞌbi ma sulgaꞌ. 15 Ya balikna, bang mbal ampunbi aꞌa bay makarusa ni kaꞌam, ya du kaꞌam mbal niampun eꞌ Mmaꞌbi Tuhan.”
Pasal Pagpuwasa
16 “Bang kam amuwasa daꞌa subay palaꞌatunbi pamaihuꞌanbi, buwat aꞌa maglaku-laku inān in sigām ahāp. Mbal sigām angupiksaꞌ di-sigām, pangilahan aꞌa kaseheꞌ in sigām magpuwasa. Hakaꞌanta kam toꞌongan, bang sigām kasanglitan eꞌ manusiyaꞌ, ya na heꞌ panungbas sigām. Halam aniyaꞌ saddī. 17 Saguwāꞌ kaꞌam ilu, bang kam amuwasa, kulaꞌupinbi baihuꞌbi maka surayunbi buꞌunbi, 18 boꞌ mbal kinataꞌuwan eꞌ aꞌa kaseheꞌan in kaꞌam amuwasa. Ya sadja makataꞌu Mmaꞌbi Tuhan ya mbal taꞌndaꞌ eꞌ manusiyaꞌ. Ati Mmaꞌbi ilu, ya makaꞌndaꞌ ma ai-ai hinangbi sampay ma kalimbungan, anungbas du ma kaꞌam.”
Pasal Karaya ma Deyom Sulgaꞌ
19 “Daꞌa kam magtimuk altaꞌ maitu ma dunya, sabab hal magkaꞌat, sumaꞌan pinagkeket eꞌ ulat, sumaꞌan ginahaꞌ, sumaꞌan isab nilangpasan. 20 Sagōꞌ maghinang kam ahāp boꞌ aniyaꞌ karayabi tinauꞌan kaꞌam ma deyom sulgaꞌ, sabab karaya mahēꞌ mbal takeket eꞌ ulat, mbal magkagahaꞌ, maka mbal kalangpasan. 21 Sababna maingga-maingga panauꞌanbi altaꞌbi, mahēꞌ ya pataptapan pangatayanbi.”
Pasal Palitaꞌan ma Deyom Baranta
22 “Matabi itu sapantun palitaꞌan amuwan sawa ma deyom ginhawabi. Bang ahāp matabi, asawa sampay deyom ginhawabi. 23 Sagōꞌ bang matabi mbal ahāp, angalendom sampay ginhawabi. Bang yukbi aniyaꞌ ma kaꞌam kasawahan boꞌ paꞌin halam, na aheya kalendomanbi.
24 “Ya niōnan sosohoꞌan mbal makapagduwa nakuraꞌ, sabab tantu kabꞌnsihanna nakuraꞌna dakayuꞌ maka kalasahanna dakayuꞌ. Amalut iya ma dakayuꞌ ati taikutanna dakayuꞌ. Hatina mbal kam manjari maghinang ma Tuhan bang pilak ya paheyabi ma atay.”
Daꞌa Magsusa
25 “Angkanna kam sohoꞌku daꞌa sakit magsusa pasal kallumanbi, bang ai kakanbi maka bang ai inumbi. Daꞌa kam magsusa isab pasal ginhawa baranbi bang ai kapanꞌmmekbi. Sabab kallumta itu labi ahalgaꞌ ma kita min kapamanganta. Ya du baranta, labi ahalgaꞌ min panꞌmmekta. 26 Ndaꞌunbi saga manuk-manuk paleyang. Mbal magtanom, mbal magani. Mbal isab anauꞌ kinakan ma llaw damuli. Sagōꞌ binalanjaꞌan du sigām eꞌ Mmaꞌbi ma sulgaꞌ. Boꞌ kaꞌam ilu, ahalgaꞌ giꞌ toꞌongan min kamanuk-manukan. 27 Sai bahāꞌ makapatahaꞌ umulna minsan laꞌa hal danjām, ma sabab kasusahanna?
28 “Angay isab kam magmasusa ma pasal panꞌmmekbi? Ndaꞌunbi saga sumping ma deyom kaparangan bang buwattingga katomoꞌna. Mbal magsangsāꞌ maghinang, mbal magtꞌnnun. 29 Sagōꞌ hakaꞌanta kam, minsan sultan Sulayman maka kahaldayana ma masa awal eꞌ, mbal du makaꞌatu lingkat pamakayna ma dakayuꞌ sumping itu. 30 Bang Tuhan ya makapayakun kaparangan ya tatasanna dangꞌllaw du, boꞌ pagsalung alanos sampay tinunuꞌ, tantu Tuhan amasꞌmmekan kaꞌam. Akulang pahāp pangandolbi ma iya!
31 “Angkanna kam subay mbal magmasusa. Daꞌa kam magupama buwattitu: ai pagkakanta, ai paginumta, ai bahāꞌ pasꞌmmekta? 32 Saga aꞌa mbal ataꞌu magtaꞌat ma Tuhan, ya na paꞌin heꞌ-i kinasusahan eꞌ sigām. Sagōꞌ kaꞌam ilu, kinataꞌuwan eꞌ Mmaꞌbi ma sulgaꞌ in inaꞌan kagunahanbi asal. 33 Sagōꞌ muna-muna kannalunbi pagparinta Tuhan maka kabontolan atay ya kabayaꞌanna. Manjari pinaniyaꞌan du kam ai-ai kulang-kabusbi. 34 Angkan kam subay mbal magkasusahan pasal llaw salung sabab saddī kasusahan ma llaw sinōng. Sarang na pagsusahanbi hal ma llaw itu.”